MySPACE

19 ပတ် - ဘာသာပြန်ပါ။

ခေါင်းဆောင်ကောင်းဆိုတာ
ခေါင်းဆောင်မှု (Leadership) ဆိုတဲ့အကြောင်းအရာကို ခုနောက်ပိုင်းမှာအတော်များများစိတ်၀င်စားလာကြ သလို သင်တန်းတွေလည်းအများကြီးဖွင့်လာကြပါတယ်။ လုပ်ငန်းခွင်မှာလည်း ခေါင်းဆောင်မှုအကြောင်း အရာဟာ အရမ်းကိုရေးပန်းစားလာပါတယ်။ ခေါင်းဆောင်မှုအတတ်ပညာဟာ လူတိုင်းအတွက်မရှိမဖြစ် လိုအပ်တဲ့ပညာရပ်တစ်ခုပါ။ သင်ယူလေ့လာလေ့ကျင့်ယူမှရမဲ့အတတ်ပညာတစ်ခုလည်းဖြစ်ပါတယ်။
Laura လည်း ခေါင်းဆောင်မှုနဲ့ပတ်သက်ပြီး ပြည်တွင်းပြည်ပကစာရေးဆရာတွေရဲ့စာအုပ်တွေဖတ်ဖူးသလို နိုင်ငံတကာကခေါင်းဆောင်မှုနဲ့ပတ်သက်တဲ့သင်တန်းတွေလည်း တက်ရောက်ခဲ့ဖူးပါတယ်။ ကိုယ်တိုင်လည်း ခေါင်းဆောင်မှုနဲ့ပတ်သက်ပြီး မန်နေဂျာတွေကအစ ခေါင်းဆောင်ဖြစ်ဖို့ပြင်ဆင်နေတဲ့လူငယ်တွေအထိ သင်တန်းပေးဖြစ်ပါတယ်။ အရင်နှစ်ပတ်လောက်က ခေါင်းဆောင်မှုနဲ့ပတ်သက်ပြီး သင်တန်းတစ်ခုလုပ်ဖြစ် ရင်း ဒီစာမျက်နှာလေးမှာလည်း ခေါင်းဆောင်မှုနဲ့ပတ်သက်တဲ့အကြောင်းအရာလေးကို မျှဝေပေးမယ်လို့ စဉ်းစားမိတာနဲ့ ကိုယ့်အတွေ့အကြုံ နဲ့ သင်ယူလေ့လာထားတဲ့အထဲက ကောက်နှုတ်ပြီးမျှဝေပေးချင်ပါတယ်။
ခေါင်းဆောင်ဆိုတာဘယ်သူလဲ?
အရင်ဆုံးခေါင်းဆောင်ကောင်းဆိုတာကို မပြောခင် ခေါင်းဆောင်ဆိုတာဘယ်သူတွေကို ပြောတာလဲဆိုတာ သိဖို့လိုပါတယ်။ “ခေါင်းဆောင်ဆိုတာ လူတစ်စုကိုလွှမ်းမိုးနိုင်ပြီး ရည်မှန်းချက်တစ်ခုကိုရရှိအောင်လုပ် ဆောင်နိုင်သူ” လို့အဓိပ္ပါယ်ရပါတယ်။ ဒါကြောင့် တစ်ချို့တွေအသိမှားနေတဲ့ ရာထူးရှိမှခေါင်းဆောင်ဖြစ်တာ မဟုတ်ပါဘူး။ ဘယ်သူပဲဖြစ်ဖြစ်ကိုယ့်ပတ်၀န်းကျင်ကလူတွေကို လွှမ်းမိုးနိုင်ပြီးသူလုပ်ချင်တာတွေကို နောက်ကလူတွေကလည်း သဘောတူညီစွာလိုက်လုပ်ဆောင်ပေးအောင် လုပ်ဆောင်နိုင်သူတိုင်းကို ခေါင်းဆောင်လို့သတ်မှတ်လို့ရပါတယ်။ အရေးအကြီးဆုံးက ခေါင်းဆောင်ဆိုတာ နောက်လိုက်ရှိမှ ခေါင်းဆောင်ဖြစ်မှာပါ။ ကိုယ့်ဟာကိုယ်ခေါင်းဆောင်လို့သတ်မှတ်ပြီး နောက်လိုက်မရှိရင် ခေါင်းဆောင် မဖြစ်ပါဘူး။
ခေါင်းဆောင်ကောင်းဆိုတာ
ခေါင်းဆောင်ဆိုတိုင်း ခေါင်းဆောင်ကောင်းဖြစ်ချင်မှဖြစ်တာပါ။ ဒါကြောင့်ခေါင်းဆောင်ကောင်းဆိုတာ လူအများကဘယ်လိုလူမျိုးတွေကို သတ်မှတ်လေ့ရှိသလဲ။ ဘယ်အချက်တွေနဲ့ပြည့်စုံတဲ့သူတွေကို ခေါင်းဆောင်ကောင်းလို့သတ်မှတ်လေ့ရှိသလဲ ဆိုတာကို သင်တန်းတွေမှာဆွေးနွေးဖြစ်တဲ့ အကြောင်းအရာတွေကို မျှဝေပေးချင်ပါတယ်။
(၁) ရိုးသားမှု
“ရိုးသားမှုဟာ အကောင်းဆုံးမူဝါဒ” လို့ဆိုရိုးစကားရှိပါတယ်။ ခေါင်းဆောင်ဖြစ်လာတဲ့အခါမှာ အမှားလုပ်မိရင် (သို့မဟုတ်) ကိုယ်မသိတဲ့အရာတွေကို မသိတဲ့အတိုင်း၀န်ခံပြောဆိုဖို့ ၀န်လေး တတ်ကြပါတယ်။ ခေါင်းဆောင်ကောင်းတွေကတော့ မသိတဲ့အရာကိုမသိဘူးလို့ပြောဖို့၀န်မလေးသလို အမှားလုပ်ခဲ့မိရင်လည်း မှားသွားတယ်ဆိုတာကိုအောက်လက်ငယ်သားတွေကို ပြောဖို့မတွန့်ဆုတ်တတ်ကြ သူတွေပါ။ မှားနေတာကိုမှားတယ်လို့၀န်မခံဘဲဟန်ဆောင်နေခဲ့ရင် လက်အောက်ငယ်သားတွေက သိရှိသွား တဲ့အခါ လေးစားမှုလျော့ကျသွားနိုင်ပါတယ်။
(၂) ပေါင်းသင်းဆက်ဆံရေး
ပေါင်းသင်းဆက်ဆံရေးဟာ ခေါင်းဆောင်တွေအတွက်အရမ်းကိုအရေးပါတဲ့အချက်တစ်ချက်ပါ။ ခေါင်းဆောင်ဖြစ်လာတဲ့အခါမှာ အနည်းဆုံးတော့ကိုယ့်ရဲ့လက်အောက်ငယ်သားတွေနဲ့ ကောင်းမွန်တဲ့ ပေါင်းသင်းဆက်ဆံရေးကိုတည်ဆောက်နိုင်ရပါမယ်။ ခေါင်းဆောင်ကောင်းတွေဟာ ဘယ်သူနဲ့မဆို ကောင်းမွန်တဲ့ဆက်ဆံရေးကို တည်ဆောက်ထားနိုင်ပြီး လူတိုင်းကိုရာထူးနေရာပေါ်မမူတည်ဘဲ လေးစားမှုနဲ့ ဆက်ဆံတတ်ကြသူတွေပါ။
(၃) မိမိကိုယ်ကိုယ်ယုံကြည်မှု
ခေါင်းဆောင်ကောင်းတွေမှာ မိမိကိုယ်ကိုယ်ယုံကြည်မှုဟာ ရာနှုန်းပြည့်ရှိတတ်ပါတယ်။ မိမိကိုယ်ကိုယ် ယုံကြည်မှု လွန်ကဲပြီးမောက်မာမှုမဖြစ်အောင်လည်း အမြဲထိန်းသိမ်းတတ်ကြပါတယ်။ မိမိကိုယ်ကိုယ်ယုံကြည်မှုရှိတဲ့အတွက် နောက်လိုက်တွေကလည်းခေါင်းဆောင်ကိုယုံကြည်စွာနဲ့ လက်တွဲလုပ်ဆောင်ကြတဲ့အတွက် ရလဒ်ကောင်းတွေကိုရရှိနိုင်ပါတယ်။
(၄) ဆုံးဖြတ်ချက်ပြတ်သားမှု
ခေါင်းဆောင်ကောင်းတွေဟာ ဆုံးဖြတ်ချက်ချမှတ်တဲ့အခါမှာ တွေဝေနှောင့်နှေးနေတာမျိုးမရှိတတ်ကြပါဘူး။ ဘာကြောင့်လဲဆိုရင် ဆုံးဖြတ်ချက်မချခင်က အဖက်ဖက်ကနေစဉ်းစားပြီး အကောင်းဆုံးဆုံးဖြတ်ချက်ကို သာချမှတ်လေ့ရှိပါတယ်။ ဆုံးဖြတ်ချက်ချတဲ့အခါမှာလည်း နောက်လိုက်တွေရဲ့အကြံဥာဏ်ကိုထည့်သွင်း စဉ်းစားပေးပြီး တစ်ဦးတစ်ယောက်တည်းချမှတ်တာမျိုးမလုပ်ဘဲ အားလုံးအတွက်အကောင်းဆုံးဖြစ်မဲ့ ဆုံးဖြတ်ချက်မျိုးကိုသာ ရဲရဲဝံ့ဝံ့ချမှတ်တတ်ကြသူတွေပါ။
(၅) L လေးလုံး (Listen, Learn, Love, Lead) (နားထောင်၊ သင်ယူ၊ ချစ်ခင်၊ ဦးဆောင်)
ဒီ L လေးလုံးကတော့ ခေါင်းဆောင်ကောင်းတိုင်းမှာရှိလေ့ရှိတဲ့ အရာတွေပါ။ ခေါင်းဆောင်ကောင်းတွေဟာ လက်အောက်ငယ်သားနောက်လိုက်တွေရဲ့ သဘောထားကိုနားထောင်လေ့ရှိပြီး လိုအပ်ချက်တွေကို ဖြည့်ဆည်းပေးတတ်ကြပါတယ်။ သင်ယူလေ့လာမှုကိုလည်း အမြဲမပြတ်လုပ်ဆောင်နေတတ်သလို အများနဲ့လည်းမျှဝေတတ်ကြသူတွေပါ။ ခေါင်းဆောင်ကောင်းတွေဟာမိမိအဖွဲ့၀င်တွေကိုချစ်ခင်မြတ်နိုးစွာနဲ့ ဖေးမစာနာထောက်ထားကာ ဦးဆောင်ကြတဲ့သူတွေလည်းဖြစ်ပါတယ်။
ခေါင်းဆောင်ကောင်းတစ်ယောက်မှာ ရှိသင့်ရှိထိုက်တဲ့အချက်တွေကအများကြီးရှိပါတယ်။ အထက်ကအချက်ငါးချက်ကတော့ အရေးကြီးတဲ့ထဲမှာပါ၀င်တဲ့အတွက်အဓိကထားရေးထားတာပါ။ ယခုလက်ရှိခေါင်းဆောင်နေရာမှာ ရောက်ရှိနေကြတဲ့သူတွေလည်းမိမိကိုယ်ကိုယ်ဒီအချက်လေးတွေနဲ့ ဆန်းစစ်နိုင်သလို ခေါင်းဆောင်နေရာအတွက်ပြင်ဆင်နေတဲ့သူတွေလည်း မိမိမှာဒီအချက်လေးတွေရှိလာ အောင်လေ့ကျင့်လုပ်ဆောင်နိုင်ပါတယ်။ နောက်ထပ်ဆောင်းပါးတစ်ပုဒ်မှာ အခြားကျန်ရှိနေတဲ့အချက်တွေကို မျှဝေပေးပါအုံးမယ်။
စာဖတ်သူတို့ရောကိုယ့်လုပ်ငန်းပတ်၀န်းကျင်၊ ကိုယ့်ဘ၀မှာရော ခေါင်းဆောင်ကောင်းနဲ့ကြုံဖူးပါသလား?
ကိုယ်ကြုံဖူးတဲ့ခေါင်းဆောင်ကောင်းတွေမှာရော ဒီအချက်လေးတွေကိုတွေ့ရှိရပါသလား?
ကိုယ်သဘောကျတဲ့ခေါင်းဆောင်ကို comment မှာ mention ခေါ်ပြီး အသိပေးလို့ရသလို ဒီပို့စ်လေးကိုလည်း အခြားသူတွေနဲ့ share လုပ်နိုင်ပါတယ်။
#whatisaleader #goodleader #qualities
www.laurachointernational.com
#laura_cho
Career Coach