ကုန်ဈေးနှုန်းကြီးမြင့်နေခြင်းကို အစိုးရအဖွဲ့များက စနစ်တကျစိစစ်ကြပ်မတ်ရန် နစက ဥက္ကဋ္ဌမှာကြား
နိုင်ငံအတွင်း၌ အခြေခံစားသောက်ကုန်များအပါအဝင် ကုန်ပစ္စည်းများစျေးနှုန်းကြီးမြင့်နေခြင်းနှင့်ပတ်သက်၍ ဆောင်ရွက်သွားသင့်သည်များကို ယနေ့ ဒီဇင်ဘာ ၃ ရက်မွန်းလွဲပိုင်းကကျင်းပသည့် ပြည်ထောင်စုအစိုးရအဖွဲ့အစည်းအဝေးတွင် နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က ထည့်သွင်းမှာကြားခဲ့သည်။
အသား၊ ငါးနှင့် အခြေခံစားကုန် ကုန်ဈေးနှုန်းများကြီးမြင့်လာ၍ ကုန်ထုတ်လုပ်သည့် လုပ်ငန်းရှင်များအနေဖြင့် အခြေခံစားသောက်ကုန်များအား ပြည်သူများအားရောင်းချရာတွင် သင့်တင့်လျောက်ပတ်သည့်အမြတ်ကိုသာတင်ပြီး အမြတ်ငွေနည်းနည်းနှင့် ပမာဏ များများရောင်းချပြီး သက်သာချောင်ချိမှုရှိစေရန် ဆောင်ရွက်ပေးကြရမည်ဟု ပြောသည်။
" ကုန်ဈေးနှုန်းကြီးမြင့်နေမှုကို ပြည်ထောင်စုအဆင့်၊ တိုင်းနဲ့ပြည်နယ်အစိုးရအဖွဲ့တွေက စနစ်တကျစိစစ်ကြပ်မတ်ဆောင်ရွက်ရပါမယ် ဖြစ်သင့်ဖြစ်ထိုက်တဲ့ ကုန်ဈေးနှုန်းတွေဖြစ်စေဖို့အတွက် စေတနာထား အပင်ပန်းခံပြီး နိုင်ငံအတွင်းမှာ ဝင်ငွေနဲ့ထွက်ငွေမျှတအောင်ဆောင်ရွက်ကြရပါမယ်"ဟု နစက ဥက္ကဋ္ဌကမှာကြားသည်။
ဝင်ငွေနှင့်ထွက်ငွေမျှတအောင် ကုန်ထုတ်လုပ်မှုများအား မဖြစ်မနေတိုးမြှင့်၍ ပြည်ပသို့တင်ပို့ရောင်းချနိုင်ရမည်ဖြစ်ကာ လက်ရှိတင်ပို့နေသည်ထက် နှစ်ဆခန့်ပိုမိုတင်ပို့နိုင်ရမည်ကိုလည်း တိုက်တွန်းပြောကြားသည်။
ထို့ကြောင့် ကုန်ထုတ်လုပ်မှုကို ယခုထက်တိုးမြှင့်နိုင်ရန် အလုပ်အကိုင်များဖန်တီးပေးခြင်းနှင့် ကုန်ထုတ်လုပ်ငန်းများအပေါ် incentive များပေးရမည်ဖြစ်ကာ အလုပ်အကိုင်များဖန်တီးရာ၌ လိုအပ်သည့်သွင်းအားစုများကိုလည်း လုံလောက်စွာရရှိအောင်ဆောင်ရွက်ပေးရမည်ဟု မှာကြားသည်။
ကုန်ထုတ်လုပ်မှုတွင် ထုတ်လုပ်မှုကိုမဖြစ်မနေတိုးမြှင့်ဆောင်ရွက်ရမည်မှာ “မှတစ်ပါး အခြားမရှိ”ဖြစ်၍ ထုတ်လုပ်မှုများဆောင်ရွက်ရာတွင် ဈေးကွက်ရှိပြီး အရည်အသွေးပြည့်မီသည့် ကုန် ပစ္စည်းများဖြစ်ရန်လည်း လိုသည်ကို ပြောသည်။
ကုန်ပစ္စည်းချင်းတူပါက ဈေးသက်သာရမည်၊ ဈေးချင်းတူပါက အရည်အသွေးကောင်းမွန်ရမည် ဆိုသည့် အချက် ၂ ချက်ဖြင့် ဆောင်ရွက်ပါက အောင်မြင်နိုင်မည်ဖြစ်၍ တိုင်းနှင့် ပြည်နယ်ဝန်ကြီးချုပ်များ၊ သက်ဆိုင်ရာဝန်ကြီးဌာနများက စဉ်းစားဆောင်ရွက်ကြရမည်ဟု နစက ဥက္ကဋ္ဌကမှာကြားခဲ့သည်။
