တရုတ် Xpeng ကုမ္ပဏီ မိုးပျံကား အကြီးအကျယ်ထုတ်ဖို့ပြင်
တရုတ်က ကမ္ဘာပေါ်မှာ ပထမဆုံး မိုးပျံကားတွေ အကြီးအကျယ်ထုတ်လုပ်တဲ့ နိုင်ငံ ဖြစ်လာတော့မှာပါ။
နာမည်ကြီး တရုတ်လျှပ်စစ်ကားကုမ္ပဏီ Xpeng Motors က လာမယ့်နှစ်ထဲမှာ မိုးပျံကားတွေ အမြောက်အများထုတ်မယ်လို့ ပြောပါတယ်။ ယာဉ်ထိန်းချုပ်မှုကို AI နဲ့ ပေါင်းစပ်ပြီး မိုးပျံကား ပျံသန်းစနစ်ထိန်းချုပ်ရေးသစ်ပါ Xpeng က ဖန်တီးနေတာပါ။
Xpeng က ထုတ်နေတဲ့ မိုးပျံယာဉ်က ဒရုန်းနဲ့ ခြောက်ဘီးတပ်ဗင်ကား ပေါင်းစပ်ထားတဲ့ Modular ဒီဇိုင်းမျိုးပါ။ ကားနောက်ထဲမှာ ၂ ယောက်စီး ဒရုန်း ပါပြီး ကားနဲ့ ခရီးသည်တင်ဒရုန်းကို သယ်သွားနိုင်ပါတယ်။ ဒီယာဉ်ကိုပဲ မနှစ် နိုဝင်ဘာလက ကျူဟိုင်လေကြောင်းပြပွဲမှာ ပထမဆုံး ပျံသန်းပြခဲ့ပါတယ်။
Xpeng ယာဉ်က အလိုအလျောက်စနစ်ရော manual စနစ်ပါ ပါတဲ့ ယာဉ်ပါ။ ပုံမှန်ကားမောင်းတတ်သူတစ်ယောက်တောင် ၁ နာရီလောက် သင်လိုက်တာနဲ့ မောင်းတတ်သွားမယ်လို့ ပြောပါတယ်။ ဈေးကွက်ထဲတော့ ယွမ် ၂ သန်း မကျော်တဲ့ ဈေးနဲ့ ဝင်ဖို့လည်း ရှိပါတယ်။
ခေတ်ရှေ့ပြေး Xpeng ယာဉ်ကို အော်ဒါမှာဖို့ စိတ်ဝင်စားသူ ၃ ထောင်လောက် ရှိနေပါတယ်။ ထုတ်လုပ်မှုကိုတော့ ၂၀၂၆ မှ လုပ်မှာ ဖြစ်ပြီး တစ်နှစ်ကို အခုလို မိုးပျံကားအစီးရေ ၁ သောင်း ထုတ်လုပ်ဖို့လည်း မျှော်မှန်းထားတာပါ။ ၂၀၂၆ မှာ Xpeng ကုမ္ပဏီရဲ့ အပြည့်အဝ လူမဲ့ကားပါကင်ထိုးနိုင်စွမ်းတွေပါ ပါတဲ့ Level 4 အဆင့်နည်းပညာပါ ထွက်ဖို့ ရှိပါတယ်။
Xpeng ကုမ္ပဏီဟာ ယာဉ်နည်းပညာအပြင် လူပုံတူစက်ရုပ်တွေလည်း ထုတ်လုပ်နေပါတယ်။ နောက်နှစ်ထဲမှာ Xpeng ကနေ Level 3 အဆင့် အလိုအလျောက်လုပ်ဆောင်နိုင်စွမ်းရှိတဲ့ humanoid robots တွေကိုလည်း ဈေးကွက်ဝင် ထုတ်လုပ်မှုလုပ်ဆောင်သွားဖို့ မျှော်လင့်ထားပါတယ်။
တရုတ်နိုင်ငံအနေနဲ့လည်း အရှိန်ကျလာတဲ့ စီးပွားရေးကို တွန်းတင်ဖို့ နိုင်ငံ့စီးပွားရေးလုပ်ငန်းတွေကို အားပေးလာနေပါတယ်။ တကယ်လို့ Xpeng သာ မိုးပျံယာဉ်တွေ ထုတ်လုပ်တင်ပို့နိုင်မယ်ဆိုရင် ကမ္ဘာ့ပထမဆုံး မိုးပျံယာဉ်ကုမ္ပဏီအဖြစ် ဈေးကွက်ဝင်နိုင်တော့မှာပါ။
