UFC အဖွဲ့အစည်းမှာ Reinier de Ridder ထိပ်တန်းဖြစ်နိုင်လား
UFC အဖွဲ့အစည်းမှာ ထိပ်တန်းဖြစ်နိုင်လားဆိုတဲ့ ဆောင်းပါးက ည (၈) နာရီမှာ တင်ဖို့ပါ။ မှားပြီး Close Tab လုပ်မိတယ်။ ဆောင်းပါးအစအဆုံးက ပျက်သွားပါလေရော။ ပြန်ဆယ်လို့လည်း မရတော့ဘူး။ ကျွန်တော်ကိုကလည်း Rabbit Converter မှာ ရေးမိတာမှားတယ်။ အရင်လို Google Keep သာဆို Close Tab လုပ်မိလည်း ဘာမှမဖြစ်ဘူး။ အခုက အစအဆုံးပြန်ရေးရတာပါ။ ဒါကြီးကို ဒုတိယအကြိမ်ပြန်ရေးရတော့ ပထမတုန်းကလို စိတ်အားထက်သန်မှုမရှိတော့တာ အမှန်ပဲ။
UFC အဖွဲ့အစည်းမှာ ထိပ်တန်းဖြစ်နိုင်လားဆိုတဲ့ မေးခွန်းက စိတ်ဝင်စားစရာပါ။ နယ်သာလန်လောရှည်က တော်တော် Hot နေတာ အမှန်ပဲ။ အမှန်တိုင်းပြောရရင် Reinier de Ridder ကို စသိတာ (၅) နှစ်လောက်ပဲရှိသေးတယ်။ Aung La Nsang နဲ့ Reinier de Ridder ပထမပွဲကို သိပ်မမျှော်လင့်ပါဘူး။ အရင်က Reinier de Ridder ရဲ့ နိုင်ပွဲတွေကလည်း အထင်ကြီးစရာမှ မကောင်းတာလေ။ Aung La Nsang နိုင်လိမ့်မယ်လို့ ထင်တာပါ။ အထင်နဲ့ အမြင်က တက်တက်စင်အောင် လွဲတာပဲ။
Reinier de Ridder က Aung La Nsang ကို ပထမအချီမှာ လည်ပင်းညှစ်လိုက်တာပါ။ ကြက်ကလေး၊ ငှက်ကလေးလို အသာလေးညှစ်လိုက်တာပါပဲ။ နယ်သာလန်လောရှည်ကြီးကို လျှော့တွက်လို့ မရတော့ဘူး။ မကျေပွဲမှာလည်း Reinier de Ridder က ဆက်နိုင်ပြီး ချန်ပီယံကာကွယ်ပွဲတွေထိုးလို့ ခေတ်တစ်ခေတ်ကို ထူထောင်နိုင်ခဲ့ပါတယ်။ အဲဒီအချိန်ထိ Striking Skill က ဒီလောက်မဟုတ်ပါဘူး။ နင်းခြေတားခြေသုံးပြီး အကွာအဝေးထိန်းထားတယ်၊ ထောက်လက်သီးထိုးတယ်။ ဒီလောက်ပဲ လုပ်တတ်တာပါ။
Anatoly Malykhin က Reinier de Ridder ကို နန်းချခဲ့ပါတယ်။ ပထမပွဲကို လိုက်ဟဲဗီးဝိတ်တန်းမှာ ကစားခဲ့တာပါ။ ဝင်လုံးလို့မရတဲ့အခါမှာ ယှဉ်ထိုးလိုက်ရတာ ငါးပါးမှောက်တာပဲ။ Anatoly Malykhin က Takedown Defense ကောင်းတာလည်း ပါတယ်။ ခွန်အားကြီးသလို ပါဝါကြီးတာကြောင့်လည်း အလဲထိုးခံရတာပါ။ Reinier de Ridder က ကိုယ့်အားနည်းချက်ကို သိသွားပုံပေါ်တယ်။ ပြည်ပထွက်ပြီး Striking ဖြည့်လိုက်တာ မကျေပွဲမှာ ပိုကောင်းလာတယ်။
မကျေပွဲကို မစ်ဒယ်ဝိတ်တန်းမှာ ကစားခဲ့ကြတာပါ။ မကျေပွဲက ပထမပွဲလို မဟုတ်ဘူး။ Reinier de Ridder က Anatoly Malykhin ကို အထိနာအောင် ကစားနိုင်ခဲ့ပါတယ်။ သံဇကာဘေးမှာ Anatoly Malykhin ခွေခနဲလဲမလိုဖြစ်သွားသေးတယ်။ လက်သီးပါဝါကွာလို့သာ Reinier de Ridder က ရှုံးရတာပါ။ အရင်ထက် Striking Skill က သိသိသာသာတက်လာတယ်။
အဲဒီနောက်မှာ ONE Championship က နန်းကျဘုရင် Reinier de Ridder ကို ပစားမပေးတော့ဘူး။ ဆက်ဆံရေးက အရင်လို မပြေလည်တော့ဘူး။ အဲဒါကြောင့်မို့ လက်ပြနှုတ်ဆက်လိုက်တာပါ။ ကြားထဲမှာ UAE Warriors အဖွဲ့အစည်းငယ်မှာ ကစားခဲ့သေးတယ်။ နိုင်လိုက်တာပါပဲ။ အဲဒီနောက်မှသာ UFC အဖွဲ့အစည်းကို ရောက်သွားတာပါ။
Reinier de Ridder က UFC အဖွဲ့အစည်းမှာ (၃) ပွဲဆက်တိုက် ပွဲသိမ်းနိုင်ထားပြီး နောက်ဆုံးပွဲမှာ အပိုဆုကြေးရလိုက်တယ်။ Bo Nickal ကို အလဲထိုးပြီး ပိုနာမည်ကြီးလာတာပါ။ အရင်တည်းက Striking ဖြည့်နေတာပါ။ အခုဆိုရင် Kill Cliff ကလပ်မှာ လေ့ကျင့်နေတာမို့ Striking Skill က ပိုတိုးတက်လာပါပြီ။ ဒီထက်လည်း တိုးတက်လာဖို့ပဲရှိပါတယ်။ ဇူလိုင်လ (၂၆) ရက်နေ့မှာ Reinier de Ridder နဲ့ Robert Whittaker တို့ကို ကြည့်ရမယ်။ အဆင့် (၅) Robert Whittaker ကိုသာနိုင်လိုက်ရင် နယ်သာလန်လောရှည်က ထိပ်တန်းဖြစ်လာလိမ့်မယ်။ Top 5 ဝင်ရင် ထိပ်တန်းဖြစ်ပြီလို့ ဆိုနိုင်ပါတယ်။
Reinier de Ridder ရဲ့ Grappling Skill က ကမ္ဘာ့အဆင့်ရှိပါတယ်။ အဲဒါက မယုံမရှိနဲ့ တကယ်။ ဝင်လုံးမိရင် အမှတ်ယူဖို့ထက် ချုပ်ကွက်အထိကို ဖော်ဆောင်နိုင်တာပါ။ အဲဒါကြောင့်မို့လို့ Finishing Rate မြင့်နေတာပါ။ Submission Skill က တကယ်လက်လန်တယ်။ မစ်ဒယ်ဝိတ်တန်းမှာ Striking သမားများပါတယ်။ Striking Skill တိုးတက်လာပေမယ့် သာမန်အဆင့်ထက် မပိုသေးပါဘူး။
ဒီနေရာမှာ ရုပ်ပိုင်းဆိုင်ရာ အားသာချက်ကို ထည့်ပြောချင်တယ်။ Reinier de Ridder က အရပ် (၆) ပေ (၄) လက်မဖြစ်ပြီး လက်တံ (၇၈) လက်မဖြစ်ပါတယ်။ မစ်ဒယ်ဝိတ်တန်းမှာ အတော်အားသာတဲ့ အချက်အလက်ပါ။ ပွဲတွင်းဝိတ်က (၂၁၂) ပေါင်ဖြစ်နေတယ်။ လိုက်ဟဲဗီးဝိတ်သမား Jiri Prochazka ထက်တောင် ပိုထွားတယ်။ မစ်ဒယ်ဝိတ်တန်းမှာ Reinier de Ridder က အကောင်ကြီးတဲ့ ကစားသမားပါ။ ရုပ်ပိုင်းဆိုင်ရာ အားသာချက်က အလယ်အလတ် Striking Skill ကို အထောက်အကူဖြစ်တာတော့ အမှန်ပဲ။
စာလည်းရှည်နေပြီမို့ နိဂုံးချုပ်ပါမယ်။ Reinier de Ridder အတွက် ကြေးစားဘဝမှာ အတွေ့အကြုံအရင့်ကျက်ဆုံးအချိန်ပါ။ ရှင်ကြီးဝမ်းလည်း ဝင်ခဲ့ဖူးပါပြီ၊ ရှင်ငယ်ဝမ်းလည်း ဝင်ခဲ့ဖူးပြီမို့ ဘယ်ဝမ်းက ပိုနံသလဲဆိုတာ နားလည်နေပါပြီ။ သံဇကာထဲမှာ Striker တွေရော Grappler တွေရော နပန်းသမားတွေကိုရော ရင်ဆိုင်ဖူးထားပြီ။ သူကြိတ်လိုက်တာလည်း ရှိသလို သူခံရတာလည်း ရှိဖူးပြီ။ အနိမ့်အမြင့်၊ အတက်အကျမျိုးစုံကို နားလည်နေပါပြီ။
Reinier de Ridder က Robert Whittaker ထက် သိသိသာသာ မနိမ့်ဘူး။ နိုင်ကောင်းနိုင်ပါလိမ့်မယ်။ နိုင်ရင်တော့ ထိပ်တန်းဖြစ်လာလိမ့်မယ်။ UFC အဖွဲ့အစည်းမှာ Reinier de Ridder ထိပ်တန်းဖြစ်နိုင်လားလို့မေးရင် ကျွန်တော်က Yes လို့ ဖြေပါလိမ့်မယ်။ ထိပ်တန်းဖြစ်ပြီးမှ ချန်ပီယံဖြစ်နိုင်လားဆိုတဲ့ ဆောင်းပါးကို ပြန်ရေးပါ့မယ်။
