MySPACE

11 w - Translate

#နိုင်ငံတကာသတင်း
◾️အပစ်အခတ်ရပ်စဲထားပါက ရုရှားနှင့်ဆွေးနွေးမည်ဟု ဇီလန်စကီး ပြောကြား
အပစ်အခတ်ရပ်စဲမှုသဘောတူညီချက်ရရှိပြီး တိုက်ခိုက်မှုများ ရပ်တန့်သွားပါက ရုရှားနှင့်မည်သည့်ပုံစံနှင့်မဆို ဆွေးနွေးရန် ယူကရိန်းက အသင့်ရှိကြောင်း သမ္မတ ဇီလန်စကီး က ပြောကြားသည်။
ထို့ပြင် ယနေ့တွင် လန်ဒန်မြို့၌ အနောက်နိုင်ငံများမှ အရာရှိများနှင့် တွေ့ဆုံနေသော ယူကရိန်းကိုယ်စားလှယ်အဖွဲ့သည်လည်း တစ်စိတ်တစ်ပိုင်း သို့မဟုတ် အပြည့်အဝအပစ်ရပ်ရေးအတွက် တာဝန်အပ်နှင်းမှု ရရှိနိုင်ကြောင်း ယူကရိန်းခေါင်းဆောင်က သတင်းထောက်များအား ပြောကြားသည်။
“ အပစ်အခတ်ရပ်စဲပြီးရင် ကျွန်တော်တို့က ဆွေးနွေးဖို့အသင့်ရှိပါတယ်။ ရှေ့ဆက်မတိုးနိုင်ဘူးဆိုတာမျိုး မဖြစ်ရအောင် ဘယ်လိုပုံစံနဲ့ မဆို ဆွေးနွေးဖို့ အသင့်ရှိပါတယ်။” ဟု ကိဗ်မြို့ သမ္မတရုံးတွင် ဇီလန်စကီး က ပြောသည်။
သို့သော်လည်း လုံခြုံ‌ရေးအာမခံချက်များ ၊ နေတိုးမဟာမိတ်တွင် ယူကရိန်းအဖွဲ့ဝင်ဖြစ်ရေး နှင့် ပိုင်နက်နယ်မြေ အစရှိသည့် ရှုပ်ထွေးနက်နဲသော အချင်းအရာများလည်း ပါဝင်နေသောကြောင့် အားလုံးကို မြန်မြန်ဆန်ဆန် သဘောတူညီမှုမရနိုင်ကြောင်းလည်း ဇီလန်စကီး က သတိပေးသည်။
ခရိုင်းမီးယားကျွန်းဆွယ်အား ရုရှားထိန်းချုပ်မှုကို မည်သည့်သဘောတူညီချက် အစိတ်အပိုင်းအဖြစ်မှ ယူကရိန်းက အသိအမှတ်ပြုမည် မဟုတ်ကြောင်း ဇီလန်စကီးက ပြောကြားပြီး ယင်းသို့လက်ခံခြင်းမှာ ယူကရိန်း အ ခြေခံဥပဒေနှင့် ဆန့်ကျင်လိမ့်မည်ဖြစ်ကြောင်း ၎င်းက ဆက်ပြောသည်။
ခရိုင်းမီးယားကျွန်းဆွယ်ကို ရုရှားက ၂၀၁၄ ခုနှစ် တွင် သိမ်းယူခဲ့ပြီး နောက်ပိုင်းတွင် ၎င်းတို့ပိုင်နက်ထဲ သွတ်သွင်းခဲ့သည်။
ယူကရိန်းနှင့် ရုရှားစစ်ပွဲ အဆုံးသတ်ရေးနည်းလမ်းရှာရန် အမေရိကန်ဦးဆောင်သော သံ တမန်‌ ရေး ကြိုးပမ်းအားထုတ်မှုများ ဆက်တိုက်ဖြစ်ပေါ်လာနေစဉ် ထွက်ပေါ်လာသည့် လန်ဒန်မြို့ ဆွေးနွေးပွဲများတွင် အမေရိကန် ၊ ဗြိတိန် ၊ ပြင်သစ် ၊ ဂျာမနီနှင့် ယူကရိန်း အရာရှိများ တွေ့ဆုံကြမည်ဖြစ်ကြောင်း သိရသည်။
လန်ဒန်မြို့အစည်းအဝေးသို့ အမေရိကန်နိုင်ငံခြားရေးဝန်ကြီး မာကိုရူဘီယိုတက်ရောက်ရန် ကနဦး စီစဉ်ထားခဲ့သော်လည်း နောက်ပိုင်း၌ အစီအစဉ်ပြောင်းကာ ဝါရှင်တန်၏ ယူကရိန်းအထူးကိုယ်စားလှယ် ဗိုလ်ချုပ်ကြီး ကိတ်သ်ကဲလော့ သာ တက်ရောက်မည်ဖြစ်ကြောင်း အမေရိကန်နိုင်ငံခြားရေးဝန်ကြီးဌာ နပြောခွင့်ရသူက ပြောသည်။
ယခုသီတင်းပတ်အတွင်း အခြားကမ္ဘာခေါင်းဆောင်များနှင့်အတူ ပုပ်ရဟန်းမင်းကြီး ဖရန်စစ်၏ ဈာပနသို့ တက်ရောက်ချိန်တွင် ၎င်းအနေဖြင့် အမေရိကန်သမ္မတ ဒေါ်နယ်ထရန့် နှင့်‌တွေ့ဆုံကြောင်းလည်း ဇီလန်စကီးက သတင်းထောက်များအား ပြောကြားခဲ့သည်။
သတင်း-ရဲမင်း
ကိုးကား-Reuters