ChatGPT အသုံးများရင် ဦးနှောက်ထိခိုက်နိုင်
MIT က ပညာရှင်တွေ ပြောသလိုဆို AI chatbot သုံးရတာ သိပ်ပျော်ဖို့ မကောင်းတော့ဘူး။
အသက် ၁၈ နှစ်ကနေ ၃၉ နှစ်ကြား လူ ၅၄ ယောက်ကို အုပ်စု ၃ စုခွဲပြီး MIT ပညာရှင်တွေ သုတေသနလုပ်ပါတယ်။ သူတို့သုတေသနလုပ်ပုံက အုပ်စုတစ်စုကို ChatGPT သုံးပြီး SAT အက်ဆေးတွေ ရေးခိုင်းပါတယ်။
ကျန်တဲ့ အုပ်စုနှစ်စုမှာ တစ်စုကို Google ရဲ့ search သုံးခိုင်းပြီး နောက်ဆုံးအုပ်စုကို ကိုယ်ပိုင်ဦးနှောက်နဲ့ စဉ်းစားရေးဆိုပြီး ခိုင်းတာပါ။ အဖွဲ့တစ်ဖွဲ့ချင်းစီ အက်ဆေးရေးနေချိန်မှာ ဦးနှောက်လှိုင်းတွေကို EEG သုံး စောင့်ကြည့်ပါတယ်။
အဖွဲ့ ၃ ခုမှာ ChatGPT အကူအညီနဲ့ အက်ဆေးရေးတဲ့အဖွဲ့က ဦးနှောက်အနည်းဆုံး သုံးတာ တွေ့ရပြီး ကျန်တဲ့ အုပ်စုတွေနဲ့ ယှဉ်ရင် အာရုံကြော ၊ ဘာသာသိမှု ၊ အပြုအမူ level တွေမှာ အောက်ဆုံး ရောက်ခဲ့တယ်လို့ ဆိုပါတယ်။
ဦးနှောက်အားကိုးတဲ့အဖွဲ့ကတော့ အာရုံကြောချိတ်ဆက်မှု အမြင့်ဆုံးဖြစ်ခဲ့တာ ပြပြီး စူးစမ်းလိုစိတ်ပိုမြင့်ခဲ့တာပါ။ သူတို့ရေးတဲ့ အက်ဆေးအတွက်လည်း ကျေနပ်အားအရဆုံးဖြစ်ခဲ့ပါတယ်။ Google Search သမားတွေကလည်း အားရကျေနပ်မှုမြင့်ခဲ့ပြီး ဦးနှောက်လုပ်ဆောင်ချက်တွေ တက်ကြွခဲ့တာပါ။
ChatGPT သုံးသူတွေကိုပဲ AI မသုံးဘဲ စာရေးခိုင်းချိန်မှာ သူတို့ဦးနှောက်က အချိတ်အဆက်အားနည်းခဲ့တာ ပြပါတယ်။ ဒီလေ့လာမှုမှာ တွေ့လိုက်ရတာ တစ်ခုက ChatGPT သုံးတာက ဦးနှောက်ရဲ့ မှတ်ဉာဏ်နဲ့ လေ့လာမှုအပိုင်းဆိုင်ရာအပိုင်းတွေ လှုပ်ရှားမှုထိုးကျခဲ့တယ်ဆိုတာပါပဲ။
ChatGPT အားကိုးနဲ့ အက်ဆေးရေးထားတဲ့သူတွေက ကိုယ်ရေးတဲ့စာထဲက အကြောင်းအရာတောင် ပြန်မမှတ်မိနိုင်အောင် ဖြစ်ခဲ့တယ်လို့ ဆိုပါတယ်။ အဲ့ဒါက အက်ဆေးရေးပြီး မိနစ်ပိုင်းနဲ့တင် မေ့သွားကြတာပါ။ နောက်တစ်ချက်ကတော့ ChatGPT သုံးတဲ့သူတွေဟာ ကြာလေလေ အပျင်းထူလေလေလို့လည်း ဆိုပါတယ်။
ဒီသုတေသနက လူနည်းနည်းနဲ့ စမ်းသပ်ထားတဲ့ သုတေသနဆိုပေမယ့် LLM မော်ဒယ်တွေ အားကိုးလွန်းတာက ရေရှည်မှာ လူကို ခပ်ပိန်းပိန်းဖြစ်စေနိုင်တယ်ဆိုတာကို ဂရုပြုမိစေမယ်လို့ ပညာရှင်တွေက ထောက်ပြထားပါတယ်။

လူတိုင်းနေ့စဉ်အမှတ်မထင်ရနေတတ်တဲ့အကုသိုလ်တွေရှောင်ရှားနိုင်ဖို့ဒီတရားလေးနာထားကြပါ

တရုတ်မှာ BCI chip နည်းပညာ စမ်းသပ်အောင်မြင်
တရုတ်က BCI လို့ ခေါ်တဲ့ ခေါင်းထဲ chip ထည့်ပြီး ကွန်ပျူတာကို စိတ်နဲ့ စေခိုင်းနိုင်တဲ့ နည်းပညာ ရသွားပါပြီ။
BCI (Brain-Computer Interface) နည်းပညာ ကို အီလွန်မတ်စ်ရဲ့ Neuralink နဲ့ တွဲသိကြမှာပါ။ မလှုပ်ရှားနိုင်ဖြစ်နေတဲ့ ကိုယ်တစ်ပိုင်းသေ ဝေဒနာရှင်မှာ chip ထည့်ပြီး ဗွီဒီယိုဂိမ်းဆော့ခိုင်းနိုင်တဲ့ နည်းပညာမျိုးပါ။ ဒီနည်းပညာကို ပိုင်တဲ့ ဒုတိယနိုင်ငံက တရုတ်ဖြစ်လာပါတယ်။
ပြီးခဲ့တဲ့ မတ်လထဲမှာ တရုတ်သိပ္ပံအကယ်ဒမီ CEBSIT က ပညာရှင်တွေဟာ BCI နည်းပညာကို လွန်ခဲ့တဲ့ ၁၃ နှစ် လျှပ်စစ်မတော်တဆမှုမှာ ခြေလက်ဆုံးရှုံးခဲ့ရတဲ့ လူနာတစ်ယောက်ရဲ့ ဦးနှောက်မှာ ထည့်သွင်းခဲ့ပါတယ်။ ဝိုင်ယာလက် implant ထည့်ပြီး နှစ်ပတ်သုံးပတ်အကြာမှာ လူနာက စိတ်နဲ့ ဗွီဒီယိုဂိမ်းတွေ ၊ chess တွေ ဆော့နိုင်လာတယ်လို့ ဆိုပါတယ်။
တရုတ်ပညာရှင်တွေ သုံးလိုက်တဲ့ implant က အချင်း ၂၆ မီလီမီတာ ၊ အထူ ၆ မီလီမီတာမပြည့်တဲ့ ကမ္ဘာ့အသေးဆုံး implant လို့ ပြောပါတယ်။ အကြွေစေ့အရွယ်ရှိတဲ့ ဒီ implant ရဲ့ electrode လေးတွေက လူ့ဆံပင်ရဲ့ အပုံ ၁၀၀ ပုံ ၁ ပုံလောက်ပဲ ထူပါတယ်။ Neuralink ရဲ့ BCI implant ထက်လည်း အဆ ၁၀၀ ကျော် ပိုပြီး အလိုက်သင့် ကွေးညွှတ် flexible ဖြစ်တယ်လို့တောင် ဆိုပါတယ်။
ဒီအောင်မြင်မှုက ရှေ့ဆက်မယ့် စီမံကိန်းတွေရဲ့ အစပါပဲ။ နောက်တစ်ဆင့်အနေနဲ့ လူနာကို စက်ရုပ်လက်တပ်ပြီး စိတ်အတွေးအကြံနဲ့ အရာဝတ္ထုတွေ ကောက်ယူနိုင်အောင်လည်း ကြိုးပမ်းနေပါတယ်။ ဖူဒန်တက္ကသိုလ် ဟွာရှန်းတက္ကသိုလ်နဲ့ ပူးပေါင်းပြီး နောက်နှစ်ထဲမှာ ကိုယ်တခြမ်းသေလူနာ ၄၀ ကို ဆက်ပြီး စမ်းသပ်ဖို့လည်း ရှိပါတယ်။
တရုတ်ပညာရှင်တွေက အာဏာပိုင်တွေဆီကနေ BCI နည်းပညာ ခွင့်ပြုချက်တောင်းထားပါတယ်။ ၂၀၂၈ ထဲလောက် ဈေးကွက်ထဲ ဝင်မယ်လို့လည်း ပြောပါတယ်။

မောင်းသူမဲ့ Robotaxi ပြေးဆွဲနေပြီ ဖြစ်တဲ့ Tesla
အီလွန်မတ်စ်ရဲ့ ယာဉ်မောင်းမပါတဲ့ robotaxi ကားတွေ အော်စတင်မြို့မှာ စပြီး ပြေးဆွဲနေပါပြီ။
robotaxi ဆိုပေမယ့် အရင်နှစ် We, Robot ပွဲမှာ ပြသွားတဲ့ Cybercab ကားတွေတော့ မသုံးသေးပါဘူး။ Model Y တွေနဲ့ ကုမ္ပဏီပိုင်ကားတွေမှာ FSD ယာဉ်မောင်းနည်းပညာထည့်ပြီး တက္ကစီဆွဲတာပါ။
ခရီးသည်တွေ Tesla မောင်းသူမဲ့ကား ငှားလို့ရပြီဆိုပေမယ့် လောလောဆယ်တော့ Tesla fan တွေပဲ အရင်ငှားလို့ရမှာပါ။ ကားကလည်း ၁၀ စင်းလောက်ပဲ သုံးပါတယ်။ ယာဉ်အန္တရာယ်ဘေးကင်းအောင်ဆိုပြီး safety driver ထားတာမျိုးတော့ မရှိပါဘူး။ အဲ့ဒီအစား ရှေ့ခန်း ခရီးသည်ထိုင်ခုံနေရာမှာပဲ Tesla ဝန်ထမ်းတစ်ယောက် လိုက်ပါစောင့်ကြည့်ပေးနေတာပါ။
လမ်းကြောင်းမှာ ဘေးကင်းအောင် virtual opertor ကလည်း စောင့်ကြည့်ပေးဦးမှာပါ။ Tesla robotaxi တွေရဲ့ အလိုအလျောက်မောင်းနှင်မှု နည်းပညာက AI နဲ့ Vision ကင်မရာတွေပေါ် အဓိကထားပြီး ယာဉ်လမ်းကြောင်းနဲ့ ပတ်ဝန်းကျင်ကို ကြည့်ပါတယ်။ Tesla နဲ့ ပြိုင်ဘက် Google ပိုင် Waymo ကတော့ LiDAR , Radar ၊ ကင်မရာစတဲ့ အာရုံခံ sensor စနစ်တွေ အများကြီး သုံးပြီး လမ်းကြောင်းကို ထောက်လှမ်းပါတယ်။
Waymo ရဲ့ အာရုံခံနည်းပညာက ရာသီဥတုဆိုးရွားနေချိန်မှာတောင် ပတ်ဝန်းကျင်အနေအထားကို သိနိုင်လို့ ပိုဘေးကင်းတယ်လို့ ပြောပါတယ်။ Telsa FSD နည်းပညာက ကုန်ကျစရိတ်အများကြီးသက်သာပေမယ့် ယာဉ်တိုက်မှုတွေ ဖြစ်ဖူးလို့ စိတ်မချရဘူးလို့ ပြောသူတွေလည်း ရှိပါတယ်။
အော်စတင်မှာ အခု Tesla ပြေးဆွဲနေတာက ကန့်သတ်ထားတဲ့ အလျား ၁၀ မိုင် အနံ ၅ မိုင်အတွင်းပါ။ ဈေးကတော့ တော်တော်လေး သက်သာပါတယ်။ သတ်မှတ်မိုင်အတွင်း ဘယ်သွားသွား ၄.၂၀ ဒေါ်လာပါပဲ။ ဒါက အစမ်းကာလပရိုမိုးရှင်းဈေးပါ။ နောက်တော့ သွားမယ့်နေရာပေါ် လိုက်ပြီး ဈေးနှုန်းပြောင်းပါလိမ့်မယ်။
အီလွန်မတ်စ်ကတော့ Robotaxi တွေ အရှိန်အဟုန်နဲ့ တိုးတက်လာရင် တစ်မိုင်ကို တက္ကစီခ ၀.၂၀ ဒေါ်လာကနေ ၀.၃၀ ဒေါ်လာအတွင်းပဲ ရှိမယ်လို့ ပြောဖူးပါတယ်။ အခုလို ဈေးသက်သာပြီး FSD ဆော့ဖ်ဝဲလ်သာ စိတ်ချရမယ်ဆိုရင် Tesla robotaix က သမရိုးကျကားအငှားဈေးကွက်ကို မြေလှန်ပစ်နိုင်ဖို့ ရှိပါတယ်။

မကျေနပ်ချက်နဲ့အမုန်းတွေများနေရင် ဒီတရားလေးနာကြည့်ပါ(ပါမောက္ခချုပ်ဆရာတော်ကြီး‌)

မျက်စိကွယ်သူတွေကို ပြန်မြင်စေမယ့်နည်းပညာ စမ်းသပ်မယ့် အီလွန်မတ်စ်

နောက် ၆ လ နဲ့ တစ်နှစ်အတွင်း Neuralink က မျက်မမြင်ကမ္ဘာကို ပြောင်းလဲပစ်မယ့် နည်းပညာတစ်မျိုး စမ်းတော့မှာပါ။

ဒီနည်းပညာကို Blindsight လို့ ခေါ်ပါတယ်။ Blindsight လို့ ခေါ်တဲ့ device က Neuralink ရဲ implant တစ်မျိုးပါ။ ဦးနှောက်ရဲ့ အမြင်အာရုံဖမ်းယူတဲ့အပိုင်းထဲ အင်မတန်သေးတဲ့ မိုက်ခရိုအီလက်ထရုဒ်ပါ chip ထည့်ပြီး အပြင်က ပုံရိပ်ဖမ်းစက်နဲ့ချိတ်ပြီး အမြင်အာရုံကို ဖန်တီးတာပါ။

မျက်မမြင်တွေကို အမြင်အာရုံပြန်ရစေမယ့် နည်းပညာလို့ ပြောရမှာပါ။ Blindsight က စစချင်း မြင်ရတဲ့ မြင်ကွင်းက ရုပ်ထွက်ကြည်လင်ပြတ်သားမှု နည်းပေမယ့် ကြာလေလေ အမြင်အာရုံထက်မြက်လေလေ ဖြစ်မယ်လို့ ဆိုပါတယ်။

အီလွန်မတ်စ်ပြောတဲ့အတိုင်းဆို တချိန်မှာ ဒီ implant က စူပါမန်းတစ်ယောက်ရဲ့ အမြင်မျိုးတောင် ပိုင်ဆိုင်မယ့် နည်းပညာပါ။ လောလောဆယ်အထိ Blindsight နည်းပညာက မျောက်တွေနဲ့ စမ်းသပ်အောင်မြင်ပြီးသားပါ။ implant ထည့်ထားတဲ့ မျောက်တွေလည်း ကျန်းကျန်းမာမာပဲလို့ ပြောပါတယ်။

Blindsight က FDA ရဲ့ Breakthrough device designation ခွင့်ပြုချက်လည်း ရပြီးသားပါ။ လူတွေဆီမှာ စမ်းသပ်ဖို့တော့ နောက် ၆ လနဲ့ တစ်နှစ်အတွင်း ဖြစ်ဖို့ မှန်းထားပါတယ်။ Neuralink က ဒီနှစ်ထဲတင် အမေရိကန်မူပိုင်ခွင့်ရုံး USPTO မှာ Telepathy , Blindsight နဲ့ Telekinesis ဆိုတဲ့ နည်းပညာ သုံးမျိုး တင်ထားပါတယ်။

Telepathy က အတွေးနဲ့ အရာဝတ္ထုတွေ ထိန်းချုပ်နိုင်တဲ့ BCI နည်းပညာ ဖြစ်ပြီး Telekinesis နည်းပညာကလည်း Telepathy ဆန်ဆန် စိတ်နဲ့ ထိန်းချုပ်တဲ့ နည်းပညာမျိုးပါ။ Neuralink က ကိုယ်တပိုင်းသေဝေဒနာရှင်တွေကို BCI နည်းပညာ ဖြစ်တဲ့ Link implant ထည့်ပြီး ကုရာမှာ အောင်မြင်မှုတွေ ရထားပါတယ်။

တကယ်လို့ Blindsight လည်း အောင်မြင်မယ်ဆိုရင် မျက်မမြင်တို့ ကမ္ဘာဟာ အကြီးအကျယ်ပြောင်းလဲတိုးတက်လာတော့မှာပါ။

Neta EV ကားတွေ ထုတ်နေတဲ့ Hozon ဒေဝါလီခံ
ဈေးသက်သာတဲ့ NETA EV ကားတွေ ထုတ်နေတဲ့ မိခင်တရုတ်ကုမ္ပဏီ တရားဝင်ဒေဝါလီခံသွားပါပြီ။
NETA လျှပ်စစ်ကားတွေ ထုတ်နေတဲ့ Zhejiang Hozon New Energy Automobile က တရားဝင် ဒေဝါလီခံကြောင်းကို ဇွန်လ ၁၉ ရက်နေ့ကတည်းက တရုတ်နိုင်ငံပိုင် CCTV သတင်းက ဖော်ပြခဲ့တာပါ။ ပေးစရာအကြွေး ယွမ် ၁၀ ဘီလျံ (ဒေါ်လာ ၁.၄ ဘီလျံ) ကျော်ရှိနေတဲ့ Hozon ဟာ အကြွေးတွေ ပိပြီး တရားစွဲခံရတဲ့နောက် ဒေဝါလီခံလိုက်တာပါ။
Hozon က မနှစ်ကတည်းက တရုတ်မှာ အခြေအနေမကောင်းလို့ showroom တွေ အများကြီး ပိတ်ထားရတာပါ။ ၂၀၂၄ နိုဝင်ဘာကတည်းက ဝန်ထမ်းလစာမရလို့ဆိုပြီး ရာနဲ့ချီတဲ့ သူ့ဝန်ထမ်းတွေကလည်း လမ်းပေါ်ထွက် ဆန္ဒပြခဲ့ကြပါတယ်။
ထိုင်းမှာဆို NETA Auto အပိုပစ္စည်းပြတ်တာ ၊ အာမခံ ပြန်ထုတ်ပေးဖို့ ကြာတာ နဲ့ services အဆင်မပြေတာတွေကြောင့် ပြဿနာတွေ တက်ထားပါတယ်။ တချို့ဆို ၁၀ လလောက်အထိတောင် စောင့်ခိုင်းတာတွေ ရှိတယ်လို့ ဆိုပါတယ်။ ဒါတွေက NETA ကို ဖောက်သည်တွေ ယုံကြည်မှုနည်းစေတဲ့ အချက်တွေပါ။
နောက်တော့ NETA နဲ့ လက်တွဲထားတဲ့ dealers တွေလည်း လက်တွဲဖြုတ်ကုန်ပါတယ်။ ထိုင်းမှာ NETA ကား showroom ၆၀ ရှိရာကနေ ၄၀ အထိ ကျသွားသလို ထပ်လျှော့ချတာတွေလည်း ရှိဦးမှာပါ။ အဓိကက ငွေကြေးအရှုပ်အရှင်းကိစ္စတွေပါ။
ထိုင်း NETA Auto ရဲ့ GM ဆွန်ပေါင်လုံကတော့ "ကုမ္ပဏီက ကြွေးမြီနဲ့ လုပ်ငန်းဖွဲ့စည်းပုံပြန်ပြင်နေတယ်" လို့ ပြောပြီး "တရုတ်မှာ NETA ရှိသရွေ့ ထိုင်းမှာလည်း NETA ရှိနေမယ်" ဆိုတာမျိုး ပြောပါတယ်။
NETA က ၂၀၂၂ မှာ ကားအစီးရေ ၁၅၂၀၀၀ ရောင်းနိုင်ခဲ့ပေမယ့် ၂၀၂၃ နဲ့ ၂၀၂၄ မှာ ၁၂၇၅၀၀ နဲ့ ၆၄၅၄၉ စီးပဲ ရောင်းနိုင်ခဲ့ပါတယ်။ အခုနှစ် ဇန်နဝါရီလထဲမှာ NETA ကားရောင်းအားက အစီးရေ ၁၁၀ အထိတောင် ထိုးကျသွားတာပါ။ ထိုင်း EV ဈေးကွက်ထဲက price war ကလည်း NETA ကို အလဲထိုးခဲ့တဲ့ အချက်ထဲမှာ ပါပါတယ်။
NETA V မော်ဒယ်တစ်စီးက ထိုင်းမှာ ဘတ် ၅၄၉၀၀၀ ဈေးက စရောင်းပါတယ်။ ပြိုင်ဘက် BYD , Geely , Changan , SAIC Motor ကုမ္ပဏီကြီးတွေနဲ့ ယှဉ်ရင် EV ကားတွေထဲမှာ ဈေးသက်သာတယ်လို့ ပြောနိုင်ပါတယ်။ ဒါပေမယ့် EV လောက ဈေးကွက်ပြိုင်ဆိုင်မှုက ပြင်းထန်ပါတယ်။ အပြိုင်အဆိုင် ဈေးချရောင်းချိန်မှာ NETA ရဲ့ ယှဉ်ပြိုင်နိုင်စွမ်းက ကျသွားတာပါ။
NETA ဟာ EV ကားထုတ်ဖို့ စက်ရုံ ထိုင်းမှာ ဆောက်ရမယ်ဆိုတဲ့ သတ်မှတ်ချက်နဲ့ ထိုင်းအစိုးရရဲ့ EV 3.0 scheme ကနေ ထောက်ပံ့ကြေးတွေ ရခဲ့တာပါ။ ဒီသတ်မှတ်ချက် မလိုက်နာနိုင်ရင် ထောက်ပံ့ကြေး ပြန်ပေးရမယ့်အခြေအနေလည်း ရှိပါတယ်။ ထိုင်းအစိုးရရဲ့ EV ထုတ်လုပ်ရေးလိုအပ်ချက်အရဆို NETA က ဒီနှစ်ထဲ ထိုင်းမှာ EV ကားအစီးရေ ၁၉၀၀ ထုတ်လုပ်ရမှာ ဖြစ်ပေမယ့် အခုထိ အစီး ၄၀၀၀ ပဲ ထုတ်လုပ်ထားနိုင်ခဲ့တယ်လို့ ဆိုပါတယ်။
Hozon Auto ဟာ ၂၀၂၂ ထဲမှာ NETA အမှတ်တံဆိပ် EV ကားတွေ မြန်မာပြည်တွင်းဈေးကွက်ထဲ စတင်မိတ်ဆက်ထားပါတယ်။

ကိုယ်အဖြစ်ချင်ဆုံးဆန္ဒကိုရင်ထဲကနေသစ္စာဆိုကြည့်ပါ - ပါချုပ်ဆရာတော်

Apple products တွေ တရုတ်မှာ ယွမ် ၂၀၀၀ အထိ Discount ချနေ
တရုတ်ဖုန်းဈေးကွက်မှာ Apple က မော်ဒယ်ပေါ်လိုက်ပြီး ယွမ် ၂၀၀၀ အထိ လျှော့ဈေးတွေနဲ့ ဝယ်သူတွေ ဖိတ်ခေါ်နေပါတယ်။
တရုတ်မှာက ဈေးကွက်ပြိုင်ဆိုင်မှု ကြမ်းတမ်းပါတယ်။ ဈေးနှုန်းချင်း ယှဉ်ပြီး သူ့ထက်ငါ ဝယ်သူအလုအယက်ခေါ်ကြတာပါ။ ဒီဈေးကွက်မှာ Apple လို လျှော့ဈေးမထားတဲ့ကုမ္ပဏီ ရောင်းအားကျတာ သိပ်တော့ မဆန်းပါဘူး။
အပြိုင်အဆိုင်များတဲ့ တရုတ်မှာ ဈေးကွက်နေရာရနိုင်ဖို့ ဒီနှစ် တရုတ်အစိုးရထောက်ပံ့ကြေးအစီအစဉ်မှာ Apple က ပထမဆုံးအကြိမ် တိုက်ရိုက်ပါလာပါတယ်။ အစိုးရထောက်ပံ့ကြေးဆိုတာက ဈေးကွက်ဝယ်လိုအားတက်အောင် ဒစ်ဂျစ်တယ်ထုတ်ကုန်ဝယ်သူတွေကို Discount ပုံစံနဲ့ ထောက်ပံ့ပေးတာပါ။ ဥပမာ - ယွမ် ၆၀၀၀ အောက် ပစ္စည်း(ဖုန်း ,တက်ဘလက် ,ကွန်ပျူတာ စသည်ဖြင့်) ဝယ်ရင် ၁၅% လျှော့ဈေးနဲ့ အများဆုံး ယွမ် ၅၀၀ အထိ ဈေးသက်သာတာမျိုး ဖြစ်ပါတယ်။
ဒီအစီအစဉ်က တရုတ် e-Commerce ပလက်ဖောင်းတွေ ၊ လက်လီအရောင်းဆိုင်တွေကနေတစ်ဆင့် ပေးလေ့ရှိပါတယ်။ ဒီတစ်ခေါက်မှာ Apple ရဲ့ Official အွန်လိုင်းစတိုးနဲ့ လက်လီအရောင်းဆိုင်တွေပါ အခုအစီအစဉ်ထဲ ပါလာတာပါ။ Apple ရဲ့ တရုတ်ဝက်ဘ်ဆိုက်မှာ တင်ထားပုံအရ သူတို့ဆီက တိုက်ရိုက်ဝယ်ရင် Device မော်ဒယ်ပေါ်လိုက်ပြီး ယွမ် ၂၀၀၀ (၂၇၈ ဒေါ်လာ) အထိ လျှော့ဈေးရမယ်လို့ ဆိုပါတယ်။
Apple က အခုနှစ် ပထမ ၃ လပတ် တရုတ်ဈေးကွက်မှာ iPhone တင်ပို့မှု ၉% ကျဆင်းထားတာပါ။ Huawei , Xiaomi , vivo , OPPO စတဲ့ ပြည်တွင်းကုမ္ပဏီတွေ ရောင်းအားတက်နေချိန်မှာ Apple တစ်ခုပဲ ရောင်းအားကျခဲ့တာလည်း ဖြစ်ပါတယ်။
အခု Discount တွေကနေ Apple ရောင်းအားကို ဆွဲတင်နိုင်ဖို့ ရှိပါတယ်။

Meta ရဲ့ 15 ဘီလီယံတန် ရင်းနှီးမြုပ်နှံမှုက Scale အတွက် စိုးရိမ်စရာဖြစ်လာပြီလား
Meta ကနေ Scale AI အပေါ် ကြီးမားတဲ့ရင်းနှီးမြှုပ်နှံမှုပြီးတဲ့နောက်မှာ Scale AI ကိုအသုံးပြုနေတဲ့ အချို့ကုမ္ပဏီတွေအနေနဲ့ စဉ်းစားစရာအနေအထားမှာ ရောက်ရှိနေကြပါတယ်။
Google အနေနဲ့ Scale ကို ဒေါ်လာ ၂၀၀ သန်းနီးပါး သုံးဖို့စီစဉ်ထားပြီး AI training အတွက် Annotation ဝန်ဆောင်မှုတွေကို ယူမယ်ဆိုတာရှိတယ်။ Meta ရဲ့ 15 ဘီလီယံတန် ရင်းနှီးမြုပ်နှံမှုနဲ့ Scale Founder ခေါ်ယူမှုသတင်းတွေတက်လာပြီး နောက်ရက်မှာပဲ Scale က သိပ်လွတ်လပ်တော့မယ်မထင်တဲ့အတွက် Google က တခြား vendor တွေနဲ့ ဆွေးနွေးနေပြီး ဆက်ဆံရေးဖြတ်ဖို့ စဉ်းစားနေတယ်ဆိုတဲ့ သတင်းတွေ တက်လာပါတယ်။