ဂျာမနီ ခရစ္စမတ်ဈေး တိုက်ခိုက်မှုအတွက် အောက်မေ့ဖွယ်အခမ်းအနားကျင်းပ
-------------
ဂျာမနီနိုင်ငံ မတ်ဒီဘာ့ဂ်မြို့မှာ ဒီဇင်ဘာ ၂၁ ရက် ညက ကြေကွဲဖွယ်ကောင်းတဲ့ ခရစ္စမတ်ဈေး တိုက်ခိုက်မှုအတွင်း သေဆုံးရသူတွေအတွက် အောက်မေ့ဖွယ် အခမ်းအနားကို စနေနေ့ညနေက ကျင်းပခဲ့ပါတယ်။
အနက်ရောင် BMW ကားနဲ့ လူအုပ်ထဲကို မီတာ ၄၀၀ လောက် မောင်းဝင်တိုက်ခဲ့လို့ အခုအချိန်အထိ အနည်းဆုံး ၅ ဉီး သေဆုံးပြီး ၂၀၀ ကျော် ဒဏ်ရာရရှိခဲ့ပါတယ်။ ဒဏ်ရာရသူတွေထဲ ငါးနှစ်သားကလေးတစ်ဦးပါဝင်ပါတယ်။ဒဏ်ရာရသူတွေထဲက ၄၁ ဦိးဟာ ဒဏ်ရာပြင်းထန်ကာ သေဆုံးသူဦးရေ တိုးလာမှာ စိုးရိမ်နေကြပါတယ်။
စနေနေ့ညက အောက်မေ့ဖွယ်အခမ်းအနားကျင်းပရာ ဘုရားကျောင်းကို သမ္မတ ဖရန့်ဝေါ်လ်တာ စတိန်းမီအာနဲ့ သေဆုံးသူတွေရဲ့ ဆွေမျိုးတွေ၊ အရေးပေါ် တုံ့ပြန်သူတွေနဲ့ ဖိတ်ကြားထားသူတွေ တက်ရောက်ခဲ့ပါတယ်။
ဂျာမန်မီဒီယာတွေရဲ့ ဖော်ပြချက်အရ ကားနဲ့တိုက်ခိုက်မှုဟာ အကြမ်းဖျင်းအားဖြင့် သုံးမိနစ်လောက် ကြာမြင့်ခဲ့ပြီး တိုက်ခိုက်သူဟာ ၂၀၀၆ ခုနှစ်ထဲက ဂျာမနီကိုရောက်နေတဲ့ အသက် ၅၀ အရွယ် ဆရာဝန်တစ်ဦးဖြစ်သူ တာလက် အဲလ်-အဗ္ဗဒူမိုဆန် ဖြစ်တယ်လို့ သိရပါတယ်။
ရဲတပ်ဖွဲ့က ဖမ်းဆီးနိုင်ခဲ့ပြီး စစ်ဆေးမေးမြန်းနေတဲ့ အဲလ်-အဗ္ဗဒူမိုဆန်ဟာ ဘာသာရေးအစွန်းရောက် မှတ်တမ်းဝင်သူ မဟုတ်ဘူးလို့ သတင်းတွေက ဖော်ပြပါတယ်။ သူ့ရဲ့ တိုက်ခိုက်ရတဲ့ရည်ရွယ်ချက်ကို ရှင်းရှင်းလင်းလင်း မသိရသေးဘဲ ဆော်ဒီဒုက္ခသည်တွေကို ဂျာမနီရဲ့ ကိုင်တွယ်မှုက အကြောင်းရင်းတစ်ခု ဖြစ်နိုင်တယ်လို့ ဖော်ပြကြပါတယ်။

ရက်ရှ်ဖို့ဒ်ရဲ့ ယူနိုက်တက် ကစားသမားဘဝ အဆုံးသတ်တော့မှာလား

ဒီဇင်ဘာ ၂၂

ပြီးခဲ့တဲ့ ရက်ပိုင်းက ဗြိတိန်မီဒီယာ အများအပြားရဲ့ခေါင်းကြီးပိုင်း သတင်းတွေမှာ ရက်ရှ်ဖို့ဒ်နဲ့ ယူနိုက်တက် အသင်းတို့ရဲ့ သတင်းတွေဟာ နေရာယူထားတာ ဖြစ်ပါတယ်။

ယူနိုက်တက်အသင်း နည်းပြအာမိုရင်ဟာ ရက်ရှ်ဖို့ဒ်ကို မန်စီးတီးအသင်းနဲ့ မန်ချက်စတာ ဒါဘီပွဲစဉ်မှာ လူစာရင်း ကနေ ချန်လှပ်ခဲ့တာကနေ စပြီး ရက်ရှ်ဖို့ဒ်နဲ့ ယူနိုက်တက်အသင်းတို့ရဲ့ အနာဂတ်သတင်းတွေဟာ အများအပြား ထွက်ပေါ်ခဲ့တာပါ။

ယူနိုက်တက်အသင်းရဲ့ အရောင်းစာရင်း တင်သွင်းခြင်း ခံထားရတဲ့ ရက်ရှ်ဖို့ဒ်က သူဟာ စိန်ခေါ်မှု အသစ်တွေ အတွက် အဆင်သင့် ဖြစ်နေပြီလို့ ပြောကာ အနာဂတ်နဲ့ ပတ်သက်တဲ့ သတင်းတွေကို တုန့်ပြန်ခဲ့တာ ဖြစ်ပါတယ်။

ပုံ - ရက်ရှ်ဖို့ဒ်ကို တွေ့ရစဉ်

#centralnewsnaypyitaw

ယခုကာလ၌ လျှပ်စစ်ဓာတ်အား တစ်ရက်ပျမ်းမျှ(၂၄၀၀)မဂ္ဂါဝပ်သာ ထုတ်လုပ်နိုင်ပြီး ဓာတ်အားလိုအပ်ချက်ကို ကာလတိုဖြေရှင်းနိုင်ရန် စီစဉ်ဆောင်ရွက်နေ

ဒီဇင်ဘာ ၂၂

ယခုကာလတွင် လျှပ်စစ်ဓာတ်အား တစ်ရက်လျှင်ပျမ်းမျှ(၂၄၀၀)မဂ္ဂါဝပ်သာ ထုတ်လုပ်နိုင်ပြီး ဓာတ်အားလိုအပ်ချက်ကို ကာလတိုဖြေရှင်းနိုင်ရန် စီစဉ်ဆောင်ရွက်နေကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက အသိပေးထုတ်ပြန်ထားသည်။

ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက ယမန်နေ့(ဒီဇင်ဘာ ၂၁ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

လျှပ်စစ်စွမ်းအားဝန်ကြီးဌာနမှ လျှပ်စစ်ဓာတ်အားထုတ်လုပ်ပေးလျက်ရှိသည့် ဓာတ်အားပေးစက်ရုံများ၏ အရင်းအမြစ်အလိုက် စုစုပေါင်းတပ်ဆင် စက်အင်အားမှာ (၇၂၇၂)မဂ္ဂါဝပ်ရှိပြီး ၎င်းစက်များအား စွမ်းအားပြည့်မောင်းနှင်လည်ပတ်နိုင်ပါက (၄၀၀၀)မဂ္ဂါဝပ်ခန့် ထုတ်လုပ်ဖြန့်ဖြူးနိုင်မည်ဖြစ်ကြောင်း သိရသည်။

နိုင်ငံတော်၏ ဓာတ်အားလိုအပ်ချက်မှာ နှစ်စဥ်(၉)ရာခိုင်နှုန်းခန့် တိုးတက်သုံးစွဲလျက်ရှိသဖြင့် ပြည်သူများ၏ တစ်ရက်အတွက် လျှပ်စစ်ဓာတ်အားပျမ်းမျှ လိုအပ်ချက်မှာ (၄၄၀၀)မဂ္ဂါဝပ်ဖြစ်သော်လည်း အကြမ်းဖက်သောင်းကျန်းသူများမှ ၂၃၀ ကေဗွီ၊ ၁၃၂ ကေဗွီ ဓာတ်အားလိုင်းများ ဖျက်ဆီးမှုကြောင့် ရေအား လျှပ်စစ်စက်ရုံများနှင့် အပူစွမ်းအင်သုံးစက်ရုံများမှ စွမ်းအားပြည့်ဓာတ်အားပို့လွှတ်ဖြန့်ဖြူးနိုင်ခြင်းမရှိကြောင်း သိရသည်။

ထို့ပြင် သဘာဝဘေးအန္တရာယ်ကြောင့် ဓာတ်အားထုတ်လုပ်နိုင်ခြင်းမရှိသည့် ဓာတ်အားပေးစက်ရုံများကြောင့်လည်းကောင်း၊ ဓာတ်ငွေ့ခွဲတမ်းလျော့နည်း ရရှိမှုများအရလည်းကောင်း တပ်ဆင်ထားသောစက်များ၏ စက်စွမ်းအားပြည့်လည်ပတ်နိုင်မှုမရှိခြင်း စသည်တို့ကြောင့် စုစုပေါင်းဓာတ်အား (၁၄၀၈) မဂ္ဂါဝပ်ခန့်လျော့နည်းထုတ်လုပ်ရလျက်ရှိကြောင်း YESC ၏ ထုတ်ပြန်ချက်တွင်‌ ဖော်ပြထားသည်။

ထို့ကြောင့် ယခုကာလတွင် တစ်ရက်ပျမ်းမျှ(၂၄ဝဝ)မဂ္ဂါဝပ်ခန့်သာ ထုတ်လုပ်နိုင်သဖြင့် လိုအပ်ချက်၏ (၅၅)ရာခိုင်နှုန်းခန့်ကိုသာ ထုတ်လုပ်ပေးနိုင်ကြောင်း သိရသည်။ထိုသို့ထုတ်လုပ်မှု လျော့နည်းရရှိမှုကို ပြန်လည်ဖြည့်ဆည်းပေးနိုင်‌ရန်အတွက် ဖျက်ဆီးခံရသည့် လျှပ်စစ်အားလိုင်းများနှင့် သဘာဝဘေးဒဏ်ကြောင့် ထိခိုက်ပျက်စီးမှုများဖြစ်ပါ်ခဲ့သည့် ဓာတ်အားပေးစက်ရုံများကို အမြန်ဆုံးပြင်ဆင်ပြီးစီးနိုင်ရေး ဆောင်ရွက်နေကြောင်း သိရသည်။

ထို့ပြင် လက်ရှိလျှပ်စစ်ဓာတ်အားလိုအပ်ချက်ကို ကာလတိုဖြေရှင်းနိုင်ရန်အတွက် LNG ဓာတ်အားပေးစက်ရုံစီမံကိန်းများကို အကောင်အထည်ဖော်ဆောင်ရွက်နိုင်ရေး စီစဥ်ဆောင်ရွက်လျက်ရှိပြီး ရေရှည်တိုးတက်သုံးစွဲလာသည့် လျှပ်စစ်ဓာတ်အားကို ဖြည့်ဆည်းနိုင်ရန် ရေ၊ နေ၊ လေတို့မှ ထုတ်လုပ်နိုင်ရေးကို လည်း စီမံဆောင်ရွက်နေကြောင်း YESC က ဆိုထားသည်။

သို့ဖြစ်၍ လက်ရှိဓာတ်အားလျော့နည်းဖြန့်ဖြူးပေးနိုင်မှုအပေါ် နားလည်ခွင့်လွှတ်ပေးရန် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းက အသိပေးထုတ်ပြန်ထားသည်။

Credit - MT News Agency

#သတင်းဟင်းလေးအိုးကြီး

ဂါဇာစစ်ပွဲ အဆုံးသတ်ရေး ၉၀ ရာခှိုင်နှုန်း နီးစပ်လာ

ဒီဇင်ဘာ ၂၂

အစ္စရေးနဲ့ဟားမတ်စ်တို့အကြား ဂါဇာအပစ်အခတ်ရပ်စဲရေးနဲ့ပတ်သက်ပြီး ၉၀ ရာခိုင်နှုန်း သဘောတူညီချက်ရရှိထားပေမယ့် အဓိကကျတဲ့ကိစ္စရပ်တွှေအပေါ် ညှိနှိုင်းဖို့လိုအပ်နေတယ်လို့ ဆွေးနွေးပွဲမှာ ပါဝင်တဲ့ ပါလက်စတိုင်း တာဝန်ရှိသူတယောက် ပြောပါတယ်။

သဘောတူညီချက်အတွက် အဓိကအတားအဆီးတစ်ခုကတော့ အီဂျစ်နဲ့ နယ်နိမိတ်တလျှောက် ဂါဇာတောင်ပိုင်းရှိ မဟာဗျူဟာအရေးပါတဲ့နယ်မြေဖြစ်တဲ့ ဖီလာဒယ်လ်ဖီးယားမှာ အစ္စရေးတပ်တွေ ဆက်လက်ရှိနေမယ့် ကိစ္စဖြစ်ပါတယ်။

အစ္စရေးကတော့ ဒီဒေသမှာ ဆက်လက်တပ်စွဲထားမယ်လို့ ဆိုပါတယ်။ ဆွေးနွေးမှုမှာတော့ အစ္စရေးနဲ့ ဂါဇာနယ်စပ်တလျှောက်မှာ ကီလိုမီတာများစွာကျယ်ဝန်းတဲ့ ကြားခံဇုန်တခုဖန်တီးဖို့လည်း ပါဝင်ပါတယ်။

ဒီပြသနာတွေကို ဖြေရှင်းညှိနှိုင်းပြီးပြီဆိုရင်တော့ ရက်ပိုင်းအတွင်း အဆင့်သုံးဆင့်ပါတဲ့ အပစ်အခတ်ရပ်စဲရေးကို သဘောတူနိုင်မယ်လို့ ဆွေးနွေးမှုမှာပါဝင်တဲ့ ပါလက်စတိုင်းတာဝန်ရှိသူကပြောပါတယ်။

သဘောတူချက်အဆင့်သုံးဆင့် ပထမအဆင့်မှာတော့ အမျိုးသမီးစစ်သမီးတယောက်ကို ပြန်လွှတ်တိုင်း ပါလက်စတိုင်းအကျဉ်းသား အယောက် ၂၀ ကို အစ္စရေးကပြန်လွှတ်ပေးမှာဖြစ်ပါတယ်။ ဘယ်သူတွေကို ပြန်လွှတ်ပေးမယ်ဆိုတာ သဘောတူညီချက်မရသေးပေမယ့် အစ္စရေးမှာ ၂၅ နှစ်အထက် ထောင်ကျနေသူ ၄၀၀ ထဲက ရွေးချယ်မှာဖြစ်ပါတယ်။

ပျောက်ဆုံးနေတဲ့ ဓါးစာခံအချို့ကို ဟားမတ်စ်တို့က ရှာဖွေနေဆဲလို့ ယူဆရတာကြောင့် အစ္စရေးဓါးစာခံတွေကို ဟာမတ်စ်တို့က အဆင့်ဆင့် ပြန်လွှတ်ပေးဖွယ်ရှိပါတယ်။ ဂါဇာမှာ ဓါးစာခံ ၉၆ ယောက်ထိန်းသိမ်းခံထားရဆဲဖြစ်ပြီး ၆၂ ယောက်အသက်ရှင်နေသေးတယ်လို့ အစ္စရေးက ယုံကြည့်နေပါတယ်။

အီဂျစ်နဲ့ ကာတာတို့ရဲ့ ကြီးကြပ်မှုနဲ့ ပါလက်စတိုင်းဒုက္ခသည်တွေ ဂါဇာမြောက်ပိုင်းကို ပြန်လာနိုင်မှာဖြစ်ပြီး တနေ့ကို ထရပ်ကားအစီး ၅၀၀ ဝန်းကျင်နဲ့ အကူအညီတွေပေးအပ်မယ်လို့ ပါလက်စတိုင်းတာဝန်ရှိသူကပြောပါတယ်။

သဘောတူညီချက် နောက်ဆုံးအဆင့်မှာတော့ ဂါဇာစစ်ပွဲ အဆုံးသတ်ပြီး ယခင်နို်ငငံရေးနဲ့မဆက်နွယ်ပေမယ့် ပါလက်စတိုင်းအဖွဲ့အားလုံးရဲ့ကျောထောက်နောက်ခံပြုတဲ့ ကော်မတီတရပ်ကနေ ကြီးကြပ်သွားမှာဖြစ်ကြောင်း ၎င်းကပြောဆိုထားသည်။

Ref:BBC
Photo:Reuters

Credit - VOM News Agency

#သတင်းဟင်းလေးအိုးကြီး

ယူကရိန်းစစ်ပွဲရပ်ဖို့ ထရမ့်နှင့် အပေးယူလုပ်ရန် အသင့်ဟု ပူတင်ပြော

မော်စကို၊ ဒီဇင်ဘာ ၂၂

ရုရှားသမ္မတ ဗလာဒီမာ ပူတင် (Vladimir Putin) က ယူကရိန်းစစ်ပွဲရပ်ဖို့ အရေးနှင့်ပတ်သက်ပြီး အမေရိကန် သမ္မတ ဒေါ်နယ်ထရမ့် (Donald Trump) နှင့် အပေးအယူလုပ် ဆွေးနွေးရန် အသင့်ရှိကြောင်း ဒီဇင်ဘာ ၁၉ ရက် တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထရမ့်နှင့် ဆွေးနွေးခဲ့မည်ဆိုပါက ယူကရိန်းစစ်ပွဲ အဆုံးသတ်ရေးနှင့်ပတ်သက်ပြီး ရုရှားဘက်မှ အလျှော့၊ အတင်း ပြုလုပ်ပေးရန် အသင့်ရှိသည်ဟုလည်း ပူတင်က ပြောကြားခဲ့သည်။

ထို့နောက် ယူကရိန်း အာဏာပိုင်များနှင့် ဆွေးနွေးမှုများ စတင်ရန်အတွက် ကြိုတင်သတ်မှတ်ချက်များမရှိဟု ၎င်းက ဆိုသည်။

သူ့ကိုယ်သူ ပြဿနာများအား ကြားဝင်ဖြေရှင်းရာတွင် ဆရာတစ်ဆူအဖြစ် ပုံဖော်ထားသည့် ထရမ့်က ယူကရိန်း ပဋိပက္ခကို လျင်မြန်စွာ အဆုံးမည်ဟု ပြောကြားခဲ့သော်လည်း အချိန်ဇယား အတိအကျကို ထုတ်ဖော်ပြောဆို ခဲ့ခြင်းမရှိပေ။

ပူတင်သည် နှစ်စဉ်ကျင်းပနေကျ နှစ်ကုန် သတင်းစာ ရှင်းလင်းပွဲတွင် ရုရှားနိုင်ငံသားများနှင့် အမေးအဖြေ ပြုလုပ်ခဲ့ ချိန်၌ သူ့အနေဖြင့် နှစ်အနည်းငယ်လောက် စကားမပြောခဲ့သည့် ထရမ့်နှင့်တွေ့ဆုံရန် အသင့်ရှိကြောင်း အမေရိကန် သတင်းချန်နယ်မှ သတင်းထောက်တစ်ဦးကို ပြောကြားခဲ့သည်။

ပူတင် အနေဖြင့် ထရမ့်ကို အစည်းအဝေးလုပ်ရန် ကမ်းလှမ်းဖွယ် ရှိ/မရှိ မေးမြန်းခံရချိန်တွင် ပူတင်က ရုရှားသည် အားနည်းသည့် အနေအထားသို့ ရောက်ရှိနေသည်ဆိုသည့် ပြောကြားချက်များကို ငြင်းဆိုခဲ့သည်။

ရုရှားသည် ၂၀၂၂ ခုနှစ်က ယူကရိန်းကို ဝင်ရောက် တိုက်ခိုက်ခဲ့ချိန်ကထက် ပိုမိုအင်အား တောင့်တင်းလာခဲ့ ကြောင်း ၎င်းက ပြောကြားခဲ့သည်။

"ဆွေးနွေးညှိနှိုင်းမှုတွေနဲ့ အပေး/အယူတွေ လုပ်ဖို့အတွက် အသင့်ရှိတယ်ဆိုတာ ကျနော်တို့ အရင်ကတည်းက ပြောပြီးပါပြီ" ဟု ပူတင်က ပြောကြားခဲ့ပြီး ရုရှားတပ်များသည် ယူကရိန်းစစ်မြေပြင်တွင် အသာစီးရနေသည်ဟု ဆိုသည်။

"မကြာခင်အချိန်မှာပဲ ယူကရိန်းဘက်က တိုက်ခိုက်ပေးချင်တဲ့ ယူကရိန်းနိုင်ငံသားတွေဟာ ကုန်တော့မှာပါ။ ကျနော့်အထင်တော့ မကြာခင်မှာ ယူကရိန်းဘက်က တိုက်ခိုက်ချင်တဲ့သူတောင် ရှိလာတော့မှာ မဟုတ်ပါဘူး" ပူတင်က ပြောကြားခဲ့သည်။

ပြီးခဲ့သည့် လကလည်း ပူတင်က ယူကရိန်းနှင့် အပစ်အခတ်ရပ်စဲရေးကို ဆွေးနွေးရန် ပြောကြားခဲ့သော်လည်း ရုရှားတပ်များ သိမ်းပိုက်ထားသည့် နေရာများကို ပြန်ပေးမည် မဟုတ်ဘဲ ယူကရိန်းကိုလည်း နေတိုးအဖွဲ့ထဲဝင်မည့် ရည်မှန်းချက်ကို စွန့်လွှတ်ရန် ပြောကြားထားသည်။

ပူတင်က ယူကရိန်းနှင့် ဆွေးနွေးမှုများ စတင်ရန် စည်းကမ်းချက်များ သတ်မှတ်မထားကြောင်း၊ ယူကရိန်းသမ္မတ ဇာလန်းစကီး (Volodymyr Zelenskiy) အပါအဝင် အားလုံးနှင့် ဆွေးနွေးရန် အသင့်ရှိကြောင်း ပြောကြားခဲ့သည်။

သို့သော် မည်သည့် သဘောတူညီချက်ကိုမဆို ယူကရိန်း၏ တရားဝင်မှုရှိသည့် အာဏာပိုင်များနှင့်သာ လက်မှတ် ရေးထိုးနိုင်မည်ဖြစ်ကြောင်း ပူတင်က ပြောကြားခဲ့သည်။

ပူတင်သည် ယူကရိန်းသမ္မတ ဇာလန်းစကီးကို တရားဝင်မှုရှိသည့် အာဏာပိုင်အဖြစ် သတ်မှတ်မထားဘဲ ယူကရိန်း လွှတ်တော်ကိုသာ တရားဝင်မှုရှိသော အာဏာပိုင်အဖြစ် ယူဆထားသည်။

Source: ရိုက်တာ

ပုံ - ပူတင်ကို တွေ့ရစဉ်

#centralnewsnaypyitaw

Someone: နင်စိတ်ပါ လက်ပါ လုပ်တတ်တာ ဘာရှိလဲ?
Me:

မြန်မာအသင်း ဗီယက်နမ်ကိုဂိုးပြတ်ရှုံးနိမ့်ပြီး အုပ်စုအဆင့်မှထွက်ရ

အာဆီယံချန်ပီယံရှစ် ၂၀၂၄ဘောလုံးပြိုင်ပွဲ အုပ်စု(ရဲ့ နောက်ဆုံးပွဲစဉ်အဖြစ် ဗီယက်နမ်အသင်းနဲ့ မြန်မာအသင်းတို့ ဒီဇင်ဘာ၂၁ရက် ညပိုင်းက ဗီယက်နမ်နိုင်ငံမှာ ယှဉ်ပြိုင်ကစားခဲ့ပြီး မြန်မာအသင်းက ဗီယက်နမ်အသင်းကို ငါးဂိုး ဂိုးမရှိနဲ့ ဂိုးပြတ်ရှုံးနိမ့်ကာ အုပ်စုအဆင့်ကနေ ထွက်ခွာခဲ့ရပါတယ်။

မြန်မာအသင်းဟာ ဒီပွဲစဉ်ကိုအနိုင်ရမှနောက်တစ်ဆင့်ကို တက်ရောက်မှာဖြစ်ပေမယ့်လည်း ဗီယက်နမ်အသင်းကို မယှဉ်နိုင်ခဲ့ဘဲ ဂိုးပြတ်ရှုံးနိမ့်သွားခဲ့ရတာပါ။

ပထမပိုင်းပွဲကစားချိန်အပြီးမှာ ဂိုးမရှိသရေကျနေပေမယ့် ဒုတိယပိုင်းမှာတော့ ဗီယက်နမ်အသင်းရဲ့သွင်းဂိုးတွေကို ခွင့်ပြုပေးခဲ့ရတာဖြစ်ပါတယ်။

အုပ်စု(ရဲ့ ပွဲစဉ်အားလုံးယှဉ်ပြိုင်ကစားပြီးချိန်မှာ ဗီယက်နမ်အသင်းက ရမှတ်၁၀မှတ်နဲ့ အုပ်စုပထမ၊ ဖိလစ်ပိုင်အသင်းက ရမှတ်၆မှတ်နဲ့ အုပ်စုဒုတိယရပြီး ဆီမီးဖိုင်နယ်ကို တက်ရောက်သွားပါတယ်။

ဆီမီးဖိုင်နယ်ပွဲစဉ်တွေအဖြစ် ထိုင်းနဲ့ ဖိလစ်ပိုင်၊ ဗီယက်နမ်နဲ့ စင်ကာပူအသင်းတို့ ယှဉ်ပြိုင်ကစားကြမှာဖြစ်ပါတယ်။
ဓာတ်ပုံ-MFF

ရွှေ့ပြောင်းနိုင်သော ပစ္စည်းကို အာမခံထား၍ ငွေချေးခြင်းဆိုင်ရာ ဥပဒေ ပြဋ္ဌာန်းနိုင်ရန် ဆောင်ရွက်
----------------------------------------

ရွှေ့ပြောင်းနိုင်သော ပစ္စည်းကို အာမခံထား၍ ငွေချေးခြင်းဆိုင်ရာ ဥပဒေကို ပြဋ္ဌာန်းနိုင်ရေး ဆောင် ရွက် နေတယ်လို့ မြန်မာနိုင်ငံတော်ဗဟိုဘဏ်က သိရပါတယ်။

ရွှေ့ပြောင်းနိုင်သော ပစ္စည်းကို အာမခံထား၍ ငွေချေးခြင်းဆိုင်ရာ ဥပဒေ(မူကြမ်း)နှင့်စပ်လျဉ်းတဲ့ အစည်းအဝေးကိုတော့ ဒီဇင်ဘာ ၁၈ ရက်က မြန်မာနိုင်ငံတော် ဗဟိုဘဏ်မှာ ကျင်းပပြုလုပ်ခဲ့ပြီး ဗဟိုဘဏ် ဥက္ကဋ္ဌ ဒေါ်သန်းသန်းဆွေ နဲ့ တာဝန်ရှိသူတွေ တက်ရောက် ခဲ့ပါတယ်။

ဥပဒေမူကြမ်းကိုတော့ အခြားနိုင်ငံတွေက ကျင့်သုံးဆောင်ရွက်နေတဲ့ အခြေအနေတွေအပေါ် လေ့လာ ပြီး ညှိနှိုင်းရေးဆွဲခဲ့ရာ အခုအချိန်မှာ အဋ္ဌမ (မူကြမ်း) အဆင့်ကို ရောက်ရှိနေပြီ ဖြစ်တယ်လို့ ဗဟိုဘဏ် ဥက္ကဋ္ဌ ဒေါ်သန်းသန်းဆွေက ပြောပါတယ်။

မြန်မာနိုင်ငံမှာ ရွှေ့ပြောင်းနိုင်တဲ့ ပစ္စည်းကို အပေါင်ထားပြီး ချေးငွေထုတ်ချေးနိုင်မယ့် ဈေးကွက် တစ်ရပ် ပေါ်ပေါက်လာပြီး MSME စီးပွားရေးလုပ်ငန်းတွေ ချေးငွေရရှိနိုင်မှု တိုးတက်ရေးကို အထောက် အကူပြုဖို့ ရည်ရွယ် ထားတယ်လို့လည်း ဆိုပါတယ်။

ဒါ့အပြင် အပေါင်ပစ္စည်းတွေကို မှတ်ပုံတင်ထားတာကြောင့် အာမခံအကျိုးခံစားခွင့်ကို ဥပဒေအရ ခိုင်မာမှုရှိစေဖို့ အာမခံ အကျိုးခံစားခွင့်နဲ့ စပ်လျဉ်းပြီး အငြင်းပွားမှုတွေကို ဥပဒေအရ ဖြေရှင်းနိုင်ဖို့ ရည်ရွယ်ထားတယ်လို့ ဗဟိုဘဏ် ဥက္ကဋ္ဌက ပြောကြားခဲ့ပါတယ်။

အင်းတော်မြို့မှာ တိုက်ပွဲပြန်လည် ပြင်းထန်နေ

ဒီဇင်ဘာ ၂၂

စစ်ကိုင်းတိုင်း၊ အင်းတော်မြို့နယ်မှာ အခုရက်ပိုင်းအတွင်း တိုက်ပွဲတွေ ပြန်လည် ပြင်းထန်နေတယ်လို့ ဒေသခံတွေဆီက သိရပါတယ်။

“အင်းတော်တိုက်ပွဲက ပြီးခဲ့တဲ့ ဩဂုတ်လ ၁၆ ရက်နေ့ကတည်းက စခဲ့တာပေါ့။ နောက်ပိုင်း ရပ်လိုက်နားလိုက် ဖြစ်နေရာကနေ အခုရက်ပိုင်းအတွင်းမှာ ပြန်ပြီး ပြင်းထန်လာခဲ့တာ။ ဂျပန်လှိုဏ်ဂူနဲ့ မြို့မဘုန်းကြီးကျောင်းတို့မှာ ခံစစ်ပြင်ထားတဲ့ နောက်ဆုံးကျန်နေတဲ့ နစကတပ်ကို ဒေသတွင်း လက်နက်ကိုင်တပ်တွေက ထိုးစစ်ဆင်နေတာ။ နစကဘက်ကလည်း လေကြောင်းကနေရော၊ လက်နက်ကြီးနဲ့ရော တန်ပြန် တိုက်နေတယ်” လို့ ဒေသခံတယောက်က ပြောပါတယ်။

နစက စစ်ရေးသတင်းရင်းမြစ်တွေရဲ့ ရေးသားချက်မှာတော့ အင်းတော်မြို့၊ မြို့မ ဘုန်းကြီးကျောင်းမှာ စစ်ရှောင် နေထိုင်လျက်ရှိတဲ့ အရပ်သား ပြည်သူတွေကို KIA/PDF အဖွဲ့မှ ရှော့တိုက်ဒုံးနဲ့ အကြောင်းမဲ့ ပစ်ခတ်တာကြောင့် စစ်ရှောင် အပြစ်မဲ့ပြည်သူ အမျိုးသမီး နှစ်ယောက် သေဆုံးပြီး သံဃာ တပါးနဲ့ အမျိုးသမီး တယောက်တို့ ထိခိုက်ဒဏ်ရာ ရရှိခဲ့တဲ့အတွက် ဒဏ်ရာရ လူနာတွေကို အင်းတော်မြို့ရှိ တပ်မတော်စစ်ကြောင်းမှ ဆေးကုသပေးလျက်ရှိတယ်လို့ ဖော်ပြထားပါတယ်။

“ဂျပန်လှိုဏ်ဂူကုန်းနဲ့ မြို့မဘုန်းကြီးကျောင်းက တောင်ကုန်းပေါ်မှာရှိတာ။ တောင်ကြော တဆက်တည်း ရှိနေတာလည်းဖြစ်တယ်။ အရင်က ဂျပန်တွေ မြေအောက်ဆေးရုံအဖြစ် အသုံးပြုခဲ့ဖူးတဲ့ လှိုဏ်ခေါင်းတွေလည်း ရှိနေတာမို့ နစကတပ်တွေဟာ အဲဒီနေရာတွေကနေ အထိုင်ချပြီး ခုခံနေတာ။ အဲဒီကို ဒေသတွင်းလက်နက်ကိုင်တပ်တွေက ဝိုင်းတိုက်နေတာဆိုတော့ လူထိခိုက်သေဆုံးတာတွေကတော့ ရှိနေပါတယ်။ ဒါပေမယ့် လတ်တလော တိုက်ပွဲအခြေအနေတွေအရ ဖြစ်စဉ်အတိအကျကိုတော့ ပြောဖို့ခက်တယ်” လို့ ‌သတင်းရင်းမြစ်တယောက်က ပြောပါတယ်။

တိုက်ပွဲကြောင့် အင်းတော်ဒေသခံတွေဟာ ပြီးခဲ့တဲ့ သြဂုတ်လကတည်းက ဘေးလွှတ်ရာ နေရာတွေကို တိမ်းရှောင်သွားကြပေမယ့် ပြည်သူတချို့ကတော့ မြို့မဘုန်းကြီးကျောင်းအတွင်း ပိတ်မိနေဆဲဖြစ်တယ်လို့ စစ်ဘေးရှောင်အရေး ဆောင်ရွက်နေသူတွေက ပြောပါတယ်။

လတ်တလောမှာ စစ်ဘေးရှောင် အများစုကတော့ မော်တိတ်ဒေသ အောင်းကုန်း၊ နန့်သာ၊ အင်ပင် စတဲ့ ကျေးရွာတွေဘက်ကို စစ်ရှောင်နေကြတယ်လို့ သိရပါတယ်။

“လက်ရှိမှာ စစ်ရှောင်တွေအတွက် စားနပ်ရိက္ခာတွေ ရှားပါးနေတာပါ။ အဓိက လိုတာက‌တော့ ဆန်ပေါ့။ ဆန်မလုံလောက်တဲ့အတွက် တချို့က ဆန်ပြုတ် ပြုတ်ပြီး သောက်နေရတာရှိတယ်။ တုပ်ကွေးရာသီလည်းဖြစ်တော့ ဖျားနာနေသူတွေလည်း ရှိနေတယ်။ ဒါကြောင့် ဆေးဝါး အကူအညီတွေလည်း အရေးပေါ် လိုအပ်နေပါတယ်” လို့ ကူညီပေးနေသူက ပြောပါတယ်။

လက်ရှိ အင်းတော်တိုက်ပွဲကာလဟာ လေးလကျော် ကြာမြင့်လာပြီဖြစ်ပြီး တိုက်ပွဲအတွင်း အင်းတော် နဘားလမ်းဆုံက နစကအထိုင်စခန်း၊ ရဲစခန်း၊ အထွေထွေအုပ်ချုပ်ရေးရုံးတို့ကို ဒေသတွင်း လက်နက်ကိုင် ပူးပေါင်းတပ်ဖွဲ့တွေက သိမ်းပိုက်ထားတယ်လို့ သိရပါတယ်။

Photo:CJ

Credit - VOM News Agency

#သတင်းဟင်းလေးအိုးကြီး

မြိုရတော့နည်းနည်းခက်မယ်