ဝုလ်ဗ်ကွင်းလယ်ကစားသမား ဂျော်အိုဂိုးမက်စ်ကို ဇန်နဝါရီမှာခေါ်ယူဖို့ မန်ယူအသင်း ကြိုးပမ်းနေ

မန်ယူအသင်းဟာ ဝုလ်ဗ်အသင်းက ဘရာဇီးလ်ကွင်းလယ်ကစားသမား ဂျော်အိုဂိုးမက်စ်ကို ဇန်နဝါရီစျေးကွက်မှာ ခေါ်ယူဖို့ ကြိုးပမ်းနေကြောင်း သိရပါတယ်။
ဂျော်အိုဂိုးမက်စ်(၂၄ နှစ်)ဟာ ၂၀၂၃ ဇန်နဝါရီမှာ ဖလာမင်ဂိုကနေ ဝုလ်ဗ်အသင်းကို ယူရို(၁၈.၇)သန်းနဲ့ ပြောင်းရွှေ့ခဲ့သူဖြစ်ပြီး လက်ရှိစာချုပ်က ၂၀၃၀ အထိ ဖြစ်တဲ့အပြင် တစ်နှစ်သက်တမ်းထပ်တိုးနိုင်မယ့် သဘောတူညီမှုလည်း ပါဝင်ပါတယ်။
ဂျော်အိုဂိုးမက်စ်က ဝုလ်ဗ်အသင်းရဲ့ အမာခံကစားသမားတစ်ဦးအဖြစ် ခြေစွမ်းပြနေတာကြောင့် မန်ယူအသင်းက ခေါ်ယူဖို့ ကြိုးပမ်းနေခြင်းဖြစ်ပြီး အသင်းနှစ်သင်းကြား ဆွေးနွေးမှုတွေ စတင်နေပြီလို့လည်း သတင်းထွက်နေပါတယ်။
ဂျော်အိုဂိုးမက်စ်က လီဗာပူးလ်အသင်းဟာ သူ့ရဲ့ အိပ်မက်အသင်းဖြစ်ကြောင်း ဝန်ခံခဲ့ဖူးပေမဲ့ မန်ယူအသင်းမှာ ပြောင်းရွှေ့ကစားဖို့လည်း ဆန္ဒရှိနေကြောင်း သိရပါတယ်။
ဝုလ်ဗ်အသင်းက ဇန်နဝါရီစျေးကွက်မှာ အမာခံကစားသမားတွေကို ရောင်းထုတ်လိုခြင်းမရှိပေမဲ့ ဂျော်အိုဂိုုးမက်စ်ကိုတော့ ယူရိုသန်း(၅၀)နဲ့ ရောင်းထုတ်ဖွယ်ရှိကြောင်း သိရပါတယ်။

(၈) ကြိမ်မြောက် MFF Congress နိုဝင်ဘာ (၂၈) ပြုလုပ်မယ်

မြန်မာနိုင်ငံဘောလုံးအဖွဲ့ချုပ် (MFF) ရဲ့ (၈) ကြိမ်မြောက် ကွန်ဂရက်ကို နိုဝင်ဘာ (၂၈) ရက်မှာ ရန်ကုန်မြို့ရှိ Novotel Max ဟိုတယ်မှာ ပြုလုပ်မှာဖြစ်ပါတယ်။
MFF ကွန်ဂရက်ကို မြန်မာနိုင်ငံအိုလံပစ်ကော်မတီ ဥက္ကဋ္ဌ၊ အားကစားနှင့် လူငယ်ရေးရာဝန်ကြီးဌာန ပြည်ထောင်စုဝန်ကြီးလည်း တက်ရောက်မှာဖြစ်ပါတယ်။
MFF ကွန်ဂရက်ကို ကမ္ဘာ့ဘောလုံးအဖွဲ့ချုပ် (FIFA) ဥက္ကဋ္ဌ အင်ဖန်တီနိုက အွန်လိုင်းရုပ်သံကနေ နှုတ်ခွန်းဆက်စကား ပြောကြားမှာဖြစ်ပါတယ်။
MFF ကွန်ဂရက်မှာ မြန်မာ့ဘောလုံးလောကအတွင်း နှစ်ပေါင်းများစွာ တာဝန်ထမ်းဆောင်ခဲ့သူများကို စွမ်းဆောင်ရည်ဆုချီးမြှင့်မှာဖြစ်ပါတယ်။
AFC ရဲ့ Best Grassroots Club Award ဆု ရရှိတဲ့ Future Stars Football Training ကိုလည်း စွမ်းဆောင်ရည်ဆု ချီးမြှင့်မှာဖြစ်ပါတယ်။
ဒါ့အပြင် ၂၀၂၄ ခုနှစ်ရဲ့ ဘဏ္ဏာရေးအစီရင်ခံစာကို ပြန်လည်အတည်ပြုခြင်း၊ ၂၀၂၅ ခုနှစ်အတွင်း မြန်မာ့ဘောလုံးနဲ့ပတ်သက်လို့ ဆောင်ရွက်မှုများကို တင်ပြခြင်း၊ ၂၀၂၅ ခုနှစ်ရဲ့ ရငွေ၊ သုံးငွေ၊ လက်ကျန်စာရင်းများကို တင်ပြခြင်း၊ ၂၀၂၆ ခုနှစ်အတွက် သုံးစွဲမယ့် လျာထားဘဏ္ဏာရေးစာရင်းကို တင်ပြခြင်း၊ အလုပ်အမှုဆောင်တစ်ဦးကို ရွေးချယ်တင်မြှောက်ခြင်း အစရှိတဲ့ လုပ်ဆောင်မှုများကို ပြုလုပ်သွားမှာဖြစ်ကြောင်း သိရပါတယ်။
MFF ကွန်ဂရက်ကို MFF ဥက္ကဋ္ဌ၊ အမှုဆောင်အဖွဲ့ဝင်များ၊ အားကစားဝန်ကြီးဌာနမှ တာဝန်ရှိသူများ၊ မြန်မာ့လက်ရွေးစင်ဘောလုံးသမားဟောင်းကြီးများ၊ မြန်မာ့ဘောလုံးလောကအတွင်းမှ ပုဂ္ဂိုလ်များ၊ ဖိတ်ကြားထားတဲ့ မီဒီယာများတက်ရောက်ကြမှာဖြစ်ပါတယ်။
Photo- MFF

အက်သလက်တီကိုအား ကိုင်တွယ်ပြီးချိန်တွင် ဘယ်ကလပ်အား ကိုင်တွယ်လိုကြောင်း ဒီယေဂိုဆီမြွန်နီ ဖွင့်ဟလာ
=====================

ဒီယေဂိုဆီမြွန်နီက အက်သလက်ကိုမက်ဒရစ်မှ ထွက်ခွာချိန်တွင် အသင်းဟောင်း အင်တာမီလန်အား ကိုင်တွယ်လိုကြောင်း ဖွင့်ဟ ပြောကြားလာပါတယ်။
ဒါ့အပြင် အာဂျင်တီးနားလူမျိုးနည်းပြက အင်တာမီလန်အား ကိုင်တွယ်ရေး ရည်မှန်းချက်မှာ တစ်နေ့တွင် ဖြစ်မြောက်လာမယ်လို့လည်း ဆိုသွားပါတယ်။
ဆီမြွန်နီဦးဆောင်တဲ့ အက်သက်တီကိုမက်ဒရစ်ဟာ ယနေ့ညတွင် မက်ဒရစ်မှာ အင်တာမီလန်အား ဧည့်ခံကစားရပါမယ်။
အာဂျင်တီးနားလူမျိုးနည်းပြဟာ အင်တာမီလန်နှင့်ပွဲမတိုင်မီ သတင်းစာရှင်းလင်းပွဲတွင် တစ်နေ့တွင် အင်တာမီလန်ကို ကိုင်တွယ်လိုကြောင်း ပြောကြားသွားတဲ့အပြင် ပြိုင်ဘက်ရဲ့ အားသာချက်ကိုလည်း ပြောကြားသွားပါတယ်။
အင်တာမီလန်ဟာ ယခုရာသီ ချန်ပီယံလိဂ်တွင် ၄ ပွဲလုံး အနိုင်ရရှိထားပါတယ်။ တဖက်တွင် အက်သလက်တီကိုက လီဗာပူးနှင့် အာဆင်နယ်တို့ကို ရှုံးနိမ့်ထားပါတယ်။
အခြားတစ်ဖက်တွင် ဒီယေဂိုဆီမြွန်နီဟာ ဥရောပတွင် အခြေအနေမကောင်းမှုနှင့်အတူ အက်သလက်တီကိုအနာဂတ်နှင့်ပတ်သက်ပြီး မေးခွန်းထုတ်ခြင်းခံနေရသူလည်း ဖြစ်ပါတယ်။
ဆီမြွန်နီက "ဒါ(အင်တာကို ကိုင်တွယ်ရေး)က ကျွန်တော့်အပေါ် မမူတည်ဘူး။ ဒါပေမယ့် ကျွန်တော့်နည်းပြဘဝကို ကြည့်လိုက်ရင် တစ်နေ့မှာ အင်တာမီလန်ကို ကိုင်တွယ်လာမယ်ဆိုတာ တွေးမြင်မိတယ်။ တစ်နေ့ ဖြစ်လာမယ်လို့ ထင်တယ်"လို့ ဆိုသွားပါတယ်။
ဒါ့အပြင် အင်တာနှင့်ပတ်သက်ပြီး ၎င်းက "အင်တာက ကစားတာ အရမ်းကောင်းတယ်။ သူတို့မှာ စရိုက်ရှိတယ်။ အရမ်းရှင်းလင်းတဲ့ တိုက်စစ်စနစ်ရှိတယ်။ လူအင်အားလည်း တောင့်တယ်။ မီလန်နဲ့ပွဲမှာ တစ်ပွဲလုံး သူတို့ပဲ လွှမ်းမိုးခဲ့တယ်။ အခွင့်အရေးတွေလည်း ရခဲ့တယ်။ သူတို့နိုင်ခဲ့သင့်တယ်(ရှုံးနိမ့်)။ သူတို့က အနိုင်ရဖို့ပဲ ကစားတယ်။ ချန်ပီယံလိဂ်မှာလည်း ကိန်းဂဏန်းတွေက သူတို့ ဘာလဲဆိုတာ ပြသနေတယ်။ အင်တာလို အသင်းတစ်သင်းအတွက် ဒါဘီပွဲမှာ ရှုံးနိမ့်မှုက တွန်းအား ဖြစ်လာစေတယ်။ သူတို့က အရမ်းတောင့်တင်းတဲ့အသင်း ဖြစ်နေလို့ပါ။ သူတို့က စကူဒက်တိုရဖို့ ရေပန်းစားနေသလို ချန်ပီယံလိဂ်မှာလည်း အရမ်းကောင်းလာပါမယ်။ ကျွန်တော်တို့အတွက် ပွဲတိုင်းက အရေးကြီးတယ်။ ဘယ်လို ပြိုင်ဘက်ဆိုတာ အရေးမကြီးပါဘူး။ အခု ရာသီရဲ့ အမြင့်ဆုံးအပိုင်းသို့ ရောက်နေပြီ။ နေရာတော်တော်များများ ပိုကောင်းအောင် လုပ်ရမယ်။ ဒါပေမယ့် အလုပ်ဖြစ်လား မဖြစ်လားဆိုတာ ကြည့်ရမယ်"လို့ ဆိုသွားပါတယ်။
ဆီမြွန်နီဟာ ကစားသမားဘဝတုန်းက အင်တာမီလန်တွင် ကစားခဲ့သူ ဖြစ်ပြီး ၁၀၀၆-၉၇ ရာသီတုန်းက ဥရောပဖလားဆွတ်ခူးရာတွင် အဓိကနေရာမှ ပါဝင်ခဲ့သူ ဖြစ်ပါတယ်။
သူဟာ ၁၉၉၀ ခုနှစ်များတုန်းက အင်တာမီလန်တွင် ရော်နယ်ဒို၊ ဂျာဗီးယားဇနက်တီတို့ကဲ့သို့ ကစားသမားများနှင့် တွဲကစားခဲ့သူလည်း ဖြစ်ပါတယ်။

ဘာစီလိုနာသို့ ပြန်လည်ပြောင်းရွှေ့ရန် သဘောတူညီမှု ရရှိခဲ့တဲ့ လီယွန်နယ်မက်ဆီ
====================

လီယွန်နယ်မက်ဆီဟာ ၂၀၂၃ ခုနှစ်တုန်းက ဘာစီလိုနာသို့ ပြန်လည် ပြောင်းရွှေ့ခဲ့ရန် အပြီးသတ် သဘောတူညီမှု ရရှိခဲ့ဖူးပါတယ်။ ဘာစီလိုနာဟာ ကလပ်ရဲ့သမိုင်းတွင် အကြီးကျယ်ဆုံးကစားသမားအား နူးကမ့်သို့ ပြန်ခေါ်ဆောင်ရေး စာချုပ်ချုပ်ဆိုဖို့ပဲ လိုတော့တဲ့ အခြေအနေအထိ ရောက်ခဲ့ပေမယ့်လည်း ဖြစ်လာခဲ့ခြင်း မရှိပါဘူး။
မက်ဆီဟာ ၂၀၂၁ ခုနှစ်တုန်းက နှစ်နှစ်ဆယ်နီးပါး ကျင်လည်လာခဲ့တဲ့ ဘာစီလိုနာမှ အလွတ်ပြောင်းရွှေ့ကြေးဖြင့် ထွက်ခွာပြီးတဲ့နောက် ပီအက်စ်ဂျီသို့ ပြောင်းခဲ့ပါတယ်။
သူဟာ ပီအက်စ်ဂျီတွင် နှစ်ရာသီကြာ ကစားပြီးနောက်မှာတော့ အမေရိကန်ကလပ် အင်တာမိုင်ယာမီသို့ ရောက်လာပါတယ်။
သူဟာ ၂၀၂၁ ခုနှစ်တုန်းက စာချုပ်သက်တမ်းကုန်ဆုံးချိန်တွင် ဘာစီလိုနာမှာ ဘဏ္ဍာရေးပြဿနာတက်ကာ စာချုပ်သစ်ချုပ်ဆိုရေးမတတ်နိုင်မှုနှင့်အတူ ဝမ်းနည်းကြေကွဲစွာ ထွက်ခွာခဲ့ရတာပါ။
သူဟာ ပီအက်စ်ဂျီတွင် ကစားတဲ့ ၂ နှစ်အတွင်းတွင် ပြည်တွင်းဖလားများ ရရှိခဲ့သလို အာဂျင်တီးနားကို တတိယမြောက် ကမ္ဘာဖလား ရရှိအောင်လည်း ဦးဆောင်နိုင်ခဲ့ပါတယ်။
ယနေ့တွင် Sport ရဲ့ ဖော်ပြလာမှုအရ မက်ဆီဟာ ၂၀၂၃ ခုနှစ် ဇန်နဝါရီလတွင် ထိုစဉ်တုန်းက ဘာစီလိုနာကို ကိုင်တွယ်နေတဲ့ ကစားဖော်ဟောင်းဇာဗီးနှင့် အပြန်အလှန်စကားပြောရာမှ အသင်းဟောင်းသို့ ပြန်ရေး ဆန္ဒပြင်းပြလာခဲ့ခြင်းဖြစ်ကြောင်း သိရပါတယ်။
ဇာဗီးကလည်း မက်ဆီ ပြန်လာပါက အသင်းရဲ့ အဆင့်အတန်းကို ပိုမိုမြင့်တင်နိုင်မယ်လို့ ယုံကြည်နေခဲ့ပါတယ်။
လအတန်ကြာ ၎င်းတို့အကြား အပြန်အလှန် စကားပြောပြီးနောက်မှာတော့ အပြောင်းအရွှေ့ ဖြစ်မြောက်လာမယ်လို့ ယုံကြည်လာရပါတယ်။
ဇာဗီးဟာ မက်ဆီရဲ့ ဖခင်ဂျော့၊ ကလပ်ဥက္ကဌဂျိုအန်လာပေါ်တာတို့နှင့်လည်း စကားပြောခဲ့ပါတယ်။ လာပေါ်တာကလည်း မက်ဆီအား ပြန်လည်ခေါ်ဆောင်ရေးကို အားပေးထောက်ခံခဲ့ပါတယ်။ ဒါ့အပြင် ဘောလုံးဒါရိုက်တာမားသရူးအလီမန်နီကလည်း မက်ဆီအား ခေါ်ယူရေးကို ထောက်ခံခဲ့ပါတယ်။
အားလုံး ထင်မှတ်ထားသလို အဆင်ပြေချောမွေ့နေခဲ့ပြီး မက်ဆီဟာ ၂၀၂၃ ခုနှစ် နွေရာသီတွင် ဘာစီလိုနာသို့ ၂ နှစ်စာချုပ်ဖြင့် ပြောင်းရန်လည်း သဘောတူညီမှု ရခဲ့ပါတယ်။
ဒါပေမယ့် ဧပြီလမှာတော့ အခြေအနေအားလုံး ပြောင်းလဲသွားပါတော့တယ်။ လာလီဂါက ဘာစီလိုနာအား အသုံးစရိတ် ကန့်သတ်ထားမှုနှင့်အတူ မက်ဆီအား ခေါ်ယူခွင့် မပြုလာပါဘူး။
ဘာစီလိုနာဟာလည်း အခြေအနေကို နားလည်လိုက်ပြီး ဘဏ္ဍာရေးတောင့်တင်းလာရေး ကြိုးပမ်းကာ မက်ဆီကို ခေါ်ယူနိုင်ပါက ကစားသမားမှတ်ပုံတင်ရေး ကြိုးပမ်းခဲ့ပါတယ်။
တဖက်တွင် မက်ဆီဟာ ဘာစီလိုနာသို့ ပြောင်းရေး စောင့်ဆိုင်းနေရမှု၊ ဖြစ်လာရန် အာမခံချက် မရှိမှုနှင့်အတူ အသင်းဟောင်းသို့ ပြောင်းရေး အိပ်မက်ကို အဆုံးသတ်ပြီး အင်တာမိုင်ယာမီသို့ ပြောင်းရန် ဆုံးဖြတ်လိုက်ပါတယ်။
လီယွန်နယ်မက်ဆီဟာ မကြာသေးမီတုန်းက အင်တာမိုင်ယာမီနှင့် သုံးနှစ်စာချုပ်ချုပ်ဆိုလိုက်ပြီး ဖြစ်ပေမယ့်လည်း ဘာစီလိုနာသို့ ပြန်လာရေး မဖြစ်နိုင်တာမျိုးတော့ မဟုတ်ပါဘူး။ မက်ဆီအနေဖြင့် မေဂျာလိဂ်ရာသီနားစဉ်အတွင်း ဘာစီလိုနာသို့ ကာလတို အငှားစာချုပ်ဖြင့် ပြောင်းကစားလာနိုင်ပါသေးတယ်။
ဒါပေမယ့် ဘာစီလိုနာဥက္ကဌလာပေါ်တာက မက်ဆီအား ပြန်လည်ခေါ်ယူရေးမှာ မဖြစ်နိုင်တော့ကြောင်း ဆိုထားပါတယ်။

ယနေ့ည အိုလံပီယာကို့စ်နှင့်ပွဲကို ရီးရဲလ်မက်ဒရစ်ရဲ့ ဟွိုက်ဆန်နှင့် ကော့တွိုက်စ်တို့ လွဲချော်မည်
====================

ရီးရဲလ်မက်ဒရစ်ဟာ ယနေ့ည အိုလံပီယာကို့စ်နှင့် ချန်ပီယံလိဂ်ပွဲစဉ်တွင် သီဘောက်ကော့တွိုက်စ်နှင့် ဒိန်းဟွိုက်ဆန်တို့ မပါဝင်လာမှုနှင့်အတူ ကြီးမားတဲ့ ထိုးနှက်ချက် ကြုံနေရပါတယ်။
အသက် ၃၃ နှစ်ရှိ နံပါတ်တစ် ဂိုးသမားကော့တွိုက်စ်မှာ အစာအိမ်နှင့် အူလမ်းကြောင်း ရောင်ရမ်းခြင်းတို့ကြောင့် ယနေ့ည Georgios Karaiskakis Stadium တွင် ကစားရမယ့်ပွဲစဉ်မှာ ပါဝင်လာနိုင်မှာ မဟုတ်ပါဘူး။
ဒါ့အပြင် El Desmarque ရဲ့ ဖော်ပြလာမှုအရ ကော့တွိုက်စ်ဟာ အင်္ဂါနေ့တုန်းက အသင်းနှင့်အတူ လေ့ကျင့်ခန်းဆင်းနိုင်ခဲ့ခြင်း မရှိပေမယ့်လည်း ယခုအပတ်အကုန် ဂီရိုနာနှင့် ရင်ဆိုင်ရမယ့် လာလီဂါပွဲမှာတော့ ပါဝင်လာနိုင်မှာ ဖြစ်ကြောင်း သိရပါတယ်။
ကောတွိုက်စ် အနားယူလာရမှုနှင့်အတူ ဇာဗီးအလွန်ဆိုဟာ ယူကရိန်းဂိုးသမားအင်ဒရီလူနန်ကို ပွဲထွက်ဂိုးသမားအဖြစ် အသုံးပြုလာပါမယ်။ အလွန်ဆိုဟာ ယခုရာသီ လာလီဂါနှင့် ချန်ပီယံလိဂ်ပွဲအားလုံးတွင် ကော့တွိုက်စ်ကို ဦးစားပေးဂိုးသမားအဖြစ် အသုံးပြုလာခဲ့တာပါ။ ဒါပေမယ့် လူနန်မှာ ကော့တွိုက်စ် အနားယူနေရမှုနဲ့အတူ အခွင့်အရေး ရရှိလာပြီလည်း ဖြစ်ပါတယ်။
လူနန်ဟာ အသက် ၁၉ နှစ်အရွယ် ၂၀၁၈ ခုနှစ်တုန်းက ကော့တွိုက်စ်နှင့်အတူ ရီးရဲလ်မက်ဒရစ်သို့ ရောက်လာသူ ဖြစ်ပါတယ်။ အသက် ၂၆ နှစ်ရှိ ဂိုးသမားဟာ ၂၀၂၃-၂၄ ရာသီတွင် ကာလိုအန်ဆယ်လော့တီလက်အောက်တွင် ချန်ပီယံလိဂ်ဖလားနှင့် လာလီဂါဖလားတို့ ရရှိအောင် အဓိကနေရာမှ စွမ်းဆောင်ခဲ့သူလည်း ဖြစ်ပါတယ်။
ယနေ့ညပွဲစဉ်ကို ကော့တွိုက်စ်အပြင် ဗဟိုနောက်ခံလူဒိန်းဟွိုက်ဆန်မှာလည်း လွဲချော်လာပါမယ်။ ကြံ့ခိုင်မှု ပြဿနာနှင့် ရင်ဆိုင်ရကာ စပိန်အသင်းမှ နုတ်ထွက်ခဲ့ရတဲ့ ဟွိုက်ဆန်မှာလည်း ယနေ့ညပွဲစဉ်ကို လွဲချော်လာပါမယ်။
အလွန်ဆိုဟာ ဟွိုက်ဆန်အပြင် အန်တိုနီယိုရူဒီဂါ၊ ဒေးဗစ်အလာဘာ၊ အီဒါမီလီတာအိုတို့မှာလည်း အနားယူနေရမှုနဲ့အတူ ဗဟိုခံစစ်အတွက် ကြံ့ခိုင်မှုပြည့်ဝသူအဖြစ် ရအူးလ်အဆန်စီယိုတစ်ဦးတည်းသာ ရှိပါတော့တယ်။
အလွန်ဆိုဟာ အိုလံပီယာကို့စ်နှင့်ပွဲတွင် ဗဟိုခံစစ်မှာ အဆန်စီယိုအား အယ်ဗာရိုကာရီရက်စ်အား အသုံးပြုလာနိုင်ပါတယ်။ အလွန်ဆိုဟာ ဘယ်နောက်ခံလူကာရီရက်စ်အား ဗဟိုခံစစ် ဘယ်နောက်ခံလူအဖြစ် အသုံးပြုထားပြီးလည်း ဖြစ်ပါတယ်။

ဒူးဒဏ်ရာကြောင့် နှစ်အကုန်အထိ ထပ်မံ နားရဦးမယ့် နေမာ
=====================

ဆန်းတို့စ်ဟာ နေမာမှာ ဒူးဒဏ်ရာကြောင့် နှစ်အကုန်အထိ အနားယူလာရတော့မှာ ဖြစ်လို့ ကြီးမားတဲ့ ထိုးနှက်ချက် ကြုံလာရပါတယ်။
ဘရာဇီးစီးရီးအေတွင် တန်းမဆင်းရရေး တိုက်ပွဲဝင်နေရတဲ့ ဆန်းတို့စ်ဟာ ရာသီအဆုံးအဖြတ်ကာလတွင် နေမာကို လက်လွှတ်ဆုံးရှုံးလာရမှာလည်း ဖြစ်ပါတယ်။
အသက် ၃၃ နှစ်ရှိနေမာဟာ ကစားသမားဘဝစတင်ရာ ဆန်းတို့စ်သို့ ပြန်လည်ပြောင်းရွှေ့လာပြီးနောက် ဒဏ်ရာပြဿနာများနှင့် ဆက်တိုက် နပန်းလုံးလာခဲ့ရသူလည်း ဖြစ်ပါတယ်။
နေမာဟာ ၂၀၂၃ ခုနှစ် စက်တင်ဘာလတုန်းက ဘရာဇီးအတွက် ကစားစဉ် ဒူးအရွတ်ဒဏ်ရာရရှိကာ တစ်နှစ်ခွဲကြာ အနားယူခဲ့ရသူ ဖြစ်ပြီး ၇ ပွဲသာ ကစားနိုင်ခဲ့ပြီးနောက် စာချုပ်ဖျက်သိမ်းခြင်းခံခဲ့ရပါတယ်။
ဆန်းတို့စ်ဟာ ဘရာဇီးစီးရီးအေသို့ ပြန်တက်လှမ်းလာပြီးနောက် နေမာကို ခေါ်ယူကာ ကလပ်ရဲ့ အဆင့်အတန်းကို မြှင့်တင်ရန် ရည်မှန်းထားခဲ့ပေမယ့်လည်း ထင်မှတ်ထားသလို မဖြစ်လာခဲ့ပါဘူး။
နေမာမှာ ဆန်းတို့စ်သို့ ရောက်လာပြီးနောက် ၂၅ ပွဲတည်းသာ ကစားထားနိုင်ပြီး ၇ ဂိုးတည်းသာ သွင်းထားနိုင်ပါတယ်။ သူဟာ ဆန်းတို့စ်အတွက် ကစားပြီးနောက် ဒဏ်ရာကြောင့် ဆက်တိုက် အနားယူလာခဲ့ရတာလည်း ဖြစ်ပါတယ်။
သူဟာ ဆန်းတို့စ်တွင် ဒဏ်ရာပြဿနာများနှင့် ရုန်းကန်ရမှုနှင့်အတူ ဘရာဇီးလက်ရွေးစင်အသင်းတွင် ပြန်လည် ကစားခွင့် ရရှိရေး ကာလိုအန်ဆယ်လော့တီကို သက်သေပြရေး ခက်ခဲနေပါတယ်။
နေမာဟာ တနင်္လာနေ့တုန်းက အင်တာနေစီယွန်နယ်နှင့် တစ်ဂိုးစီသရေကျတဲ့ပွဲကို စတင်လွဲချော်လာပါတယ်။
ယခု GloboEsporte ရဲ့ ဖော်ပြလာမှုအရ နေမာဟာ ဘယ်ဖက်ဒူးဒဏ်ရာရရှိလာတာ ဖြစ်ပြီး နှစ်ကုန်အထိ အနားယူလာရမယ်လို့ သိရပါတယ်။ အသက် ၃၃ နှစ်ရှိ ကစားသမားဟာ နောက်ဆုံးကစားခဲ့တဲ့ မီရက်စ်ဆိုလ်နှင့်ပွဲတွင် နောက်ခံလူတစ်ဦးအား လိမ်ခေါက်ကျော်ဖြတ်ရန် ကြိုးပမ်းစဉ် ဒဏ်ရာရရှိသွားတာလည်း ဖြစ်ပါတယ်။
သူဟာ ယင်းပွဲကို ပွဲချိန်ပြည့်ကစားသွားနိုင်ခဲ့ပေမယ့်လည်း ပွဲအပြီး စစ်ဆေးချိန်မှာတော့ ပြင်းထန်နေကြောင်း တွေ့ရပါတယ်။
နေမာ မကစားနိုင်မှုနှင့်အတူ ဆန်းတို့စ်ဟာ ၂၀၂၅-၂၆ ရာသီလက်ကျန်ပွဲ ၃ ပွဲတွင် တန်းမဆင်းရရေးအတွက် အပြင်းအထန် တိုက်ပွဲဝင်လာရတော့မှာလည်း ဖြစ်ပါတယ်။

ရှုံးပွဲမရှိသေးတဲ့ ဘိုင်ယန်နှင့်ပွဲတွင် ဟယ်ရီကိန်းကို ထိန်းချုပ်ရန် စီစဉ်ထားကြောင်း အာဆင်နယ်နောက်ခံလူတမ်ဘား ဖွင့်ဟလာ
===================

ဂျူရီယန်တမ်ဘားက ယနေ့ည ဘိုင်ယန်မြူးနစ်နှင့် ရင်ဆိုင် ကစားရမယ့် ချန်ပီယံလိဂ်ပွဲစဉ်တွင် ကမ္ဘာ့အကောင်းဆုံးကစားသမားများထဲမှ တစ်ဦးဖြစ်တဲ့ ဟယ်ရီကိန်းအား ထိန်းချုပ်နိုင်ရေး စီစဉ်ထားကြောင်း ပြောကြားသွားပါတယ်။
အာဆင်နယ်ဟာ ယခုရာသီ ချန်ပီယံလိဂ် ၄ ပွဲလုံး နိုင်ပွဲ ရရှိထားပြီး ၁၁ ဂိုးသွင်းထားနိုင်ကာ တစ်ဂိုးမျှ ပေးထားရခြင်း မရှိပါဘူး။ တဖက်တွင် ဘိုင်ယန်မြူးနစ်ကလည်း ၄ ပွဲလုံး အနိုင်ရရှိထားပြီး တိုက်စစ်အကောင်းဆုံးအသင်းအဖြစ် ရပ်တည်နေပါတယ်။
ဘိုင်ယန်မြူးနစ်ဟာ ဘွန်ဒက်စ်လီဂါ ၁၁ ပွဲတွင် ၁၀ ပွဲအနိုင်ရရှိထားပြီး ၄၁ ဂိုးအထိ သွင်းထားနိုင်ပါတယ်။ အာဆင်နယ်မှာလည်း ပရီးမီးယားလိဂ်တွင် ဒုတိယနေရာမှ ချဲလ်ဆီးကို ၆ မှတ်အထိ ဖြတ်ထားပါတယ်။
ယနေ့တွင် ချန်ပီယံလိဂ်တွင် အကောင်းဆုံးအသင်းနှစ်သင်း ထိပ်တိုက်တွေ့လာကြမှာ လည်း ဖြစ်ပါတယ်။
ယနေ့ညပွဲစဉ်တွင် ယခုရာသီ ပြိုင်ပွဲအရပ်ရပ်တွင် ၆ ဂိုးတည်းသာပေးထားရမှုကြောင့် ခံစစ်ကောင်းမွန်မှုအတွက် ချီးကျူးခံနေရတဲ့ အာဆင်နယ်ခံစစ်အတွက် အကြီးမားဆုံးစိန်ခေါ်မှုက အင်္ဂလန်အသင်းခေါင်းဆောင်ဟယ်ရီကိန်းကို ထိန်းချုပ်ရေး ဖြစ်ပါတယ်။
အသက် ၃၂ နှစ်ရှိ ဟယ်ရီကိန်းဟာ ယခုရာသီတွင် ကလပ်နှင့် နိုင်ငံအတွက် ၁၉ ပွဲကစားထားရာတွင် ၂၆ ဂိုးအထိ သွင်းထားနိုင်ပါတယ်။
တမ်ဘားက "လွယ်တော့ မလွယ်ကူလာပါဘူး။ သူက အံ့ဩစရာကောင်းတဲ့ တိုက်စစ်မှူးတစ်ဦးပါ။ ဒါကို လူတိုင်း သိတယ်။ သူ့မှာ အရည်အသွေးတွေ အများကြီး ရှိတယ်။ သူက ဒါကို ကာလရှည်ကြာ လုပ်လာခဲ့တာပါ။ အခု ဘိုင်ယန်မြူးနစ်မှာ သူက ကမ္ဘာ့အကောင်းဆုံးကစားသမားတွေထဲက တစ်ဦး ဖြစ်နေပါတယ်။ ဒီတော့ ကျွန်တော်တို့အတွက် အသင်းလိုက်အနေနဲ့ ကောင်းမွန်တဲ့ စိန်ခေါ်မှု တစ်ခု ဖြစ်လာမှာပါ။ ခံစစ်သမားတစ်ဦးအနေနဲ့ သူ့ကို တားဆီးသွားမယ်။ ဟယ်ရီကိန်းလို တိုက်စစ်မှူးတစ်ဦးနဲ့ ရင်ဆိုင်ဖို့ အခွင့်အရေး ကြုံလာတဲ့အခါ သူက ပြောစရာ ဖြစ်လာပါတယ်။ သူက အန္တရာယ်အရှိဆုံးကစားသမားတွေထဲက တစ်ဦးဖြစ်လို့ ခံစစ်သမားတွေအနေနဲ့ သူနဲ့ပတ်သက်ပြီး ဆွေးနွေးကြပါတယ်။ အခြားပွဲတွေမှာလည်း ကျွန်တော်တို့ဟာ ပြိုင်ဘက် ကစားသမားတွေနဲ့ပတ်သက်ပြီး သူတို့ ကစားပုံဘယ်လို ဆိုပြီး ဆွေးနွေးကြတယ်။ ဒီပွဲအတွက်လည်း ဒီအတိုင်းပါပဲ"လို့ ပြောကြားသွားပါတယ်။

အလက်ဇန္ဒားအီဆက်ခ်ထံမှ ပေါင် ၁.၂ သန်းတန်ဖိုးရှိ တန်ဖိုးရှိပစ္စည်းများ ခိုးယူသွားသူများ ၁ ပေါင်တည်းသာ ပြန်ပေးရန် ပြစ်ဒဏ်ချမှတ်ခြင်းခံရ
==================

အလက်ဇန္ဒားအီဆက်ခ်ထံမှ ပေါင် ၁.၂ သန်းတန်ဖိုးရှိ အဖိုးတန်ပစ္စည်းများကို ခိုးယူခဲ့ကြတဲ့ သူခိုးများဟာ ၁ ပေါင်တည်းသာ ပြန်ပေးရန် အမိန့်ချမှတ်ခြင်းခံလာရပါတယ်။
အသက် ၂၆ နှစ်ရှိ အီဆက်ခ်ဟာ ၂၀၂၄ ခုနှစ် ဧပြီလတုန်းက နော်သမ်ဘာလမ်းနေအိမ် ဖောက်ထွင်းခြင်းခံခဲ့ရတာပါ။
သူဟာ ထိုစဉ်တုန်းက နယူးကာဆယ်တွင် ကစားနေခဲ့တာ ဖြစ်ပြီး နေအိမ်သို့ ည ၁၀ နာရီတွင် ပြန်လည်ရောက်ရှိလာချိန်မှာ ဖောက်ထွင်းခံထားရကြောင်း သိရှိခဲ့တာလည်း ဖြစ်ပါတယ်။
Newcastle Crown Court တွင် ကြားနာမှုအရ အီဆက်ခ်နေအိမ်လုံခြုံရေးကင်မရာများမှ ရိုက်ကူးထားတဲ့ ဗီဒီယိုမှတ်တမ်းများအရ ဖောက်ထွင်းသမားများဟာ ယင်းဖောက်ထွင်းမှုတွင် လူ ၃ ဦးနှင့် ယာဉ်မောင်း အမျိုးသမီး ၁ ဦးတို့ ပါဝင်တာ တွေ့ရပါတယ်။
ဖောက်ထွင်းသမားများဟာ ဒါရက်စ်ဟေးလ်ရှိ အီဆက်ခ်ရဲ့ နေအိမ်မှ ပေါင် ၆၈၀၀၀ တန်ဖိုးရှိ လက်ဝတ်ရတနာများ၊ ငွေသား ပေါင် ၁၀၀၀၀ နှင့် ပေါင် ၁၂၀၀၀၀ တန်ဖိုးရှိ Audi RS6 ကားကို ရယူသွားခဲ့ကြပါတယ်။
ဖောက်ထွင်းမှုတွင် ပါဝင်ကြသူများမှာ ညီအစ်ကိုတွေ ဖြစ်ကြတဲ့ ဗလန်တီနိုနီကိုလော့ဗ်(၃၂ နှစ်)၊ ဂီယာကိုမိုနီကိုလော့ဗ်(၂၈ နှစ်)၊ အစ်မ ဂျီလာဂျာဗိုနိုဗစ်(၄၃ နှစ်)နှင့် သား ချာလီဂျိုဗာနိုဗစ်(၂၃ နှစ်)တို့ ပါဝင်ခဲ့ကြပါတယ်။
၎င်းတို့ဟာ ယင်းရက်သတ္တပတ်အတွင်းတွင်ပင် အရှေ့မြောက်ပိုင်းတွင် အခြားဖောက်ထွင်းမှုနှစ်ခုကိုလည်းကျူးလွန်ခဲ့ကြပါတယ်။
၎င်းတိုဟာ ပိုင်ရှင်များ မရှိချိန်တွင် ယင်းနေအိမ်မှ ပေါင် ၁ သန်း တန်ဖိုးရှိ အိတ်များ၊ အဝတ်အစားများ၊ လက်ဝတ်ရတနာများအပြင် CBE ဆုတံဆိပ်တို့ကို ရယူခဲကြပါတယ်။
ဒါ့အပြင် ၎င်းတိုဟာ အခြားနေအိမ်တစ်လုံးမှ ပေါင် ၁ သိန်းတန်ဖိုးရှိ ပစ္စည်းများ ခိုးယူခဲ့ကြပါတယ်။
ယင်းနောက် ၎င်းတို့ဟာ အီဆက်ခ်ကို နှစ်ရက်တိုင်တိုင် စောင့်ကြည့်ကာ သွားလာလှုပ်ရှားမှုများကို စောင့်ကြည့်ကာ ပစ်မှတ်ထားခဲ့ကြပါတယ်။
၎င်းတို့ဟာ လက်အိတ်များ၊ မျက်နှာဖုံးများ၊ ခိုးယူထားတဲ့ ကားနံပါတ်ပြားတို့ကို အသုံးပြုကာ ဖောက်ထွင်းမှုများ ကျူးလွန်လာကြတာလည်း ဖြစ်ပါတယ်။
ဒါပေမယ့် ၎င်းတိုဟာ အီဆက်ခ်ရဲ့ နေအိမ်ကို ဖောက်ထွင်းပြီး ၉ ရက်အကြာ ဧပြီလ ၁၃ ရက်အကြာတွင် ဘာမင်ဂမ်မှာ ဖမ်းဆီးခြင်းခံခဲ့ရပြီးနောက် ထောင်ဒဏ် ၆ နှစ်မှ ၁၀ နှစ်အတွင်း ချမှတ်ခြင်းခံခဲ့ရပါတယ်။
ဒါပေမယ့် ၎င်းတို့ဟာ တနင်္လာနေ့မှာတော့ Proceeds of Crime Act အရ အမှုကို ပြန်လည်ကြားနာရန် ရုံးတက်ခဲ့ရပါတယ်။
အစိုးရရှေ့နေ ဒါနီရယ်ကော်ဒေးက ဖောက်ထွင်းဂိုဏ်းမှာ ဒုစရိုက်မှုများမှ ပေါင် ၁၂၆၆၂၇၅၉၃ ရရှိခဲ့ကြောင်း ဆိုသွားပါတယ်။
တရားသူကြီးက ချာလီဂျိုဗာနိုဗစ်အား ရဲတပ်ဖွဲ့က နေအိမ်စီးနင်းခံစဉ် ထိန်းသိမ်းနိုင်ခဲ့တဲ့ ပေါင် ၁၁၃၅၅၀ ကို ပြန်ပေးရန် အမိန့်ချမှတ်ခဲ့ပါတယ်။
တဖက်တွင် ကျန် ဖောက်ထွင်းသမား ၃ ဦးဆီမှ ပိုင်ဆိုင်မှုတစုံတရာ တွေ့ရှိခဲ့ခြင်း မရှိပါဘူး။
ဒါကြောင့်လည်း တရားသူကြီးက ကျန် မောင်နှမသုံးဦးအား ၁ ပေါင်တည်းသာ ပေးရန် အမိန့်ချမှတ်ခဲ့ပါတယ်။ တကယ်လို့ ယင်း ၁ ပေါင်အား မပေးနိုင်ပါကလည်း ထောင်ဒဏ် ၇ ရက်ကျခံရန်လည်း အမိန့်ချမှတ်ခဲ့ပါတယ်။

ပီအက်စ်ဗွီကို ရှုံးနိမ့်ပြီးနောက် ဘယ်သူမှ မလိုချင်တဲ့ မှတ်တမ်းဆိုးတွေကို ပိုင်ဆိုင်လာတဲ့ လီဗာပူး
====================

လီဗာပူးဟာ ရာသီအစတုန်းက ၇ ပွဲဆက် နိုင်ပွဲ ရရှိပြီး တာထွက်ကောင်းခဲ့ကာ ပရီးမီးယားလိဂ်ချန်ပီယံဘွဲ့ကို ကာကွယ်နိုင်မယ်လို့ ယူဆခြင်းခံခဲ့ရုံသာမက ချန်ပီယံလိဂ်မှာလည်း အဆင့်တစ်ခုသို့အထိ တက်ရောက်နိုင်မယ်လို့ ယုံကြည်ခဲ့ရပါတယ်။
ဒါပေမယ့် ယခု လီဗာပူးဟာ အန်ဖီးလ်ကွင်းမှာ ပီအက်စ်ဗွီအသင်းကို ၄-၁ ဖြင့် အရှက်တကွဲ ရှုံးနိမ့်ပြီးချိန်မှာတော့ ၇၁ နှစ်အတွင်း အဆိုးရွားဆုံး ရလဒ်ပိုင်ဆိုင်ထားပြီ ဖြစ်ပါတယ်။
လီဗာပူးဟာ ၁၉၅၃-၅၄ ရာသီနောက်ပိုင်းတွင် ပထမဆုံးအကြိမ်အဖြစ် ၁၂ ပွဲမှာ ၉ ပွဲအထိ ရှုံးနိမ့်ထားပါတယ်။ ဒါ့အပြင် ၎င်းတို့ဟာ ၁၉၅၃ ခုနှစ် ဒီဇင်ဘာလနောက်ပိုင်းတွင် ပြိုင်ပွဲအရပ်ရပ်တွင် ဂိုးကွာခြားချက် ၃ ဂိုးဖြင့် သုံးပွဲဆက် ပထမဆုံးအကြိမ် ရှုံးနိမ့်လာပါတယ်။
လီဗာပူးဟာ မာဆေးဆိုက်ရှိ အန်ဖီးလ်ကွင်းမှာ ငါးရက်အတွင်း ၇ ဂိုးအထိလည်း ‌ေးထားရပြီ ဖြစ်ပါတယ်။
ပီအက်စ်ဗွီရှုံးပွဲအပြီးတွင် လီဗာပူးအလယ်တန်းကာတစ်ဂျုံးစ်က "အရိုးသားဆုံးပြောရရင် ကျွန်တော့်မှာ အဖြေတွေ မရှိပါဘူး။ ဒါက လက်မခံနိုင်စရာပါ။ ရင်ထဲမှာ ဒေါသအလိပ်လိုက် ထွက်နေတယ်။ အခုအချိန်မှာ ပြောစရာ စကားမရှိဘူး"လို့ ပြောကြားသွားပါတယ်။
အန်းဆလော့ဟာ လီဗာပူး ပထမဆုံးရာသီတွင် ပရီးမီးယားလိဂ်ချန်ပီယံ ဖြစ်ခဲ့‌ေပေမယ့် ယခုအခါမှာတော့ ရလဒ်ဆိုးရွားနေမှုနှင့်အတူ အနာဂတ် မရေမရာ ဖြစ်လာပြီလည်း ဖြစ်ပါတယ်။
ဒတ်ချ်လူမျိုးနည်းပြဟာ အသင်းအတွင်း ကြုံနေရတဲ့ ပြဿနာတွေကို အမြန်ဆုံးဖြေရှင်းဖို့ နည်းလမ်းရှာဖွေပြီး လမ်းကြောင်းမှန်ပေါ်သို့ ပြန်ပို့ရေး ဖိအားကြုံနေရပါတယ်။
လီဗာပူးဟာ နောက်ဆုံး ၇ ပွဲတွင် ၆ ပွဲအထိ ရှုံးပွဲ ကြုံထားရတာပါ။ နိုဝင်ဘာလအစောပိုင်းတုန်းက လီဗာပူးဟာ ဗီလာနှင့် ရီးရဲလ်မက်ဒရစ်တို့ကို အနိုင်ရပြီးတဲ့နောက် စိတ်ဓာတ်ပိုင်း ပြန်လည်မြင့်တက်ကာ လမ်းကြောင်းမှန်ပေါ်သို့ ပြန်ရောက်လာပြီလို့ ယူဆခဲ့ရပါတယ်။
ဒါပေမယ့် လီဗာပူးတို့ လမ်းကြောင်းမှန်ပေါ် ရောက်တာ ယာယီမျှသာ ဖြစ်ပြီး နိုင်ငံတကာပွဲစဉ်တွေ မတိုင်မီ မန်စီးတီးကို ၃-၀ ဂိုးဖြင့် အရေးနိမ့်လာပါတယ်။
ယင်းနောက် နိုင်ငံတကာပွဲစဉ်တွေ အပြီးမှာ ရှောင်ဒိုက်ချီရဲ့ နော်တင်ဟမ်ဖောရက်စ်ကို ထပ်မံ ရှုံးနိမ့်ပြီးနောက် ပရီးမီးယားလိဂ်အမှတ်ပေးဇယားအဆင့် ၁၂ နေရာသို့ပါ ရောက်လာပါတယ်။
အခု ပီအက်စ်ဗွီကို အိမ်ကွင်းရှုံးနိမ့်ပြီးချိန်မှာတော့ ချန်ပီယံလိဂ်မှာလည်း အဆင့် ၁၃ နေရာသို့အထိ ရောက်လာပါတယ်။
ယင်းသို့ ရလဒ်ဆိုးရွားနေပေမယ့်လည်း လီဗာပူးဟာ အန်းဆလော့ကို အရင်စလို ထုတ်ပယ်လာမယ့် အခြေအနေမှာတော့ မရှိပါဘူး။
ဆလော့အတွက် နောက်ထပ် ပြဿနာကတော့ နွေရာသီတုန်းက ပေါင်သန်းလေးရာကျော် အသုံးပြုပြီး ခေါ်ယူထားတဲ့ ကစားသမားအများစုက အလုပ်ဖြစ်မနေတာပါ။
စံချိန်တင် ပြောင်းရွှေ့ကြေးဖြင့် ခေါ်ယူထားတဲ့ အလက်ဇန္ဒားအီဆက်ခ်နှင့် ဖလိုရီယန်ဝါ့ဇ်တို ယခုတိုင် ပရီးမီးယားလိဂ်မှာ ဂိုးသွင်းနိုင်ခြင်း မရှိသေးသလို ဖန်တီးမှုလည်း မပြုလုပ်နိုင်သေးပါဘူး။ ဒါ့အပြင် ဘယ်နောက်ခံလူမီလို့စ်ကာကတ်ဇ်ကလည်း ရုန်းကန်နေရပါတယ်။
ယခုအခါ ဖီယင်နုနည်းပြဟောင်းဟာ ဒတ်ချ်ထိပ်သီး ပီအက်စ်ဗွီနှင့် ရင်ဆိုင်ရတဲ့ နောက်ဆုံး ၈ ပွဲမှာ ၁ ပွဲတည်းပဲ (သုံးပွဲသရေ၊ ၄ ပွဲရှံး)အနိုင်ရထားတဲ့မှတ်တမ်းပိုင်ဆိုင်ထားပါတယ်။
ဒီလို ရလဒ်ဆိုးရွားမှုတွေကြုံရပေမယ့်လည်း ဆလော့ကတော့ အနာဂတ်နှင့်ပတ်သက်ပြီး တွေးပူမနေပါဘူး။ အသင်းရဲ့ အခြေအနေကို အလှည့်အပြောင်း ဖြစ်အောင် လုပ်ဖို့ပဲ အာရုံစိုက်နေပါတယ်။
အသက် ၄၇ နှစ်ရှိ နည်းပြက "ပိုကောင်းအောင် လုပ်ရမယ်။ တစ်နေ့ချင်းစီ အသင်းကို ပိုကောင်းအောင် ကြိုးစားနေတယ်။ ဒီအတွက်ပဲ အဓိက အာရုံစိုက်ထားပါတယ်"လို့ ပြောကြားသွားပါတယ်။
လီဗာပူးဟာ ပီအက်စ်ဗွီကို မရှုံးနိမ့်မီ ချန်ပီယံလိဂ် ၄ ပွဲတွင် ၃ ပွဲ အနိုင်ရထားခဲ့တာပါ။
ဒါပေမယ့် ပီအက်စ်ဗွီကို ရှုံးနိမ့်ပြီးနောက်မှာတော့ ထိပ်ဆုံး ၈ သင်းစာရင်းကနေ ဖယ်ရှားခံလာရပါတယ်။ လီဗာပူးဟာ ချန်ပီယံလိဂ်ရှုံးထွက်အဆင့်သို့ တက်ရေးအတွက် အင်တာမီလန်၊ မာဆေးတို့နှင့် ရင်ဆိုင်ရပါဦးမယ်။
လီဗာပူးဟာ တနင်္ဂနွေနေ့မှာ လန်ဒန်သို့ သွားရောက်ပြီး ဝက်စ်ဟမ်းနှင့် ပွဲကြပ်ကစားရပါဦးမယ်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ
********************************************
🇲🇲 ရည်ညွှန်းလက်လီဈေးနှုန်းများ
💢ရန်ကုန်မြို့
💢မန္တလေးမြို့
💢နေပြည်တော်
💢တိုင်းဒေသကြီး/ ပြည်နယ်မြို့တော်များ