#နိုင်ငံတကာသတင်း
◼ တိုးတက်မှုမရှိသော ထရန့်-ပူတင်ဆွေးနွေးပွဲအပြီး ကိဗ်မြို့ ညလုံးပေါက်နီးပါး ဒရုန်းဖြင့် တိုက်ခိုက်ခံရ
ရုရှားသမ္မတဗလာဒီမာပူတင်နှင့် ဆွေးနွေးမှုအတွင်း အပစ်အခတ်ရပ်စဲရေးနှင့် ပတ်သက်၍ တိုးတက် မှုမရရှိခဲ့ကြောင်း အမေရိကန်သမ္မတ ဒေါ်နယ်ထရန့်က ပြောကြားပြီးနောက် နာရီပိုင်းအကြာ ယမန်နေ့ညတွင် ရုရှားက ယူကရိန်းမြို့တော် ကိဗ်မှ နေရာ တစ်ဒါဇင်ကျော်ကို ပစ်မှတ်ထားတိုက်ခိုက်ခဲ့ပြီး ယင်းတွင် လူနေရပ်ကွက်များလည်း ပါဝင်ကြောင်း ယူကရိန်းအရာရှိတစ်ဦးက ပြောကြားသည်။
ရုရှားတို့၏ ညလုံးပေါက်နီးပါး ဒရုန်းများဖြင့် တိုက်ခိုက်မှုကြောင့် အနည်းဆုံး လူ ၁၄ ဦး ဒဏ်ရာရရှိခဲ့ကာ ရထားလမ်းကွန်ရက်အခြေခံအဆောက်အအုံများလည်း ပျက်စီးခဲ့ပြီး လူနေအဆောက်အဦးများ နှင့် ကားများလည်း မီးလောင်ခဲ့ကြောင်း မြို့တော်မှ အာဏာပိုင်များက ယနေ့ နံနက်စောစောတွင် ပြောကြားကြသည်။
ထိခိုက်ဒဏ်ရာရသူ ၁၂ ဦးကို ဆေးရုံံတင်ခဲ့ရကြောင်း ကိဗ်မြို့တော်ဝန် ဗီတာလီကလစ်ချ်ကို က ပြောကြားသည်။
မြို့လယ်မှ စီးဆင်းသွားသော ဒီနီပရိုမြစ်နှစ်ဖက်စလုံးရှိ ခရိုင် ဆယ်ခုအနက် ခရိုင်ခြောက်ခုတွင် ပျက်စီးမှုများ ဖြစ်ပေါ်ခဲ့ပြီး သစ်ပင်ပေါများသော ဟိုလိုဆီးစကီးခရိုင်တွင် ဆေးရုံတစ်ရုံပေါ်သို့ ဒရုန်းအပိုင်းအစများ ကျရောက်ပြီးနောက် မီးလောင်မှုဖြစ်ပွားခဲ့ကြောင်း ကလစ်ချ်ကို က တယ်လီဂရမ်လူမှုကွန်ရက်ပေါ်တွင် ရေးသားသည်။
မကြာသေးမီ သီတင်းပတ်များအတွင်း ရုရှားက ယူကရိန်းအား နေ့စဉ်ရက်ဆက်နီးပါး ရာနှင့်ချီသော ဒရုန်းများ၊ ဒုံးကျည်များဖြင့် ပစ်ခတ်တိုက်ခိုက်ခဲ့သည်။ ဇွန်လတစ်လတည်းမှာပင် ရုရှားက ယူကရိန်းအား ပဲ့ထိန်းဒုံးကျည် ၈၀ ခန့်အပါအဝင် ဒုံးကျည်ပေါင်း ၃၃၀ ကျော်၊ တိုက်ခိုက်ရေးဒရုန်းပေါင်း ငါးထောင်ကျော်၊ လေထီးဗုံးပေါင်း ငါးထောင်ကျော် ဖြင့် တိုက်ခိုက်ခဲ့ကြောင်း ယူကရိန်းနိုင်ငံခြားရေးဝန်ကြီး က သီတင်းပတ် စောစောပိုင်းက ပြောကြားသည်။
ကြာသပတေးနေ့က ရုရှားသမ္မတ ဗလာဒီမာပူတင်နှင့် ဖုန်းခေါ်ဆိုမှုတွင် ယူကရိန်းစစ်ပွဲ အဆုံး သတ် ရေးနှင့်ပတ်သက်၍ တိုးတက်မှုမရခဲ့ကြောင်း အမေရိကန်သမ္မတ ဒေါ်နယ်ထရန့်က ပြောကြားခဲ့ပြီး ပဋိပက္ခ၏ အရင်းခံ အကြောင်းများကို ဖြေရှင်းရန် မော်စကိုက ဆက်လက်တွန်းအားပေးသွားမည် ဖြစ်ကြောင်း ကရင်မလင်က ထပ်မံပြောကြားသည်။
အရေးပါသောလက်နက်တချို့ ယူကရိန်းသို့ ပေးပို့ခြင်းကို ရပ်တန့်ရန် သီတင်းပတ်အစောပိုင်းက ချမှတ်ခဲ့သော ဝါရှင်တန်၏ ဆုံးဖြတ်ချက်ကြောင့် ပိုမိုပြင်းထန်လာသော လေကြောင်းတိုက်ခိုက်မှုများနှင့် စစ် မြေ ပြင်ထိုးစစ်များအပေါ် ယူကရိန်း၏ တွန်းလှန်နိုင်စွမ်းကို ထိခိုက်နိုင်ကြောင်း ကိဗ်အစိုးရ သတိပေးချက်များလည်း ထွက်ပေါ်ခဲ့သည်။
အမေရိကန်လက်နက်ထောက်ပံ့မှုများနှင့်ပတ်သက်၍ သမ္မတ ထရန့်နှင့် ယနေ့စကားပြောရန် မျှော်လင့်ကြောင်း ယူကရိန်းသမ္မတ ဗိုလိုဒီမာဇီလန်စကီးက ပြောသည်။
ကိဗ်မြို့ တိုက်ခိုက်မှုကြောင့် မြို့တော်မှ ရထားကွန်ရက် အခြေခံအဆောက်အဦးများကို ပျက်စီးသွား စေခဲ့ ခြင်းကြောင့် ခရီးသည်တင် ရထားများကို လမ်းကြောင်းပြောင်းခဲ့ရပြီး နှောင့်နှေးမှုများ ဖြစ်ပေါ်ခဲ့ကြောင်း နိုင်ငံ၏ အကြီးဆုံး အစိုးရပိုင်ရထားလုပ်ငန်း က ပြောကြားသည်။
၂၀၂၂ ခုနှစ် ဖေဖော်ဝါရီလတွင် ရုရှား ကယူကရိန်းကို ကျူးကျော်ခဲ့ပြီးနောက်ပိုင်း အရပ်သားများအား ပစ်မှတ်ထားသည်ဆိုခြင်းကို နှစ်ဖက်စလုံးက ငြင်းဆိုကြသော်လည်း ယင်းပဋိပက္ခအတွင်း အရပ်သား ထောင်နှင့်ချီသေဆုံးခဲ့ပြီး အများစုမှာ ယူကရိန်းနိုင်ငံသားများ ဖြစ်သည်။
Reuters/CNN
