မြန်မာ-အိန္ဒိယ IT ကဏ္ဍပူးပေါင်းမြှင့်တင်ရေးဆိုင်ရာ MoU သက်တမ်းတိုးမြှင့်စာလဲလှယ်
********************
(ပြည်တွင်း) မတ်လ ၂၄
၂၀၀၇ ခုနှစ်ကစတင်ရေးထိုးခဲ့တဲ့ မြန်မာ-အိန္ဒိယ IT ကဏ္ဍပူးပေါင်းမြှင့်တင်ရေးဆိုင်ရာ MoU သက်တမ်း တိုးမြှင့် စာလဲလှယ်ခြင်းကို မတ်လ ၂၁ ရက်မွန်းလွဲပိုင်းက နေပြည်တော်မှာကျင်းပခဲ့ရာ သိပ္ပံနှင့်နည်းပညာဝန်ကြီးဌာန ဒုတိယဝန်ကြီးဦးအောင်ဇေယျ တက်ရောက်ခဲ့ပါတယ်။
အဆိုပါ အခမ်းအနားမှာ သိပ္ပံနှင့်နည်းပညာ ဒုတိယဝန်ကြီးက တက်ရောက်ပြီးနောက် ယနေ့ခေတ် Digital Transformation ဆိုင်ရာ IT ဖွံ့ဖြိုးမှုတိုးတက်မှု အရွေ့များ မြန်ဆန်လျက်ရှိ၍ အမီလိုက်ပါနိုင်အောင် ဆောင်ရွက်ရာမှာ နိုင်ငံတကာပူးပေါင်း ဆောင်ရွက်မှုသည် အရေးပါသော အခန်းကဏ္ဍမှပါဝင်တယ်လို့ ပြောကြားခဲ့ပါတယ်။
ဒါ့အပြင် ယနေ့လဲလှယ်မှုမှ AI ၊ Cybersecurity၊ Big Data၊ Cloud Computing စတဲ့ ထွန်းသစ်စ IT နည်းပညာများဆိုင်ရာ လူ့စွမ်းအားရင်းမြစ်များမွေးထုတ်ခြင်း၊ သုတေသန အတွေ့အကြုံများဖလှယ်ခြင်း၊ စွမ်းရည်များ မြှင့်တင်ခြင်းတို့တွင် ပူးပေါင်းဆောင်ရွက်မှုများအား ပိုမိုမြှင့်တင်နိုင်ပြီး ဒေသတွင်း ဒစ်ဂျစ်တယ်ရပ်ဝန်း တည်ထောင်မှု နှင့် စဉ်ဆက်မပြတ်ဖွံ့ဖြိုး တိုးတက်မှုအတွက် အထောက်အကူပြုမည်ကို ယုံကြည်မျှော်လင့်ကြောင်းကို ပြောကြားခဲ့ ပါတယ်။
ထို့နောက် ဒုတိယဝန်ကြီး ဒေါက်တာအောင်ဇေယျနှင့် မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီး H.E. Mr. Abhay Thakur တို့က MoU သက်တမ်းတိုးမြှင့်စာများကို အပြန်အလှန် လဲလှယ်ခဲ့ကြပါတယ်။
အဆိုပါ MoU ကို ၂၀၀၇ ခုနှစ်တွင် စတင်ရေးထိုးခဲ့ပြီး ယခုသက်တမ်းတိုးမှုဟာ ပဉ္စမအကြိမ်ဖြစ်ကာ India- Myanmar Center for Enhancement of IT Skills (IMCEITS) သင်တန်းစင်တာကို သုတေသနနှင့်တီထွင်ဆန်းသစ်မှု ဦးစီးဌာနရှိ သတင်းအချက်အလက်နှင့် ဆက်သွယ်ရေးနည်းပညာသုတေသနဌာနနှင့် အိန္ဒိယနိုင်ငံရှိ Center for Development of Advanced Computing (C-DAC) တို့ဆက်လက်ပူးပေါင်းဆောင်ရွက်သွားမှာ ဖြစ်ပါတယ်။
သင်တန်းစင်တာမှ ၂၀၂၁ ခုနှစ်တွင် AI နှင့် Big Data သင်တန်းများစတင်ဖွင့်လှစ်ခဲ့ပြီး ထွန်းသစ်စ IT နည်းပညာသင်တန်းများကို ဆက်လက်မြှင့်တင်ဖွင့်လှစ်သွားမည်ဖြစ်ကာ သင်တန်းစင်တာမှ ၂၀၂၄ ခုနှစ်တွင် သင်တန်းအမှတ်စဉ် ၂၇ အထိ ဖွင့်လှစ်နိုင်ခဲ့ပြီး သင်တန်းဆင်း IT ပညာရှင် ၂,၈၇၃ ဦးအထိမွေးထုတ်နိုင်ခဲ့ကာ အလုပ်အကိုင်ရရှိမှုတွင်လည်း ၉၈ ရာခိုင်နှုန်းရှိခဲ့ပါတယ်။
