ယခုဘဏ္ဍာနှစ်တွင် ဆန်နှင့်ဆန်ကွဲတင်ပို့ရန် လျာထားချက် တန်ချိန် ၂ သန်းခွဲထက် ပို၍ တင်ပို့နိုင်မည်ဟု MRF ဥက္ကဋ္ဌ ပြော
ဇန်နဝါရီ ၂၄
ယခု ၂၀၂၄-၂၀၂၅ ဘဏ္ဍာနှစ်တွင် ပြည်ပသို့ ဆန်နှင့်ဆန်ကွဲတင်ပို့ရန် လျာထားချက် တန်ချိန် ၂ သန်းခွဲထက် ပို၍တင်ပို့နိုင်မည်ဖြစ်ကြောင်း ယမန်နေ့က ပြုလုပ်သည့် မြန်မာနိုင်ငံဆန်စပါးအသင်းချုပ်(MRF) နှစ်ပတ်လည်အစည်းအဝေးနှင့် အထွေထွေညီလာခံတွင် ထုတ်ပြန်သည့် မြန်မာနိုင်ငံဆန်စပါးအသင်းချုပ်၏ ၂၀၂၄ ခုနှစ် အစီရင်ခံစာတွင် ဖော်ပြထားသည်။
၂၀၂၄ ခုနှစ်၊ ဧပြီလ ၁ ရက်မှ ၂၀၂၅ ခုနှစ်၊ မတ်လ ၃၁ ရက်တွင် ကုန်ဆုံးမည့် ၂၀၂၄-၂၀၂၅ ဘဏ္ဍာနှစ်အတွက် ပို့ကုန်လျာထားချက်တွင် (Export Target) ထက်ပို၍ တင်ပို့ရောင်းချထားနိုင်သည့် အခြေအနေကောင်းတစ်ခုဖြစ်ကြောင်း မြန်မာနိုင်ငံဆန်စပါးအသင်းချုပ် ဥက္ကဋ္ဌ ဦးရဲမင်းအောင်က အစီရင်ခံစာတင်ပြစာနှင့် နှုတ်ခွန်းဆက်စကား ပြောကြားရာတွင် ထည့်သွင်းပြောကြားခဲ့သည်။
၂၀၂၄ ခုနှစ်၊ ဇန်နဝါရီလမှ ဒီဇင်ဘာလကုန်အထိ တစ်နှစ်အတွင်း ပြည်ပသို့ ဆန်နှင့်ဆန်ကွဲ တန်ချိန် ၂ ဒသမ ၇၆၇ သန်းတင်ပို့မှုမှ ဒေါ်လာ ၁ ဒသမ ၃၃၂ ဘီလျံရရှိခဲ့သလို ယခုဘဏ္ဍာနှစ် ဧပြီလမှ ဒီဇင်ဘာလအထိ ၉ လအတွင်း တန်ချိန် ၂ သန်းကျော်တင်ပို့မှုမှ ဒေါ်လာသန်း ၉၅၀ ခန့်အထိ ရရှိထားကြောင်း မြန်မာနိုင်ငံဆန်စပါးအသင်းချုပ်မှ သိရသည်။
ယခုဘဏ္ဍာနှစ်တွင် ပြည့်သို့ ဆန်နှင့်ဆန်ကွဲတန်ချိန် ၂ ဒသမ ၅ သန်း (တစ်လလျှင် တန်ချိန် ၂ သိန်းကျော်) တင်ပို့ရန်လျာထားခဲ့သော်လည်း ၂၀၂၄ ခုနှစ် ဧပြီလမှ ဇူလိုင်လအထိ လေးလဆက်တိုက် လျာထားချက်တန်ချိန် ၂ သိန်းကျော် ပြည့်မီခြင်းမရှိဘဲ အချို့လများတွင် တန်ချိန်တစ်သိန်းအောက်သာ တင်ပို့နိုင်ခဲ့ခြင်းဖြစ်သည်။
သို့သော် ပို့ကုန်ရငွေ ၇၅ ရာခိုင်နှုန်းအထိ လွတ်လပ်စွာရောင်းဝယ်ခွင့်ပြုခဲ့သည့် ၂၀၂၄ ခုနှစ် ဩဂုတ်လမှ စတင်ပြီး လစဉ်တင်ပို့ရမည့် ဆန်နှင့်ဆန်ကွဲတန်ချိန် ၂ သိန်းကျော် တင်ပို့နိုင်ခဲ့ပြီးနောက်တွင် ငါးလဆက်တိုက် လျာထားချက်ပြည့်မီခဲ့သလို တချို့လများတွင် လျာထားချက်ထက် နှစ်ဆအထိ တင်ပို့နိုင်ခဲ့ခြင်းဖြစ်သည်။
Credit - MT News Agency
#သတင်းဟင်းလေးအိုးကြီး
