ထိုင်းရောက်မြန်မာ CI သမားများ မည်သို့ ကြုံတွေ့နေရလဲ
အောက်တိုဘာ ၉
ထိုင်းနိုင်ငံရောက် အထောက်အထားမဲ့ မြန်မာရွှေ့ပြောင်း အလုပ်သမားများအနေဖြင့် Certificates of Identification (CI) မှ PJ Passport ပြောင်းရာတွင် မည်ကဲ့သို့ အခက်အခဲများ ကြုံတွေ့နေရလဲဆိုသည့် အပေါ် အားလုံးက စောင့်ကြည့်နေကြသည်။
CI မှ PJ ပြောင်းသူများသည် ယခင်က အခြားနိုင်ငံများသို့ သွားရောက် လည်ပတ်ခွင့် ရှိခဲ့သော်လည်း စက်တင်ဘာ ၂၅ ရက်မှစ၍ အလုပ်သမား နိုင်ငံကူးလက်မှတ် (PJ Passport) တွင် ထိုင်းနိုင်ငံ၌နေထိုင်လုပ်ကိုင်ရန်နှင့် မြန်မာနိုင်ငံသို့ ပြန်လာရန်အတွက်သာ အသုံးပြုရမည့် တံဆိပ်တုံး ရိုက်နှိပ်ထားကြောင်း သိရသည်။
CI ကိုင်ဆောင်ထားသော မြန်မာရွှေ့ပြောင်း အလုပ်သမားများအနေဖြင့် ထိုင်းနိုင်ငံတွင်သာ နေထိုင်ရပ်တည် မည်ဆိုလျှင် ထိုကန့်သတ်ချက်နှင့်ပတ်သက်ပြီး အခက်အခဲ အကျပ်အတည်း မရှိနိုင်သော်လည်း အခြား ပြင်ပနိုင်ငံ တွင် ဆက်လက် ပညာသင်ကြား လိုသူများဖြစ်ပါက ရည်မှန်းချက်များအတွက် နစ်နာဆုံးရှုံးမှုများ ရှိကြောင်း ထောက်ပြကြသည်။
ထို့ပြင် မိမိတိုးတက်မည့် အခွင့်အလမ်းများ ရှာချင်သည့်အတွက် အခြားနိုင်ငံသို့သွားရန် ဇွဲရှိစွာ ကြိုးစားနေ သူများမှာလည်း ထိုကန့်သတ်ချက်ကြောင့် နစ်နာဆုံးရှုံးမှု များစွာရှိသည်ဟု ပညာရေးနှင့် ဖွံ့ဖြိုးတိုးတက်ရေး ဖောင်ဒေးရှင်းမှ အလုပ်သမားရေးတာဝန်ခံ ဦးမင်းဦးမှ CNI သတင်းဌာနသို့ ပြောသည်။
၎င်းက အများစုက ဒီမှာပဲ လောလောဆယ် နေထိုင်ရပ်တည်ပြီးတော့ အလုပ်လုပ်ဖို့အတွက် ဆိုလို့ရှိရင် ဒီလူ တွေက ဒီမှာသွားလာနေတဲ့ဟာတော့ ကိစ္စမရှိဘူးပေါ့နော်။ ဒီထဲမှာမှ ခုနကပြောတဲ့ တချို့တွေ ဆိုလို့ရှိရင်လည်း ဒီက အလုပ်သမားဆိုပေမယ့် နောက်ပိုင်းမှာ ဒီမှာနေပြီးတော့ ကြိုးစားအားထုတ်ပြီးတော့ ပညာဖြည့်ချင်တဲ့လူတွေ တခြား နိုင်ငံသွားဖို့အတွက် ဇွဲရှိရှိကို ကြိုးစားနေတဲ့ သူတွေအတွက်ဆိုရင် ဒါက အင်မတန်မှ နစ်နာဆုံးရှုံးမှုပေါ့။ နောက်ပြီးတော့ အကြောင်းကြောင်းကြောင့် ဒီဘက် ထွက်ပြေးလာတယ် ရောက်ရှိလာပြီးတော့မှ အဲလိုမျိုး အလုပ် သမားအဖြစ်နဲ့ ရပ်တည်ပြီးတော့ ခုနက တတိယနိုင်ငံတွေမှာ ပညာသင်တဲ့လူတွေ သူတို့ကြိုးစား အားထုတ်ပြီး တော့ ရယ်ရွယ်ထားတဲ့ ရည်မှန်းချက်တွေ အတွက်ကတော့ အင်မတန်မှ နစ်နာတာပေါ့ဟု ပြောသည်။
နိုင်ငံတော် အဖွဲ့အစည်းအနေဖြင့် ထိုသို့ မူဝါဒပြောင်းလဲ ချမှတ်ခြင်းသည် များသောအားဖြင့် နိုင်ငံအတွက် လိုအပ် သည့်အချိန်တွင် လိုအပ်သလို ပြဋ္ဌာန်းခြင်းဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။
၎င်းက အဲတာကတော့ ဥပဒေတစ်ခုက လိုအပ်လို့ ထုတ်ပြန်သည့်အခါမှာ ဒီဥပဒေနှင့်ပတ်သက်လို့ ဆိုလိုတာ ကတော့ ဥပဒေနဲ့ ငြိစွန်းတဲ့အခါမှာ ထိခိုက်နစ်နာမှုဆိုတာ အနည်းဆုံးတော့ ရှိကြတာပဲ။ ဒါကတော့ လိုအပ်လို့ လုပ်တဲ့အခါမျိုးမှာ ဒါတွေကတော့ မဖြစ်မနေ ကြုံတွေ့ရမယ့် ဘေးထွက်ဆိုးကျိုးပေါ့။ အဲတာကလည်း ပြောလို့ တော့ မရဘူး။ ဥပဒေတစ်ခုသည် အမြဲတမ်း အကုန်လုံးအပေါ် ၁၀၀ ရာခိုင်နှုန်း လွှမ်းခြုံပြီး အလုံးစုံ ကောင်းအောင် လုပ်ပေးပါမယ်ဆိုတာမျိုး မရှိဘူး။ များသောအားဖြင့်ကတော့ နိုင်ငံ့အတွက် ဘယ်အပိုင်းတွေက အရေးကြီးလဲ ကာကွယ်ဖို့ လုပ်တဲ့အခါမှာ ခုနကပြောတဲ့ ဘေးထွက်ဆိုးကျိုးတွေကတော့ ရှိတတ်ပါတယ်။ အဲဒါကလည်း ဥပဒေ တစ်ရပ် ပြဋ္ဌာန်းတဲ့အချိန် ကျင့်သုံးတဲ့အချိန်မှာ ဖြစ်လေ့ဖြစ်ထရှိတဲ့ သဘောပါပဲ ဟု ပြောသည်။
နိုင်ငံကူးလက်မှတ်သည် ထိုင်းနှင့်မြန်မာ နှစ်နိုင်ငံအတွက်သာ အသုံးပြုရမည်ဆိုသည့် ကန့်သတ်ချက်သည် မည့်သည် နိုင်ငံတွင်မှ ကျင့်သုံးဆောင်ရွက်ခြင်းမရှိပဲ ထိုင်းရောက် မြန်မာရွှေ့ပြောင်း အလုပ်သမားအပေါ်တွင်သာ ကန့်သတ်ခြင်းသည် မသင့်လျော်သည့် ကိစ္စရပ်ဟု ရွှေ့ပြောင်းအလုပ်သမားရေး ဆောင်ရွက်ပေးနေသည့် ဦးအောင်ကျော်က CNI သတင်းဌာနသို့ ပြောသည်။
၎င်းက ဒါက ဘယ်နိုင်ငံမှာမှ ကျနော်တို့ မကျင့်သုံးတဲ့ကိစ္စပေါ့ နိုင်ငံကူးလက်မှတ် တစ်ခုအပေါ်မှာ နိုင်ငံတစ်ခုထဲ သာ နေထိုင်ခွင့် ရှိတယ်ဆိုတာမျိုးက ကျနော်တို့ သိသလောက်က ပြောမယ်ဆိုရင် ဘယ်နိုင်ငံမှာမှလည်း ထုတ်ပြန် ကန့်သတ်တာမျိုး မရှိပဲနဲ့ ကျနော်တို့ မြန်မာနိုင်ငံသား တိုင်းရင်းသားအားလုံးကို ရွှေ့ပြောင်း အလုပ်သမား အားလုံး ကို ကန့်သတ်တယ် ဆိုတာမျိုးကျ လုံးဝ မသင့်လျော်တဲ့ ကိစ္စတစ်ခုလို့ပဲ ကျနော်မြင်ပါတယ်ဟု ပြောသည်။
မြန်မာနိုင်ငံမှ ရွှေ့ပြောင်းအလုပ်သမား CI စာအုပ် ကိုင်ထားသူများကတော့ အစိုးရ၏ ကန့်သတ်ချက်များ ပြန်လည် ဖြေလျှော့ပေးရန် မျှော်လင့်နေကြသည်။
အလားတူ CI စာအုပ် ကိုင်ထားသည့် မြန်မာရွှေ့ပြောင်း လုပ်သားများကလည်း အစိုးရက မည်သည့်အတွက် ကြောင့် ယခုလို ကန့်သတ်လာခြင်းကို သိအောင် အဖြေရှာပြီးနောက် ကန့်သတ်ချက်များ ဖြစ်ပေါ်လာစေမည့် အခြေအနေများကို ရှောင်ရှားသင့်ကြောင်း ထောက်ပြကြသည်။
ပုံ - မြန်မာရွှေ့ပြောင်းတွေနဲ့ CI စာအုပ်ကို တွေ့ရစဉ်
Credit - Central News Independence News Agency
#
