ဖယောင်းနံ့သင်းသင်း မွန်ရိုးရာသၚ်္ကြန်ထမင်း❤
သင်္ကြန်နားနီးပီးဆိုတော့ ငရုပ်သီးတောင့် ကြွပ်ကြော်လေးကိုက်ပြီး မွန်သင်္ကြန်ထမင်း စားကြရအောင် 😍
တိုင်းရင်းသား လူမျိုးတိုင်းမှာ သူတို့ရဲ့ နာမည်ကျော် ရိုးရာ အစားအသောက်တွေ ရှိကြပါတယ်။
အထူးသဖြင့် ရိုးရာ ပွဲတော်တွေမှာ ပြင်ဆင် ချက်ပြုတ်ကြတဲ့ အစားအစာတွေထဲက မွန်လူမျိုးတို့ရဲ့ နာမည်ကျော် “မွန်သင်္ကြန်ထမင်း” လုပ်နည်းကို စာဖတ် ပရိသတ်တွေအတွက် ဝေမျှ ပေးချင်ပါတယ်။
မွန်လူမျိုးတွေက အခုလိုနွေရာသီ ပူလာတဲ့အချိန် မတ်လ၊ ဧပြီလတွေမှာ “သင်္ကြန်ထမင်း” လုပ်စားလေ့ရှိပြီး သင်္ကြန် အချိန်ခါမှာ သင်္ကြန်စာအဖြစ် ချက်စားလေ့ ရှိကြပါတယ်။
#မွန်ရိုးရာသင်္ကြန်ထမင်း ၊ #သင်္ကြန်ကြော် ပြုလုပ်နည်း 😋
ထမင်း
~~~~
ဆန်ကို ရေများများနဲ့ ဆန်ပြုတ် ပြုတ်သလို ဆန်လုံးကွဲပြီး နူးအိလာအောင်ချက်ပါ ဆန်လုံးတွေ နူးအိသွားပြီဆို ထမင်းတွေကို ဇကာနဲ့ရေစစ်ပါ။ ထမင်းမှာစေးနေတာတွေကုန်အောင် ရေအေးနဲ့ထပ်ခါထပ်ခါလောင်းပြီး ဇကာကိုလှုပ်ကာရေဆေးရေစစ်ပေးပါ ပြီးရင် ရေခဲသေတ္တာထဲထည့်ထားပေးထားပါ (သို့) ထမင်းထဲရေခဲတုံးကြီးကြီးတစ်တုံးထည့်ထားပေးပါ
ဖယောင်းရေ (သင်းရေလို့လဲ ခေါ်ကြပါတယ်)
~~~~~~
ကြွေပန်းကန်ပြားပေါ်မှာ မီးရဲနေတဲ့မီးသွေး အနည်းငယ် တင်ပါ။
နံ့သာတုံးနဲ့ပျားဖယောင်းကို ဓါးနဲ့ပါးပါးခြစ်ထားပါ (ပျားဖယောင်းကို ပရဆေးဆိုင်တွေမှာဝယ်လို့ရပါတယ် မလွယ်ရင် ရိုးရိုးဖယောင်းတိုင်ကိုသုံးလို့ရပါတယ်)
ပူနေတဲ့မီးသွေးပေါ်ကို နံ့သာနဲ့ဖယောင်းဖတ်ကလေးတွေတင်ပါ
အငွေ့ထွက်လာရင် ခြောက်သွေ့နေတဲ့အိုးတစ်လုံးကို ပန်းကန်ပြားပေါ်မှာမှောက်အုပ်ပြီး အငွေ့များ စုယူပါ။ (အနံ့ဖမ်းဖို့မြေအိုးအသေးကို သုံးရင် အနံ့ပိုစုပ်ပြီး ပိုကောင်းပါတယ်)
ပြီးရင်အိုးကိုလှန်ပြီးရေဆွတ်ထားတဲ့အဝတ်ပါးနဲ့ အိုးမျက်နှာဝကိုလုံအောင်ချက်ချင်းအုပ်ပါ။အဝတ်ပါးပေါ်မှအိုးထဲသို့သောက်ရေကို
လောင်းချပြီး အိုးအဖုံးအုပ်ထားလိုက်ပါ ဖယောင်းနံ့သင်းတဲ့ရေကိုရပါမယ်။ အေးတာကြိုက်ရင် အိုးထဲရေခဲထည့်ထားပါ (သို့) ဗူးနဲ့ပြောင်းထည့်ပြီးရေခဲသေတ္တာထဲထည့်ထားပါ
(ဖယောင်းရေက စားနေကျလူမဟုတ်ရင် စားဖို့နဲနဲခက်ပါတယ် ဖယောင်းရေအစား ရိုးရိုးသောက်ရေသန့်နဲ့သုံးဆောင်ပါရှင့်)
သရက်သီးငါးခြောက်ထောင်းကြော်
~~~~~~~~~~~~~~~~~
ငါးခြောက်ထောင်းကြော်အတွက် အသားများပြီးနူးညံ့တဲ့ငါးခြောက်ကိုသုံးပါ ငါးခြောက်ကိုအရွယ်တော်တုံးပြီး နူးအောင်ရေခမ်းပြုတ်ပါ (သုံးတဲ့ငါးခြောက်ကအငန်ကဲနေရင် ရေဆူလာတဲ့ခါတစ်ရေလောက်ငှဲ့ထုတ်ပါ) ပြုတ်ထားတဲ့ငါးခြောက်ကိုပွလာအောင်ဆုံနဲ့ထောင်းပါ။
သရက်သီးကိုအခွံသင်ပြီး ခြစ်ထားပါ ( သရက်သီးခြစ်ရဲ့ပမာဏက ထောင်းထားတဲ့ငါးခြောက်ထောင်းရဲ့ တစ်ဝက်နီးပါးခန့်ရှိရပါမယ် ကိုယ်သုံးတဲ့သရက်သီးရဲ့အချဉ်အရသာပေါ်မူတည်ပြီး လိုတိုးပိုလျော့အနည်းငယ်ရှိနိုင်ပါတယ်)
ကြက်သွန်နီ လေးစိတ်စိတ်ပြီး အဖတ်ကလေးတွေ ခွာထားပါ
ဆီအိုးတည်ပါ ပူလာရင် ငါးခြောက်ထောင်းကြော်နဲ့တွဲစားဖို့လိုအပ်တဲ့ ကြက်သွန်နီကြော်နဲ့ ငရုတ်သီးအခြောက်တောင့်အရင်ကြော်ထားပါ
ပြီးရင်ငါးခြောက်ထောင်းကြော်ပါမယ် ဆီပူထဲနနွင်းထည့်ပါ ငါးခြောက်ဖွထားတာထည့်ကြော်ပါ အနည်းငယ်နီရောင်သန်းပြီးခြောက်လာတဲ့ခါ ခြစ်ထားတဲ့သရက်သီးထည့်ပါ ငါးခြောက်နဲ့သရက်သီးသမပြီးအရည်အနည်းငယ်ခြောက်တဲ့ထိ အဆက်မပြတ်မွှေပေးနေပါ
အပေါ့အငန်အရသာထည့်ပါ ကြက်သွန်နီအဖတ်ကလေးတွေထည့်ပါ ကြက်သွန်နီကျက်ပြီဆို ငါးခြောက်ထောင်းကြော်ရပါပြီး
အမယ်အားလုံးအဆင်သင့်ဖြစ်ပြီမို့ ပုံမှာပြထားတဲ့အတိုင်းပြင်ဆင်ပြီးစားသုံးနိုင်ပါပြီ
ခုမှ စမ်းပြီး စားကြည့်မယ့်လူတွေတွက် စားတဲ့နည်းကလေးလဲ
ပြောပြချင်ပါတယ် 😀
ငါးခြောက်ကြော်ကိုအရင်ခပ်စားပါ ပြီးရင်ထမင်းတစ်ဇွန်းကိုရေအနည်းငယ်ပါ ပါအောင်ခပ်စားပါ ငရုတ်သီးတောင့်ကြော်လေး ကိုက်ပါရှင့်
(တချို့ကတော့ သရက်သီးနဲ့ငါးခြောက်ကိုရောမကြော်ပဲ ငါးခြောက်ထောင်းကိုသက်သက်အကြွပ်ကြော် သရက်သီးကိုသုပ်ပြီး နှစ်မျိုးတွဲပြီးစားကြပါတယ်)
