ဂန္တဝင်လက်ဝှေ့ကျော် ဦးသမန်းကျား၏ ကျန်ရစ်သူမိသားစုထံ လက်ဝှေ့အဖွဲ့ချုပ်က သွားရောက်တွေ့ဆုံကူညီ
ကွယ်လွန်သွားသည့် ရိုးရာလက်ဝှေ့ကျော် သမန်းကျား၏ နာရေးအတွက် မြန်မာနိုင်ငံလက်ဝှေ့အဖွဲ့ချုပ်က ကျန်ရစ်သူမိသားစုများအား ယနေ့ ဇန်နဝါရီ (၂၃)ရက်တွင် သွားရောက်တွေ့ဆုံကူညီမှုများပေးအပ်ခဲ့ကြောင်း သိရသည်။
ဂန္တဝင်ကြီး ဦးသမန်းကျား၏ နာရေးအတွက် ပုဗ္ဗာရုံဆရာတော် ဦးဇင်းနေမိုး ၊ ရိုးရာလက်ဝှေ့အဖွဲ့ချုပ် တာဝန်ရှိသူများနှင့်အတူ ရိုးရာလောကသားများမှသွားရောက်တွေ့ဆုံကာ လိုအပ်သည်များကို ကူညီပေးခဲ့ကြခြင်းဖြစ်ကြောင်း သိရသည်။
ရိုးရာလက်ဝှေ့ကျော် ဦးစောလှမင်း (ခ) သမန်းကျားသည် ဇန်နဝါရီ (၂၁)ရက် နံနက် (၈)နာရီအချိန်တွင် ရန်ကုန်တိုင်း တိုက်ကြီးမြို့၊ တစ်မိုင်ဝန်ထမ်းရပ်ကွက် နေအိမ်၌ ကွယ်လွန်ခဲ့ခြင်းဖြစ်သည်။
ဦးစောလှမင်း (ခ) သမန်းကျားသည် ကွယ်လွန်ချိန်တွင် အသက် (၇၃)နှစ်အရွယ်ရှိပြီဖြစ်ပြီး ဘားအံမြို့နယ် ၊ ရွှေတောရွာ ဇာတိမွေးဖွားသူတစ်ဦးဖြစ်ကြောင်း သိရသည်။
