တက္ကဆက်မှာ ရုတ်တရက်ရေကြီးလို့ ၂၄ ယောက်သေဆုံးပြီး ၂၅ ယောက်ပျောက်ဆုံးနေ
ဝါရှင်တန် ၊ ဇူလိုင်-၅-၂၀၂၅
ရတီ(VOM)
အမေရိကန်နိုင်ငံ တက္ကဆက်ပြည်နယ် ဂွါဒါလူပီမြစ်တလျှောက်မှာ မိုးသည်းထန်းစွာရွာသွန်းပြီး ရေကြီးရေလျှံမှုတွေကြောင့် လူ ၂၄ ယောက်ထက်မနည်းသေဆုံးသွားပြီး မြစ်ကမ်းနားရှိ နွေရာသီစခန်းတခုမှ မိန်းကလေး နှစ်ဒါဇင်နီးပါး ပျောက်ဆုံးနေတယ်လို့ တာဝန်ရှိသူတွေက ပြောပါတယ်။
ဆန်အန်တီနီယို့မြို့ အနောက်မြောက်ဘက် ၁၀၅ ကီလိုမီတာအကွာရှိ တက္ကဆက်ဟေးလ်ကောင်တီ အချို့ဒေသတွေမှာ အာဏာပို်ငတွေက အရေးပေါ်အခြေအနေ ကြေညာထားပါတယ်။ မိုးသည်းထန်စွာရွာသွန်းမှုတွေဟာ မိုးရေချိန်၃၀ စင်တီမီတာထိရှိခဲ့တယ်လို့ ဆိုပါတယ်။
ရေကြီးရေလျှံ သတိပေးချက် မထုတ်ပြန်ခင်မှာပဲ အလွန်လျှင်မြန်စွာနဲ့ ခန့်မှန်းမရတဲ့အချိန်တွင်းမှာ ရုတ်တရက် ရေကြီးခဲ့တယ်လို့ ပြောပါတယ်။ ရေဘေးကြောင့် ၂၄ ယောက်သေဆုံးကြောင်း အာဏာပိုင်များ အတည်ပြုထားပြီး သေဆုံးသူအရေအတွက် မြင့်တက်လာနိုင်တယ်လို့ ဆိုပါတယ်။
ကလေးနဲ့ လူကြီးအလောင်း အလောင်းတွေ ရှာတွေ့ထားတယ်လို့ ဆိုပါတယ်။တွေ့ရှိထားပြီး တချို့ကတော့ ကားတွေနဲ့အတူ မျောပါခဲ့တာလို့ တာဝန်ရှိသူတွေက ပြောပါတယ်။ ဒေသစံတော်ချိန် မနက် ၄ နာရီမှာ ဖြစ်ပွားခဲ့တဲ့ ရေကြီးမှုအတွင်း ဂွါဒါလူပီမြစ်ဘေးမှာ စခန်းချနေတဲ့ ကလေး ၇၀၀ ကျော်ထဲက မိန်းကလေး ၂၃ ယောက်ကို အာဏာပိုင်တွေက အပူတပြင်း ရှာဖွေနေပါတယ်။
စခန်းမှာရှိတဲ့ တခြားသူတွေကတော့ ဘေးကင်းတယ်လို့ ဆိုပါတယ်။ ဒါပေမယ့်လည်း စခန်းချသူအားလုံးကို ချက်ချင်းဘေးလွတ်ရာမရွှေ့နိုင်သေးပါဘူး။ ရေကြီးမှုကြောင့် လမ်းပန်းဆက်သွယ်ရေးတွေ ပြတ်တောက်မှုကြောင့်လို့ ဆိုပါတယ်။
ဒေသတွင်း မိုးသည်းထန်စွာရွာသွန်းမှုကြောင့် ဂွါဒါလူပီမြစ်သည် ၄၅ မိနစ်အတွင်း ရှစ်မီတာထိ မြင့်တက်ခဲ့ပြီး ရဟတ်ယာဉ် ၁၄ စင်း၊ ဒရုန်း တဒါဇင်နဲ့အတူ ကယ်ဆယ်ရေးလုပ်သား ရာနဲ့ချီပြီး ဖြန့်ကြက်ထားတယ်လို့ တာဝန်ရှိသူတွေက ပြောပါတယ်။
