ထိုင်းအစိုးရက အနည်းဆုံး လုပ်ခလစာတိုးမြှင့်မှုကို အတည်ပြု
ဘန်ကောက်၊ ဒီဇင်ဘာ ၂၆
ထိုင်းအစိုးရအဖွဲ့သည် လာမည့်နှစ် ဇန်နဝါရီလမှစပြီး အနည်းဆုံး လုပ်ခလစာတိုးမြှင့်မှု အစီအစဉ်ကို ဒီဇင်ဘာ ၂၄ ရက်က အတည်ပြုခဲ့ပြီး အသုံးစရိတ်များကိုမြှင့်တင်ရန် အခွန်ကောက်ခံမှုများအား လျှော့ချသွားမည်ဟု CNA မှ ဖော်ပြခဲ့သည်။
ထို့ပြင် လာမည့်နှစ်အတွင်း စီးပွားရေး ဖွံ့ဖြိုးတိုးတက်မှုနှုန်းကို ၃ ရာခိုင်နှုန်းကျော် တိုးမြှင့်နိုင်ရန် မျှော်လင့်ထား ကြောင်း ဝန်ကြီးချုပ် ပေတုန်တန် (Paetongtarn Shinawatra) က သတင်းထောက်များကို ပြောကြားခဲ့သည်။
နိုင်ငံ့စီးပွားရေးကို တိုးတက်စေရန်အတွက် တစ်ရက်လုပ်ခ အနည်းဆုံးလစာကို ဘတ် ၄၀၀ (၁၁ ဒသမ ၇၂ ဒေါ်လာ) မြှင့်တင်ပေးရန် ဆန္ဒရှိကြောင်း အစိုးရအဖွဲ့က ပြောကြားခဲ့သည်။
သို့သော် ဒီဇင်ဘာ ၂၄ ရက်က လုပ်ခလစာရေးရာကော်မတီက ဇန်နဝါရီ ၁ ရက်မှစပြီး တစ်ရက်လုပ်ခ အနည်းဆုံး လစာကို ၂၂၇ ဘတ်မှ ဘတ် ၄၀၀ ( ၉ ဒသမ ၉ ဒေါ်လာမှ ၁၁ ဒသမ ၇ ဒေါ်လာ) အကြား ၂ ဒသမ ၉ ရာခိုင်နှုန်း အထိ တိုးမြှင့်ပေးရန် ဆုံးဖြတ်ခဲ့သည်။
ဘတ် ၄၀၀ အထိ တိုးမြှင့်ပေးမည့် ပြည်နယ်များတွင် ဖူးခက် (Phuket) ၊ ချာချောင်ဆာအို (Chachoengsao) ၊ ချောင်ဘူရီ (Chon Buri) ၊ ရာယုန် (Rayong) ပြည်နယ်များနှင့် ဆမူအီ (Samui) ကျွန်းတို့ ပါဝင်သည်။
ထို့ပြင် အစိုးရအဖွဲ့သည် စားသုံးသူကဏ္ဍကို မြှင့်တင်ရန် အခွန်များကို လျှော့ချပေးရန် အတည်ပြုခဲ့ကြောင်း ပေတုန်တန်က ပြောကြားခဲ့သော်လည်း အသေးစိတ် ထုတ်ပြန်ခဲ့ခြင်းမရှိပေ။
ဒုတိယဘဏ္ဍာရေးဝန်ကြီး ဂျူလာပန် အမ်မော်ဗီဗက် (Julapun Amornvivat) ကလည်း အစိုးရသည် ငွေကြေး သုံးစွဲမှု ပမာဏအပေါ် မူတည်ပြီး ဘတ် ၅၀,၀၀၀ အထိ အခွန်လျှော့ပေးမည် ဖြစ်သော်လည်း ပြည်တွင်းခရီးသွား လာမှု ပါဝင်မည်မဟုတ်ကြောင်း၊ ထိုအစီအစဉ်ကို ဇန်နဝါရီ ၁၆ ရက်မှ ဖေဖော်ဝါရီ ၂၈ ရက်အကြား စတင် လုပ်ဆောင်သွားမည်ဟု ဆိုသည်။
ထို့ပြင် အစိုးရအဖွဲ့သည် ဇန်နဝါရီလမှစပြီး ထိုင်းလူမျိုးများအား တစ်ဦးလျှင် ဘတ် ၁၀,၀၀၀ စီပေးသည့် ဒုတိယအသုတ် အစီအစဉ်ကို စတင်ရန် အတည်ပြုခဲ့သည်ဟု ပေတုန်တန်က ပြောသည်။
ဒုတိယအသုတ် အစီအစဉ်တွင် ဘတ် ၄၀ ဘီလျံကို သက်ကြီးပိုင်းအရွယ် လူဦးရေ ၄ သန်းကို ထောက်ပံ့မည် ဖြစ်သည်။
အမေရိကန်ဒေါ်လာ ၁၄ ဘီလျံ တန်ကြေးရှိသည့် ထိုအစီအစဉ်၏ ပထမအသုတ်ကို စက်တင်ဘာလက စတင်ခဲ့ပြီး လက်ရှိအချိန်တွင် ဘတ် ၁၀,၀၀၀ စီရရှိထားသည့် ထိုင်းလူမျိုး ၁၄ ဒသမ ၅ သန်းရှိပြီဖြစ်သည်။
Source: CAN
ပုံ - ထိုင်းဝန်ကြီးချုပ် ပေတုန်တန်ကို တွေ့ရစဉ်
#centralnewsnaypyitaw
