လျှပ်စစ်မီး မမှန်သဖြင့် EV ကားများ သိန်းရာချီ အရှုံးခံကာ ပြန်ရောင်းနေကြ
ရန်ကုန်မှာ လျှပ်စစ်မီး ပုံမှန်မရပဲ အားသွင်းဖို့ အခက်ခဲတွေရှိလာတာကြောင့် EV ကားပိုင်ရှင်တွေဟာ မူးရင်းဝယ်ဈေးထက် သိန်းရာချီ အရှုံးခံကာ ပြန်လည်ရောင်းချနေကြတယ်လို့ ကားပွဲစားတွေထံက သိရပါတယ်။
၂၀၂၄ ခုနှစ် နှစ်လည်ပိုင်းလောက်ကစပြီး ရန်ကုန်မှာ လျှပ်စစ်မီးရရှိချိန်ဟာ ပိုမိုနည်းပါးလာတဲ့အတွက် EV ကားပိုင်ရှင်တွေဟာ မီးမလာချိန်မှာအားသွင်းဖို့ မီးစက်ဝယ်ယူရတာ၊ ဓာတ်ဆီဝယ်ယူရတာတွေနဲ့ အပိုကုန်ကျစရိတ်တွေရှိလာသလို မီးလာချိန်မှာလည်း မီးအားနည်းတာတွေရှိနေတာကြောင့် အားသွင်းမရတာမျိုး တွေဖြစ်နေတဲ့အတွက် သိန်းရာချီအရှုံးခံပြီး ပြန်ရောင်းနေရတာလို့ သိရပါတယ်။
အခုတလော EV ကားတွေ ပြန်ရောင်းချင်လို့ လာအပ်သူတွေ မနည်းဘူး။ ကားလည်းဝယ်ရ၊ မီးစက်လည်းဝယ်ရ၊ ဓာတ်ဆီလည်း ဝယ်ရတော့ စိတ်ပျက်လာကြတာ။ လာရောင်းခိုင်းသူတိုင်းက အဲ့ဒီတိုင်းပဲပြောတယ်။ အခုကျနော့်လက်ထဲမှာတင် ရောင်းဖို့ဆိုင်နေတာ ၄ စီးလောက်ရှိတယ်။ ကျပ် သိန်း ၁၀၀၀ အထက် ကားတွေချည်းပဲ။ ပိုင်ရှင်တွေက သိန်း ၇၀၀ လောက်ပြန်ရရင် တော်ပြီဆိုပြီး လာအပ်နေကြတာလို့ ကားပွဲစားတဦးက ပြောပါတယ်။
ဒီလို EV ကားတွေ ပြန်လည်ရောင်းချပေးဖို့ ပွဲစားတွေနဲ့ ချိတ်ဆက်နေကြပေမဲ့ မီးမမှန်တဲ့ အခြေအနေတွေကြောင့် ဝယ်လက်နဲ့ ပြန်ချိတ်ပေးနိုင်ဖို့ မလွယ်ကူကြဘူးလို့ ပွဲစားတွေက ဆိုပါတယ်။
#evကား
#လျှပ်စစ်မီး
