အိုးမဲ့အိမ်မဲ့ ဖြစ်သွားတဲ့ ကျူးကျော်မိသားစုတွေကို မြေနဲ့အိမ် ဝယ်ပေးမည်
ရှမ်းတောင်ပိုင်း ကလောမြို့မှာ သဘာဝဘေးကြောင့် အိုးမဲ့အိမ်မဲ့ ဖြစ်သွားတဲ့ ကျူးကျော်မိသားစုတွေကို ရောင်စဉ်မဲ့ လူမှုကူညီရေးအသင်းက မြေနဲ့အိမ် ဝယ်ပေးမယ်လို့ သိရပါတယ်။ မိုးသည်းထန်စွာရွာသွန်းခဲ့တဲ့အတွက် တောင်ကျရေတွေ စီးဆင်းမှုကြောင့် ရေစီးနဲ့ မျောပါပြီး နေအိမ်တွေ ပျက်စီးခဲ့တဲ့ ကျူးကျော်မိသားစုတွေကို အဓိက ဝယ်ပေးမှာ ဖြစ်ပါတယ်။
ရောင်စဉ်မဲ့ လူမှုကူညီရေးအသင်းမှ တာဝန်ရှိသူတစ်ဦးက အခုလို ပြောပါတယ်..
"လက်ရှိ ရာသီဥတုအနေထားက မိုးရွာပြီး အေးပါတယ်။ နေစရာအိမ်မရှိတော့ ဝါးလုံးလေးထောင်ပြီး တာလပတ်ကို အမိုးလုပ်ပြီး နေနေကြရတယ်။ ဒီရာသီဥတုနဲ့ဆို ရေရှည်နေဖို့ မပြောနဲ့ တစ်ရက်တောင် တော်တော်ကြိုးစားနေရမှာ။ ကျွန်တော့် အနေနဲ့ အိမ်ပြိုပျက်သွားတဲ့ ကျူးကျော် မိသားစုတွေ အကုန်လုံးကို တစ်အိမ် ၁ သိန်း/၂ သိန်း/ ၃ သိန်း လှူလို့ သူတို့ ဘာမှဖြစ်လာမှာ မဟုတ်ဘူး။ လက်တွေ့ အကူညီဖြစ်အောင် အိုးပိုင် အိမ်ပိုင်ဖြစ်အောင် လုပ်ပေးမှာပါ"
အစီအစဉ်ကတော့ ကလောမြို့ရဲ့ ကုန်းမြင့်နေရာတခုမှာ မြေကွက်ဝယ် အိမ်ဆောက်ပေးပြီး ပိုင်ဆိုင်မှုကို ၃ နှစ်ပြည့်လို့ အမှန်တကယ် နေထိုင်သူဆို အပိုင်လွှဲပေးမှာဖြစ်ပြီး ပြန်ရောင်းတာမျိုး လုံးဝ ခွင့်မပြုဘူးလို့ သိရပါတယ်။
ရွှေတြိဂံ၊ ပုံ - ရောင်စဉ်မဲ့ လူမှုကူညီရေးအသင်း
