တစ်ပေါက်ငါးပြား
*************
မနေ့ကသည်ဓာတ်ပုံလေးတင်လိုက်တော့အောက်ပြည်မှာမွေးပြီးအောက်ပြည်မှာကြီးခဲ့တဲ့ နှမ တစ်ယောက်ကသည်ပုံအကြောင်းဘာမှမသိပါလို့ပြောလာပါတယ်။
အညာသူအညာသားကျွန်တော့်မိတ်ဆွေများကတော့သည်ပုံမြင်လိုက်တာနဲ့လွမ်းမျက်ရည်သီသီဝေ့ပြီးမင်းနှယ်ရှာရှာဖွေဖွေတွေ့မှတွေ့တတ်ပလေတယ်လို့ဆိုကြပါတယ်။
ဆိုတော့ ဧရာဝတီတိုင်းသူ နှမ သိစေရအောင် မောင်ကြီးရှင်းပြ ပါရစေ။
သည် ဘီရိုပုံစံရုပ်သေပြသစ်သားပုံးကြီးကိုကျွန်တော်တို့ငယ်ငယ်ကတစ်ပေါက်ငါးပြားလို့ပဲလွယ်လွယ်ခေါ်ကြပါတယ်။ချောင်းကြည့်ပေါက်သုံးခုထဲကတစ်ပေါက်ကြည့်ရင်ကြည့်ခ ငါးပြားပေးရပေသကိုး။ချောင်းကြည့်ပေါက်တွေမှာမှန်ဘီလူးတတ်ထားပြီးအတွင်းကပန်းချီကားတွေကိုတစ်ခုချင်းကြိုးနဲ့ဆွဲချပြီးကြည့်စေတာပါ။
ဖျော်ဖြေမှု ပါးရှားလှတဲ့ကျွန်တော်တို့ကလေးဘဝကတော့ ချွင် တောက် ဆိုတဲ့စည်းဝါးနဲ့သီချင်းဆိုသံကြားရ ရင် တစ်ပေါက်ငါးပြားလာပဟေ့ဆိုတဲ့ပြီးအမေ့ဆီကပိုက်ဆန် ၁၅ ပြားလောက်တောင်း လက်ထဲကျစ်ကျစ်ပါအောင်ဆုပ်ပြီးအသံကြားရာဒုန်းစိုင်းပြေးတော့တာပါပဲ။တစ်ခါကြည့်ငါးပြားဆိုပေတဲ့တစ်ခါနဲ့အားမရလို့သုံးခါလောက်ပြန်ကြည့်ချင်တာမို့ ၁၅ ပြားတောင်းခဲ့ရတာပါ။
ပြတဲ့သူကအသက်ကြီးကြီးဦးလေးကြီးတစ်ယောက်ဖြစ်တတ်ပါတယ်။ပန်းချီပုံတစ်ပုံကြိုးဆွဲချပြလိုက် ပန်းချီပုံနဲ့ဆိုင်တဲ့အကြောင်းအရာကိုသီချင်းဆိုဖွဲ့နွဲ့ပြောလိုက် လက်ထဲကချွင်တောက်ကလည်းအဆက်မပြတ်စေရ ……
ကျွန်တော်တို့ကလေးတစ်သိုက်ကတော့အပေါက်ကိုမျက်နှာအပ်ကြည့်ရင်းဦးလေးကြီးရဲ့အဆိုအပြောထဲမှာမျောနေတော့တာပါ။
ဥပမာ… ရွှေတိဂုံဘုရားပုံဆိုရွှေတိဂုံမှာကျားတက်တာငါးရက်ကြာတဲ့အကြောင်း အင်္ဂလိပ်စာသင်ကြီးများသေနတ်နဲ့ ပစ်လိုက်မှထွက်ပြေးသွားတဲ့အကြောင်းဖွဲ့နွဲ့ပြော၊ပုပ္ပါးတောင်ပုံပြရင်ဗျတ္တနဲ့မယ်ဝဏ္ဏအကြောင်းဆိုငိုပြောတွေနဲ့ထိုးဇာတ်ခင်းတော့တာကိုး။ကျွန်တော်တို့မှာတော့ပုပ္ပါးတောင်ပုံမြင်ကွင်းကျယ်ကိုကြည့်ရင်းဦးလေးကြီးအသံကိုကြားနေရတာမို့ မယ်ဝဏ္ဏ ဒါန်းစီးတာသည်နေရာထင်ရဲ့ ဗျတ္တပန်းခူးဖို့တက်လာတာသည်လမ်းမြှောင်လေးထင်ရဲ့ နဲ့စိတ်ထဲမှာပုံဖော်တွေးကြည့်ရင်းအရသာရှိနေရပါတယ်။
ပန်းချီကားဆယ်ကားလောက်ဟာ one course ပါပဲ။ကျွန်တော်တို့ကတော့သုံးခါလောက်ပြန်ကြည့်လိုက်ရမှကိုကျေနပ်တာပါ။
မိုးလဲချုပ်လာပြီ ကြည့်သူကလေးတွေလဲပါးလာပြီဆိုရင်ပစ္စည်းတွေသိမ်းပြီးရုပ်သေပြဘီရို ကြီးကိုပုခုန်းပေါ်ထမ်းလို့ နောက်တရွာကိုမမှောင်ခင်ကူးဖို့တရွေ့ရွေ့နဲ့ထွက်ခွာသွားတဲ့ ဦးလေးကြီးကိုကြည့်ရင်းကျွန်တော်တို့ကလေးတစ်သိုက်မှာတော့ ရွှေတိဂုံပုံပြတုန်းက ကျားပါတယ်မပါဘူး ဇော်ဂျီဆေးကြိတ်တဲ့ပုံပြတုန်းကဘေးမှာ သူယောင်မယ်ပုံပါတယ်မပါဘူးစသဖြင့်ငြင်းခုန်ရင်းကျန်ရစ်ခဲ့ရတော့တာပေါ့။
သြော်…လွမ်းမိပါသေးတော့ တစ်ပေါက်ငါးပြားရယ်……။
(ဓာတ်ပုံများကို Lin San Tyna Page မှ ရယူပါသည်။)
_ Lay Myint
