မန်ယူနိုက်တက်-ဘီလ်ဘာအိုပွဲမှာ (၂)ဂိုးသွင်းခဲ့တဲ့ မေဆန်မောင့်ကို ရုပ်သံဘောလုံးဝေဖန်သုံးသပ်သူတွေ ချီးကျူး
မန်ယူနိုက်တက်အသင်းက ဘီလ်ဘာအိုအသင်းကို (၄-၁)ဂိုးနဲ့ အနိုင်ရခဲ့တဲ့ ယူရိုပါလိဂ်ဆီမီးဖိုင်နယ်(ဒုတိယအကျော့)ပွဲစဉ်မှာ ခြေစွမ်းပြသပြီး (၂)ဂိုးသွင်းယူခဲ့တဲ့ မန်ယူနိုက်တက်အသင်းကွင်းလယ်တိုက်စစ်ကစားသမား မေဆန်မောင့်ကို TNT Sports ရဲ့ရုပ်သံဘောလုံးဝေဖန်သုံးသပ်သူတွေက ချီးကျူးခဲ့ပါတယ်။ ဒီပွဲက မေဆန်မောင့်ရဲ့ သွင်းဂိုးတွေဟာ ချယ်လ်‌ဆီးအသင်းက ပြောင်းရွှေ့လာပြီးနောက် မန်ယူနိုက်တက်အသင်းအတွက် အိုးထရက်ဖိုဒ့်မှာ ပထမဆုံးသွင်းယူတဲ့သွင်းဂိုးတွေဖြစ်ခဲ့တာပါ
မေဆန်မောင့်ဟာ မန်ယူနိုက်တက်အသင်းကို ရောက်ရှိလာပြီးကတည်းက ဒဏ်ရာတွေနဲ့ ရုန်းကန်ခဲ့ရပြီး အကောင်းဆုံးပြသနိုင်ခဲ့ခြင်းမရှိသေးတာဖြစ်ပါတယ်။ မေဆန်မောင့်ဟာ ဒဏ်ရာကနေပြန်သက်သာလာပြီးနောက် မန်ယူနိုက်တက်အသင်းအတွက် ပွဲချိန်ပြည့်ပါဝင်ကစားခွင့်မရသေးဘဲ ဘီလ်ဘာအိုအသင်းနဲ့ပွဲမှာလည်း လူစားဝင်အဖြစ်ပါဝင်ခဲ့ရတာပါ။ မေဆန်မောင့်ဟာ လူစားဝင်လာပြီး (၁၀)မိနစ်အကြာမှာ နောက်ခံလူယိုရိုရဲ့ပေးပို့မှုကနေ လှပတဲ့သွင်းဂိုးသွင်းယူခဲ့သလို မိနစ်(၉၀)ပြည့်ပြီး ထပ်ဆောင်းအချိန်ပိုမှာလည်း နောက်ထပ်လှပတဲ့သွင်းဂိုးကို သွင်းယူခဲ့တာဖြစ်ပါတယ်။

အင်္ဂလန်ဘောလုံးအားကစားကလောင်ရှင်များအဖွဲ့ (FWA)ရဲ့ အကောင်းဆုံးဘောလုံးသမားဆု ဆွတ်ခူးခဲ့တဲ့ဆာလာ
အင်္ဂလန်ဘောလုံးအားကစားကလောင်ရှင်များအဖွဲ့ (FWA)ရဲ့ တစ်နှစ်တာအကောင်းဆုံးဘောလုံးသမားဆုကို လီဗာပူးလ်တိုက်စစ်မှူးဆာလာက ဆွတ်ခူးခဲ့ပါတယ်။

ဘောလုံးအားကစားကလောင်ရှင်တွေက မဲပေးရွေးချယ်တဲ့ဒီဆုကို ဆာလာဟာ ဒီဆုကို မဲရာခိုင်နှုန်း(၉၀%)ကျော်ရရှိပြီး ဆွတ်ခူးခဲ့တာဖြစ်ကြောင်းသိရပါတယ်။

မဲရာခိုင်နှုန်းတွေအရ ဒုတိယနေရာမှာ ဆာလာရဲ့လီဗာပူးလ်အသင်းဖော်ဗန်ဒိုက်၊ တတိယနေရာမှာ နယူးကာဆယ်တိုက်စစ်မှူးအစ်ဆက်တို့ ရှိနေကြောင်းသိရပါတယ်။

ပွဲပေါင်း(၃၅၀)ကျော်ကစားခဲ့တဲ့ ကလပ်ဂန္ထဝင်အပါအဝင် စီနီယာကစားသမား(၄)ဦးထွက်ခွာမယ်လို့ ဝက်စ်ဟမ်းအသင်းကြေညာ
ဝက်စ်ဟမ်းအသင်းဟာ ဒီရာသီကုန်မှာ စာချုပ်ကုန်ဆုံးပြီး အသင်းကထွက်ခွာမယ့် စီနီယာကစားသမား(၄)ဦးကို ကြေညာခဲ့ပြီး ဒီအထဲမှာ ပွဲပေါင်း(၃၅၀)ကျော်ပါဝင်ကစားခဲ့တဲ့ ကလပ်အသင်းဂန္ထဝင်ကစားသမားတစ်ဦးလည်း ပါဝင်နေပါတယ်။ ဒီကစားသမားတွေကတော့ နောက်ခံလူခရက်စ်ဝဲလ်၊ ဂိုးသမားဖာဘီယန်စကီး၊ နောက်ခံလူကူဖဲလ်နဲ့ တိုက်စစ်မှူးဒန်နီအင့်စ်တို့ဖြစ်ပြီး သူတို့တွေဟာ ဝက်စ်ဟမ်းအသင်းအတွက် စုစုပေါင်းပြိုင်ပွဲစုံပွဲပေါင်း(၈၀၀)ကျော်ပါဝင်ကစားထားတာပါ။

ဝက်စ်ဟမ်းအသင်းဟာ ဒီရာသီမှာ ရလဒ်တွေအလွန်ဆိုးရွားနေပြီး ပရီးမီးယားလိဂ်ပြိုင်ပွဲမှာ (၉)ပွဲသာအနိုင်ရရှိကာ အမှတ်ပေးဇယားအဆင့်(၁၇)နေရာမှာရပ်တည်နေပါတယ်။ ဝက်စ်ဟမ်းအသင်းက ထွက်ခွာမယ့် ဘယ်နောက်ခံလူ ခရက်စ်ဝဲလ်ဟာ အသင်းမှာ ၂၀၁၄ ခုနှစ်ကတည်းက ရှိနေခဲ့တာဖြစ်ပြီး လက်ရှိအချိန်ထိ ပွဲပေါင်း(၃၆၅)ပွဲပါဝင်ကစားထားတာပါ။

ပခုံးခွဲစိတ်မှုခံယူမယ့် ဘယ်လင်ဂမ်ကြောင့် ကလပ်ကမ္ဘာ့ဖလားပြိုင်ပွဲမတိုင်မီ ရီးရဲလ်မက်ဒရစ်အသင်းကြီးမားတဲ့ထိုးနှက်ချက်ကြုံတွေ့
အင်္ဂလန်ကွင်းလယ်လူ ဘယ်လင်ဂမ်ဟာ (၁၈)လကြာနာကျင်မှုကိုခံစားကာ ပွဲကစားခဲ့ပြီးနောက် နွေရာသီမှာ ပခုံးခွဲစိတ်မှုခံယူမှာဖြစ်တဲအတွက် ၂၀၂၅ ဖီဖာကလပ်ကမ္ဘာ့ဖလားပြိုင်ပွဲမတိုင်မီ ရီးရဲလ်မက်ဒရစ်အသင်းအတွက် ကြီးမားတဲ့ထိုးနှက်ချက်ကြုံတွေ့ရဖွယ်ရှိနေပါတယ်။ ဘယ်လင်ဂမ်ဟာ ၂၀၂၃ ခုနှစ်၊ နိုဝင်ဘာက ဗယ်လက်ကာနိုအသင်းနဲ့ပွဲစဉ်မှာ လဲကျပြီးအဆစ်လွဲသွားခဲ့ပြီးကတည်းက ပခုံးပြဿနာနဲ့ ရင်ဆိုင်ကာ ပွဲအချို့လွဲချော်ခဲ့ရတာပါ။

ဆိုးရွားတဲ့ပုံစံတွေကို မြန်မြန်ဆန်ဆန်မပြောင်းလဲပေးနိုင်ရင် မန်ယူနိုက်တက်ကနေ မိမိထွက်ခွာနိုင်တယ်လို့ နည်းပြအာမိုရင်ဝန်ခံ
မန်ယူနိုက်တက်အသင်းက ဝက်စ်ဟမ်းအသင်းကို (ဝ-၂)ဂိုးနဲ့ အရေးနိမ့်ခဲ့တဲ့ ပရီးမီးယားလိဂ်ပွဲအပြီးမှာ မန်ယူနိုက်တက်အသင်းနည်းပြအာမိုရင်က အသင်းရဲ့ဆိုးရွားတဲ့ပုံစံတွေကို မြန်မြန်ဆန်မပြောင်းလဲပေးနိုင်ခဲ့ရင် သူဟာ အသင်းကနေ ထွက်ခွာနိုင်တယ်လို့ ဝန်ခံခဲ့ပါတယ်။ မန်ယူနိုက်တက်အသင်းဟာ ဝက်စ်ဟမ်းအသင်းကို အရေးနိမ့်ပြီးနောက် ဒီရာသီပရီးမီးယားလိဂ်ပြိုင်ပွဲမှာ ရှုံးပွဲ(၁၇)ပွဲကြုံတွေ့ထားပြီး ဒီရှုံးပွဲတွေထဲက (၁၃)ပွဲဟာ နည်းပြအာမိုရင်လက်ထက်မှာ ရှုံးနိမ့်ခဲ့တာပါ။

မန်ယူနိုက်တက်အသင်းဟာ ယူရိုပါလိဂ်ပြိုင်ပွဲမှာ ဗိုလ်လုပွဲတက်နိုင်ခဲ့ပေမယ့် ပရီးမီးယားလိဂ်ပြိုင်ပွဲမှာ ရလဒ်တွေအလွန်ဆိုးရွားနေပြီး အမှတ်ပေးဇယားအဆင့်(၁၆)နေရာမှာ ရပ်တည်နေတာဖြစ်ပါတယ်။ မန်ယူနိုက်တက်အသင်းနည်းပြအာမိုရင်က ပွဲအပြီးမီဒီယာတွေ့ဆုံမှုမှာ ကစားသမားတွေဟာ ရှုံးပွဲကြုံတွေ့မှုတွေအပေါ်မှာ ဂရုစိုက်မှုမရှိတော့ကြောင်းနဲ့ အသင်းကြီးတစ်သင်းဖြစ်တယ်ဆိုတဲ့ ခံစားချက်ဆုံးရှုံးနေပြီလို့ ဆိုခဲ့ပါတယ်။

အန်ဆယ်လော့တီကို ဘရာဇီးလ်နည်းပြသစ်အဖြစ်ခန့်အပ်ကြောင်း ဘရာဇီးလ်ဘောလုံးအဖွဲ့ချုပ်(CBF)ကြေညာ
ဘရာဇီးလ်ဘောလုံးအဖွဲ့ချုပ်(CBF)က ရီးရဲလ်မက်ဒရစ်အသင်းနည်းပြအန်ဆယ်လော့တီကို ဘရာဇီးလ်အသင်းနည်းပြသစ်အဖြစ်ခန့်အပ်ကြောင်း ကြေညာခဲ့ပါတယ်။ အန်ဆယ်လော့တီဟာ ဒီရာသီလာလီဂါပြိုင်ပွဲပြီးဆုံးမယ့် မေ(၂၆)ရက်မှာ ဘရာဇီးလ်အသင်းနည်းပြရာထူးကို တရားဝင်စတင်ကိုင်တွယ်သွားမှာပါ။

အီတလီလူမျိုးနည်းပြအန်ဆယ်လော့တီဟာ ဘရာဇီးလ်အသင်းရဲ့ပထမဆုံးနိုင်ငံခြားသားနည်းပြအဖြစ်မှတ်တမ်းဝင်ခဲ့ပြီဖြစ်ပါတယ်။

အေစီမီလန်အသင်းက အပြီးသတ်ခေါ်ယူမှာမဟုတ်တဲ့အတွက် မန်စီးတီးအသင်းထံ ဝေါ်လ်ကာပြန်လာရဖွယ်ရှိ
အင်္ဂလန်ညာနောက်ခံလူ ဝေါ်လ်ကာဟာ အငှားကစားနေတဲ့ အေစီမီလန်အသင်းက သူ့ကိုအပြီးသတ်မခေါ်ယူဖို့ ဆုံးဖြတ်ခဲ့တဲ့အတွက် ရာသီကုန်ချိန်မှာ မိခင်ကလပ် မန်စီးတီးအသင်းထံ ပြန်လာရဖွယ်ရှိနေပါတယ်။

ဝေါ်လ်ကာဟာ မန်စီးတီးအသင်းမှာ (၇)နှစ်ခွဲကြာရှိခဲ့တာကို အဆုံးသတ်ပြီး ဇန်နဝါရီအပြောင်းအရွှေ့ကာလက အေစီမီလန်အသင်းထံ ရာသီကုန်အထိအငှားစာချုပ်နဲ့ ပြောင်းရွှေ့လာခဲ့တာပါ။

ကိုယ်ဝန်အတုနဲ့ မိမိဆီက ငွေညှစ်ဖို့ ကြိုးစားခဲ့တဲ့ အမျိုးသမီးတစ်ဦးကို တောင်ကိုရီးယားရဲတပ်ဖွဲ့ထံ ဆွန်ဟောင်မင်တိုင်ကြား
စပါးအသင်းခေါင်းဆောင် ဆွန်ဟောင်မင်ဟာ ကိုယ်ဝန်အတုနဲ့ သူ့ဆီကနေ ငွေညှစ်ဖို့ကြိုးစားခဲ့တဲ့ အမျိုးသမီးတစ်ဦးကို တောင်ကိုရီးယားရဲတပ်ဖွဲ့ထံ တိုင်ကြားမှုပြုလုပ်ခဲ့ပါတယ်။ အသက်(၂၀)နှစ်အရွယ်ရှိအမျိုးသမီးတစ်ဦးနဲ့ အသက်(၄၀)နှစ်အရွယ်ရှိ အမျိုးသားတစ်ဦးကို ငွေညှစ်ဖို့ကြိုးပမ်းမှုနဲ့ ဆိုးလ်မြို့ရှိ ရဲတပ်ဖွဲ့က စုံစမ်းစစ်ဆေးမှုတွေပြုလုပ်နေတယ်လို့ Yonhap သတင်းအေဂျင်စီနဲ့ The Korea Times တို့က ဖော်ပြထားတာပါ။

■ လီဗာပူးလ်အသင်းဟာ လေဗာကူဆင်အသင်းကွင်းလယ်လူ ဖလော်ရီယန်ဗစ်ဇ်ကို ခေါ်ယူဖို့အတွက် ဆွေးနွေးမှုတွေပြုလုပ်ခဲ့တယ်လို့ သတင်းတွေထွက်ပေါ်လာခဲ့ပါတယ်။ ဖလော်ရီယန်ဗစ်ဇ်ကို လာမယ့်နွေရာသီအပြောင်းအရွှေ့ကာလမှာခေါ်ယူဖို့ ဘိုင်ယန်မြူးနစ်၊မန်စီးတီးနဲ့ ရီးရဲလ်မက်ဒရစ်အသင်းတို့က စိတ်ဝင်စားနေတာဖြစ်ပါတယ်။

■ အင်တာမီလန်အသင်းဟာ မန်ယူနိုက်တက်အသင်းတိုက်စစ်မှူး ဇက်ခ်ဇီကို လာမယ့်နွေရာသီအပြောင်းအရွှေ့ကာလမှာ ခေါ်ယူဖို့စိတ်ဝင်စားနေပါတယ်။ ဇက်ခ်ဇီဟာ မန်ယူနိုက်တက်အသင်းကစားသမားဘဝပွဲဦးထွက်ရာသီမှာ ပုံမှန်ခြေစွမ်းပြသနိုင်ခြင်းမရှိသေးဘဲ လက်ရှိအချိန်မှာ ဒဏ်ရာကြောင့်အနားယူနေရတာဖြစ်ပါတယ်။