နိုင်ငံကျော် တေးရေး/တေးဆို ကိုင်ဇာ၏ စျာပနအခမ်းအနား ရေဝေးသုသာန်၌ ပြုလုပ်ပြီးစီး

မြန်မာ့တေးဂီတလောကတွင် ဆယ်စုနှစ်များစွာ ထင်ရှားကျော်ကြားခဲ့သည့် နိုင်ငံကျော် တေးရေး/တေးဆို ကိုင်ဇာ (ခ) ဦးညီညီဝင်း၏ စျာပနအခမ်းအနားကို ယနေ့ (ဩဂုတ် ၂၄ ရက်) ရန်ကုန်မြို့၊ ရေဝေးသုသာန်၌ ပြုလုပ်ခဲ့ပြီး ဂူသွင်းသင်္ဂြိုဟ်ခြင်း အစီအစဉ်များ ပြီးစီးခဲ့ပြီဖြစ်ကြောင်း သိရသည်။
ကိုင်ဇာ၏ နောက်ဆုံးခရီးကို ကျန်ရစ်သူမိသားစုဝင်များ၊ ဆွေမျိုးမိတ်သင်္ဂဟများ၊ တေးဂီတနှင့် အနုပညာနယ်ပယ်မှ လုပ်ဖော်ကိုင်ဖက်များ၊ အနုပညာရှင်များနှင့် ၎င်းကို ချစ်ခင်အားပေးခဲ့ကြသည့် ပရိသတ်များက လာရောက်၍ ဝမ်းနည်းစွာ နောက်ဆုံးဂါရဝပြု ပို့ဆောင်ခဲ့ကြသည်။
နိုင်ငံကျော် တေးရေး/တေးဆို ကိုင်ဇာသည် အဆုတ်အတွင်း ပိုးဝင်ရောက်မှုကြောင့် ဝိတိုရိယဆေးရုံ အထူးကြပ်မတ်ကုသဆောင်တွင် ဆေးကုသမှုခံယူနေစဉ် ဩဂုတ် ၂၂ ရက်က ကွယ်လွန်ခဲ့ခြင်းဖြစ်ပြီး ကွယ်လွန်ချိန်တွင် အသက် ၆၆ နှစ်ရှိပြီဖြစ်သည်။
ကိုင်ဇာသည် ၁၉၇၇ ခုနှစ်တွင် “အကျည်းတန်၏ အထီးကျန်အတ္ထုပ္ပတ္တိ” တေးစီးရီးဖြင့် တေးဂီတလောကသို့ စတင်ဝင်ရောက်ခဲ့ပြီး “အနမ်းပန်း”၊ “သီချင်းရှင်ကိုကြင်နာပါ”၊ “မနိုးပါစေနဲ့မိုးရယ်” နှင့် “တူနှစ်ကိုယ်တိုင်းပြည်” အပါအဝင် ကိုယ်ပိုင်သံစဉ် တေးစီးရီးပေါင်းများစွာကို ရေးသားသီဆိုခဲ့သူဖြစ်သည်။
မျိုးဆက်အဆက်ဆက် ပရိသတ်များ၏ ချစ်ခင်အားပေးမှုကို ရရှိခဲ့သည့် နိုင်ငံကျော် တေးရေး/တေးဆို ကိုင်ဇာ၏ နောက်ဆုံးခရီးကို ယနေ့တွင် ပို့ဆောင်ခဲ့ကြပြီး ၎င်း၏ တေးသီချင်းများနှင့် အနုပညာလက်ရာများမှာ မြန်မာ့တေးဂီတလောကနှင့် ပရိသတ်များ၏ အမှတ်တရများထဲတွင် ဆက်လက်တည်ရှိနေမည်ဖြစ်သည်။

မြန်မာ-တရုတ် ချစ်ကြည်ရေးအသင်း (ကချင်ရုံးခွဲ) သို့ ပြည်နယ်ဝန်ကြီးချုပ် သွားရောက်ကြည့်ရှု၊ နယ်စပ်ဒေသ ပိုမိုဖွံ့ဖြိုးတိုးတက်ရေး ပူးပေါင်းဆောင်ရွက်ကြရန် တိုက်တွန်း

ကချင်ပြည်နယ်ဝန်ကြီးချုပ်သည် ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများနှင့်အတူ ယမန်နေ့ (ဩဂုတ် ၂၃ ရက်) ညနေပိုင်းက မြစ်ကြီးနားမြို့၊ အေးမြသာယာဈေးအတွင်း ဖွင့်လှစ်ထားသည့် မြန်မာ-တရုတ် ချစ်ကြည်ရေးအသင်း (ဗဟို) ရုံးခွဲ (ကချင်) သို့ သွားရောက်ကြည့်ရှုကာ အသင်းဝင်များနှင့် တွေ့ဆုံခဲ့ကြောင်း သိရသည်။
တွေ့ဆုံစဉ် ပြည်နယ်ဝန်ကြီးချုပ်က ကချင်ပြည်နယ်သည် တရုတ်နိုင်ငံနှင့် ရှည်လျားသည့် နယ်စပ်မျဉ်း ထိစပ်လျက်ရှိသည့် ပြည်နယ်တစ်ခုဖြစ်သဖြင့် နှစ်နိုင်ငံအကြား ဆွေမျိုးပေါက်ဖော် ချစ်ကြည်ရင်းနှီးမှု ပိုမိုခိုင်မာလာစေရေးနှင့် နယ်စပ်ဒေသများ ဘက်စုံဖွံ့ဖြိုးတိုးတက်လာစေရေးတို့အတွက် သက်ဆိုင်ရာအဖွဲ့အစည်းများက အတူတကွ ဝိုင်းဝန်းပူးပေါင်းဆောင်ရွက်ကြရန် တိုက်တွန်းပြောကြားခဲ့သည်။
ထို့ပြင် နှစ်နိုင်ငံ နယ်စပ်ဒေသဖွံ့ဖြိုးတိုးတက်ရေး လုပ်ငန်းများ ဆောင်ရွက်ရာတွင် သက်ဆိုင်ရာဥပဒေ၊ စည်းမျဉ်းစည်းကမ်းနှင့် လုပ်ထုံးလုပ်နည်းများကို လေးစားလိုက်နာပြီး ပူးပေါင်းဆောင်ရွက်သွားကြရန်လည်း ပြည်နယ်ဝန်ကြီးချုပ်က မှာကြားခဲ့သည်။
ဆက်လက်၍ မြန်မာ-တရုတ် ချစ်ကြည်ရေးအသင်း (ကချင်ရုံးခွဲ) ဥက္ကဋ္ဌ ဦးဆောင်ဘောမ်နှင့် အသင်းဝင်များက အသင်း၏ လက်ရှိလုပ်ငန်းဆောင်ရွက်နေမှုများနှင့် လိုအပ်ချက်များကို တင်ပြခဲ့ကြရာ ပြည်နယ်ဝန်ကြီးချုပ်က သက်ဆိုင်ရာတာဝန်ရှိသူများနှင့် လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့သည်။
ယင်းနောက် ပြည်နယ်ဝန်ကြီးချုပ်က မြန်မာ-တရုတ် ချစ်ကြည်ရေးအသင်း (ကချင်ရုံးခွဲ) ၏ အသင်းရန်ပုံငွေအတွက် ငွေကျပ် သိန်း ၅၀ ထောက်ပံ့ပေးအပ်ခဲ့ကြောင်း သိရသည်။

တိုက်ဖွန်းနာရာကြောင့် တရုတ်နှင့် ဗီယက်နမ်တွင် မိုးကြီးရေလျှံ၊ တရုတ်၌ လူ ၅၄,၀၀၀ ခန့် ဘေးလွတ်ရာရွှေ့ပြောင်း

တိုက်ဖွန်းမုန်တိုင်း နာရာ (Narra) ၏ အရှိန်ကြောင့် ဗီယက်နမ်နိုင်ငံမြောက်ပိုင်းနှင့် တရုတ်နိုင်ငံတောင်ပိုင်း ကွမ်ရှီဒေသတို့တွင် မိုးသည်းထန်စွာရွာသွန်းကာ ရေကြီးရေလျှံမှုနှင့် မြေပြိုမှုများ ဖြစ်ပွားခဲ့ပြီး အခြေခံအဆောက်အအုံများနှင့် စိုက်ပျိုးသီးနှံများ ပျ-က်စီးဆုံးရှုံးခဲ့ကြောင်း သိရသည်။
တရုတ်နိုင်ငံတွင် ရေကြီးရေလျှံမှုများကြောင့် လူပေါင်း ၅၄,၀၀၀ ခန့်ကို ဘေးလွတ်ရာသို့ ရွှေ့ပြောင်းပေးခဲ့ရပြီး ယင်းတို့အနက် ၈,၀၈၇ ဦးကို အရေးပေါ်ရေဘေးကယ်ဆယ်ရေးစခန်းများသို့ ပြောင်းရွှေ့ပေးထားကြောင်း တရုတ်နိုင်ငံပိုင် CCTV ရုပ်သံက ဖော်ပြသည်။
ဗီယက်နမ်မြောက်ပိုင်းတွင်လည်း နာရာမုန်တိုင်းအရှိန်ကြောင့် ရက်နှင့်ချီ မိုးသည်းထန်စွာရွာသွန်းခဲ့ရာ လူတစ်ဦး သေဆုံးခဲ့ပြီး အိမ်ထောင်စု ၄,၃၀၀ ကျော် ဘေးလွတ်ရာသို့ ရွှေ့ပြောင်းခဲ့ရသည်။
ဗီယက်နမ်နိုင်ငံ မြောက်ပိုင်းတောင်တန်းဒေသများဖြစ်သည့် Lang Son နှင့် Cao Bang ပြည်နယ်တို့တွင် ဩဂုတ် ၂၄ ရက် နံနက်အစောပိုင်းမှစ၍ မိုးသည်းထန်စွာရွာသွန်းခဲ့ပြီး ၂၄ နာရီအတွင်း မိုးရေချိန် ၂၃၆ မီလီမီတာမှ ၃၀၀ မီလီမီတာအထိ ရရှိခဲ့သဖြင့် ရေကြီးရေလျှံမှုနှင့် မြေပြိုမှုများ ဖြစ်ပွားခဲ့သည်။
ယူနက်စကို ကမ္ဘာ့အမွေအနှစ်စာရင်းဝင် ဟာလောင်ပင်လယ်အော် (Ha Long Bay) တည်ရှိရာ Quang Ninh ပြည်နယ်တွင်လည်း ရေကြီးရေလျှံမှုများ ဖြစ်ပေါ်ခဲ့ပြီး မြို့၏ အစိတ်အပိုင်းအချို့ ရေမြုပ်ခဲ့ကာ ခရီးသွားလုပ်ငန်း၊ ငါးဖမ်းလုပ်ငန်းနှင့် သယ်ယူပို့ဆောင်ရေးလုပ်ငန်းများ အနှောင့်အယှက်ဖြစ်ပေါ်ခဲ့ကြောင်း သိရသည်။
မုန်တိုင်းအရှိန်ကြောင့် ကျောင်းများနှင့် ရုံးလုပ်ငန်းများ ပုံမှန်လည်ပတ်နိုင်မှု ထိခိုက်ခဲ့သည့်အပြင် အိမ်ထောင်စု ၅၅,၀၀၀ နီးပါး လျှပ်စစ်ဓာတ်အား ပြ-တ်တေ-ာက်ခဲ့ပြီး ဆန်နှင့် အခြားစိုက်ပျိုးသီးနှံ ဟက်တာ ၁၀,၀၀၀ ကျော် ပျ-က်စီးခဲ့ကြောင်း ဖော်ပြထားသည်။

ခေတ်မီဆေးပညာသင်ထောက်ကူပစ္စည်းများကို တပ်မတော်ဆေးတက္ကသိုလ်(ရန်ကုန်)သို့ အိန္ဒိယသံအမတ်ကြီးက လွှဲပြောင်းပေးအပ်

မြန်မာနိုင်ငံဆိုင်ရာ အိန္ဒိယနိုင်ငံသံရုံး၏ သံအမတ်ကြီး Abhay Thakur က ခေတ်မီဆေးပညာသင်ထောက်ကူပစ္စည်းများကို စွမ်းဆောင်ရည်မြှင့်တင်ရေးဆိုင်ရာ အကူအညီပေးရေးအစီအစဉ်တစ်စိတ်တစ်ပိုင်းအဖြစ် တပ်မတော်ဆေးတက္ကသိုလ်(ရန်ကုန်)သို့ ယနေ့ သြဂုတ် ၂၄ ရက်တွင်လွှဲပြောင်းပေးအပ်ခဲ့ကြောင်း သိရသည်။
laparoscopy ကိရိယာများ၊ သွားဘက်ဆိုင်ရာပစ္စည်းများ၊ မျိုးရိုးဗီဇခွဲခြမ်းစိတ်ဖြာမှုနှင့် ရောဂါဗေဒဆိုင်ရာ ပစ္စည်းကိရိယာများနှင့် digital panelများ အပါအဝင် ခေတ်မီဆေးပညာသင်ထောက်ကူပစ္စည်းများကို လွှဲ ပြောင်းပေးအပ်ခဲ့ခြင်းဖြစ်သည်။

သောင်ရင်းမြစ်ရေ မြဝတီမြို့၏စိုးရိမ်ရေမှတ်အထက် သို့ တစ်ကျော့ပြန်ကျော်လွန်ရောက်ရှိ ယာယီရေဘေးကယ်ဆယ်ရေးစခန်းများသို့ ရွေ့ပြောင်းကြရန်လိုက်လံအသိပေးနှိုးဆော်

သောင်ရင်းမြစ်ရေသည် ယနေ့ သြဂုတ် ၂၄ ရက်တွင် ကရင်ပြည်နယ်၊ မြဝတီမြို့၏စိုးရိမ်ရေမှတ်အထက်သို့ တစ်ကျော့ပြန်ကျော်လွန်ရောက်ရှိလာသဖြင့် ယာယီရေဘေးကယ်ဆယ်ရေးစခန်းများသို့ ရွှေ့ပြောင်းနေ ထိုင်ကြရန် သက်ဆိုင်ရာ တာဝန်ရှိသူများက အသိပေးနှိုးဆော်မှုများပြုလုပ်လျက်ရှိကြောင်း သိရသည်။
ပြီးခဲ့သည့် သြဂုတ် ၂၀ ရက်ညနေပိုင်းမှစတင်၍ သောင်ရင်းမြစ်ရေသည် မြဝတီမြို့၏စိုးရိမ်ရေမှတ်အ ထက်သို့ကျော်လွန်ရောက်ရှိခဲ့သဖြင့် အနိမ့်ပိုင်းရပ်ကွက်များနှင့် မြစ်ကမ်းအနီးတို့တွင် ရေဝင်ရောက်မှုများဖြစ်ပေါ်ခဲ့သဖြင့် ရေဘေးသင့်သူများကို ယာယီရေဘေးကယ်ဆယ်ရေးစခန်း(၆)ခုသို့ရွှေ့ပြောင်းပေးခဲ့ကြကြောင်း သိရသည်။
ထိုသို့ ရွှေ့ပြောင်းပေးခဲ့ရာမှ ယမန်နေ့ သြဂုတ် ၂၃ ရက်တွင် ရေများပြန်လည်ကျဆင်းသွားသဖြင့် ယာယီရေဘေးကယ်ဆယ်ရေးစခန်း(၆)ခုအနက် (၃)ခုကိုပိတ်သိမ်းပြီးနောက် ရေဘေးသင့်သူများမှာ ၎င်းတို့၏နေ အိမ်များသို့ပြန်လည်နေထိုင်ခဲ့ကြကြောင်း သိရသည်။
ရေဘေးသင့်သူများ ၎င်းတို့၏နေအိမ်များသို့ပြန်လည်ရွှေ့ပြောင်းနေထိုင်ပြီးချိန်တွင်ပင် ယနေ့ သြဂုတ် ၂၄ ရက်၌ သောင်ရင်းမြစ်ရေမှာ မြဝတီမြို့၏စိုးရိမ်ရေမှတ်အထက်သို့ တစ်ကျော့ပြန်ကျော်လွန်ရောက်ရှိလာခဲ့ခြင်းဖြစ်ကြောင်း သိရသည်။

ဟိုတယ်ခရီးဝန်ကြီးဌာနအမည်ပြောင်းလဲ

ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာနအမည်အား ယဉ်ကျေးမှု၊ ဟိုတယ်နှင့် ခရီးသွားလာရေးဝန်ကြီးဌာနအဖြစ် အမည်ပြောင်းလဲသတ်မှတ်ကြောင်း နိုင်ငံတော်သမ္မတရုံးက ထုတ်ပြန်ခဲ့သည်။
နိုင်ငံတော်သမ္မတရုံးက ဥပဒေကဲ့သို့အာဏာတည်သောအမိန့်အမှတ် ၅/၂၀၂၆ ဖြင့် ယနေ့ သြဂုတ် ၂၄ ရက်က ထုတ်ပြန်ခဲ့ခြင်းဖြစ်သည်။
ဖွဲ့စည်းပုံအခြေခံဥပဒေပုဒ်မ ၂၀၂၊ ပုဒ်မခွဲ (က)၊ ပုဒ်မ ၂၁၂၊ ပုဒ်မခွဲ (က) နှင့် (ခ)တို့အရ ဟိုတယ်၊ ခရီးသွားလာရေးနှင့် ယဉ်ကျေးမှုဝန်ကြီးဌာနအား ယဉ်ကျေးမှု၊ ဟိုတယ်နှင့် ခရီးသွားလာရေးဝန်ကြီးဌာနအဖြစ် အမည်ပြောင်းလဲသတ်မှတ်ခဲ့ခြင်းဖြစ်သည်။

ထိုင်းနိုင်ငံ(တောင်ပိုင်း)တွင် အကြမ်းဖက်တိုက်ခိုက်မှုများဖြစ်ပေါ်နေသည့် ပြည်နယ်(၃)ခုတွင်နေထိုင်သော မြန်မာနိုင်ငံသားများ တစ်စုံတစ်ရာဖြစ်ပေါ်ပါကဆက်သွယ်နိုင်

ထိုင်းနိုင်ငံ(တောင်ပိုင်း)တွင် အကြမ်းဖက်တိုက်ခိုက်မှုများဖြစ်ပေါ်နေသည့် ပြည်နယ်(၃)ခုတွင်နေထိုင်သော မြန်မာနိုင်ငံသားများ တစ်စုံတစ်ရာဖြစ်ပေါ်ပါကဆက်သွယ်နိုင်သည်ဟု ထိုင်းနိုင်ငံဆိုင်ရာ မြန်မာသံရုံး၊ ဗန်ကောက်မြို့က ယနေ့ သြဂုတ် ၂၄ ရက်တွင် အသိပေးခဲ့သည်။
ထိုင်းနိုင်ငံ(တောင်ပိုင်း)၊ ပတ္တနီ၊ ယာလာနှင့် နရာသီဝပ်ပြည်နယ်များတွင် လက်ရှိအချိန်၌ အကြမ်းဖက်တိုက်ခိုက်မှုများဖြစ်ပေါ်လျက်ရှိသည်။
ထို့ကြောင့် ယင်းပြည်နယ်များတွင်နေထိုင်လျက်ရှိသည့် မြန်မာနိုင်ငံသားများအနေဖြင့် မသက်ဆိုင်သော လူစုလူဝေးများတွင် ပါဝင်ပတ်သက်မှုမရှိရန်၊ လုံခြုံရေးအထူးဂရုပြုနေထိုင်သွားလာရန်၊ အကြောင်းတစ်စုံ တစ်ရာပေါ်ပေါက်ပါက မြန်မာသံရုံးနှင့် အလုပ်သမားသံအရာရှိရုံးများသို့ ဆက်သွယ်အကြောင်းကြားကြရန် အသိပေးခဲ့သည်။

ပါမောက္ခချုပ်ဆရာတော်ကြီးထံ နိုင်ငံတော်သမ္မတ ဦးမင်းအောင်လှိုင်နှင့် ဇနီး မိသားစုက ကျမ်းစာအုပ်များလှူဒါန်း

စာပေပျောက်လျှင် လူမျိုးပျောက်နိုင်သဖြင့် စာပေထိန်းသိမ်းရေးကိုအဓိကထားကြိုးစားရန် ပါမောက္ခ ချုပ်ဆရာတော်ကြီးတိုက်တွန်း
မန္တလေးတိုင်း၊ ပြင်ဦးလွင်မြို့နယ်၊ အောင်ချမ်းသာကျေးရွာရှိ ဓမ္မသဟာယသာသနစင်တာ၌သီတင်းသုံးနေတော်မူသည့် ပါမောက္ခချုပ်ဆရာတော်ကြီးထံ နိုင်ငံတော်သမ္မတ ဦးမင်းအောင်လှိုင်နှင့် ဇနီး မိသားစုက ဗုဒ္ဓကျမ်းစာအုပ်များကို လှူဒါန်းခဲ့ကြသည်။
နိုင်ငံတော်သမ္မတနှင့် ဇနီး မိသားစုက ဓမ္မစကြာမဟာဋီကာသစ်ကျမ်းကြီး၊ ဗုဒ္ဓဝါဆိုစဉ်အလင်္ကာများစာအုပ်နှင့် သာသနာရေးဝန်ကြီးဌာနမှ ဆောင်ရွက်ထားရှိသော ကွန်ပျူတာစာစီမူ အဋ္ဌကထာကျမ်းစာအုပ်များကို လှူဒါန်းခဲ့ကြခြင်းဖြစ်သည်။
အဆိုပါ ကျမ်းစာအုပ်များနှင့် လှူဖွယ်ဝတ္ထုပစ္စည်းများကို နိုင်ငံတော်သမ္မတနှင့် ဇနီး မိသားစု(ကိုယ်စား) သာ သနာရေးဝန်ကြီးဌာန ပြည်ထောင်စုဝန်ကြီး ဦးတင်ဦးလွင်က သြဂုတ် ၂၄ ရက်နံနက်ပိုင်းတွင် ပါမောက္ခချုပ်ဆရာတော်ကြီးထံ ဆက်ကပ်လှူဒါန်းပြီး သာသနာရေးဆိုင်ရာများကို လျှောက်ထားခဲ့သည်။
ပါမောက္ခချုပ်ဆရာတော်ကြီးက အဋ္ဌကထာ ဋီကာကျမ်းစာအုပ်များကို ပြန်လည်ပုံနှိပ်နိုင်ခြင်းမရှိသည်မှာ နှစ်ပေါင်းအတော်ကြာပြီ၍ ပါဠိတော်များကို အဋ္ဌကဘထာ၊ ဋီကာအဖွင့်များနှင့်ကြည့်၍ အဓိပ္ပာယ်သိရှိရကာ အဋ္ဌကထာဋီကာအဖွင့်ကိုမကြည့်ဘဲ ပါဠိတော်သက် သက်ဘာသာပြန်လျှင် Interpretation Problem ဖြစ်နိုင်သဖြင့် နောင်တွင် AI tool များဖြင့် ဘာသာပြန်ခြင်းလုပ်ငန်းဆောင်ရွက်လျှင် Leak Version (မူကွဲမူပျက်) များထွက်ပေါ်လာနိုင်ပြီးပျက်စီးနိုင်သည်ဟု မိန့်ကြားတော်မူသည်။
ထို့ပြင် ပါဠိတော်၊ အဋ္ဌကထာ၊ ဋီကာစာပေများ မပျောက်ပျက်အောင်ထိန်းသိမ်းခြင်းလုပ်ငန်းသည် သာ သနာရေးဝန်ကြီးဌာန၏ အဓိကလုပ်ငန်းဖြစ်ပြီး အရေးအကြီးဆုံးဖြစ်၍ ယခုကဲ့သို့ အဋ္ဌကထာ၊ ဋီကာကျမ်းများကို ဆဋ္ဌမူအတိုင်းပြင်ဆင်ဖြည့်စွက်နုတ်ပယ်ခြင်းမပြုဘဲ နောက်ဆက်တွဲ(Index)ပါ နာနာပါဌ (Different Version)များ၊ အောက်ခြေမှတ်စု(Foot note)များပါမကျန် ကွန်ပျူတာစာစီမူပြန်လည်ပုံနှိပ်ဆောင်ရွက်ခြင်းသည် အလွန်ပြည့်စုံပြီး အင်မတန်ကောင်းမွန်သောအ လုပ်ဖြစ်သည်ဟု မိန့်ကြားတော်မူသည်။
ထို့အတူ စာပေပျောက်လျှင် လူမျိုးပျောက်နိုင်သဖြင့် စာပေထိန်းသိမ်းရေးကို အဓိကထားကြိုးစားရန် တိုက် တွန်းခဲ့ပြီး ထေရဝါဒ ဗုဒ္ဓဘာသာနှင့်ပတ်သက်လျှင် ပါဠိတော်၊ အဋ္ဌကထာ၊ ဋီကာ စာပေများကို ထေရဝါဒအ တိုင်း ထိန်းသိမ်းထားနိုင်သည့် မြန်မာနိုင်ငံကိုသာ အား ကိုးပြုရမည်ဟုလည်း မိန့်ကြားတော်မူခဲ့သည်။

MOFA ဒုတိယဝန်ကြီး ဦးကိုကိုကျော် ရုရှားသံရုံးယာယီတာဝန်ခံနှင့် UNOPS မြန်မာနိုင်ငံဆိုင်ရာ ယာယီညွှန်ကြားရေးမှူးတို့ကို သီးခြားစီတွေ့ဆုံ

နိုင်ငံခြားရေးဝန်ကြီးဌာန ဒုတိယဝန်ကြီး ဦးကိုကိုကျော်သည် ဩဂုတ် ၂၄ ရက်တွင် ရန်ကုန်မြို့ရှိ ရုရှားသံရုံး၏ သံရုံးယာယီတာဝန်ခံ မစ္စ နာတာလီရာ နယ်ဖယ်ဒေါ်ဗာနှင့် ကုလသမဂ္ဂစီမံကိန်းဝန်ဆောင်မှုရုံး (UNOPS) ၏ မြန်မာနိုင်ငံဆိုင်ရာ ယာယီညွှန်ကြားရေးမှူးနှင့် ယာယီဌာနေကိုယ်စားလှယ် Mr. Peter John Cross တို့အား သီးခြားစီ လက်ခံတွေ့ဆုံခဲ့ကြောင်း သိရသည်။
ရုရှားသံရုံး၏ သံရုံးယာယီတာဝန်ခံနှင့် တွေ့ဆုံရာတွင် မြန်မာ-ရုရှား နှစ်နိုင်ငံအကြား ရှိရင်းစွဲချစ်ကြည်ရင်းနှီးသည့် ဆက်ဆံရေးကို ဆက်လက်တိုးတက်ခိုင်မာစေရေး၊ ကဏ္ဍစုံပူးပေါင်းဆောင်ရွက်မှုများ ပိုမိုမြှင့်တင်ရေးနှင့် ဒေသတွင်း၊ နိုင်ငံတကာမျက်နှာစာတို့တွင် ပိုမိုနီးကပ်စွာ ပူးပေါင်းဆောင်ရွက်သွားရေးဆိုင်ရာ ကိစ္စရပ်များကို ဆွေးနွေးခဲ့ကြသည်။
ထို့နောက် ဒုတိယဝန်ကြီး ဦးကိုကိုကျော်သည် UNOPS ၏ မြန်မာနိုင်ငံဆိုင်ရာ ယာယီညွှန်ကြားရေးမှူးနှင့် ယာယီဌာနေကိုယ်စားလှယ် Mr. Peter John Cross အား သီးခြားလက်ခံတွေ့ဆုံခဲ့ပြီး မြန်မာအစိုးရနှင့် UNOPS တို့အကြား လက်ရှိပူးပေါင်းဆောင်ရွက်နေသည့် လုပ်ငန်းများအပြင် အနာဂတ်တွင် ပူးပေါင်းဆောင်ရွက်မှုများ ဆက်လက်တိုးမြှင့်နိုင်မည့် အခြေအနေများနှင့်စပ်လျဉ်း၍ အမြင်ချင်းဖလှယ် ဆွေးနွေးခဲ့ကြောင်း သိရသည်။

လေဖိအားနည်းရပ်ဝန်းအရှိန်နှင့် မိုးတိမ်တောင်ဖြစ်ထွန်းမှုတို့ကို ရန်ကုန်တိုင်းအတွင်းနေထိုင်သူများ ကြိုတင်သတိပြုကြရန် မိုးဇလသတိပေး

လာမည့် ၂၄ နာရီအတွင်း အိန္ဒိယနိုင်ငံ၊ ဂျက်ခမ်းပြည်နယ်နှင့် ဩရိဿပြည်နယ်(မြောက်ပိုင်း)တို့ကိုဖြတ်ကျော်မည့် လေဖိအားနည်းရပ်ဝန်းနှင့် မိုးတိမ်တောင်ဖြစ်ထွန်းမှုတို့ကြောင့် မိုးလေဝသဖြစ်စဥ်များဖြစ်ပေါ်နိုင်၍ ရန်ကုန်တိုင်းအတွင်းနေထိုင်သူများ ကြိုတင်သ တိပြုနေထိုင်ကြရန် မိုးဇလက သြဂုတ် ၂၄ ရက်ညပိုင်းတွင် အသိပေးထုတ်ပြန်ခဲ့သည်။
မိုးတိမ်တောင်ဖြစ်ထွန်းမှုသည် ရန်ကုန်တိုင်းအပါအဝင် ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင် ပြည်နယ်နှင့် ရှမ်းပြည်နယ်(မြောက်ပိုင်းနှင့် အရှေ့ပိုင်း) တို့တွင်လည်းဖြစ်ထွန်းလျက်ရှိသည်ဟု အသိပေးခဲ့သည်။
ယင်း မိုးတိမ်တောင်များရွေ့လျားရာနေရာတစ်လျှောက်တွင် မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနှင့် မိုးသီးကြွေခြင်းဖြစ်စဉ်များဖြစ်ပေါ်နိုင်၍ ကြိုတင်သတိပြုကြရန်လည်း မိုးဇလကသတိပေးခဲ့သည်။
မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်နာရီလျင် (၃၅)မိုင်အထိတိုက်ခတ်နိုင်သော ပြင်းများတိုက်ခတ်၍ (၁၁)ပေမှ (၁၃)ပေခန့်အထိရှိသော လှိုင်းများဖြစ်ပေါ်နိုင်သည်ဟုလည်း အသိပေးခဲ့သည်။