😋

ရက်ရှ်ဖို့ဒ်ရဲ့ ပြောင်းရွှေ့ကြေးကို ယူနိုက်တက် လျှော့ပေးဖို့မရှိ

ဖေဖော်ဝါရီ ၁၈

ဘာစီလိုနာအသင်းအနေနဲ့ ရက်ရှ်ဖို့ဒ်ကို အသင်းမှာ ဆက်ထိန်းထားချင်ရင် နွေရာသီမှာ သဘောတူညီထားတဲ့ ပြောင်းရွှေ့ကြေးကို ပေးချေရမှာဖြစ်ပြီး ယူနိုက်တက်အသင်းက သူ့ရဲ့ပြောင်းရွှေ့ကြေးကို လျှော့ပေးဖို့ မရှိဘူးလို့ ESPN က ဖော်ပြထားပါတယ်။

ပြီးခဲ့တဲ့နွေရာသီမှာ ယူနိုက်တက်အသင်းကနေ ရာသီကုန်အထိ အငှားစာချုပ်နဲ့ ရောက်ရှိလာခဲ့တဲ့ ရက်ရှ်ဖို့ဒ်ကို ဘာစီလိုနာအသင်းဟာ ရာသီကုန်ချိန်မှာ ယူရိုသန်း ၃၀ ကနေ ၃၅ သန်းကြားနဲ့ အပြီးသတ်ဝယ်ယူဖို့ ရွေးချယ်ခွင့် ရှိနေတာပါ။

ဘာစီလိုနာအသင်းဟာ ရက်ရှ်ဖို့ဒ်အတွက် ယူနိုက်တက်အသင်းနဲ့ ပြန်လည်ဆွေးနွေးပြီး ဒီပြောင်းရွှေ့ကြေးထက် နည်းပါးတဲ့ ပြောင်းရွှေ့ကြေးကို ညှိနှိုင်းဖို့ မျှော်လင့်နေတာ ဖြစ်ပါတယ်။

ယူနိုက်တက်အသင်းကတော့ ဘာစီလိုနာအသင်းနဲ့ ပြန်လည်ဆွေးနွေးဖို့ ဆန္ဒမရှိဘဲ ရက်ရှ်ဖို့ဒ်ကို နွေရာသီထက် ကျော်လွန်ပြီး စပိန်မှာ ဆက်ထိန်းသိမ်းချင်ရင် ပြောင်းရွှေ့ကြေး အပြည့်အဝ ပေးချေဖို့ မျှော်လင့်နေတာပါ။

ရက်ရှ်ဖို့ဒ်ဟာ ဘာစီလိုနာအသင်းမှာ ဆက်နေချင်တဲ့ သူ့ရဲ့ဆန္ဒကို ပြီးခဲ့တဲ့ အင်တာဗျူးတွေမှာ ထုတ်ပြောထား ပါတယ်။

ရက်ရှ်ဖို့ဒ်ဟာ နည်းပြဟောင်း အာမိုရင် လက်ထက်မှာ ယူနိုက်တက်အသင်းအတွက် ပွဲကစားခွင့် ဆုံးရှုံးခဲ့ပြီး ၂၀၂၅ ခုနှစ်၊ ဇန်နဝါရီမှာ အက်စတွန်ဗီလာအသင်းထံ အငှားကစားခဲ့ရသလို ပြီးခဲ့တဲ့နွေရာသီမှာ ဘာစီလိုနာအသင်းထံ အငှားနဲ့ရောက်ရှိလာတာ ဖြစ်ပါတယ်။

ယူနိုက်တက်အသင်းဟာ နည်းပြ အပြောင်းအလဲ ပြုလုပ်ထားပေမယ့် ရက်ရှ်ဖို့ဒ်အပေါ် သူတို့ရဲ့ရပ်တည်ချက် ပြောင်းလဲမှု မရှိဘူးလို့ သိရပါတယ်။

ယူနိုက်တက်အသင်းနဲ့ ၂၀၂၈ ခုနှစ်အထိ စာချုပ်ရှိနေတဲ့ ရက်ရှ်ဖို့ဒ်ဟာ ဘာစီလိုနာအသင်းမှာ ပြိုင်ပွဲစုံ ၃၄ ပွဲ ကစားထားပြီး ၁၀ ဂိုး သွင်းယူကာ ဂိုးဖန်တီးမှု အများအပြား ပြုလုပ်ထားပါတယ်။


Source: ESPN

ပုံ - ရက်ရှ်ဖို့ဒ်ကို တွေ့ရစဉ်

ယနေ့ ရွှေဈေးနဲ့ နိုင်ငံခြားငွေလဲနှုန်းများ

( ၂၀၂၆ - ဖေဖော်ဝါရီ ၁၈ ၊ နံနက် ၁၀ နာရီ)

#ရွှေဈေး

-ကမ္ဘာ့ရွှေဈေး
တအောင်စ ၄၉၁၅ ဒေါ်လာ

ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း

- အကယ်ဒမီ မီးလင်းရွှေ တကျပ်သား
၆,၉၀၀,၀၀၀ ကျပ်

ပြင်ပ အရောင်းအဝယ်ဖြစ်တဲ့ ရွှေဈေးနှုန်း

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၃၃၀,၀၀၀ ကျပ်
ဝယ်ဈေး ၁၀,၂၉၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၉၃၀,၀၀၀ ကျပ်
ဝယ်ဈေး ၉,၈၉၀,၀၀၀ ကျပ်

* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)

-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၁၀,၂၁၀,၀၀၀ ကျပ်
ဝယ်ဈေး ၁၀,၁၇၀,၀၀၀ ကျပ်

-၁၅ ပဲရည် တကျပ်သား
ရောင်းဈေး ၉,၈၁၀,၀၀၀ ကျပ်
ဝယ်ဈေး ၉,၇၇၀,၀၀၀ ကျပ်

“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”

(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

#နိုင်ငံခြားငွေလဲလှယ်နှုန်း

-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၆၅၇ ကျပ်

ပြင်ပပေါက်စျေး

-အမေရိကန်ဒေါ်လာ‌
ရောင်းဈေး - ၃၉၈၀ ကျပ်
ဝယ်ဈေး - ၃၈၈၀ ကျပ်

-စင်္ကာပူဒေါ်လာ
ရောင်းဈေး - ၃၁၅၀ ကျပ်
ဝယ်ဈေး - ၃၀၇၀ ကျပ်

-ယူရို
ရောင်းဈေး - ၄၇၁၅ ကျပ်
ဝယ်ဈေး - ၄၅၉၅ ကျပ်

-ထိုင်းဘတ်
ရောင်းဈေး - ၁၂၇.၃၉ ကျပ်
ဝယ်ဈေး - ၁၂၄.၂၂ ကျပ်

-မလေးရှားရင်းဂစ်
ရောင်းဈေး - ၁၀၂၀ ကျပ်
ဝယ်ဈေး - ၉၉၅ ကျပ်

-တရုတ်ယွမ်
ရောင်းဈေး - ၅၇၆ ကျပ်
ဝယ်ဈေး - ၅၆၂ ကျပ်

-ဂျပန်ယန်း
ရောင်းဈေး - ၂၅.၉ ကျပ်
ဝယ်ဈေး - ၂၅.၂၅ ကျပ်

-အိန္ဒိယရူပီး
ရောင်းဈေး - ၄၃.၉၄ ကျပ်
ဝယ်ဈေး - ၄၂.၈၄ ကျပ်

-ကိုရီးယားဝမ်
ရောင်းဈေး - ၂.၇၆ ကျပ်
ဝယ်ဈေး - ၂.၆၉ ကျပ်

-စတာလင်ပေါင်
ရောင်းဈေး - ၅၄၀၀ ကျပ်
ဝယ်ဈေး - ၅၂၆၅ ကျပ်

-ဩစတြေးလျဒေါ်လာ
ရောင်းဈေး - ၂၈၁၁ ကျပ်
ဝယ်ဈေး - ၂၇၄၁ ကျပ်

-ကနေဒါဒေါ်လာ
ရောင်းဈေး - ၂၉၁၆ ကျပ်
ဝယ်ဈေး - ၂၈၄၃ ကျပ်

-ဟောင်ကောင်ဒေါ်လာ
ရောင်းဈေး - ၅၀၉ ကျပ်
ဝယ်ဈေး - ၄၉၇ ကျပ်

-ယူအေအီး
ရောင်းဈေး - ၁၀၈၄ ကျပ်
ဝယ်ဈေး - ၁၀၅၇ ကျပ်

ငွေလဲနှုန်းများ အချိန်နှင့်အမျှ ပြောင်းလဲနိုင်သည်။

***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

သံလွင်တံတား မိုင်းခွဲဖျက်ဆီးခံရ

ဖေဖော်ဝါရီ ၁၈

ကယားပြည်နယ်၊ မယ်စဲ့မြို့နယ်၊ ဖားဆောင်းမြို့အနီးရှိ သံလွင်တံတား(ဖားဆောင်း)အား KNPP-KNDF-PDF များ က မိုင်းခွဲဖျက်ဆီးခဲ့ကြောင်း နေပြည်တော်မှ ၂၀၂၆ ခုနှစ်၊ ဖေဖော်ဝါရီ ၁၇ ရက်တွင် ထုတ်ပြန် ကြေညာခဲ့သည်။

KNPP-KNDF-PDF တို့သည် ဖားဆောင်းမြို့အား တပ်မတော်က ပြန်လည်သိမ်းပိုက်နိုင်ခဲ့ပြီးနောက် နယ်မြေလုံခြုံ ရေး လုပ်ငန်းများ ဆက်လက်မဆောင်ရွက်နိုင်စေရန်နှင့် ၎င်းတို့အား လိုက်လံချေမှုန်းခြင်းများ မဆောင်ရွက်နိုင်စေ ရန်အတွက် ၂၀၂၆ ခုနှစ်၊ ဖေဖော်ဝါရီ ၁၇ ရက်တွင် ဖျက်ဆီးလိုက်ခြင်းဖြစ်သည်ဟု နေပြည်တော်ဘက်က ထုတ်ပြန် ခဲ့သည်။

သံလွင်တံတားသည် မယ်စဲ့မြို့နယ်၊ ဖားဆောင်းမြို့၏ အနောက်ဘက် မီတာ ၃၂၀ ခန့်အကွာ ဖားဆောင်း-မယ်စဲ့- ဘီပီ(၁၃) သွားကားလမ်း မိုင်တိုင်အမှတ်၊ ၀/၃ နှင့် ၀/၄ ကြားတွင်ရှိပြီး အရှည် ၁၂၆၀ ပေ၊ အကျယ် ၂၄ ပေရှိ သံကူ ကွန်ကရစ် အမျိုးအစားဖြစ်သည်။

KNPP-KNDF-PDF များ၏ မိုင်းခွဲဖျက်ဆီးမှုကြောင့် တံတား၏ အနောက်ဘက် ကမ်းကပ်ခုံမှ အရှည် ၂၅၀ ပေ၊ အကျယ် ၂၄ ပေခန့် ပြိုကျပျက်စီးခဲ့ကြောင်း၊ လူထိခိုက် ဒဏ်ရာရရှိမှု မရှိကြောင်း သိရသည်။

ထို့နောက် တံတားပျက်စီးမှုအား သက်ဆိုင်ရာ လမ်း/တံတား ဦးစီးဌာနမှ ပြန်လည်ပြင်ဆင်သွားမည်ဖြစ်ကြောင်း နေပြည်တော်ဘက်က ထုတ်ပြန်ခဲ့သည်။

အောင်ပွဲခံပြီးရင် ပြန်လျှောက်လာဖို့ ဗီနီစီးယက်စ်ကို မော်ရင်ဟို ပြော

ဖေဖော်ဝါရီ ၁၈

ရီးရယ်လ်အသင်းက ဘင်ဖီကာအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ချန်ပီယံလိဂ်ပွဲမှာ လူမျိုးရေးခွဲခြားမှု ပြုလုပ် ခံရတယ်ဆိုပြီး တိုင်ကြားခဲ့တဲ့ ဗီနီစီးယက်စ် အနေနဲ့ အနာဂတ်မှာ အောင်ပွဲခံပြီးရင် ပြန်လျှောက်လာဖို့ ဘင်ဖီကာ အသင်းနည်းပြ မော်ရင်ဟိုက ပြောခဲ့ပါတယ်။

မော်ရင်ဟိုက “ကျနော်ဟာ ဒီအကြောင်းကို မှတ်ချက် မပေးချင်ပေမယ့် ဗီနီစီးယက်စ်ကို ဒါနဲ့ပတ်သက်ပြီး တိတိ ကျကျ ပြောခဲ့ပါတယ်။ ဒီလိုမျိုးဂိုးသွင်းတဲ့ အချိန်မှာ မင်းအနေနဲ့ အောင်ပွဲခံပြီးရင် ပြန်လျှောက်လာရုံပါပဲလို့ ကျနော်သူ့ကို ပြောခဲ့ပါတယ်။ သူဟာ လူမျိုးရေး ခွဲခြားမှုအကြောင်း ငြင်းခုံနေချိန် ဘင်ဖီကာရဲ့သမိုင်းမှာ အကြီး မားဆုံး လူဖြစ်တဲ့ အူဆီဘီယိုကလည်း လူမည်းဆိုတာ ကျနော်သူ့ကိုပြောခဲ့ပါတယ်။ ဗီနီစီးယက်စ်ကစားတဲ့ အားကစားကွင်းတွေမှာ ဒီလိုမျိုးအရာတွေက ဖြစ်ပျက်လေ့ရှိပါတယ်”လို့ Amazon Prime နဲ့အင်တာဗျူးမှာ ပြောခဲ့တာပါ။

ချန်ပီယံလိဂ် ရှုံးထွက် ပလေးအော့ဖ် ပထမအကျော့ပွဲအဖြစ် ကစားခဲ့တဲ့ဒီပွဲမှာ ဗီနီစီးယက်စ်ဟာ ရီးရယ်လ်အသင်း အတွက် ဂိုးသွင်းယူပြီးနောက် အိမ်ရှင်ဘင်ဖီကာအသင်း ပရိသတ်တွေ အရှေ့ရှိ ထောင့်ကန်ဘော အလံတိုင်မှာ ကခုန်ပြီး အောင်ပွဲခံခဲ့ပါတယ်။

ဗီနီစီးယက်စ်ရဲ့ ဒီလုပ်ရပ်ကို ဘင်ဖီကာအသင်း ကစားသမား အများအပြားက စိတ်ပျက်ခဲ့ကြသလို သူကလည်း ကွင်းလယ်ဒိုင်လူကြီးရဲ့ အဝါကတ်ပြသခြင်း ခံခဲ့ရတာပါ။

ဒီဖြစ်ရပ်အပြီးမှာ ဘင်ဖီကာအသင်းကစားသမား ပရီစတီယာနီက သူ့ကို လူမျိုးရေးခွဲခြားတဲ့ စကားပြောခဲ့တယ်ဆို ပြီး ဗီနီစီးယက်စ်ဟာ ကွင်းလယ်ဒိုင်လူကြီးကို သွားရောက်ပြောခဲ့ပါတယ်။

UEFA ရဲ့လူမျိုးရေးခွဲခြားမှုကို ဆန့်ကျင်တဲ့လုပ်ထုံးလုပ်နည်းတွေအရ ကွင်းလယ်ဒိုင်လူကြီးဟာ ပွဲကို ၁၀ မိနစ်ခန့် ရပ်နားခဲ့ပါတယ်။

စပိန်သတင်းစာ AS က ပရီစတီယာနီဟာ ဗီနီစီးယက်စ်ကို မျောက်လို့ ခေါ်ခဲ့တယ်ဆိုပြီး ဖော်ပြထားပါတယ်။

ဘင်ဖီကာအသင်းနည်းပြ မော်ရင်ဟိုဟာ ဗီနီစီးယက်စ်နဲ့အချိန်အကြာကြီး စကားပြောခဲ့ပြီး အနာဂတ်မှာ ဒီလိုမျိုး အောင်ပွဲခံတာတွေ မပြုလုပ်ဖို့ အကြံပေးခဲ့ပါတယ်။

ဗီနီစီးယက်စ်နဲ့ ရီးရယ်လ်အသင်းဖော်တွေဟာ လူမျိုးရေးခွဲခြားတဲ့ ဒီလုပ်ရပ်ကို ပြင်းပြင်းထန်ထန် ရှုတ်ချကြောင်း ပြောခဲ့ပါတယ်။

ဘင်ဖီကာအသင်းနည်းပြ မော်ရင်ဟိုဟာ ဒီပွဲမှာ အနီကတ် ပြသခံခဲ့ရတာကြောင့် ဘာနေဗျူးမှာ ကစားမယ့် ဒုတိယအကျော့ပွဲကို ကွင်းအတွင်း ကြီးကြပ်ခွင့်ဆုံးရှုံးခဲ့ပါတယ်။

Source: metro

ပုံ - ဗီနီစီးယက်စ်နဲ့ မော်ရင်ဟိုကို တွေ့ရစဉ်

တရုတ်နှင့် အိန္ဒိယကြား နယ်စပ်ဒေသပိုင်ဆိုင်မှု အငြင်းပွား

နယူးဒေလီ၊ ဖေဖော်ဝါရီ ၁၈

အိန္ဒိယနှင့် ပါကစ္စတန်ကြား ပိုင်ဆိုင်မှု အငြင်းပွားနေသည့် ကက်ရှ်မီးယား (Kashmir) ဒေသ၏ အစွန်းပိုင်း ကာရာကိုရမ် (Karakoram) တောင်တန်း၏ မြောက်ဘက်ရှိ လူသူ အရောက်အပေါက် နည်းသည့် တောင်ကြား ဒေသတစ်ခုတွင် တရုတ်၏ လမ်းဖောက်လုပ်ရေး စီမံကိန်းကို အိန္ဒိယအစိုးရက သံတမန်ရေးအရ ပြင်းထန်စွာ ကန့်ကွက်ခဲ့သည်ဟု South China Morning Post မှ ဖော်ပြခဲ့သည်။

ဇန်နဝါရီလအတွင်းက အိန္ဒိယနိုင်ငံခြားရေးဝန်ကြီးဌာနက ထိုနယ်မြေ အစိတ်အပိုင်းသည် အိန္ဒိယ၏ပိုင်နက် ဖြစ်ကြောင်းနှင့် ယခုကဲ့သို့ မြေပြင် အခြေအနေကို ပြောင်းလဲရန် ကြိုးပမ်းမှုများအတွက် တရုတ်အား ကန့်ကွက် ကြောင်း ပြောကြားခဲ့သည်။

တရတ်အစိုးရကလည်း ထိုဒေသသည် တရုတ်နိုင်ငံပိုင်ဖြစ်ကြောင်း ပြန်လည် တုန့်ပြန်ခဲ့ပြီး မိမိတို့၏ ပိုင်နက် နယ်မြေပေါ်တွင် အခြေခံ အဆောက်အအုံ တည်ဆောက်ရေးလုပ်ငန်းများ ဆောက်လုပ်ခြင်းသည် အလုံးစုံ တရားမျှတမှုရှိကြောင်း ပြောကြားခဲ့သည်။

ယခုကဲ့သို့ အပြန်အလှန် ငြင်းခုံမှုများသည် တရုတ်-အိန္ဒိယ နယ်စပ်အငြင်းပွားမှု၏ သမိုင်းကြောင်းတွင် ကြာမြင့် စွာ တည်ရှိခဲ့သည့် ကာရာကိုရမ်ဒေသအပေါ် လူအများက အာရုံစိုက်လာကြသည်။

ထို့ပြင် ဟိမဝန္တာတောင်တန်း အိမ်နီးချင်း နှစ်နိုင်ငံကြား နယ်နိမိတ် ပိုင်ဆိုင်မှုဆိုင်ရာ ပြဿနာများ၏ ရှုပ်ထွေး နက်နဲမှုကိုလည်း ထပ်မံ မီးမောင်းထိုး ဖော်ပြရာ ရောက်ခဲ့သည်။

ထိုကဲ့သို့ အပြန်အလှန် အငြင်းပွားမှုများသည် လွန်ခဲ့သော နှစ်ပေါင်းများစွာက ကိုလိုနီအင်ပါယာများ၏ အကြွင်း အကျန်များနှင့် ၎င်းတို့၏ ပထဝီနိုင်ငံရေး အားပြိုင်မှုများသည် အင်အားကြီးနိုင်ငံများ အချင်းချင်း ယှဉ်ပြိုင်မှု ပိုမို ပြင်းထန်စေကြောင်း ပြသရာ ရောက်ခဲ့သည်။

ကိုလိုနီခေတ်က ဗြိတိသျှတို့ သတ်မှတ်ခဲ့သော ကာရာကိုရမ် နယ်နိမိတ်ကို အိန္ဒိယက တရားဝင် လက်ခံသော် လည်း တရုတ်ကမူ ထိုနယ်မြေ သတ်မှတ်မှုသည် မတရားသည့် ကိုလိုနီ အမွေအနှစ် ဖြစ်သည်ဟုဆိုကာ ယနေ့ အထိ အသိအမှတ်မပြုဘဲ ငြင်းပယ်ထားသည်။

ထို့ပြင် တရုတ်နှင့် အိန္ဒိယကြား ကီလိုမီတာ ၃၀၀၀ ကျော် ရှည်လျားသော နယ်စပ်မျဉ်းသည် တိကျသော မြေပုံ အညွှန်းကိန်းများ မရှိဘဲ လက်ရှိ ထိန်းချုပ်ထားသော နယ်နိမိတ်များအဖြစ်သာ ရှိနေသဖြင့် နယ်မြေပိုင်ဆိုင်မှု အငြင်းပွားမှုများ ဆက်လက် ဖြစ်ပွားနေဆဲဖြစ်သည်။

ပြီးခဲ့သည့် နှစ်အနည်းငယ်အတွင်း အိန္ဒိယနှင့် တရုတ် နှစ်နိုင်ငံစလုံးက ဝေးလံခေါင်သီသော နယ်စပ်တောင်တန်း များတွင် လေယာဉ်ကွင်းများ လမ်းများနှင့် တံတားများကို အပြိုင်အဆိုင် တည်ဆောက်လာခြင်းကြောင့် တစ်ဖက် နှင့်တစ်ဖက် စစ်ရေးအရ ခြိမ်းခြောက်မှုဟု ယူဆကာ တင်းမာမှုများ မြင့်တက်လာခြင်းဖြစ်သည်။

၂၀၂၀ ပြည့်နှစ်က နှစ်နိုင်ငံနယ်စပ်ရှိ ဂေါဝန်တောင်ကြား (Galwan Valley) တွင် နှစ်နိုင်ငံစစ်သားများ ခိုက်ရန် ဖြစ်ပွားခဲ့ပြီးနောက် နှစ်နိုင်ငံကြား ယုံကြည်မှုလုံးဝ ပျက်ပြားသွားခဲ့ကာ ထိပ်သီးအဆင့် စစ်ဘက်ဆိုင်ရာ ဆွေးနွေး မှုများ ပြုလုပ်ခဲ့သော်လည်း အပြီးသတ် သဘောတူညီမှု မရရှိသေးပေ။

Source: South China Morning Post

ပုံ - အိန္ဒိယနဲ့တရုတ် အငြင်းပွားနေတဲ့ နယ်မြေကိုတွေ့ရစဉ်

အမေရိကန်နှင့် အီရန်တို့ နျူးကလီးယားဆွေးနွေးမှု ပြန်စ

ဂျီနီဗာ၊ ဖေဖော်ဝါရီ ၁၈

အီရန်၏ နျူကလီးယားစီမံကိန်း အငြင်းပွားမှုနှင့် ပတ်သက်ပြီး အမေရိကန်နှင့် အီရန်တို့သည် ဖေဖော်ဝါရီ ၁၇ ရက် က ဆွစ်ဇာလန်နိုင်ငံ၊ ဂျီနီဗာ (Geneva) မြို့တွင် တိုက်ရိုက်မဟုတ်ဘဲ သွယ်ဝိုက်သောနည်းဖြင့် ဆွေးနွေးမှုများကို စတင်ခဲ့ကြောင်း ရိုက်တာမှ ဖော်ပြခဲ့သည်။

အမေရိကန်က အရှေ့အလယ်ပိုင်းဒေသသို့ စစ်အင်အားများ အလုံးအရင်း စေလွှတ်ထားသည်။

ထို့နောက် ဆွေးနွေးပွဲများ အောင်မြင်စေရန် အမေရိကန်အနေဖြင့် လက်တွေ့မကျသော တောင်းဆိုမှုများကို ရှောင်ကြဉ်ရန် လိုအပ်ကြောင်း အီရန်အဆင့်မြင့်အရာရှိတစ်ဦးက ပြောကြားခဲ့သည်။

အိုမန်နိုင်ငံက ကြားဝင်စေ့စပ်ပေးသည့် ထိုဆွေးနွေးပွဲများတွင် အမေရိကန်သံတမန် စတိဗ် ဝစ်ကော့ဖ် (Steve Witkoff) နှင့် ဂျဲရက် ကူးရှ်နာ (Jared Kushner) တို့ ပါဝင် တက်ရောက်မည်ဖြစ်ပြီး အီရန်ဘက်မှ နိုင်ငံခြားရေး ဝန်ကြီး အဘတ်စ် အာရက်ချီ (Abbas Araqchi) တက်ရောက်မည်ဖြစ်သည်။

အမေရိကန်သမ္မတ ဒေါ်နယ်ထရမ့် (Donald Trump) က ၎င်းအနေဖြင့် ဂျီနီဗာ ဆွေးနွေးပွဲများတွင် သွယ်ဝိုက် သောနည်းဖြင့် ပါဝင်ပတ်သက် သွားမည်ဖြစ်ကြောင်း၊ အီရန် အနေဖြင့် သဘောတူညီချက်တစ်ခု ရယူလိမ့်မည်ဟု ယုံကြည်ကြောင်း ပြောကြားခဲ့သည်။

“သဘောတူညီချက် မရခဲ့ရင် ဖြစ်လာမယ့် နောက်ဆက်တွဲ အကျိုးဆက်တွေကို သူတို့ (အီရန်) အနေနဲ့ လိုလား မယ်လို့ ကျနော် မထင်ပါဘူး။ သူတို့ရဲ့ နျူကလီးယား စွမ်းရည်တွေကို အမြစ်ပြတ်ချေမှုန်းဖို့ B-2 ဗုံးကြဲလေယာဉ် တွေ မလွှတ်ခင်ကတည်းက ကျနော်တို့ သဘောတူညီချက်တစ်ခု ရနိုင်ခဲ့တာပါ။ ဒါပေမဲ့ ကျနော်တို့က B-2 တွေကို လွှတ်ခဲ့ရတာပေါ့”ဟု ထရမ့်က ပြီးခဲ့သည့်နှစ်တွင် အီရန်နျူကလီးယား စက်ရုံများကို ဗုံးကြဲတိုက်ခိုက်သည့် ဖြစ်စဉ် ကို ရည်ညွှန်း ပြောကြားခဲ့သည်။

ပြီးခဲ့သည့်နှစ် ဇွန်လက ဆွေးနွေးပွဲများ ပြန်လည် မစတင်မီ အီရန်နှင့် အစ္စရေးကြား ၁၂ ရက်ကြာ စစ်ပွဲဖြစ်ပွား ခဲ့ပြီးနောက် အမေရိကန်က အီရန် နျူကလီးယား စက်ရုံများကို ဗုံးကြဲ တိုက်ခိုက်ခဲ့ခြင်းဖြစ်သည်။

ယခု ဆွေးနွေးပွဲများကို ဂျီနီဗာမြို့ရှိ ကုလသမဂ္ဂဆိုင်ရာ အိုမန်သံအမတ်ကြီး၏ နေအိမ်တွင် ကျင်းပခဲ့ပြီး လုံခြုံရေး ကိုလည်း အထူးတင်းကျပ်ထားသလို ထိုနေအိမ် အပြင်ဘက်တွင် အီရန်သံတမန် အမှတ်တံဆိပ်ပါသည့် မော်တော် ယာဉ် အချို့ကိုလည်း တွေ့မြင်ရသည်။

တစ်ဖက်တွင်လည်း သမ္မတထရမ့်က တိုက်ခိုက်ရန် အမိန့်ပေးလာပါက အီရန်အပေါ် သီတင်းပတ် များစွာကြာမြင့် မည့် စစ်ဆင်ရေးများ ပြုလုပ်နိုင်ရန်အတွက် အမေရိကန်စစ်တပ်က ပြင်ဆင်နေကြောင်း အမေရိကန်အရာရှိနှစ်ဦး က ရိုက်တာသတင်းဌာနကို ပြောကြားခဲ့သည်။

အီရန်နိုင်ငံကလည်း ဖေဖော်ဝါရီ ၁၆ ရက်တွင် ဟော်မုဇ်ရေလက်ကြား (Strait of Hormuz) ၌ စစ်ရေးလေ့ကျင့် မှုများ ပြုလုပ်ခဲ့ပြီး ထိုရေလက်ကြားသည် ပင်လယ်ကွေ့ အာရပ်နိုင်ငံများမှ ရေနံတင်ပို့သည့် အရေးပါသော နိုင်ငံတကာ ရေလမ်းကြောင်းတစ်ခုဖြစ်သည်။

လက်ရှိတွင် အာရပ်နိုင်ငံများကလည်း အီရန်နှင့်အမေရိကန်ကြား အငြင်းပွားမှုများကို သံတမန်နည်းလမ်းဖြင့် ဖြေရှင်းကြရန် တောင်းဆိုထားသည်။

Source: ရိုက်တာ

ပုံ - အီရန်အလံနဲ့ နျူထိပ်ဖူးကိုတွေ့ရစဉ်

❝မန်းရွှေစက်တော်ရာဘုရားပွဲတော်ကာလ ဖေဖော်ဝါရီ ၁၆ ရက်အထိ အနယ်နယ်အရပ်ရပ်မှ ဘုရားဖူးပြည်သူ သုံးသောင်းခန့် လာရောက်ခဲ့❞

ဖေဖော်ဝါရီ ၁၈

မကွေးတိုင်းဒေသကြီး မင်းဘူး (စကု)မြို့နယ်ရှိ မန်းရွှေစက်တော်ရာဘုရားပွဲတော်ကို ၂၀၂၆ ခုနှစ် ဇန်နဝါရီ ၂၂ ရက်မှ စတင်ကျင်းပလျှက်ရှိရာ ပွဲတော်ကာလ စနေ၊ တနင်္ဂနွေနှင့် အစိုးရရုံးပိတ်ရက်ရှည်များအပါအဝင် ဖေဖော်ဝါရီ ၁၆ ရက်အထိ ဘုရားဖူးပြည်သူ ၃၀၀၀၀ ခန့် လာရောက်ဖူးမြော်ခဲ့ကြောင်း မန်းရွှေစက်တော်ရာဘုရား ဂေါပကအဖွဲ့ထံမှ သိရသည်။

အဆိုပါ မန်းရွှေစက်တော်ရာ ဘုရားပွဲတော်ကြီးကို နှစ်စဉ်ပုံမှန်ကျင်းပမြဲဖြစ်သော တပို့တွဲလဆန်း ၅ ရက် ကစပြီး မြန်မာနှစ်ဆန်း ၁ ရက် အထိ (၂၀၂၆ ခုနှစ် ဇန်နဝါရီ ၂၂ ရက်မှ ဧပြီ ၁၇ ရက်အထိ) ရက် ပေါင်း ၈၆ ရက်ကြာ ကျင်းပနေခြင်းဖြစ်ပြီး ဘုရားဖူးပြည်သူများ စိတ်အေးချမ်းသာစွာ တည်းခိုနားနေနိုင်ရန် တည်းခိုဆောင်များကိုလည်း စီစဉ်ဆောင်ရွက်ပေးထားသည်ဟုဆိုသည်။

လက်ရှိတွင် နေ့စဉ် ယာဉ်ဝင်ထွက်မှုအနေဖြင့် ကားအစီးရေပေါင်း ၅၀ နှင့် ၁၀၀ ကြားရှိပြီး ယခင်နှစ်ဘုရားပွဲတော်ကာလထက် ယခုနှစ်တွင် ထူးထူးခြားခြား ပိုမိုစည်ကားခဲ့သဖြင့် စနေ၊ တနင်္ဂနွေရုံးပိတ်ရက်များနှင့် ယခုတစ်ပတ် အစိုးရရုံးပိတ်ရက်ရှည်ကာလများတွင် တည်းခိုဆောင်အခန်းများ ပြည့်သည်အထိ လာရောက်ခဲ့ကြသလို Grade-12 တက္ကသိုလ်ဝင်စာမေးပွဲဖြေဆိုပြီးချိန်တွင် ဘုရားဖူးခရီးသွားများ ယခုထက်ပိုမိုစည်ကားနိုင်သည်ဟု ဘုရားဂေါပကအဖွဲ့က ခန့်မှန်းထားသည်။

မန်းရွှေစက်တော်ရာ ဘုရားပွဲတော်သည် သင်္ကြန်ရုံးပိတ်ရက်ကာလများတွင် အစည်ကားဆုံးဖြစ်သလို တပေါင်းလပြည့်နေ့မတိုင်မီ ဘုရားဖူးလာရောက်လေ့ရှိသော မန်းရွှေစက်တော်ရာဘုရားကြီးအနီးရှိ မင်းလှကျင်းကျေးရွာမှ ဒေသခံများက ​ရှေးရိုးရာအစဉ်အလာမပျက် လှည်းယာဉ်တန်းများဖြင့် ဘုရားဖူးလာရောက်နိုင်ရေး စီစဉ်လျက်ရှိကြသည်ဟုလည်း သိရသည်။

❝မသင်္ကာဖွယ် ကား ၃ စီးကို စစ်ဆေးရာမှ အထောက်အထားမဲ့ မြန်မာ ၂၈ ဦးကို ဖမ်းမိခဲ့ဟုဆို❞

 ဖေဖော်ဝါရီ ၁၈

ထိုင်းနိုင်ငံ၊ ဖိချိတ် (Phichit)ခရိုင်၊ ဝချီရာဘာရာမီမြို့နယ်၊ နောင်လုံကျေးရွာအနီး ဖိစနုလောက်-နခွန်စဝမ် လမ်းမကြီး (အဝေးပြေးလမ်း ၁၁၇) ပေါ်၌ အရှိန်ပြင်းစွာ မောင်းနှင်လာသည့် မသင်္ကာဖွယ် ကား ၃ စီးကို ရဲတပ်ဖွဲ့က စစ်ဆေးခဲ့ရာမှ အထောက်အထားမဲ့ မြန်မာနိုင်ငံသား ၂၈ ဦးနှင့် ယာဉ်မောင်း ၃ ဦးကို ဖမ်းမိခဲ့ကြောင်း ထိုင်းသတင်းများ၏ ဖော်ပြမှုအရ သိရသည်။

ယင်းဖြစ်စဥ်သည် ဖေဖော်ဝါရီ ၁၇ ရက်နေ့က ဖြစ်ပွားခဲ့ခြင်းဖြစ်ပြီး ဖမ်းဆီးရမိသူ မြန်မာနိုင်ငံသားများသည် ဖိချိတ်ခရိုင်၌ အလုပ်လုပ်ရန်အတွက် ပွဲစားကို တစ်ဦးလျှင် ဘတ် ၈,၅၀၀ စီပေးကာ နယ်စပ်တောလမ်းများမှတစ်ဆင့် ထိုင်းနိုင်ငံအတွင်းသို့ တရားမဝင်နည်းလမ်းဖြင့် ဝင်ရောက်ခဲ့ခြင်းဖြစ်ကြောင်း ဝန်ခံခဲ့သည်ဟုဆိုသည်။

ထို့နောက် ချင်းမိုင်ခရိုင်တွင် တစ်ညအိပ်တည်းခိုခဲ့ကာ ထိုင်းနိုင်ငံအလယ်ပိုင်းဒေသများသို့ ဆက်လက်သွားရောက်စဥ် ယခုလို ဖမ်းဆီးခံရခြင်းဖြစ်သည်ဟု သိရပြီး လက်ရှိတွင် ဖမ်းဆီးရမိသူအားလုံးကို ဥပဒေအရ အရေးယူနိုင်ရန်အတွက် ဝချီရာဘာရာမီ ရဲစခန်းသို့ ပို့ဆောင်ထားကြောင်းလည်း သိရသည်။