AI နယ်ပယ်က အပြောင်းအလဲသစ် - Prompt Engineering ကနေ Context Engineering သို့
AI နဲ့ အလုပ်လုပ်တဲ့အခါ "Prompt Engineering" ဆိုတဲ့ စကားလုံးကို လူအများစု ရင်းနှီးပြီးသားဖြစ်မှာပါ။ AI ကို ကောင်းမွန်တဲ့ ညွှန်ကြားချက်တွေ ပေးနိုင်ဖို့က အရေးကြီးတယ်ဆိုတာကို ကျွန်တော်တို့ သိထားကြပါတယ်။ ဒါပေမဲ့ အခုနောက်ပိုင်းမှာတော့ နည်းပညာခေါင်းဆောင်တွေက ဒီထက်ပိုကျယ်ပြန့်ပြီး ပိုအစွမ်းထက်တဲ့ "Context Engineering" ဆိုတဲ့ အသုံးအနှုန်းကို ပိုပြီးအလေးပေး ပြောဆိုလာကြပါပြီ။

Prompt Engineering တစ်ခုတည်းနဲ့ မလုံလောက်တော့ဘူးလား? အဓိကပြဿနာကတော့ AI ဟာ "Black Box" တစ်ခုလို ဖြစ်နေတာပါပဲ။ ကျွန်တော်တို့က ညွှန်ကြားချက်ကို ဘယ်လောက်ပဲ ကောင်းအောင်ရေးပါစေ၊ AI မှာ လိုအပ်တဲ့ နောက်ခံအချက်အလက် (Context) မရှိရင် အဖြေတွေက တသမတ်တည်းမဖြစ်နိုင်ပါဘူး။ တစ်ခါတလေ အကောင်းဆုံးအဖြေတွေ ထွက်လာပေမယ့်၊ နောက်တစ်ခါမှာတော့ အဓိပ္ပာယ်မရှိတဲ့အရာတွေ ပြန်ဖြေတတ်ပါတယ်။ ဒါဟာ ညွှန်ကြားချက်ရဲ့ အားနည်းချက်ကြောင့်မဟုတ်ဘဲ၊ AI က သူ့ပတ်ဝန်းကျင်၊ သူ့ရဲ့စွမ်းဆောင်ရည်နဲ့ ကျွန်တော်တို့ပေးတဲ့ အချက်အလက်တွေကြားက ဆက်စပ်မှုကို နားမလည်လို့ ဖြစ်ပါတယ်။

ဒီနေရာမှာပဲ Context Engineering က အရေးပါလာတာပါ။ Context Engineering ဆိုတာက AI ကို ညွှန်ကြားချက်ကောင်းကောင်း ပေးရုံသက်သက်မဟုတ်တော့ဘဲ၊ သူ့အတွက် လိုအပ်တဲ့ နောက်ခံအချက်အလက်တွေ၊ ဆက်စပ်ဒေတာတွေနဲ့ လုပ်ဆောင်ချက်မှတ်တမ်းတွေကို စနစ်တကျ ပေးသွင်းစီမံခန့်ခွဲတဲ့ နည်းပညာဖြစ်ပါတယ်။ Shopify CEO Toby Lutke နဲ့ AI ပညာရှင် Andrej Karpathy တို့က ဒါကို "AI ရဲ့ Context Window (သူ့ရဲ့ short-term memory) ထဲကို လိုအပ်တဲ့ အချက်အလက် အတိအကျ ဖြည့်ပေးနိုင်ဖို့က အနုပညာနဲ့တူတဲ့ နည်းပညာတစ်ခု" လို့ တင်စားခေါ်ဝေါ်ခဲ့ပါတယ်။

Context Window ကို စီမံခန့်ခွဲတာက ထင်သလောက်မလွယ်ကူပါဘူး။ GPT-4 လို မော်ဒယ်တွေမှာ Token ထောင်ပေါင်းများစွာကနေ သိန်းနဲ့ချီပြီး မှတ်သားနိုင်ပေမယ့်၊ ရှုပ်ထွေးတဲ့လုပ်ငန်းတွေအတွက် လိုအပ်တဲ့အချက်အလက်တွေက ဒီပမာဏထက် ကျော်လွန်သွားနိုင်ပါတယ်။ ဒါကြောင့် ဘယ်အချက်အလက်ကို ထည့်မလဲ၊ ဘယ်ဟာကို ချန်ခဲ့မလဲဆိုတာကို ဗျူဟာကျကျ ဆုံးဖြတ်နိုင်ဖို့လိုပါတယ်။ ဒီလိုလုပ်ဆောင်နိုင်ဖို့ နည်းပညာပိုင်းဆိုင်ရာ နားလည်မှု၊ သတင်းအချက်အလက်တွေကို စနစ်တကျ တည်ဆောက်နိုင်စွမ်းနဲ့ ကျွမ်းကျင်ရာနယ်ပယ်အလိုက် ဗဟုသုတတွေ ပေါင်းစပ်ထားတဲ့ အထူးကျွမ်းကျင်မှုတွေ လိုအပ်လာပါတယ်။

ပြောရရင်တော့ AI နဲ့ အလုပ်လုပ်တဲ့ အနာဂတ်ဟာ ညွှန်ကြားချက်ကောင်းတွေ ရေးတတ်ရုံနဲ့ မလုံလောက်တော့ပါဘူး။ AI ကို မှန်ကန်တဲ့ အချက်အလက်တွေ ပေးသွင်းပြီး သူ့ရဲ့ "မှတ်ဉာဏ်" ကို ထိန်းကျောင်းနိုင်တဲ့ "Context Engineer" တွေရဲ့ ခေတ်ကို ရောက်ရှိလာနေပါပြီ။ ဒီအပြောင်းအလဲနဲ့ပတ်သက်ပြီး စာဖတ်သူတို့ရဲ့ အမြင်တွေကိုလည်း ကြားချင်ပါတယ်။

Baidu က AI ဗီဒီယို ဖန်တီးရေးစနစ်သစ်ကို မိတ်ဆက်၊ ပြိုင်ဘက်များကို ယှဉ်ပြိုင်ရန် Search Engine ကို အကြီးစား ပြင်ဆင်
လုပ်ငန်းသုံးအတွက်သာ ရည်ရွယ်သည့် MuseSteamer ကို မိတ်ဆက်လိုက်ပြီး ByteDance နှင့် Tencent တို့၏ ဖိအားပေးမှုများကို တုံ့ပြန်လိုက်ခြင်း ဖြစ်သည်။

တရုတ်နိုင်ငံ၏ နည်းပညာကုမ္ပဏီကြီး Baidu သည် ဇူလိုင်လ ၂ ရက်နေ့တွင် ဉာဏ်ရည်တု (AI) နည်းပညာသုံး ဗီဒီယို ဖန်တီးရေးစနစ်သစ်တစ်ခုကို မိတ်ဆက်လိုက်ပြီး ၎င်း၏ အဓိက ရှာဖွေရေးအင်ဂျင် (search engine) ကိုလည်း အကြီးစား အဆင့်မြှင့်တင်မှုများ ပြုလုပ်ခဲ့ကြောင်း ကြေညာခဲ့သည်။ ဤသည်မှာ ပြည်တွင်းပြိုင်ဘက်များဖြစ်သော ByteDance၊ Tencent နှင့် Alibaba တို့၏ ပြင်းထန်လာသော AI နယ်ပယ်အတွင်းရှိ ပြိုင်ဆိုင်မှုများကို တုံ့ပြန်လိုက်ခြင်း ဖြစ်သည်။

စီးပွားရေးလုပ်ငန်းများအတွက် MuseSteamer
Baidu ၏ AI ဗီဒီယို ဖန်တီးရေးစနစ်သစ်ကို MuseSteamer ဟု အမည်ပေးထားပြီး၊ ၎င်းသည် ရုပ်ငြိမ်ဓာတ်ပုံများမှ ၁၀ စက္ကန့်အထိရှည်သော ဗီဒီယိုများကို ဖန်တီးပေးနိုင်စွမ်းရှိသည်။ ဤစနစ်ကို အသုံးပြုသူများ၏ လိုအပ်ချက်အပေါ်မူတည်၍ Turbo, Pro, နှင့် Lite ဟူ၍ ဗားရှင်းသုံးမျိုးဖြင့် ထုတ်လုပ်ထားသည်။

အရေးကြီးသည့်အချက်မှာ OpenAI ၏ Sora ကဲ့သို့သော ပြိုင်ဘက်ထုတ်ကုန်များသည် သာမန်စားသုံးသူများကို ပစ်မှတ်ထားသော်လည်း၊ Baidu ၏ MuseSteamer မှာမူ စီးပွားရေးလုပ်ငန်းသုံးအတွက်သာ သီးသန့်ရည်ရွယ်သည်။ သာမန်ပြည်သူများအတွက် အက်ပလီကေးရှင်းကိုမူ ထုတ်လုပ်ထားခြင်း မရှိသေးပေ။ ဤနည်းဗျူဟာသည် ဒစ်ဂျစ်တယ်စျေးကွက်ရှာဖွေရေး၊ ဂိမ်းကစားခြင်း၊ e-commerce နှင့် ကြော်ငြာများအတွက် အကြောင်းအရာများ ဖန်တီးထုတ်လုပ်သည့် လုပ်ငန်းကဏ္ဍများကို ပစ်မှတ်ထားခြင်းဖြစ်သည်။

Search Engine ကို အကြီးစား အဆင့်မြှင့်တင်ခြင်း
MuseSteamer နှင့်အတူ Baidu သည် ၎င်း၏ search engine ကိုလည်း အဓိကကျသော အဆင့်မြှင့်တင်မှုများ ပြုလုပ်ခဲ့သည်။

Multimodal Search: အသစ်ပြင်ဆင်ထားသော search box သည် ပိုမိုရှည်လျားသော မေးခွန်းများကို လက်ခံနိုင်ပြီး၊ အသံနှင့် ပုံများကို အသုံးပြု၍ ရှာဖွေနိုင်သည့်စနစ် (multimodal search) ကို ထောက်ပံ့ပေးထားသည်။
Personalized Results: Baidu ၏ AI နည်းပညာကို အသုံးပြု၍ ရှာဖွေမှုရလဒ်များကို အသုံးပြုသူအတွက် ပိုမိုတိကျပြီး ပိုမိုပစ်မှတ်ကျသော အကြောင်းအရာများကို ဖော်ပြပေးမည်ဖြစ်သည်။
ပြင်းထန်လာသော AI ပြိုင်ဆိုင်မှု
ဤသို့သော အဆင့်မြှင့်တင်မှုများသည် တရုတ်နိုင်ငံအတွင်း AI နယ်ပယ်၌ ပြိုင်ဆိုင်မှု ပြင်းထန်လာခြင်းကြောင့် ဖြစ်သည်။ အထူးသဖြင့် ByteDance ၏ Doubao နှင့် Tencent ၏ Yuanbao ကဲ့သို့သော AI chatbot များသည် သုံးစွဲသူများအကြားတွင် ပိုမိုလူကြိုက်များလာသဖြင့် Baidu အပေါ် ဖိအားများ တိုးလာခဲ့သည်။ ဤခြေလှမ်းသစ်များဖြင့် Baidu သည် လုပ်ငန်းသုံး AI ဝန်ဆောင်မှုဈေးကွက်တွင် ၎င်း၏ရပ်တည်ချက်ကို ခိုင်မာစေရန်နှင့် ပြိုင်ဘက်များကို တုံ့ပြန်ရန် ရည်ရွယ်ထားသည်။

Apple ရဲ့ iOS 26 Beta မှာ FaceTime အတွက် feature အသစ်တစ်ခုကို စတင်စမ်းသပ်နေပြီဖြစ်ပါတယ်။ ဒီ feature ကတော့ video call ပြောနေစဉ်မှာ ကိုယ်လုံးတီးပုံရိပ် (nudity) ကိုတွေ့ရှိပါက ဗီဒီယိုကို အလိုအလျောက် ရပ်တန့်ပေးမှာဖြစ်ပါတယ်။
ဒီစနစ်ဟာ Apple ရဲ့ Sensitive Content Warning ရဲ့ အစိတ်အပိုင်းတစ်ခုဖြစ်ပြီး FaceTime မှာ ပထမဆုံးအကြိမ်အဖြစ် ထည့်သွင်းလာတာပါ။ Video call အတွင်းမှာ ကိုယ်လုံးတီးပုံရိပ်ကို နည်းပညာနဲ့စစ်ဆေးတွေ့ရှိခဲ့ရင် call ကို ခေတ္တရပ်တန့်ပြီး သတိပေးစာ (warning message) တစ်ခု screen မှာပေါ်လာမှာ ဖြစ်ပါတယ်။ အသုံးပြုသူအနေနဲ့ call ကို ဆက်လက်ပြောဆိုမလား၊ ဒါမှမဟုတ် အပြီးသတ်ရပ်တန့်မလားဆိုတာကို ရွေးချယ်နိုင်မှာဖြစ်ပါတယ်။
ဒီ feature ဟာ video call ရဲ့ ကင်မရာ တွေကို စစ်ဆေးရတာဖြစ်တဲ့အတွက် အသုံးပြုသူတစ်ချို့အတွက် privacy စိုးရိမ်မှုတွေရှိလာစေပါတယ်။ ဒါပေမဲ့ Apple ဘက်ကတော့ သူတို့အနေနဲ့ အသုံးပြုသူတွေရဲ့ media content တွေကို ကြည့်ရှုနိုင်မှာမဟုတ်ဘူးလို့ အာမခံထားပါတယ်။
အရေးကြီးဆုံးတစ်ချက်ကတော့ ဒီ Sensitive Content Warning feature ကို iOS မှာ အလိုအလျောက်ဖွင့်ထားမှာမဟုတ်ဘဲ ပိတ်ထားမှာ (off by default) ဖြစ်ပါတယ်။ အသုံးပြုသူအနေနဲ့ ဒီ feature ကိုသုံးချင်မှသာ Settings ထဲက Privacy & Security မှာ ကိုယ်တိုင်ဝင်ရောက်ဖွင့်လှစ်ရမှာဖြစ်ပါတယ်။
ဒီ feature နဲ့ပတ်သက်ပြီး ဘယ်လိုထင်မြင်ပါသလဲ? ဒါဟာ လိုအပ်တဲ့ စနစ်တစ်ခုလား၊ ဒါမှမဟုတ် privacy ကို ထိပါးရာရောက်နေလားဆိုတာ သင့်အမြင်ကို comment မှာဝေမျှပေးခဲ့ပါဦး။

ပိုင်ရှင်သစ်ဆီ သူ့ဟာသူ မောင်းပြီး သွားခဲ့တဲ့ Tesla ကား
Tesla က အကြီးကြီးတွေ ထုတ်ပြနေပါပြီ။
အော်စတင်မှာ ရှိတဲ့ Tesla Gigafactory ကနေ FSD သုံး Tesla Model Y တစ်စီးက မိနစ် ၃၀ အကွာအဝေးမှာ ရှိတဲ့ ကားပိုင်ရှင်သစ်ဆီ သူ့ဟာသူ မောင်းပို့လာပါတယ်။ ကားပေါ်မှာ ဘယ်သူမှ မပါဘဲ သူ့ဟာသူ တစ်နာရီ ၇၂ မိုင်နှုန်းနဲ့ တက္ကဆက် အဝေးပြေးလမ်းပေါ် မောင်းသွားတာပါ။
"ကားပေါ်မှာ ဘယ်သူမှ မပါပါဘူး။ ယာဉ်ကို ထိန်းချုပ်ဖို့လည်း အဝေးထိန်းအော်ပရေတာတွေ မထားပါဘူး။ လုံးဝအလိုအလျောက်မောင်းနှင်မှုပါ။ ဒါက အဝေးပြေးလမ်းပေါ်မှာ လူမပါ ၊ အဝေးထိန်းစနစ်မပါတဲ့ ပထမဆုံး အပြည့်အဝအလိုအလျောက်မောင်းစနစ်ပဲ" လို့ အီလွန်မတ်စ်က X ပေါ်မှာ ကြေညာပါတယ်။
Tesla AI နဲ့ Autopilot အကြီးအကဲ အရှော့ခ် အယ်လူဆာမီကလည်း ဒီခရီးစဉ်မှာ Model Y က တစ်နာရီ ၁၁၅ မိုင် speed အထိ သူ့ဟာသူ မောင်းသွားတယ်လို့ အတည်ပြုပါတယ်။ တစ်နည်းပြောရရင် Tesla ရဲ့ ပထမဆုံး အပြည့်အဝအလိုအလျောက်မောင်းနည်းပညာ FSD ခေတ် စတင်ပြီလို့ ကြေညာလိုက်တာပါပဲ။
Tesla က မကြာသေးခင်ကပဲ invite-onlye အနေနဲ့ မောင်းသူမဲ့ robotaxi ခရီးစဉ်တွေ အစမ်းစတင်နေပါတယ်။ Tesla FSD ဆော့ဖ်ဝဲလ်စနစ်နဲ့ဆို နောက်ပိုင်း ပိုင်ရှင်က ရုံးတက်နေရင်း ကားက သူ့ဟာသူ အော်ဒါလိုက်ငွေရှာတာမျိုးတွေအထိ ဖြစ်လာနိုင်ပါတယ်။

Spotify မှာ ပရိသတ် ၅ သိန်းခွဲကျော်ရထားတဲ့ AI ရော့ခ်တီးဝိုင်း
AI အဆိုတော် ၊ AI အတီးသမားတွေနဲ့ AI တီးဝိုင်းတွေ လာပါပြီ။
The Velvet Sundown ဆိုတဲ့ AI ရော့ခ်တီးဝိုင်းအဖွဲ့က Spotify မှာ နေ့ချင်းညချင်းဆိုသလို နာမည်အရမ်းကြီးလာပါတယ်။ Spotify မှာ Streaming လုပ်ရင်း လပိုင်းအတွင်း ပရိသတ် ၅ သိန်းခွဲကျော် ရှိလာတာပါ။ အခုဆို လစဉ်နားထောင်သူ ၆ သိန်းခွဲနား ရောက်လာနေပြီလို့ ဆိုပါတယ်။
တစ်လအတွင်းမှာ The Velvet Sundown အဖွဲ့ရဲ့ Floating on Echoes နဲ့ Dust and Silence အယ်လ်ဘမ်နှစ်ချပ် ထွက်ပြီးနောက် ဒီအဖွဲ့ရဲ့ သီချင်းတွေကို နားထောင်သူ တဟုန်းထိုးတက်လာတာပါ။ ဒီ band က AI band ဆိုပေမယ့် တကယ့်ဂီတသမားတွေနဲ့ ဖွဲ့စည်းထားသလိုမျိုး နာမည်တွေ ပေးထားပါတယ်။
၇၀ ပြည့်လွန်နှစ် ဆိုက်ခီဒဲလစ် အော်တာနေးတစ်ရော့ခ်အမျိုးအစား ဂီတတွေ ဖန်တီးတဲ့ ဒီတီးဝိုင်းမှာ အဆိုတော်နဲ့ Mellotron (ကီးဘုတ်ပုံစံတူရိယာ)တီးသူ ဂါဘေး ဖာရိုး ၊ ဂစ်တာသမား လန်နီး ဝက်စ် ၊ Synthesizer တီးသမား မီလို ရိန်းစ် ၊ percussion တီးသူ အော်ရီယွန် ရီယို ဒယ်လ်မာဆိုပြီး AI အဖွဲ့ဝင် ၄ ယောက်ပါတယ်လို့ ဖော်ပြထားပါတယ်။
The Velvet Sundown က Generative AI နဲ့ ဖန်တီးထားတဲ့ တီးဝိုင်းလို့ ပြောနေကြပေမယ့် တရားဝင်အတည်ပြုချက်တော့ ထွက်မလာသေးပါဘူး။ Spotify ကလည်း ဒီ band ကို AI ဆိုပြီးတော့ label တပ်မထားတော့ ပြောရခက်ပါတယ်။
ဒါပေမယ့်လည်း တစ်လအတွင်း အယ်လ်ဘမ်နှစ်ချပ်ထုတ်နိုင်တာ ၊ အဖွဲ့ဝင် artist တွေ အွန်လိုင်းပေါ်မှာရော အပြင်မှာပါ ရှာမတွေ့တာ ၊ အယ်လ်ဘမ်ကာဗာနဲ့ ပုံတွေက AI Generated ဖြစ်ထားတာတွေနဲ့ သီချင်းစာသားနဲ့ အသံတွေက AI ဆန်တာတွေကြောင့် AI တီးဝိုင်းပဲ ဖြစ်ရမယ်လို့ အများက ယူဆနေကြပါတယ်။
အခုလ ၁၄ ရက်နေ့မှာလည်း ဒီ AI band က Paper Sun Rebellion ဆိုတဲ့ တတိယအယ်လ်ဘမ်ထပ်ထွက်ဖို့ ရှိပါတယ်။ The Velvet Sundown ရဲ့ Spotify ပေါ်က လစဉ်ဝင်ငွေတင် ဒေါ်လာ ၅၀၀၀ ကျော်တယ်လို့ ပြောနေကြပါတယ်။
စတူဒီယိုစရိတ်မရှိ ၊ ဂီတပညာရှင်တွေအတွက် ပိုက်ဆံမကုန်ဘဲ AI tools တွေနဲ့ချည်း အယ်လ်ဘမ်ထုတ် တီးဝိုင်းထောင်ပြီး အောင်မြင်နိုင်တယ်ဆိုရင်တော့ ဂီတလောကအတွက် လှုပ်ခတ်ချက်ကြမ်းပြီလို့ ဆိုရမှာပါ။

အပါးဆုံးနဲ့ ဘက်ထရီအကြီးဆုံး foldable ဖုန်း Honor ကြေညာ
Foldable ဖုန်း ပါးတဲ့ဘက်မှာ Honor က ဗိုလ်စွဲနေတုန်းပါပဲ။
၄ ဂဏန်းစီးရီးကို ကျော်ပြီး Honor Magic V3 အဆက် Honor Magic V5 သစ်မှာလည်း အပေါ့ပါးဆုံး ခေါက်ဖုန်းဆိုတဲ့ ဝိသေသကို ဆက်သုံးပါတယ်။ Honor Magic V5 သစ်က အရင် Magic V3 ထက်တောင် ပိုပါးပိုပေါ့ပါတယ်။ ကာလာပေါ်လိုက်လို့ Folded/Unfolded အထူ နဲ့ ဝိတ်နည်းနည်း ကွာပါမယ်။
ဆင်စွယ်ဖြူက ပိုပါးပိုပေါ့ပါတယ်။ တခြားအရောင်တွေနဲ့ ယှဉ်ရင် 8.8mm/9.0mm (Folded)၊ 4.1mm/4.2mm (Unfolded) နဲ့ 217g/222g (weight) တွေ ရှိပါတယ်။ ဒီဇိုင်းကတော့ အရင် Magic V3 အတိုင်းဆိုပေမယ့် အခုမော်ဒယ်က ပိုရေဒဏ်ဖုန်ဒဏ် ခံနိုင်ရည်မြင့်တဲ့ IP58/59 rating တွေနဲ့ လာပါတယ်။
အသိသာဆုံးအပြောင်းအလဲက Magic V5 က ဘက်ထရီပါဝါ ၁၂% ပိုကြီးသွားတာပါ။ တရုတ်ဈေးကွက်ထဲ ဝင်မယ့် Magic V5 က ဘက်ထရီပါဝါ 6100 mAh ဆီလီကွန်ကာဗွန်သုံးပါတယ်။ ပြည်ပကို ဖြန့်မယ့်အလုံးတွေက 5820mAh နဲ့ လာမှာပါ။ Charging အတွက် သုံးမှာကတော့ 66W wired charging နဲ့ 50W wireless charging တွေပါ။
တခြား specs တွေက အပြောင်းအလဲ သိပ်မရှိပါဘူး။ အပြင် screen ၆.၄၃ လက်မ 2376 x 1060px အတွင်း ၇.၉၅ လက်မ 2352 x 2172px display တွေ သုံးပြီး အတွင်းရော အပြင်ပါ 120Hz LTPO OLED panel နဲ့ 5000nits brightness ပါပါတယ်။ ကာဗာ screen ကို အစင်းခြစ်ခံ Anti-scratch NanoCrystal Shield နဲ့ကာပြီး အတွင်း screen ကို Super Armored Inner screen သုံးပေးထားပါတယ်။
အဌဂံကင်မရာအိမ်ထဲမှာ 50MP f/1.6 wide-angle ကင်မရာ ၊ 50MP f/2.0 ultrawide နဲ့ 64MP 1/2.0" sensor 70mm f/2.5 telephoto ကင်မရာတွေ ပါပါတယ်။ Selfie အတွက်ကတော့ အတွင်းရော အပြင်ပါ 20MP f/2.2 ကင်မရာတွေ နဲ့ လာပါတယ်။ ကျောဘက် cover က စက္ကူထက် ပေါ့ပြီး စတီးထက်အဆ ၄၀ ပိုမာတဲ့ လေယာဉ်သုံး ၀.၀၁၄ မီလီမီတာ ကွန်ပိုးဆစ်ဖိုင်ဘာနဲ့ ထုတ်ထားပါတယ်။
flagship ဖုန်းဖြစ်လို့ Qualcomm ရဲ့ အမြင့်ဆုံး Snapdragon 8 Elite SoC ကို သုံးပြီး 12/256GB, 16/512GB နဲ့ 16GB/1TB ဆိုပြီး ဗားရှင်းသုံးမျိုး ၊ Ivory White , Black , Dawn Gold နဲ့ Reddish Brown လေးရောင်နဲ့ ထွက်ပါတယ်။
အနိမ့်ဆုံးမော်ဒယ်က ၈၉၉၉ ယွမ် (၁၂၅၅ ဒေါ်လာ) က စပါတယ်။ အမြင့်ဆုံး 1TB မော်ဒယ်ကတော့ ယွမ် ၁၀၉၉၉ (၁၅၃၅ ဒေါ်လာ) ဖြစ်လို့ Magic V5 က ရေလျှံငွေလျှံ ပရီမီယမ်တန်း ကိုင်ချင်သူတွေအတွက်လို့ ပြောရမှာပါ။

AI ကို ပုံအောပြီး လူ ၉၀၀၀ အလုပ်ထပ်ဖြုတ်မယ့် Microsoft
ဖွဲ့စည်းပုံပြောင်းမယ်ဆိုတဲ့ Microsoft က နောက်ထပ် ဝန်ထမ်း ၉၀၀၀ လောက် လူလျှော့ဖို့ လုပ်နေပါတယ်။
ကမ္ဘာအနှံ့က အလွှာစုံ Microsoft ဝန်ထမ်းအင်အား ၄% အောက် အလုပ်ပြုတ်မှာပါ။ Microsoft က ပြီးခဲ့တဲ့ မေလကပဲ လူ ၆၀၀၀ ကျော် အလုပ်ဖြုတ်ထားတာပါ။ ဇွန်လထဲမှာလည်း နောက်ထပ်အနည်းဆုံး လူ ၃၀၀ အလုပ်ဖြုတ်တယ်လို့ ကြားပါတယ်။
အခုတစ်ခေါက် လူလျှော့တာက ၂၀၂၃ ကထက် ကြမ်းပါတယ်။ ၂၀၂၃ ခုနှစ်တုန်းက Microsoft ဝန်ထမ်း ၁၀၀၀၀ အလုပ်ဖြုတ်ခံရတာပါ။ ဒီတစ်ခေါက် လူ ၉၀၀၀ အလုပ်ဖြုတ်ခံရရင်တော့ တစ်နှစ်အတွင်း ဝန်ထမ်း ၁၅၀၀၀ လောက် အလုပ်ဖြုတ်ခံရတာမို့ Microsoft သမိုင်းမှာ ၂၀၁၄ နောက်ပိုင်း အကြီးဆုံးလူလျှော့မှု ဖြစ်လာပါလိမ့်မယ်။
၂၀၁၄ တုန်းက Microsoft က Nokia ရဲ့ ထုတ်ကုန်နဲ့ ဝန်ဆောင်မှုစီးပွားရေးကို ဝယ်ပြီးနောက်မှာ လူပေါင်း ၁၈၀၀၀ အလုပ်ပြုတ်ခဲ့ပါတယ်။ မေလတုန်းက လူ ၆၀၀၀ ကျော် အလုပ်ဖြုတ်ခဲ့တဲ့ကိစ္စတုန်းက Software Engineer တွေနဲ့ ထုတ်ကုန်စီမံခန့်ခွဲမှုပိုင်းက ဝန်ထမ်းတွေ အများဆုံး အလုပ်ပြုတ်ခဲ့တာပါ။
Microsoft က မတ်လ သုံးလပတ်မှာ ဝင်ငွေဒေါ်လာ ဘီလျံ ၇၀ နဲ့ အသားတင်ဝင်ငွေ ဒေါ်လာ ၂၆ ဘီလျံ မြတ်ခဲ့ပါတယ်။ Wall Street က တွက်ထားတဲ့ ကိန်းဂဏန်းတွေထက်ကို ကျော်ပြီး ဝင်ခဲ့တာပါ။ Microsoft ကတော့ "စဉ်ဆက်မပြတ် ပြောင်းလဲနေတဲ့ ဈေးကွက်ထဲမှာ အောင်မြင်မှုရဖို့ ကုမ္ပဏီဖွဲ့စည်းပုံအပြောင်းအလဲတွေ ဆက်လုပ်မယ်" လို့ ပြောပြီး လူလျှော့ပါတယ်။
AI ကို လုပ်ငန်းခွင်တွေမှာ ပိုပြီး ထိထိရောက်ရောက် အသုံးချလာနိုင်တာနဲ့အမျှ အလုပ်မှာ လူလျှော့တဲ့ ကိစ္စတွေလည်း လိုက်ပါလာတာပါ။ Microsoft CEO ဆတ္တယာ နာဒဲလာကလည်း ကုမ္ပဏီမှာ ရေးတဲ့ code တွေရဲ့ ၂၀-၃၀% က AI နဲ့ ထုတ်နိုင်ပြီလို့ ပြောထားသလို AI model တွေ လေ့ကျင့်ဖို့ ဒေတာစင်တာကြီးတွေမှာ ဒေါ်လာဘီလျံ ၈၀ သုံးနေတယ်လို့ ဆိုပါတယ်။
AI သက်ရောက်မှုက လူ့အလုပ်အကိုင်တွေပေါ် အနှေးနဲ့အမြန် ထိခိုက်မှုတွေ ရှိလာတယ်လို့ ဆိုရမှာပါ။

prototype စမ်းတဲ့အဆင့် ရောက်နေပြီ ဖြစ်တဲ့ iPhone Fold
ဟိုနှစ်ထွက်မယ် ဒီနှစ်ထွက်မယ်ဆိုပြီး ကောလာဟလတွေ ဖြစ်ခဲ့တဲ့ iPhone ခေါက်ဖုန်းတော့ ရှေ့ပြေးပုံစံတွေ စမ်းနေပြီလို့ ပြောပါတယ်။
ဒါလည်း Digitimes ကလူတွေ supply chain အချက်အလက်တွေ ကြည့်ပြီး ပြောနေတာပါ။ Apple ကတော့ သူ့မူအတိုင်း ကြိတ်ကြံနေတဲ့ အကျင့်လေးနဲ့ သွားနေပါတယ်။ iPhone Fold က ဒီနှစ်ကုန်လောက် နမူနာရှေ့ပြေး prototype စမ်းသပ်တဲ့အဆင့် ပြီးရင်တော့ အင်ဂျင်နီယာနဲ့ ဒီဇိုင်းပိုင်းဆိုင်ရာ အတည်ပြုစမ်းသပ်တဲ့ EVT phase တက်မှာပါ။
EVT အဆင့် အောင်ရင် ထုတ်လုပ်ရေးစဖို့ပဲ ရှိပါတယ်။ အစီအစဉ်အတိုင်းဆို နောက်နှစ် စက်တင်ဘာ iPhone 18 စီးရီးနဲ့အတူ iPhone Fold ကိုပါ ရင်ခုန်ရမှာပါ။ iPhone Fold သတင်းအပိုင်းအစတွေကို ဆက်စပ်ကြည့်ရင် ဒီဖုန်းက တိုက်တေနီယမ်ဘော်ဒီနဲ့ လာပြီး ၇.၇၈ လက်မ dispaly နဲ့ 48MP dual ကင်မရာ သုံးပါလိမ့်မယ်။
display က Samsung ထုတ် OLED panel ဖြစ်မယ်။ display အောက်မှာ ကင်မရာထားပြီး ဘေးဘောင် Touch ID scanner နဲ့ လာပါမယ်။ FaceID တော့ မပါဘူးလို့ ကြားပါတယ်။ ခေါက်ထားချိန်မှာ အထူ 9-9.5mm ရှိမယ်ဆိုတဲ့ သတင်းမှန်ရင်တော့ ဒီဖုန်းလည်း အပါးဆုံး Foldable ဖုန်းတွေနဲ့ တတန်းတည်းထားရမှာပါ။
ဈေးကတော့ တော်တော်ချမ်းသာမှ ကိုင်နိုင်မယ့်ဈေး ဖြစ်မှာ သေချာပါတယ်။ ကြားရသလောက် iPhone Fold ရဲ့ ခန့်မှန်းဈေးက ဒေါ်လာ ၂၁၀၀ နဲ့ ၂၃၀၀ ကြားလို့ ဆိုပါတယ်။ Android OEM ထုတ် Foldable တွေ ပေါ်တာ နှစ်မနည်းတော့ဘူးဆိုပေမယ့် Apple ရဲ့ ပထမဆုံး ခေါက်ဖုန်းဖြစ်မယ့် iPhone Fold ကတော့ ကုမ္ပဏီရဲ့ ဂုဏ်ယူစရာ product ဖြစ်လာမှာပါ။

DeepSeek AI နဲ့ ECG ပါတဲ့ Honor Watch 5 Ultra
smartwatch ထဲမှာ Honor က နောက်ဆုံးထွက်တဲ့ Watch 5 Ultra လေး တော်တော်မိုက်တယ်။
Honor Watch 5 Ultra က AI စမတ်ကျန်းမာရေးနာရီမျိုးပါ။ တရုတ်ပြည်ဖြစ် DeepSeek AI ကို MagicOS ပလက်ဖောင်းနဲ့ ပေါင်းထားပြီး AI support ပေးထားလို့ပါ။ နာရီရဲ့ ဘက်ထရီနဲ့ performance ကို အကောင်းဆုံးဖြစ်စေဖို့ Honor ရဲ့ Tri-Chip စမတ်ထိန်းချုပ်စနစ်လည်း ပါပါတယ်။
နောက်ပြီး real-time အခြေအနေစောင့်ကြည့်ပြီး တုံ့ပြန်အသိပေးနိုင်တဲ့ YOYO AI assistant လည်း သုံးထားပါတယ်။ special feature က နှလုံးကျန်းမာရေးအတွက် တော်တော်ကောင်းတဲ့ အာရုံခံစနစ်တွေ နဲ့ ကျန်းမာရေးစောင့်ကြည့်စနစ်တွေ သုံးလာတာပါ။
Honor က ECG , heart rate, accelerometer , gyroscope , barometer , ambient light နဲ့ geomagnetic စတဲ့ အာရုံခံ sensor တွေ အများကြီးပါပါတယ်။ နှလုံးဖောက်နိုင်တဲ့ လက္ခဏာတွေ ကြိုပြီး ကြည့်တဲ့ features တွေ ၊ China-PAR ရဲ့ နှလုံးရောဂါဖြစ်နိုင်ခြေဆန်းစစ်ချက်နဲ့ အာရုံကြောစနစ်အခြေအနေ စောင့်ကြည့်နိုင်တဲ့ လုပ်ဆောင်ချက်တွေလို အဆင့်မြင့်ကျန်းမာရေးစနစ်တွေလည်း ထည့်ထားပါတယ်။
sports mode အနေနဲ့ ၁၀၅ ခုအထိ ပါသလို ရေအောက် အနက်မီတာ ၅၀ အထိ ရေဒဏ်ခံနိုင်တဲ့ 5ATM နဲ့ IP68 rating တွေလည်း ရထားတဲ့ နာရီပါ။ eSIM support ရတဲ့ နာရီဖြစ်ပြီး eSIM mode မသုံးရင် သူ့မှာပါတဲ့ 480mAh ဘက်ထရီက ၁၅ ရက်ထိ အားခံပါတယ်။ eSIM သုံးပြီး Honor ဖုန်းနဲ့ ချိတ်ထားရင် ၁၀ ရက် ဘက်ထရီခံမှာပါ။ ဒီနာရီက wireless charging လည်း ရပါတယ်။
Honor Watch 5 Ultra က တိုက်တေနီယမ်အလွိုင်းသုတ် အဌဂံပုံ နာရီအိုး AMOLED display နဲ့ လာပြီး မာကျောမှု mohs 9 အထိ ရတဲ့ sapphire crystal မှန်နဲ့ ကာထားပါတယ်။ ဈေးကွက်ထဲမှာ SGS ရဲ့ အစင်းခြစ်ခံ မှန်အပွန်းဒဏ်ခံနိုင်မှု ထောက်ခံချက် ကြယ်ငါးပွင့်ရ ပထမဆုံးစမတ်နာရီပါ။ Brown leather , Titanium နဲ့ Black Fluoroelastomer ပုံစံသုံးမျိုးနဲ့ လာပြီး သုံးမျိုးလုံးက ဒီဇိုင်းလှအကြမ်းခံဖက်ရှင် သုံးထားတာပါ။
ဒီနာရီက GPS , GLONASS , Galileo , Beidou နဲ့ QZSS ဆိုပြီး ဂြိုလ်တုတည်နေရာပြစနစ် ၅ ခု support ပေးသလို NFC နည်းပညာသုံး ငွေပေးချေစနစ်တွေလည်း ထောက်ပံ့ထားပါတယ်။ တရုတ်ဈေးကွက်ထဲမှာ အနက်ရောင်ဗားရှင်းကို ၁၉၉၉ ယွမ် (၂၇၅ ဒေါ်လာ) ၊ Brown မော်ဒယ်ကို ၂၂၉၉ ယွမ် (၃၁၇ ဒေါ်လာ) နဲ့ Titanium မော်ဒယ်ကို ၂၈၉၉ ယွမ် (ဒေါ်လာ ၄၀၀ ဝန်းကျင်) ဈေးတွေနဲ့ ဝင်ထားပါတယ်။

ဂျိုတာ ကွယ်လွန်ခြင်းဖြစ်စဉ် 💔😢
ဖြစ်စဉ်မှာ ဒီယေဂိုဂျိုတာနဲ့ ညီဖြစ်သူတို့ စီးနှင်းလာတဲ့ Lamborghini ကားဟာ လမ်းမှာ ကျော်တက်စဉ် ကားတာယာ‌ပေါ၊က်ပြီး လမ်းဘေးကိုလွင့်စင်ခဲ့ပါတယ်။
ယနေ့မနက် ဒေသစံတော်ချိန် ၁၂ နာရီအချိန် စပိန်နိုင်ငံ၊ ဇာမိုရာမှာဖြစ်ပွါးခဲ့ခြင်းဖြစ်ပြီး ကားမှာမီ၊းလောင်သွားခဲ့ကာ ကားပေါ်လိုက်ပါသွားသူနှစ်ဦး ဆုံးပါးခဲ့ပါတယ်။
ကားပေါ်မှာ လိုက်ပါခဲ့သူ ၂ ဦးဟာ ဂျိုတာနဲ့ သူ့ရဲ့ညီ အန်ဒရီဆေးဗားတို့ဖြစ်တယ်လို့ စပိန်ရဲတ၊ပ်ဖွဲ့က အတည်ပြုခဲ့ပါတယ်။