ဒီရုပ်ရှင်လေးကတော့ ထွေထွေထူးထူးပြောပြစရာမလိုဘူးထင်ပါတယ်။တော်တော်များများကြည့်ဖူးမယ့် နီးကျား ကာတွန်းကားအကြောင်းပဲဖြစ်ပါတယ်။လွန်ခဲ့တဲ့ ထောင်ပေါင်းများစွာက ပုလဲလုံးတစ်လုံးမွေးဖွားလာပြီး သူလိုအပ်တဲ့ စွမ်းအင်တွေ စုပ်ယူ‌တဲ့အခါ မကောင်းတဲ့စွမ်းအင်တွေပါလာလို့ ပုလဲလုံးလေးက ဆိုးသွမ်းလာပါတယ်။ဒါကြောင့် သူတော်စင်က ပုလဲလုံးကို မိစ္ဆာပုလဲ နှင့် သူတော်စင်ပုလဲ ဆိုပြီး နှစ်ခုခွဲလိုက်ပါတယ်။ပြီးတော့ သူတော်စင် ပုလဲကို လူပြည်က ဖြောင့်မတ်တဲ့ စစ်သူကြီးတို့လင်မယားစီမှာ ကလေးတစ်ယောက်ဖြစ် မွေးဖွားစေပြီး မိစ္ဆာ ပုလဲကိုတော့ နောင်သုံးနှစ်နေရင် အလိုအလျောက် ဖျက်စီးခံရမယ့် ကျိန်စာနဲ့ ချုပ်လိုက်ပါတယ်။ခက်တာက ခိုင်းလိုက်တဲ့ တပည့်ကောင်းမှုနဲ့ သူတော်စင်ပုလဲက အခိုးခံလိုက်ရပြီး မိစ္ဆာပုလဲကိုလည်း စစ်သူကြီးရဲ့ မိန်းမ ဗိုက်ထဲကို သူတော်စင်ပုလဲ အစား မိစ္ဆာ ပုလဲ ထည့်ပေးမိလိုက်ပါတယ်။ဒါနဲ့ပဲ မီးမိစ္ဆာ နီကျား လေး မွေးဖွားလာပါတော့တယ်။နီကျားက မွေးကတည်းက လူတွေရဲ့ မိစ္ဆာဆိုတဲ့ အမြင်တွေကြောင့် အကုန်လုံးကို ရှောင်ဖယ်နေကြပြီး နီးကျားနဲ့ ကစားဖော်ဆိုတာလည်း သူ့အမေအပြင် မရှိပါဘူး။နောင်သုံးနှစ်နေပြန်ရင်လည်း မိစ္ဆာပုလဲကို အလိုအလျောက် ဖျက်ဆီးမယ့် ကျိန်စာက ရှိနေတော့ နီကျားတစ်ယောက် သတ်မှတ်ခံထားရပြီးသား ကံကြမ္မာကို အရှုံးမပေးလဲ ဘယ်လိုပြောင်းလဲဖို့ ကြိုးစားမလဲဆိုတာကို ကြည့်ရှုရမှာဖြစ်ပါတယ်။
ကာတွန်းကားလေးဆိုပေမယ့် အတုယူဖို့ကောင်းတဲ့ စကားတွေ ၊ မိဘမေတ္တာ ၊ သူငယ်ချင်းဆက်ဆံရေးတွေကို ကြည်နူးဖွယ် မြင်တွေ့ရမှာဖြစ်လို့ မကြည့်ရသေးတဲ့သူတွေအတွက် "Ne Zha(2019)" ကို တင်ဆက်ပေးလိုက်ပါတယ်။

ဒီနေ့အတွက်ကတော့ Flipped လိုမျိူး ရုပ်ရှင်လေးတစ်ခုဖြစ်တဲ့ ထိုင်းအချစ်ရုပ်ရှင်လေးတစ်ခုကို ပြောပြပါမယ်။Imdb မှာလည်း 8.1 တောင်ရရှိထားပြီး ထိုင်းနိုင်ငံရဲ့ နေထိုင်မှုကလည်း မြန်မာနဲ့သိပ်မကွာတာမလို့ ကိုယ့်အိမ်ကိုယ့်ရာလို အငွေ့အသက်လေးရရှိစေမှာပါ။

ဇာတ်လမ်းကတော့ ပုံမှန်အချစ်ရုပ်ရှင်လေးတွေလိုမဟုတ်ဘဲ ငယ်ချစ်ဦးလို့ပဲပြောရမလား ဖြူစင်တဲ့ ငယ်ဘ၀ကတည်းက သဲယောဇဉ်ရှိနေကြတဲ့ ပုံစံလေးနဲ့ကြည့်ရှုရမှာပါ။ဂျေ့စ် ဆိုတဲ့ ကောင်လေး နှင့် နွဲနာ ဆိုတဲ့ကောင်မလေးက မွေးကတည်းက လပိုင်းလောက်ပဲခြားပြီးမွေးဖွားခဲ့ကြတဲ့ ကလေးနှစ်ယောက်ဖြစ်ပါတယ်။နှစ်ယောက်လုံးရဲ့ အိမ်ကလည်း ဆံပင်ညှပ်ဆိုင်တွေ ဖွင့်ထားကြပြီးတော့ သူတို့နှစ်အိမ်ရဲ့ ခြားမှာ မုန့်ဆိုင်တစ်ဆိုင်ပဲ ခြားပါတယ်။ငယ်ငယ်လေးကတည်းက ရွယ်တူသူငယ်ချင်းမရှိတဲ့ ဂျေ့စ်ကတော့ နွဲနာနဲ့ပဲ တစ်ပူတစ်တွဲဆော့ကြပါတယ်။ကျောင်းတက်ကြတော့လည်း ဂျေ့စ်မှာ နွဲနာ နှင့် သူ့မိန်းကလေးသူငယ်ချင်းတွေကလွဲရင် သူ့မှာ ယောကျာ်းလေးသူငယ်ချင်းမရှိပါဘူး။သူငယ်ချင်းမရှိတဲ့အကြောင်းအရင်းကတော့ သူကအိပ်ရာထနောက်ကျလို့ဖြစ်ပါတယ်။သူအိပ်ရာနောက်ကျတော့ ကျောင်းကားကသူစောင့်ရတာနဲ့ ကျောင်းကို အမြဲလိုလိုနောက်ကျတော့ သူတို့ရွယ်တူ ဂျက်တို့အဖွဲ့ကသူ့နဲ့သူငယ်ချင်းမလုပ်ကြတာဖြစ်ပါတယ်။နွဲနွာ နဲ့အတူဆော့တဲ့ ဂျေ့စ် ကတော့ မိန်းကလေးတွေ ဆော့နေကြ ကြိုးခုန်တာ ၊ ဟင်းချက်တာ တို့လိုဆော့ကြတော့ ဂျေ့စ်ကသိပ်မပျော်ပါဘူး။ဂျက်တို့ အဖွဲ့ကတော့ ယောကျာ်းလေးအဖွဲ့ဆိုတော့ သိတဲ့အတိုင်း ဘောလုံးကန် ၊ စက်ဘီးစီး ၊ ငါးဖမ်း တာမျိုးတွေဆော့ကြတော့ ဂျေ့စ်က ဂျက်တို့နဲ့ သွားဆော့ချင်နေပါတယ်။နွဲနာလေးကတော့ ဂျေ့စ်မပျော်မှန်းသိလို့ ဂျေ့စ်ဆိုချင်တဲ့ ဘောလုံးကန်တာတို့ကို မိန်းကလေးဖြစ်ပ်မယ့်လိုက်ဆော့ပေးပါတယ်။ဒါပေမယ့်လည်း ဂျက်တို့နဲ့ပဲဆော့ချင်နေတဲ့ ဂျေ့စ်ကတော့ ဂျက်တို့နဲ့ သွားဆော့ရဖို့အရေး ဂျေ့စ်တစ်ယောက် ဂျက်ခိုင်းတဲ့အတိုင်း နွဲနာတို့အဖွဲ့ ကြိုးခုန်ကြိုးကို ကပ်ကြေးနဲ့ဖြတ်လိုက်ရာကနေ နွဲနာလည်းစိတ်ဆိုးသွားပါတော့တယ်။အဲ့ဒီနေ့က စပြီး နွဲနာက ဂျေ့စ်ကို မခေါ်တော့ဘဲ ‌ဂျေ့စ်လည်း အမြဲတမ်းအတူတူပေါင်းခဲ့သူမရှိတော့ တစ်ခုခုဟစ်ဟာသွားသလို ခံစားသွားရပြီး အဖြူရောင်တွေကြားတွေ အခြားအ‌ရောင်တွေပါမသိမသာ‌ပါ၀င်လာပါတော့တယ်။နောက်တော့ နွဲနာတို့ မိသားစုအိမ်ပြောင်းသွားကြ‌တော့ နှစ်ယောက်သား ပိုလိုတောင်ဝေးကွာသွားကြပါတယ်။ဒီလိုနဲ့ အရွယ်တစ်ခု‌ရောက်သွားတော့ နွဲနာသတင်းတစ်ခုနဲ့အတူ ဂျေ့စ်လည်း သူ့အိမ်ပြန်ရောက်လာတဲ့အခါမှာတော့ ဂျေ့စ် နှင့် နွဲနာတို့ရဲ့ ဇာတ်လမ်းလေးက ဘယ်လိုဖြစ်သွားမလဲဆိုတာ ခံစားကြည့်ရှုရမှာဖြစ်ပါတယ်။

ရုပ်ရှင်ကတော့ ရယ်ရခက် ငိုရခက်နဲ့ အဆုံးမှာလည်း စိတ်ထဲ တစ်နုတ်နုတ်ဖြစ်စေမှာပါ။ဒါကြောင့် ငယ်ချစ်ဦးကို မေ့မရလို့ဘဲ ဖြစ်ဖြစ် လူကြီးမင်း ငယ်ချစ်ဦးနှင့်လူကြီးမင်းတို့ရဲ့ အမှတ်တရလေးတွေလိုမျိုး ဇာတ်လမ်းလေးကြည့်ချင်တယ်ဆိုရင်တော့ "My Girl (2003)" က လူကြီးမင်းအတွက်ပါပဲ။

28 Years Later ကတော့ ဝေဖန်သူတွေဆီက သုံးသပ်မှုကောင်းတွေ ရထားပါတယ်။
Danny Boyle ရဲ့ 28 Years Later ဟာ ဒီနေ့ စတင်ပြနေပြီဖြစ်ပါတယ်။ အထူးပြသပွဲတွေကို ပုံမှန်မဟုတ်ဘဲ မွန်းတည့် ၁ နာရီမှာ စတင်မယ်လို့ သတ်မှတ်ထားပါတယ်။
အခုဆိုရင် ဒီဇာတ်ကားက Metacritic မှာ ၇၈ ရထားပြီး Rotten Tomatoes မှာ ၁၀၀% နဲ့ ရပ်တည်နေပါတယ်။
ဒီဇာတ်ကားဟာ Boyle ရဲ့ ၁၀ နှစ်အတွင်း အကောင်းဆုံး ဝေဖန်သုံးသပ်ခံရတဲ့ ရုပ်ရှင်ဖြစ်လာပါပြီ။ သူ့ရဲ့ နောက်ဆုံးရုပ်ရှင် ၂ ကားဖြစ်တဲ့ T2 Trainspotting နဲ့ Yesterday က သိပ်ပြီး လူကြိုက်မများခဲ့ပါဘူး။
လက်ရှိမှာတော့ရုံတင်ပြသနေပြီး လွန်ခဲ့တဲ့ 28 ဆန်ဆန် ဇာတ်ကားတွေနဲ့ အဆက်လို့ သိရပြီး ပိုပြီးလည်း ကြောက်စရာကောင်းတာတွေပါတယ်လို့သိရပါတယ်။

Saw ရုပ်ရှင်တွေဟာ မူလဖန်တီးသူတွေ လက်ထဲပြန်ရောက်ပြီ
ထိတ်လန့်စရာကောင်းတဲ့ Saw ရုပ်ရှင်တွဲဟာ နောက်ဆုံးမှာ သူ့ရဲ့ ဖန်တီးသူတွေဆီကို ပြန်ရောက်သွားပါပြီ။ Horror ရုပ်ရှင်လောကမှာ နာမည်ကြီးတဲ့ Blumhouse Studio က Saw ရုပ်ရှင်တွဲကို တရားဝင်ဝယ်ယူလိုက်လို့ပဲဖြစ်ပါတယ်။
Blumhouse ဟာ M3GAN၊ Insidious၊ Five Nights at Freddy’s လို Horror ရုပ်ရှင်တွေထုတ်တဲ့ Studio အဖြစ် လူသိများပါတယ်။ သူတို့က Twisted Pictures ပိုင်ဆိုင်ထားတဲ့ Saw ရုပ်ရှင်တွဲရဲ့ ရပိုင်ခွင့်တစ်ဝက်ကို ပမာဏတစ်ခုနဲ့ ဝယ်ယူခဲ့တယ်လို့ The Hollywood Reporter က ဖော်ပြထားပါတယ်။ ကျန်တဲ့ တစ်ဝက်ကိုတော့ Lionsgate ကပိုင်နေမှာဖြစ်ပြီး အနာဂတ်ရုပ်ရှင်တွေမှာ ပါတနာအဖြစ် ဆက်ရှိနေမယ့် သဘောမှာရှိပါတယ်။
Twisted Pictures ဟာ ထုတ်လုပ်သူ Oren Koules နဲ့ Mark Burg ပိုင်ဆိုင်တဲ့ ကုမ္ပဏီဖြစ်ပြီး၊ Saw မှာ အစကတည်းက ပါဝင်ခဲ့တဲ့ Company ဖြစ်ပါတယ်။ Burg က Saw ဇာတ်ညွှန်းကို ပထမဆုံး ဖတ်ခဲ့သူတွေထဲက တစ်ယောက်ဖြစ်ပြီး၊ ဒီဇာတ်ညွှန်းကို James Wan နဲ့ Leigh Whannell တို့က ဖန်တီးခဲ့တာဖြစ်ပါတယ်။ “၂၁ နှစ်ကြာခဲ့ပြီ၊ ကျွန်တော်တို့ James Wan နဲ့ Leigh Whannell ကို တွေ့ခဲ့ပြီး ပထမဆုံး Saw ရုပ်ရှင်ကို ငွေထောက်ပံ့ခဲ့တယ်။ အဲဒီရုပ်ရှင်က မှော်ဆန်လောက်အောင် ကောင်းပြီး၊ ကျွန်တော်တို့ရဲ့ အိပ်မက်ထက်ကျော်လွန်တဲ့ အောင်မြင်မှုကို ရခဲ့တယ်” လို့ Burg က ပြောခဲ့ပါတယ်။
အခုဆိုရင် Blumhouse Studio က Saw ရဲ့ ရပိုင်ခွင့်တစ်ဝက်ကို ဝယ်လိုက်ပြီဆိုတော့ Saw 10 ကားမြှောက်အပြီးမှာ Original ဖန်တီးသူတွေရဲ့ လက်ရာကို နောက်ပိုင်းတွေ့လာရမယ့်အနေအထားမှာရှိပါတယ်။
John Snow ရေးသားပါသည်။

ဘတ်ဂျက် သန်း ၄၀ နဲ့ R Rate အဆင့် သတ်မှတ်ထားတဲ့ ‘Clayface’ ရုပ်ရှင်
ဒီတစ်ပတ်အစောပိုင်းက Tom Rhys Harries က DC Studios ရဲ့ Clayface ရုပ်ရှင်မှာ အဓိကဇာတ်ဆောင်အဖြစ် ရွေးချယ်ခံခဲ့ရပါတယ်။
Clayface ရဲ့ ဇာတ်ညွှန်းကို အခုအချိန်မှာမှာ တစ်ခုလုံးနီးပါး ပြည့်စုံအောင် ပြန်ပြင်ခဲ့ကြပါတယ်။ Mike Flanagan ကတော့ ဇာတ်ညွှန်းမူကြမ်းတစ်ခု တင်သွင်းခဲ့ပေမယ့်၊ အဲဒါက အစောပိုင်းအနေအထားမှာပဲ ရှိပါသေးတယ်။
ဇာတ်လမ်းကတော့ B-movie မင်းသားတစ်ယောက်အကြောင်းဖြစ်ပြီး၊ သူကိုယ်သူ နာမည်ရှိနေဖို့ ဆေးတစ်မျိုးကို ထိုးသွင်းခဲ့ပေမယ့် ပုံပြောင်းနိုင်တဲ့ ‘Clayface’ ဆိုတဲ့ Monster လိုကောင်တစ်မျိုးဖြစ်သွားတာကိုကြည့်ရမှာဖြစ်ပါတယ်။
Clayface ကို Speak No Evil ပြန်လည်ရိုက်ကူးတဲ့ ဒါရိုက်တာ James Watkins က ရိုက်ကူးမှာဖြစ်ပြီး၊ James Gunn နဲ့ Peter Safran ရဲ့ DC Studios ကနေ လာမယ့် အောက်တိုဘာမှာ ထုတ်လုပ်မှုစတင်မယ့် နောက်ထပ်ရုပ်ရှင်တစ်ကားဖြစ်လာမှာပါ။ ရုံတင်မယ့်ရက်ကတော့ ၂၀၂၆ ခုနှစ် စက်တင်ဘာ ၁၁ ရက်ဖြစ်ပါတယ်။

ထောင်နဲ့ချီတဲ့ သရုပ်ဆောင်တွေပါဝင်လာမယ့် The Odyssey ရုပ်ရှင်
Nolan ရဲ့ The Odyssey ရုပ်ရှင်ကို Iceland မှာ ၂ ပတ်ကြာ ရိုက်ကူးနေပြီး ထောင်နဲ့ချီတဲ့ အပိုသရုပ်ဆောင်တွေ ပါဝင်မယ်လို့သိရပါတယ်။
Christopher Nolan ရဲ့ The Odyssey ရုပ်ရှင်ဟာ အခုထိ အကောင်အထည်ဖော ရိုက်ကူးနေဆဲပဲဖြစ်ပြီး အခုဆိုရင် ရိုက်ကူးရေးအဖွဲ့ဟာ Iceland ကို ရောက်ရှိသွားပြီး၊ Matt Damon၊ Zendaya နဲ့ Elliot Page တို့နဲ့အတူ ထောင်နဲ့ချီတဲ့ အပိုသရုပ်ဆောင်တွေ ပါဝင်လာမယ်လို့ သိရပါတယ်။
ဒီရုပ်ရှင်ရိုက်ကူးရေးကို ဖေဖော်ဝါရီကတည်းက စတင်ခဲ့တာ၊ အခုဆို ၅ လကျော်ရှိပြီဖြစ်ပါတယ်။ အဖွဲ့ဟာ မော်ရိုကို၊ ဂရိ၊ အီတလီ၊ စကော့တလန်၊ နဲ့ Los Angeles တွေမှာ ရိုက်ကူးခဲ့ကြတာဖြစ်ပါတယ်။ နောက်တစ်ဆင့်အနေနဲ့ ဇူလိုင်မှာ အိုင်ယာလန်ကို သွားမယ်၊ အဲဒီနောက်မှာတော့ လန်ဒန်ကို ဆက်သွားမယ်လို့သိရပါတယ်။
နောက်ဆုံးသတင်းအရ The Odyssey ရဲ့ teaser တစ်ခုဟာ အဆင်သင့်ဖြစ်နေပြီး၊ Anne Hathaway က ဇာတ်ကြောင်းပြောပြထားတယ်လို့ သိရပါတယ်။ ဒီ teaser ကို ဇူလိုင်မှာ Jurassic World: Rebirth ရဲ့ ရုံတင်ပွဲတွေနဲ့အတူ တွဲပြီး ထုတ်ပြန်နိုင်တယ်လို့ ပြောကြပါတယ်။
Nolan က Homer ရဲ့ ဂန္တဝင်ဇာတ်လမ်းကို ရိုးရိုးရှင်းရှင်း ပြန်ရိုက်တာမဟုတ်ပဲ သူရဲ့ အစွမ်းအကုန်လုံးကိုသုံးပြီးရိုက်ကူးနေတာဖြစ်ပါတယ်။ ဒီဇာတ်ကားမှာ နတ်ဘုရားတွေ၊ ဘီလူးတွေ၊ နဲ့ ဒဏ္ဍာရီဆန်တဲ့ အမူအရာတွေကိုပေါင်းပြီး အရှည်ဆုံးနဲ့ အမိုက်ဆုံးရုပ်ရှင်ဖြစ်လာအောင် ဖန်တီးနေတာဖြစ်ပါတယ်။ ရုပ်ရှင်ရဲ့ ကြာချိန်က ၃ နာရီကျော်မယ်လို့ မျှော်လင့်ရပါတယ်။
ထုတ်လုပ်ရေးဘတ်ဂျက်က ဒေါ်လာ ၂၅၀ သန်းကျော်ရှိတယ်လို့ သတင်းထွက်ပြီး၊ ရုပ်ရှင်ကို နောက်ဆုံးပေါ် IMAX ကင်မရာတွေနဲ့ ရိုက်ကူးနေတယ်လို့သိရပါတယ်။
သရုပ်ဆောင်တွေအနေနဲ့ Matt Damon က Odysseus အဖြစ် အဓိကသရုပ်ဆောင်ထားပြီး၊ Tom Holland၊ Charlize Theron၊ Anne Hathaway၊ Robert Pattinson၊ Zendaya၊ Lupita Nyong’o၊ Jon Bernthal၊ Mia Goth တို့အပါအဝင် နာမည်ကြီးတွေ အများကြီးပါဝင်မယ်လို့သိရပါတယ်။ The Odyssey ဟာ ၂၀၂၆ ခုနှစ် ဇူလိုင် ၁၇ ရက်မှာ ရုံတင်ပြသဖို့ လုပ်ထားပါတယ်။

ဟောလိဝုဒ်က ရှုပ်ထွေးနေတယ်လို့ Dakota Johnson ပြောကြား
မတ်လ ၆၊ ၂၀၂၅။
မင်းသမီး Dakota Johnson ဟာ မကြာသေးခင်က Bustle မဂ္ဂဇင်းနဲ့ အင်တာဗျူးတစ်ခုမှာ ဟောလိဝုဒ်ရဲ့ လက်ရှိရုပ်ရှင်လောကအပေါ် သူ့ရဲ့အမြင်တွေကို ပွင့်ပွင့်လင်းလင်း ပြောကြားခဲ့ပါတယ်။ သူက စတူဒီယိုတွေရဲ့ ရုပ်ရှင်ဖန်တီးမှုပုံစံတွေဟာ "လုံးဝ ရှုပ်ထွေးနေပြီ" လို့ ဝေဖန်လိုက်တာ ဖြစ်ပါတယ်။
သူက အနုပညာဆိုတာ ကော်မတီတစ်ခုနဲ့ ဖန်တီးလို့ မရသလို၊ ကိန်းဂဏန်းအချက်အလက်တွေပေါ် အခြေခံပြီး ဖန်တီးလို့ မရဘူးလို့ ဆိုပါတယ်။ သူက ဆက်ပြီးတော့ အခုခေတ် စတူဒီယိုတွေမှာ ဆုံးဖြတ်ချက်တွေကို ရုပ်ရှင်တောင်မကြည့်တဲ့သူတွေ (executives) က ချနေတာဖြစ်ပြီး၊ ပရိသတ်တွေအတွက် ကောင်းမွန်တဲ့ ရုပ်ရှင်တွေ ဖန်တီးဖို့ထက် ဘဏ္ဍာရေးအချက်အလက်တွေကိုပဲ အဓိကထားနေတယ်လို့ ထောက်ပြခဲ့တာ ဖြစ်ပါတယ်။
ဒီလိုပြောဆိုမှုတွေဟာ သူနောက်ဆုံးပါဝင်သရုပ်ဆောင်ခဲ့တဲ့ Madame Web ရုပ်ရှင်ရဲ့ ဝေဖန်မှုတွေနဲ့ စီးပွားရေးအရ မအောင်မြင်မှုတွေအပြီးမှာ ထွက်ပေါ်လာတာ ဖြစ်ပါတယ်။ Johnson က ဒီလိုရုပ်ရှင်မျိုးမှာ နောက်ထပ် ပါဝင်သရုပ်ဆောင်တော့မှာ မဟုတ်ဘူးလို့ အခိုင်အမာ ပြောကြားခဲ့ပြီး၊ ဒီလိုအတွေ့အကြုံမျိုးဟာ သူ့အတွက် ပထမဆုံးအကြိမ်ဖြစ်သလို နောက်ဆုံးအကြိမ်လည်း ဖြစ်တယ်လို့ ဆိုပါတယ်။
Johnson ဟာ ရုပ်ရှင်ဖန်တီးရတာကို ချစ်မြတ်နိုးဆဲဖြစ်ပေမယ့်၊ အခုခေတ်ဟောလိဝုဒ်ရဲ့ အခြေအနေတွေကြောင့် စိတ်ပျက်မိတယ်လို့ ဝန်ခံခဲ့ပါတယ်။ သူက Remake တွေ၊ Sequel တွေ အလွန်အကျွံလုပ်တာကိုလည်း သဘောမတူဘူးလို့ ပြောကြားခဲ့တာ ဖြစ်ပါတယ်။

ကြိုက်တဲ့သူနဲ့ မကြိုက်တဲ့သူ နှစ်ဖက်ကွဲနေတဲ့ Jurassic World Rebirth
Jurassic World Rebirth ကို ပထမဦးဆုံးကြည့်ခွင့်ရတဲ့သူတွေစီက Reaction တွေထွက်ပေါ်လာပြီး ဒီ ရုပ်ရှင်ဟာ အရမ်းကောင်းတယ်လို့ ချီးကျူးနေကြတဲ့သူတွေက တစ်ဖွဲ့နဲ့ ရိုးရှင်းပြီး မလိုအပ်တဲ့” ဇာတ်လမ်းလို့ဆိုပြီး ဝေဖန်နေကြတဲ့သူတွေထွက်ပေါ်လာပါတယ်။
ဒီရုပ်ရှင်အသစ်မှာ Zora (Scarlett Johansson)၊ ရှေးသတ္တဗေဒပညာရှင် Dr. Henry Loomis (Jonathan Bailey)၊ နဲ့ သင်္ဘောကပ္ပတိန် Duncan Kincaid (Mahershala Ali) တို့ဟာ မူရင်း Jurassic Park ရဲ့ ဓာတ်ခွဲခန်းရှိခဲ့တဲ့ ဝေးလံခေါင်ဖျား ကျွန်းတစ်ခုဆီ ခရီးထွက်လာကြပါတယ်။
ဒါပေမယ့် သူတို့ရင်ဆိုင်ရတာက Original Jurassic Park ပန်းခြံမှာ အန္တရာယ်ကြီးလွန်းလို့ ထားခဲ့ရတဲ့ ဒိုင်နိုဆောတွေနဲ့တွေ့မှာဖြစ်ပါတယ်။ ဒီဒိုင်နိုဆောတွေဟာ နှစ်ပေါင်းများစွာ ကျွန်းပေါ်မှာ နေခဲ့ရတာကြောင့် အတော်လေး ပြောင်းလဲမှုတွေ ဖြစ်ပေါ်နေပြီဖြစ်ပါတယ်။
ဒီရုပ်ရှင်ကိုတော့ မူရင်း Jurassic Park ကို ရုပ်ရှင်အဖြစ် ပြန်လည်ရိုက်ကူးခဲ့တဲ့ David Koepp က ဒီဇာတ်ညွှန်းကို ရေးသားထားပြီး၊ Rogue One ရဲ့ ဒါရိုက်တာ Gareth Edwards က ရိုက်ကူးထားလတာဖြစ်ပါတယ်။
ဒီဇာတ်ကားအပေါ် ဝေဖန်ထားကြတဲ့သူတွေရဲ့ စကားသံတွေကတော့..
“Jurassic World Rebirth က အောင်မြင်တယ်! Gareth Edwards က Jurassic ဒီဇာတ်လမ်းကို ဘယ်လိုရိုက်ရမလဲဆိုတာ သိတယ်။ မူရင်းရုပ်ရှင်ရဲ့ လက်တွေ့ဆန်ခဲ့တာကို ကျွန်တော် အရမ်းကြိုက်တယ်။ နှစ်တွေကြာလာတော့ ဒီဇာတ်လမ်းတွဲဟာ CGI ကို ပိုသုံးလာတယ်” လို့ Collider ရဲ့ Perri Nemiroff က ရေးထားပါတယ်။
“Jurassic World Rebirth က မင်းလိုချင်တဲ့ အရာအားလုံးပါတယ်” လို့ ပရိသတ်တစ်ယောက်က ပြောထားပါတယ်။ “ဇာတ်လမ်းက နည်းနည်းရယ်စရာဖြစ်နိုင်ပေမယ့်ဘာဂရုစိုက်စရာလိုလဲ။ ရုပ်ရှင်က လှပတယ်၊ ဒိုင်နိုဆောတွေကလည်း အံ့သြစရာကောင်းတယ်၊ Jonathan Bailey ကတော့ ကျွန်တော့်ရဲ့ အနှစ်သက်ဆုံး မင်းသားအသစ်တွေထဲက တစ်ယောက်ဖြစ်လာနိုင်တယ်။ ကျွန်တော့်နှလုံးခုန်နှုန်းတက်လာတယ်၊ တစ်ခုခုကြောင့် အရမ်းပျော်ပြီး အော်ဟစ်ချင်လာတဲ့ အခိုက်အတန့်တစ်ခုတောင် ရှိခဲ့တယ်။” လို့ပြောထားပါတယ်။
Jurassic World Rebirth က ရုပ်ရှင်တစ်ကားပါပဲ” လို့ Variety ရဲ့ အယ်ဒီတာ Clayton Davis က တွစ်တာ ​(ယခု X) မှာ ရေးထားပါတယ်။
“Jurassic World Rebirth မှာ ပြောင်းလဲသွားတာဆိုလို့ ကျွန်းအသစ်ပေါ်က ပြောင်းလဲသွားတဲ့ ဒိုင်နိုဆောတွေပဲရှိတယ်။ ဒါကို ကျွန်တော် စိတ်ဝင်စားခဲ့တယ်။ ဒါပေမယ့် ရုပ်ရှင်က ရိုးရိုးရှင်းရှင်းပဲ။ ဘာမှ မှတ်မိစရာ ဇာတ်လမ်းတွေလည်းမပါဘူး” လို့ ပရိသတ်တစ်ယောက်က ရေးတယ်။ “မြစ်ထဲက ဇာတ်ဝင်ခန်းတစ်ခုကတော့ ကောင်းပေမယ့် ကျန်တာတွေက အကုန်မှုန်ဝါးနေတယ်။ ဇာတ်ကောင်တွေက ပျင်းစရာ၊ အချိတ်အဆက် လုံးဝမရှိဘူး၊ ကောင်းတာဆိုလို့ ဒိုင်နိုဆောတွေကိုပဲ အားပေးနေမိတယ်။” လို့ပြောထားပါတယ်။
လက်ရှိမှာတော့ Jurassic World Rebirth ကို ဇူလိုင် ၂ ရက်နေ့မှာ ရုံတင်ပြသသွားမှာဖြစ်ပြီး အဲ့ဒီအချိန်ကြမှပဲ ကောင်းမကောင်းဆုံးဖြတ်ကြရတော့မှာပါ။
John Snow ရေးသားသည်။

Jaws ဒါရိုက်တာ Steven Spielberg ရဲ့သမီးက ဒါရိုက်တာအဖြစ် ပွဲဦးထွက်တဲ့ သရဲကားအသစ်
Destry Allyn Spielberg ရဲ့ ပထမဦးဆုံး လက်ရာ Please Don’t Feed the Children ရဲ့ ပထမဆုံး Trailer ထွက်လာပြီဖြစ်ပါတယ်။ ဒီရုပ်ရှင်က ဇွန်ဘီသရဲကားနဲ့ Hansel and Gretel ပုံပြင်ကို ရောထားသလို ကြောက်စရာကောင်းတဲ့ ပုံစံမျိုးဖြစ်နေတာမျိုးတွေ့ရပါတယ်။
Trailer ထဲမှာတော့ ဆယ်ကျော်သက်တစ်စုဟာ လျှို့ဝှက်ဆန်းကြယ်တဲ့ ဗိုင်းရပ်စ်တစ်ခုကြောင့် “မိဘတွေ၊ ဆရာတွေ၊ မိသားစုတွေ အကုန်သေဆုံးသွားပြီဖြစ်တဲ့” ကမ္ဘာပျက်ကြီးထဲမှာ လှည့်လည်သွားလာနေတဲ့ ပုံစံနဲ့ စထားပါတယ်။ ဒီဗိုင်းရပ်စ်က လူကြီးတွေကိုပဲ ထိခိုက်တာဖြစ်ပြီး၊ အသက်ရှင်ကျန်နေတဲ့ လူကြီးတွေက ဒီဗိုင်းရပ်စ်အတွက် ကလေးတွေကို အပြစ်တင်ကြပါတယ်။
နောက်တော့ ဆယ်ကျော်သက်တစ်ယောက် ဒဏ်ရာရသွားတဲ့အခါ သူတို့အဖွဲ့မှာ ထူးဆန်းတဲ့ အမျိုးသမီးတစ်ယောက်ရဲ့ အိမ်မှာ ခိုလှုံဖို့ကလွဲလို့ နည်းလမ်းမရှိတော့ဘူး။ အဲ့ဒီနောက်ဘာတွေဖြစ်သွားမလဲ။
ဒီထူးဆန်းတဲဲ့ အမျိုးသမီးက သူတို့ ဆယ်ကျော်သက်တွေကို Hansel and Gretel ပုံပြင်ထဲကလို မုန့်တွေကျွေးပြီး စုန်းမကြီးလို စားလိုက်မလားဆိုတာကတော့ စိတ်ဝင်စားစရာပါပဲ။
Destry Allyn Spielberg က ဒီလိုသရဲကားကို သူ့ရဲ့ပထမဆုံး ရုပ်ရှင်အဖြစ် ရွေးချယ်ခဲ့တာက စိတ်ဝင်စားစရာပါပဲ။ ဘာလို့ဆို သူက ဒါရိုက်တာကြီး Steven Spielberg ရဲ့ သမီးဖြစ်နေပြီး၊ သူ့အဖေက Jaws ကလွဲလို့ သရဲကားတွေသိပ်မရိုက်တဲ့သူလည်းဖြစ်လို့ပါပဲ။
ဆိုတော့ ဒီဇာတ်ကားက စိတ်ဝင်စားဖို့ကောင်းပြီး ကမ္ဘာပျက်တဲ့ပုံစံံမျိုးတွေလုပ်ထားတာကနေ လူငယ်တွေ Survive လုပ်ရမယ့်ပုံစံမျိုးဆိုတော့ ကြည့်လို့ကောင်းမှာပါပဲ။
Please Don’t Feed the Children ကိုတော့ Tubi မှာ ဇွန်လ ၂၇ ရက်နေ့စတင်ပြသသွားမှာဖြစ်ပါတယ်။

ဒီကနေ့ပဲ Lexus ဘက်ကတော့ ၎င်းတို့ရဲ့ မျိုးဆက် (၈) ခုမြောက် all-new ES ကို Shanghai Motor Show မှာ တရားဝင် officially ချပြလိုက်ပါပြီ။ မနက်အိပ်ယာနိုးနိုးချင်း Google News လေးကောက်ကြည့်လိုက်ချိန်မှာပဲ ဒီသတင်းတွေ့တာနဲ့ ဝင်ဖတ်လိုက်မိတယ်ပေါ့။ ချက်ချင်းဆိုသလိုပဲ ပုံတွေကြည့်မိချိန်မှာ နည်းနည်းတော့နှာခေါင်းရှုံ့မိသွားတယ်။ "ဘာလဲကွာ Lexus" ဆိုပြီတော့တောင် စိတ်ထဲအတွေးဝင်မိသား။ ကိုယ်တိုင်က ကားဆို Sedans တွေကိုမှ သိပ်ရူးသွပ်တတ်သူဖြစ်နေတာကြောင့်လည်း ပါရင်ပါမယ်ပေါ့လေ။
ကျွန်တော့်အမြင်မှာတော့ ဒီ all-new ES မှာ understated elegance ဖြစ်တဲ့ DNA တစ်ခုပျောက်ဆုံးနေသလို ခံစားရတာအမှန်ပဲ။ ပြောရရင် Lexus ရဲ့ဟိတ်ဟန်ကိုက ကားအကြောင်းမသိတဲ့သူပင် ဒီကားကိုမြင်လိုက်တာနဲ့ ဒါဟာ Luxury ကားတစ်စီးပဲကွဆိုတဲ့ vibe မျိုး ပေးစွမ်းနေရမယ် မဟုတ်လား? ခုတော့ ဒီကောင့်ကြည့်ရတာ ဟိုးတုန်းက LF-ZC Concept ရဲ့ vibe တွေပဲရနေသလို ပြောရရင် RZ EV လို SUV မှာ ဒီလို design language နဲ့လာတာကို လက်ခံပေးနိုင်ပေမယ့် ES လို mid-size luxury sedan တစ်စီးမှာကျ လက်မခံနိုင်သေးဘူးလို့ပဲ ပြောချင်ပါရဲ့။
ကားရဲ့ဘော်ဒီက လိုအပ်တာထက် ပို smooth ဖြစ်နေတယ်လို့ မြင်မိသလို တစ်ခါတစ်ရံ Chinese EV တစ်စီးကိုကြည့်နေရသလိုပါပဲ။ အရင် 7th-gen ES ကိုပြန်ကြည့်မယ်ဆိုရင်တောင် spindle grille တွေ taillights တွေနဲ့ ဘော်ဒီကောက်ကြောင်းတွေက တကယ့် proper sedan တစ်စီးပီသစေတာ အမှန်ပဲ။
ဆိုတော့ ဒီ all-new ES မှာ Hybrid နဲ့ EV ဆိုပြီး Powertrain နှစ်မျိုးနဲ့လာပါမယ်။ ပြောချင်တာကတော့ Dual-Platform ဖြစ်သွားတယ်ပေါ့။ Lexus အတွက်တော့ "dual-platform" နဲ့လာတဲ့ ပထမဦးဆုံး mainstream မော်ဒယ်ဖြစ်ပေမယ့် BMW ဘက်မှာတွေ့ရတာတော့ အချိန်အတိုင်းအတာတစ်ခုရှိခဲ့ပါပြီ။ ( i4/4 Series, i5/5 Series, i7/7 Series ဒါတွေကို ဆိုလိုချင်တာပါ။ ) ကားရဲ့ wheelbase ကတော့ 3.1" လောက်ပိုရှည်လာတာမို့ LS နဲ့တောင် မတိမ်းမယိမ်းဖြစ်လာတယ်ဆိုပါတော့။ Sedan တစ်စီးအတွက် wheelbase ပိုရှည်လာတာကို သဘောကျပေမယ့် 7th-gen နဲ့ 8th-gen ES နှစ်စီးကို ထိပ်တိုက်ယှဥ်ကြည့်မယ်ဆိုရင် 8th-gen က ဘော်ဒီနည်းနည်းပိုမြင့်သွားတာကို တွေ့ရမှာပါ။ ဘာ့ကြောင့်လဲလို့မေးရင်တော့ ဘက်ထရီတွေကြောင့်ပါ။ ဒီကောင်တွေကို ကားရဲ့အောက်ဖက်ကြမ်းပြင်မှာနေရာပေးလိုက်ရတဲ့အခါ ကားရဲ့ "the whole silhouette" တစ်ခုလုံးကို အပေါ်ကိုထပ်မြှင့်ဖို့သာ ကျန်ပါတယ်။ ဒီလိုနဲ့ပဲ sleek sedan တစ်စီးရဲ့ Characteristic တစ်ခု ထပ်မံဆုံးရှုံးရပြန်ပြီး budget SUV တစ်စီးနဲ့တောင် အလားသဏ္ဍာန်တူသွားပါတယ်။
ဆက်လက်ပြီး ကျွန်တော်မကြိုက်ဆုံး အချက်ကိုပြောပါအုံးမယ်။ အဲ့တာကတော့ ကားရဲ့အတွင်းခန်း interior ပါ။ အရင် 7th-gen ES အပါအဝင် LS မော်ဒယ်တွေမှာပါ ကျွန်တော်တို့သိပ်သဘောကျခဲ့တာက ကိုင်ရပြုရ Grip ကောင်းကောင်း၊ thick ဖြစ်ဖြစ်၊ hand-stiched leather နဲ့ သိပ်ကိုမှ iconic ဖြစ်တဲ့ steering wheel ပါ။ ခု ဒီ 8th-gen ES အသစ်ရဲ့ အတွင်းခန်းကတော့ masterpiece တစ်ခုလို့ မခံစားရတော့သလို steering wheel ကလည်း လျှပ်တစ်ပြက်ကြည့်လိုက်ရင် Xiaomi SU7 ရဲ့ steering wheel နဲ့တောင် အတော့်ကိုဆင်ပါတယ်။ အလယ်မှာ Lexus Logo မပါတော့တာကလည်း အတော်လေးအပေါစားဆန်သွားသလားပေါ့။ ပြီးရင် Control လုပ်ရမယ့် ခလုတ်တွေအားလုံးကလည်း အရင်လို Physical Buttons တွေနဲ့သွားထားတာမျိုးမဟုတ်ဘဲ Touch Sensors တွေဖြစ်သွားတာရယ် Tesla နဲ့ အခြားတရုတ် EV တွေလို Infotainment Screen အကြီးကြီး ဖြစ်သွားတာတွေကပဲ ဒီ all-new ES ကို Timeless Japanese Luxury ကားတစ်စီးဆိုတာထက် mass-market tech demo ဘက်သွားတဲ့ vibe မျိုးရသွားစေတာ အမှန်ပါပဲ။
အထက်မှာပြောခဲ့တဲ့အတိုင်းပဲ ဒီကောင့်မှာ Hybrid နဲ့ EV ဆိုပြီး Powertrain နှစ်မျိုးနဲ့လာမှာဖြစ်ပြီး FWD နဲ့ AWD ဆိုပြီး ထပ်ရှိပါမယ်။ စိတ်မကောင်းစရာကတော့ အရင် 7th-gen မှာလို 3.5L V6 မရနိုင်တော့ပါဘူး။ ဒီအစား 2.5L 4-Cyl တစ်မျိုးတည်းသာလာမှာဖြစ်ပြီး FWD ယူချင်ယူ ဒါမှမဟုတ် အနောက်ဘက် rear axle ကမော်တာနဲ့အလုပ်လုပ်မယ့် AWD ယူရပါမယ်။ Prius တို့ Camry တို့ကလိုပေါ့။ မြင်းကောင်ရေကတော့ 225 Hp ထွက်မှာဖြစ်ပြီး e-AWD မှာတော့ 232 Hp ထွက်ပါမယ်။ EV ဗားရှင်းမှာတော့ ES350e နဲ့ ES500e ဆိုပြီး ဂရိတ်နှစ်မျိုးနဲ့လာမယ်လို့ သိရပါတယ်။ ES350e ကတော့ single-motor FWD နဲ့ဖြစ်ပြီး dual-motor AWD လိုချင်ရင်တော့ ES500e ကို ရွေးရပါမယ်။ Lexus ဘက်ကတော့ ဒီ EV Powertrain ရဲ့ Output တွေနဲ့ပတ်သက်ပြီး ဖော်ပြထားခြင်းမျိုးမရှိပေမယ့် ဂရိတ်ခွဲထားတဲ့နာမည်တွေနဲ့ ဆက်စပ်စဥ်းစားကြည့်ရင်တော့ RZ SUV (EV) နဲ့ share ကောင်း share လာနိုင်ပါတယ်။ အကယ်၍သာ ဒီလိုဖြစ်လာခဲ့မယ်ဆိုရင်တော့ ES350e မှာ 224 Hp နဲ့ ES500e မှာ 400 Hp ပတ်ချာလည်လောက် ထွက်နိုင်ပါလိမ့်မယ်။
အဆုံးသတ်ရရင်တော့ Lexus က ကနေ့ခေတ် market ရဲ့ trends တွေနောက်အမှီလိုက်ရင်း သူ့ကိုယ့်သူ Lexus မှန်းတောင် မေ့လျော့သွားပုံရပါတယ်။ old-money စတိုင်သဘောကျတဲ့ သူတစ်ယောက်ကိုသွားပြီး hypebeast cargo pants တွေ graphic tee တွေသွားဝတ်ခိုင်းလိုက်သလိုပဲ အခု all-new ES မှာလည်း Lexus ရဲ့ elegance ဖြစ်တဲ့ အငွေ့အသက်တွေ ပျောက်ဆုံးသွားတယ်လို့ ခံစားမိတယ်။
Anway, အခုပြောသွားတာတွေအားလုံးက ကျွန်တော်တစ်ဦးတစ်ယောက်တည်းရဲ့ personally အမြင်တွေမို့ တစ်ယောက်နဲ့တစ်ယောက် သဘောထားကွဲလွဲတာမျိုးတွေ ရှိနိုင်ပါတယ်။ ဆိုတော့ ကိုယ့်လူတို့ရော all-new Lexus ES အပေါ် ဘယ်လိုမြင်မိလဲ ကောမန့်မှာဝင်ရောက်ဆွေးနွေးသွားကြပါအုံး။ ကျွန်တော်ကတော့ 7th-gen ES လေးအနားမှာပဲ နေဖြစ်သွားပါအုံးမယ်လို့ပြောရင်း အဆုံးသတ်လိုက်ရပါတယ်။ အားလုံးပဲ သာယာသောနေ့လေးဖြစ်ပါစေ ခင်ဗျာ။