❝ လူ့တန်ဖိုးဆိုတာ ဘာကိုပြောတာလဲ
ကဗျာဆိုတာ
ကိုရီးယားရုပ်ရှင်ကားလို ကောင်းရဲ့လားတဲ့
သေချင်စော်ကို နံလို့
မေမေ
ကျွန်တော် ရှင်သန်ခဲ့တဲ့နှစ်သုံးဆယ်မှာ
ကျောင်းသား
ဘဏ်စာရေး
ညစောင့်
ဆိပ်ကမ်းကုန်တင်ကုန်ချ
ရေနံတွင်းတူး
အရူးတစ်ယောက်လိုလည်း
ကောင်မလေးအိမ်ရှေ့မြောင်းထဲ
လူးလှိမ့်ခဲ့ဖူးပါတယ်။
သီချင်းတွေ တစ်ပုဒ်ပြီး တစ်ပုဒ်
စာအုပ်တွေ တစ်အုပ်ပြီး တစ်အုပ်
သူငယ်ချင်းတွေ
တစ်ယောက်ပြီး တစ်ယောက်
လက်ဖက်ရည်ဆိုင်တွေ
တစ်ဆိုင်ပြီး တစ်ဆိုင်
အရက်ဆိုင်တွေ တစ်ဆိုင်ပြီး တစ်ဆိုင်
လမ်းတွေ တစ်လမ်းပြီး တစ်လမ်း
စိတ်ကူးတည့်ရာတွေချည်းပါပဲ
လျှောက်ပြောလို့ လျှောက်လုပ်လို့
မေမေ
ကျွန်တော်က ပျင်းစရာကောင်းသလား
ကျွန်တော်လည်း ပျင်းစရာကောင်းတဲ့
လူတွေနဲ့မပေါင်းချင်ပါဘူး
ပျင်းစရာကောင်းတဲ့ သင်တန်းတွေလည်း
မတက်ချင်ပါဘူး
ပျင်းစရာကောင်းတဲ့ အယူအဆတွေလည်း
နားမထောင်ချင်ပါဘူး
မေမေ
အဖေက စာသင်ရင်း သေတယ်
ကျွန်တော်က ဘာလုပ်ရင်း သေရမလဲ။
မေမေ
တချို့တံခါးတွေက
ဘယ်လောက်ခေါက်ခေါက် မပွင့်ဘူး။
မေမေ
ကျွန်တော်ချစ်နေတဲ့ တရုတ်မလေးမှာ
မျက်ရစ်မရှိရှာဘူး
မေမေ
ပိုက်ဆံမရှိတဲ့ရောဂါကို ဘာနဲ့ကုမလဲ။
မေမေ
အနာဂတ်ရှော့ခ်တဲ့
ယဉ်ကျေးမှုခြင်းတိုးတိုက်မိခြင်းတဲ့
ပုံတူမျိုးပွားလူသားတဲ့။
မေမေ
တစ်ဝမ်းတစ်ခါးဟာ ဆန်းပြားလှချည်လား
ခေတ်တွေ
အလျင်စလို ရွေ့လျားလို့
လူဟာ
အင်္ဂါဂြိုဟ်လေ့လာစူးစမ်းမှုတွေ
အဝီစိတွင်းတူးသူတွေ
ဒုံးပျံတီထွင်သူတွေ
တရားစခန်းဝင်သူတွေ
အလုပ်စခန်းက ပြန်လာသူတွေ
ငါးရှဥ့်သွေးသောက်သူတွေ
တီကောင်ကို ဆားနဲ့တို့သူတွေ
လောက လူ့ရွာမှာ ယန္တရားများလည်း
တဝုန်းဝုန်းလည်ပတ်လို့
မေမေ
လူတွေ ကြားမှကြားပါ့မလား
ကျွန်တော့်သစ်ကိုင်းခြောက်ကလေး
ကျိုးတဲ့အသံကို။
လူတွေ သိမှသိပါ့မလား
ကျွန်တော့်ဂျင်းဘောင်းဘီကလေး
ပြန်ဖာထားရတာကို။
လူတွေ မြင်မှ မြင်ပါ့မလား။
ကျွန်တော့်အကြင်နာမေတ္တာတရားကို။
ဘာပဲဖြစ်ဖြစ်
မီးခြစ်ကလေးတစ်လုံးတော့
ဆောင်ထားရမယ်။
ဘာပဲဖြစ်ဖြစ်
အတ္ထုပ္ပတ္တိစာအုပ်တွေ ဖတ်ထားရမယ်။
ကိုယ့်အကြောင်းကိုတော့ပြောရမှာပဲ။
ဘာပဲဖြစ်ဖြစ်
အခန်းတစ်ခန်းတော့ ဝယ်ထားရမယ်။
ဘာပဲဖြစ်ဖြစ်
တစ်ယောက်ယောက်တော့ ရောက်လာမှာပဲ။
မေမေ
ဘာပဲဖြစ်ဖြစ် ရန်ကုန်မှာ ပျော်ပါတယ်
လွတ်သွားတဲ့ငါးကိုလည်း မကြီးချင်တော့ပါ
မနမ်းဖူးတဲ့ နှုတ်ခမ်းများကိုလည်း
မလွမ်းတော့ပါ။
ဘာပဲဖြစ်ဖြစ် ရန်ကုန်မှာပျော်ပါတယ်
လူမိုက်တွေနဲ့လည်း သိခဲ့
လူယဉ်ကျေးတွေနဲ့လည်း ကျွမ်းခဲ့
လမ်းမှာလည်း
မြွေဆိုးတွေချည်း တက်နင်းမိလို့
မေမေ
ဘာပဲဖြစ်ဖြစ် ရန်ကုန်မှာ ပျော်ပါတယ် ။ ။ ❞
▫️ကြည်ဇော်အေး // အသံများတုန်ခါလျက်
