#ပြည်တွင်းသတင်း
◼ညောင်တုန်းမြို့အား ဗဟိုပြု၍ မြေငလျင်လှုပ်ခတ်မှု လေးကြိမ်ဖြစ်
ဧရာဝတီတိုင်း၊ ညောင်တုန်းမြို့အား ဗဟိုပြု၍ ယနေ့(မတ် ၅ ရက်)နံနက်ပိုင်းက မြေငလျင်လှုပ်ခတ်မှု လေးကြိမ်ဖြစ်ခဲ့ကြောင်း မိုးလေ၀သ နှင့် ဇလဗေဒ ညွှန်ကြားမှု ဦးစီးဌာနမှ ထုတ်ပြန်ထားသည်။
အဆိုပါ မြေငလျင်လှုပ်ခတ်မှုများမှာ နံနက် ၄ နာရီ၊ ၃၆ မိနစ်၊ ၄၇ စက္ကန့် အချိန်တွင် အင်အားရစ်(ခ်)တာစကေး (၅ ဒသမ ၁) အဆင့်ရှိ အင်အားအသင့်အတင့်ရှိသော မြေငလျင်တစ်ခု၊နံနက် ၄ နာရီ၊၅၄ မိနစ်၊ ၉ စက္ကန့် အချိန်တွင် အင်အားရစ်(ခ်)တာစကေး ၄ ဒသမ ၈ အဆင့်ရှိ မြေငလျင်တစ်ခု၊နံနက် ၅ နာရီ၊၂၀ မိနစ်၊၄၈ စက္ကန့်အချိန်တွင် အင်အားရစ်(ခ်)တာစကေး ၃ ဒသမ ၅ အဆင့်ရှိ မြေငလျင်တစ်ခု၊နံနက် ၅ နာရီ၊၂၃ မိနစ်၊၅၅ စက္ကန့်အချိန်တွင် အင်အားရစ်(ခ်)တာစကေး ၃ ဒသမ ၁အဆင့်ရှိ မြေငလျင်တစ်ခု စုစုပေါင်း လေးကြိမ်လှုပ်ခတ်ခဲ့ခြင်းဖြစ်သည်။
အဆိုပါ ငလျင်လှုပ်ခတ်မှုအား ရန်ကုန်ရှိ မြို့နယ်အများအပြားတွင်လည်းသိသာစွာခံစားခဲ့ရကြောင်း ဒေသခံများကဆိုသည်။
" မနက်က ငလျင်လှုပ်တော့ လန့်နိုးသွားတာ။နာရီကြည့်တော့ ၄ နာရီ ၃၇ လောက်ရှိမယ်။ကုတင်ပါခါရမ်းသွားတာ။နောက်တစ်ကြိမ်လည်းထပ်လှုပ်သေးတယ်။အဲ့တစ်ကြိမ်ကတော့ သိပ်မသိသာဘူး။အားပျော့တယ်"ဟု ပုဇွန်တောင်မြို့နယ်တွင် နေထိုင်သူတစ်ဦးကပြောသည်။
ပြီးခဲ့သည့် မတ်လ ၃ရက်တွင်လည်း ရန်ကုန်တိုင်း၊တိုက်ကြီးမြို့အား ဗဟိုပြု၍ အင်အားရစ်(ခ်)တာစကေး ၄ ဒဿမ ၅ အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ခတ်သွားကြောင်း မိုးလေ၀သ နှင့် ဇလဗေဒညွှန်ကြားမှုဦးစီးဌာနမှ ထုတ်ပြန်ထားသည်။
သတင်း-အင်ကြင်း
