#နိုင်ငံတကာသတင်း
◼အိန္ဒိယက စစ်ရေးပြင်ဆင်နေသည်ဟုသတင်းရထားကြောင်း ပါကစ္စတန်ပြောကြား
အိန္ဒိယနိုင်ငံက စစ်ဆင်ရေးတစ်ရပ်မကြာမီစတင်သွားရန် ရည်ရွယ်ထားသည် ဆိုသည့် ယုံကြည်ရလောက်သော ထောက်လှမ်းရေးသတင်းရရှိထားသည်ဟု ပါကစ္စတန် က ယနေ့တွင် ပြောကြားသည်။
အိန္ဒိယပိုင်ကက်ရှ်မီးယားဒေသတွင် လူ ၂၆ ဦးသေဆုံးစေခဲ့သည့် ခရီးသွားများအပေါ် တိုက်ခိုက်မှုဖြစ်ပေါ်ခဲ့ပြီး နျူကလီးယားလက်နက်ပိုင်ဆိုင်သော အိမ်နီးချင်းနှစ်နိုင်ငံကြား တင်းမာမှုများ မြင့်တက်နေစဉ် ပါကစ္စတန်၏ ပြောကြားမှု ထွက်ပေါ်လာခြင်းဖြစ်သည်။
ပါဟယ်လန်ဖြစ်ရပ်တွင် ပါဝင်ပတ်သက်ခဲ့သည် ဆိုသော အခြေအမြစ်မရှိ လုပ်ကြံဇာတ်လမ်း တစ်ခုကို အခြေခံပြီး လာမည့် ၂၄ နာရီ မှ ၃၆ နာရီအတွင်း စစ်ဆင်ရေးတစ်ရပ် စတင်ရန် အိန္ဒိယက ကြံစည်နေကြောင်း ယုံကြည်ရလောက်သည့် ထောက်လှမ်းရေးသတင်းတစ်ရပ် ရရှိထားသည်ဟု ပါကစ္စတန် က ပြောကြားသည်။
ယင်းနှင့်ပတ်သက်၍ မှတ်ချက်ပေးရန် တောင်းဆိုမှုကို အိန္ဒိယ နိုင်ငံခြားရေး နှင့် ကာကွယ်ရေးဝန်ကြီးဌာနတို့က မတုံ့ပြန်ခဲ့ကြောင်း ရိုက်တာသတင်းက ဖော်ပြသည်။
အကြမ်းဖက်မှုပုံစံ အားလုံးကို အစ္စလာမာဘတ် က ရှုတ်ချကြောင်း နှင့် အိန္ဒိယထံမှ ထွက်ပေါ်လာသည့် စစ်ဆင်ရေးမှန်သမျှကို ပြတ်ပြတ်သားသား သေသေချာချာ တုံ့ပြန်သွားမည်ဖြစ်ကြောင်း ပါကစ္စတန်အစိုးရ က ယနေ့ နံနက်တွင် ထုတ်ပြန်ပြောကြားခဲ့သည်။
ဧပြီ ၂၂ ရက် က ဖြစ်ပေါ်ခဲ့သော တိုက်ခိုက်မှုအတွင်း သေနတ်သမားများက အမျိုးသားများကို သီခြားခွဲထုတ်ခဲ့ပြီး ၎င်းတို့၏ နာမည်များကို မေးမြန်းကာ ဟိန္ဒူများကို အဓိကပစ်မှတ်ထားပြီး အနီးကပ်ပစ်ခတ်သတ်ဖြတ်ခဲ့သည်ဟု ပါဟယ်ဂန်ဒေသ ပစ်ခတ်မှုမှ လွတ်မြောက်လာသူများနှင့် အိန္ဒီယတာဝန်ရှိသူများက ပြောကြားကြသည်။
ပါကစ္စတန်နိုင်ငံသား နှစ်ဦး အပါအဝင် သေနတ်သမားသုံးဦးကို အိန္ဒိယက ဖော်ထုတ်ခဲ့ပြီး ၎င်းတို့သည် မွတ်ဆလင်လူများစုနေထိုင်ရာ ကက်ရှ်မီးယားဒေသတွင် လက်နက်ကိုင်တော်လှန်နေသည့် အကြမ်းဖက်သမားများ ဖြစ်ကြောင်းပြောသည်။
ပါကစ္စတန်ကမူ ၎င်းတို့ ပါဝင်ပတ်သက်မှုမရှိကြောင်း ပြောပြီး အမှီအခိုကင်းသော စုံစမ်းစစ်ဆေးမှု လုပ်ဆောင်ရန် တိုက်တွန်းသည်။
၁၉၄၇ ခုနှစ် ဗြိတိသျှကိုလိုနီအုပ်ချုပ်မှုမှ ထွက်ပေါ်လာခဲ့သော ပြိုင်ဘက်ဟောင်း များဖြစ်သည့် အိမ်နီးချင်းနှစ်နိုင်ငံက တိုက်ခိုက်မှုဖြစ်ပြီးနောက် တစ်ဦးနှင့်တစ်ဦး အပေါ် အပြန်အလှန်အရေးယူမှုများ လုပ်ဆောင်ခဲ့ကြရာ အိန္ဒိယက အရေးပါသော အိန္ဒုမြစ်ရေသဘောတူညီချက်အား ဆိုင်းငံ့ထားလိုက်ကာ ပါကစ္စတန်က ၎င်းတို့၏ ဝေဟင်ပိုင်နက်မှ အိန္ဒိယလေကြောင်းလိုင်းများကို ပိတ်ပင်ခဲ့သည်။
ထို့နောက်ပါဟယ်လန် တိုက်ခိုက်မှု ကျူးလွန်ခဲ့သူများအား ရှာဖွေ အပြစ်ပေးသွားမည်ဟု အိန္ဒိယဝန်ကြီးချုပ် နာရင်ဒရာမိုဒီ က ကြုံးဝါးထားသည်။
ဝန်ကြီးချုပ်မိုဒီ ၊ ပြည်ထဲရေး ၊ ကာကွယ်ရေး နှင့် ဘဏ္ဍာရေး ဝန်ကြီးများ ပါဝင်သော အိန္ဒိယအစိုးရ လုံခြုံရေးကော်မတီအဖွဲ့က ယနေ့ နှောင်းပိုင်းတွင် တွေ့ဆုံရန်ရှိကြောင်း အစိုးရသတင်းရင်းမြစ်တစ်ဦး က ရိုက်တာ အားပြောကြားပြီး ယင်းမှာ ဧပြီ ၂၂ ရက် တိုက်ခိုက်မှုနောက်ပိုင်း ဒုတိယအကြိမ်တွေ့ဆုံမှုဖြစ်ကြောင်း သိရသည်။
သတင်း-ရဲမင်း
