ဗြိတိန်ကို စွန့်ခွာပြီး ဒူဘိုင်းတွင် အခြေချရတဲ့ အကြောင်းရင်းကို ဖွင့်ချကာ အစိုးရကို ဝေဖန်လာတဲ့ ရီယိုဖာဒီနန်
====================

ရီယိုဖာဒီနန်ဟာ ဗြိတိန်ကို စွန့်ခွာပြီး ဒူဘိုင်းတွင် အခြေချရတဲ့ အကြောင်းရင်းအား ဖွင့်ဟကာ ဗြိတိန်အစိုးရကာ ဝေဖန်လာပါတယ်။
ယူနိုက်တက်နှင့် အင်္ဂလန်ဂန္ထဝင်နောက်ခံလူဟာ ဩဂုတ်လတုန်းက အင်္ဂလန်ကို စွန့်ခွာပြီး အရှေ့အလယ်ပိုင်းတွင် အခြေချလာပါတယ်။
ဖာဒီနန်ဟာ မေလတုန်းက TNT Sports မှ နုတ်ထွက်လိုက်ပြီးနောက် မိသားစုအား ခေါ်ဆောင်ကာ ဒူဘိုင်းတွင် အခြေချလာပါတယ်။
အသက် ၄၆ နှစ်ရှိ ဖာဒီနန်ဟာ ဇနီးသည် အသက် ၃၃ နှစ်ရှိ ကိတ်၊ ကလေးများဖြစ်ကြတဲ့ အသက် ၄ နှစ်ရှိ ခရီး၊ အသက် ၂ နှစ်ရှိ ရှဲတို့နှင့်အတူ နိုင်ငံခြားတွင် ပျော်ရွှင်စွာ ဘဝသစ် စတင်နေပါတယ်။
ဖာဒီနန်ဟာ ကွယ်လွန်သွားရှာဖြစ်ပြီဖြစ်တဲ့ ဇနီးဟောင်းရီဘက်ကာအယ်လစ်ဆင်နှင့်လည်း အသက် ၁၉ နှစ် အရွယ်ရှိ လိုရန့်ဇ်၊ အသက် ၁၇ နှစ်အရွယ်ရှိ တာတီ၊ အသက် ၁၄ နှစ်အရွယ်ရှိ တီယာတို့အား ပိုင်ဆိုင်ထားပါသေးတယ်။
ရီယိုဖာဒီနန်နှင့် ကိတ်တို့ဟာ နှစ်ပေါင်း ပေါင် ၅၇ သန်း ကြွယ်ဝချမ်းသာသူများလည်း ဖြစ်ပါတယ်။
ပရီးမီးယားလိဂ်ဖလား ၆ ကြိမ် ဆွတ်ခူးခဲ့တဲ့ ရီယိုဖာဒီနန်က ကီယာစတာမာရဲ့ လေဘာအစိုးရ လက်ထက်တွင် အခွန် ပေါင် ၄၀ ဘီလီယံအထိ တိုးမြှင့်ကောက်ခံလာမှုနှင့်အတူ အင်္ဂလန်ကို စွန့်ခွာရန် ဆုံးဖြတ်ချက်ချလာတာလည်း ဖြစ်ပါတယ်။
ဒါ့အပြင် ရီယိုဖာဒီနန်က အစိုးရဘက်က အခွန်တိုးမြှင့်ကောက်ခံပေမယ့်လည်း အမျိုးသားကျန်းမာရေးဝန်ဆောင်မှုဌာနက လုံလောက်တဲ့ ကျန်းမာရေး စောင့်ရှောက်မှု မပြုလပ်မှုကိုလည်း ဝေဖန်သွားပါတယ်။
ဖာဒီနန်က "ဥပမာ ပြောရရင် ကျန်းမာရေးစောင့်ရှောက်မှုကသာ အရမ်းကောင်းနေမယ်ဆိုရင် လူတွေက အခွန် ဘယ်လောက်ပဲ ပေးရပါစေ ဂရုစိုက်နေမှာ မဟုတ်ဘူး။ ဒါပေမယ့် နိုင်ငံက အစိတ်အပိုင်းတွေ ပြိုလဲပြီး မှားယွင်းနေတဲ့အချိန်မှာ အခွန်ဆောင်ပေးနေရတယ်။ တကယ်ကော အခွန်တွေက ဒီမှာ နေထိုင်တဲ့ ပြည်သူ့အကျိုးပြုမယ့်အရာတွေဆီသို့ သွားနေတာလား။ မေးခွန်းကြီးအတွက် အဖြေလိုအပ်တယ်။ အဖြေဘယ်လို ဖြစ်ရမယ်ဆိုတာ ကျွန်တော်တို့တေ အများကြီး သိကြတယ်"လို့ ဆိုသွားပါတယ်။
ဒါ့အပြင် ဖာဒီနန်က ဒူဘိုင်းတွင် အခြေချ နေထိုင်ပြီး လအနည်းငယ်အကြာမှာပင် မိသားစုဘဝအတွက် အကျိုးကျေးဇူးရှိနေပြီ ဖြစ်ကြောင်း ဆိုသွားပါတယ်။
ဆက်လက်ပြီး ၎င်းက "အရင်ကထက် မိသားစုက ကျွန်တော့်ကို တွေ့ရတယ်။ သူတို့နဲ့ တကယ့်အချိန်ကောင်းတွေ ကုန်ဆုံးရတယ်။ ဒါက ကျွန်တော့်အတွက် တကယ့်ကို ကြီးမားတဲ့အရာပါ။ အင်္ဂလန်ကို ချစ်တယ်။ ကျုပ်လည်း မျိုးချစ်တစ်ယောက်ပါ။ ဒါပေမယ့် ခရီးသစ်၊ စာမျက်နှာသစ်၊ ကွဲပြားတဲ့အရာပါ။ ဘဝကို ပြန်လည်လန်းဆန်းလာစေတယ်လို့ ထင်တယ်။ ဒူဘိုင်းမှာ သူတို့(မိသားစု)က အဖိုးတန်လာတယ်လို့ ခံစားလာရတယ်။ သူတို့ နေထိုင်တဲ့ ဘဝမှာ ပျော်နေကြတယ်။ ကလေးတွေအတွက် ကောင်းမွန်တဲ့ စွမ်းအင်နဲ့ တက်ကြွစေတယ်။ လူနေမှုဘဝစတိုင်၊ လုံခြုံရေး၊ ရာသီဥတု။ တကယ့်ကို ဘဝသစ်ပါ"လို့ ပြောကြားသွားပါတယ်။

မော်ဂန်ဂစ်ဘ်ဝှိုက်ကို မာရီနာကစ် သေနတ်ဖြင့် ချိန်ထားတဲ့ ပုံပါ ပိုစတာကြောင့် အက်ဖ်အေရဲ့ စွဲချက်တင်ခြင်းခံလာရတဲ့ ခရစ္စတယ်ပဲလေ့စ်
===================

အက်ဖ်အေဟာ အလယ်တန်းကစားသမားမော်ဂန်ဂစ်ဘ်ဝှိုက်ကို ဖောရက်စ်ပိုင်ရှင်မာရီနာကစ်က သေနတ်ဖြင့် ခေါင်းကို ချိန်ထားတဲ့ ပုံပါ ပိုစတာအား ပရိသတ်များ လွှင့်ခဲ့မှုအတွက် ခရစ္စတယ်ပဲလေ့စ်ကို စွဲချက်တင်လာပါတယ်။
ဩဂုတ်လတုန်းက Selhurst Park တွင် တစ်ဂိုးစီသရေကျတဲ့ပွဲတွင် ပဲလေ့စ်ပရိသတ်များ လွှင့်ခဲ့တဲ့ ပိုစတာထဲတွင် "Mr Marinakis is not involved in blackmail, match-fixing, drug trafficking or corruption." ဆိုတဲ့စာသားကိုလည်း ရေးသားထားပါသေးတယ်။

မာရီနာကစ်ကမူ ယင်းစွပ်စွဲမှုအားလုံးကို ငြင်းဆိုထားပါတယ်။

ယခုအခါ အက်ဖ်အေက ခရစ္စတယ်ပဲလေ့စ်ကို ပရိသတ်များအား တားဆီးမှု ပြုလုပ်နိုင်ခြင်း မရှိမှုအတွက် စွဲချက်တင်လာတာလည်း ဖြစ်ပါတယ်။

မော်ဂန်ဂစ်ဘ်ဝှိုက်ဟာ နွေရာသီတုန်းက စာချုပ်ပါအချက်အတိုင်း စပါးစ်ဘက်က ပေါင်သန်း ၆၀ ဖြင့် ကမ်းလှမ်းလာမှုကြောင့် ဖောရက်စ်မှ ထွက်ခွာရန် နီးစပ်ခဲ့ပါတယ်။

ဒါပေမယ့် သူဟာ အပြောင်းအရွှေ့မလုပ်ဘဲ ဖောရက်စ်နှင့် စာချုပ်သစ်ချုပ်ဆိုခဲ့ပါတယ်။

ပဲလေ့စ်ပရိသတ်များဟာ ပိုင်ရှင်စည်းမျဉ်းချိုးဖောက်မှုကြောင့် ယူရိုပါလိဂ်မှ ကွန်ဖရင့်လိဂ်သို့ တန်းဆင်းခဲ့ရပြီး ဖောရက်စ်က ယူရိုပါလိဂ်ဝင်ခွင့်နေရာကို ရယူခဲ့မှုအပေါ် မကျေမနပ်ဖြစ်ကာ ယင်းသို့ ပိုင်ရှင်အား ပစ်မှတ်ထားလာခဲ့တာလည်း ဖြစ်ပါတယ်။
ပဲလေ့စ်အနေဖြင့် လာမယ့် ကြာသပတေးနေ့ နောက်ဆုံးထားကာ စွဲချက်အား တုံ့ပြန်ရပါမယ်။

သားဖြစ်သူထက် ၅ နှစ်သာ ပိုကြီးတဲ့ ချစ်သူနှင့် စေ့စပ်လာတဲ့ လာမိန်းယာမဲလ်ရဲ့ ဖခင်
====================

ဘာစီလိုနာစူပါစတားလာမိန်းယာမဲလ်ရဲ့ ဖခင်ဟာ သားဖြစ်သူထက် ၅ နှစ်သာ ပိုကြီးတဲ့ ချစ်သူကောင်မလေးနှင့် စေ့စပ်လာကြောင်း သိရပါတယ်။

အသက် ၁၈ နှစ်ရှိ ဘာစီလိုနာစတားလာမိန်းယာမဲလ်မှာ ဖခင်ရဲ့ ချစ်သူထက် ၂ နှစ်သာ ကြီးတဲ့ ချစ်သူနှင့် လမ်းခွဲလိုက်ပြီးနောက် ယခုသတင်းထွက်လာတာလည်း ဖြစ်ပါတယ်။

မူနာနာဇရာဝီဟာ လွန်ခဲ့တဲ့ လအနည်းငယ်ခန့်ကတည်းက သူ့ထက် ၁၂ နှစ်ငယ်တဲ့ အသက် ၂၃ နှစ်ရှိ ခရစ္စတီနာနှင့် ချစ်ကြိုက်လာခဲ့တာပါ။

အသက် ၃၅ နှစ်ရှိ နာဇရာဝီဟာ သူ့ချစ်သူနှင့် စေ့စပ်လိုက်တဲ့သတင်းက အုတ်အော်သောင်းနင်းဖြစ်လာမှာ စိုးရိမ်မှုနှင့်အတူ ယင်းသတင်းကို ထိန်ချန်လာပါတယ်။

သူဟာ ဝရံတာတွင် ခရစ္စတီနာနှင့် တွဲ ရိုက်ကူးထားတဲ့ ဓာတ်ပုံအား အင်စတာဂရမ်တွင် တင်လာရာမှာ အနက်ရောင်အသည်းပုံနှင့် စိန်လက်စွပ် Emoji ကို အသုံးပြုသွားပါတယ်။

နာဇရာဝီနှင့် ခရစ္စတီနာတို့ ဘယ်အချိန်မှာ တွေ့ဆုံ ချစ်ကြိုက်လာခဲ့ကြသလဲဆိုတာကိုတော့ မသိရသေးပါဘူး။

တဖက်တွင် လာမိန်းယာမဲလ်ဟာ အာဂျင်တီးနားမော်ဒယ် နစ်ကီနစ်ကိုးလ်နှင့် လအတန်ကြာ ချစ်ကြိုက်လာပြီးနောက် လမ်းခွဲလိုက်ကြပြီ ဖြစ်ပါတယ်။

နာဇရာဝီဟာ ၂၀၁၀ ခုနှစ်တုန်းက လာမိန်းယာမဲလ်ရဲ့ မိခင် ရှီလာအီဘာနာနှင့် လမ်းခွဲခဲ့ပါတယ်။ ၎င်းတို့ ဘယ်အချိန်မှာ လက်ထပ်ခဲ့သလဲ မသိရပေမယ့် လာမိန်းယာမဲလ် ၃ နှစ်သား အရွယ်တွင် လမ်းခွဲခဲ့တာပါ။

ချန်ပီယံလိဂ်ပြိုင်ပွဲစနစ်သစ်အား ခိုးကူးမှုအတွက် ပေါင် ၁၈ သန်း နစ်နာကြေးပေးလာရဖို့ ရှိနေတဲ့ ယူအီးအက်ဖ်အေ
======================

ယူအီးအက်ဖ်အေဟာ ချန်ပီယံလိဂ်ပြိုင်ပွဲစနစ်သစ်အား ခိုးယူမှုအတွက် ပေါင် ၁၈ သန်းတန်ကြေးရှိ တရားစွဲဆိုမှုနှင့် ရင်ဆိုင်နေရပါတယ်။

ယူအီးအက်ဖ်အေဟာ ပြီးခဲ့တဲ့ရာသီမှ စတင်ကာ ချန်ပီယံလိဂ်အား လိဂ်စနစ်ဖြင့် စတင်ကျင်းပလာခဲ့တာပါ။

စနစ်သစ်ကြောင့် ပြိုင်ပွဲဝင်အသင်း ၃၆ သင်းတို့ဟာ လိဂ်အဆင့်အဖြစ် အနည်းဆုံး ၈ ပွဲကစားရပါတယ်။

ဒါပေမယ့် ယခုအခါမှာတော့ ချီလီအားကစားအကြံပေးကုမ္ပဏီတစ်ခုက ယူအီးအက်ဖ်အေအား ပြိုင်ပွဲစနစ်အား ခိုးကူးမှုအတွက် တရားစွဲလာပါတယ်။

ယခုတရားစွဲမှုကို လီယန်ဒရိုရှာရာဦးဆောင်တဲ့ MatchVision က တရားစွဲလာတာလည်း ဖြစ်ပါတယ်။

၎င်းတို့ကုမ္ပဏီရဲ့ အမှုဆောင်ချုပ်ဟာ ၂၀၁၃ ခုနှစ်တုန်းက ပြိုင်ပွဲစနစ်အား ယူအီးအက်ဖ်အေကို တင်ပြခဲ့ဖူးပါတယ်။

တဖက်တွင် ရှာရာဟာ ယင်းပြိုင်ပွဲစနစ်မူပိုင်ခွင့်အား ၂၀၀၆ ခုနှစ်တွင် ရယူထားခဲ့ပါတယ်။

ဒါကြောင့်လည်း သူဟာ ယူအီးအက်ဖ်အေမှာ မူပိုင်ခွင့် ချိုးဖောက်တယ်ဆိုပြီး တရားစွဲဆိုလာတာလည်း ဖြစ်ပါတယ်။

ယူအီးအက်ဖ်အေဟာ ရှာရာရဲ့ တရားစွဲဆိုမှုအား သုံးပတ်အတွင်းတွင် ပြန်လည်ချေပရပါမယ်။ လက်ရှိအချိန်တွင် ယူအီးအက်ဖ်အေဘက်က တစုံတရာ မှတ်ချက်ပြုထားခြင်း မရှိသေးပါဘူး။

နူးကမ့်ကွင်း လုပ်ငန်းခွင်တွင် ကူးစက်ရောဂါပိုးရှိသူအား တွေ့ရှိပြီးနောက် အကြီးအကျယ်ပြန့်နှံ့ကူးစက်နေမှာ စိုးရိမ်နေရတဲ့ ဘာစီလိုနာ
=======================

ဘာစီလိုနာဟာ နူးကမ့်ကွင်းသစ်တည်ဆောက်ရေး လုပ်ငန်းခွင်အတွင်းမှ ဝန်ထမ်းတစ်ဦးတွင် တီဘီရောဂါပိုး ရှိကြောင်း တွေ့ရှိရပြီးနောက် လုပ်ငန်းခွင်မှ ဝန်ထမ်းများအား အကြီးအကျယ် ပျံ့နှံ့ကူးစက်လာမှာ စိုးရိမ်နေရပါတယ်။

ဘာစီလိုနာဟာ ကွင်းဆောက်လုပ်ရေးလုပ်ငန်းမှ ဝန်ထမ်းတစ်ဦးတွင် တီဘီပိုးရှိကြောင်း စစ်ဆေးတွေ့ရှိပြီးနောက် စုံစမ်းစစ်ဆေးမှုများ ပြုလုပ်နေပြီလည်း ဖြစ်ပါတယ်။

Barcelona Public Health Agency (ASP က နူးကမ့်လုပ်ငန်းခွင်မှ ဝန်ထမ်းတစ်ဦးတွင် ရောဂါပိုးတွေ့ရှိထားကြောင်း အတည်ပြုထားပါတယ်။

ယင်းသို့ တီဘီရောဂါပိုးကူးစက်ခံထားရသူ တစ်ဦးအား တွေ့ရှိရပြီးနောက် အခြားလုပ်ဖော်ကိုင်ဖက် ၂၃ ဦးတို့ကိုလည်း စစ်ဆေးမှု ပြုလုပ်နေပါတယ်။

လက်ရှိအချိန်တွင် ဆေးစစ်ဆေးမှု ရလဒ်ကို စောင့်ဆိုင်းနေတုန်းပါ။ တကယ်လို့များ နောက်ထပ် ကူးစက်ခံထားရသူ ၂ ဦးကိုသာ ထပ်မံ တွေ့ရှိပါက Barcelona Public Health Agency (ASP က ရောဂါကူးစက်ပျံ့နှံ့နေပြီလို့ ကြေညာလာမှာလည်း ဖြစ်ပါတယ်။

တီဘီရောဂါမှာ အဆုတ်ကို ထိခိုက်စေလေ့ရှိပြီး ပိုးရှိသူမှာ ပြင်းထန်သော ချောင်းဆိုးခြင်း၊ ဖျားနာခြင်းနှင့် အလွန်အမင်းမောပန်းနွမ်းနယ်ခြင်းတို့ ဖြစ်လေ့ရှိပါတယ်။

ရာသီအကုန်တွင် ဘာစီလိုနာမှ ထွက်ခွာလာတော့မယ့် ဟန်ဆီဖလစ်
======================

ဟန်ဆီဖလစ်ဟာ ရာသီအကုန်တွင် ဘာစီလိုနာမှ ထွက်ခွာလာမယ်လို့ သူ့နည်းပြအဖွဲ့ဝင်များအား အသိပေးထားကြောင်း သိရပါတယ်။

ဟန်ဆီဖလစ်ဟာ ကစားသမားများရဲ့ အပြုအမူများအပေါ် အကြီးအကျယ် စိတ်ပျက်နေတဲ့အပြင် ဘုတ်အဖွဲ့ရဲ့ ထောက်ခံအားပေးမှုလည်း မရရှိမှုနှင့်အတူ ထွက်ခွာရန် စီစဉ်လာတာလည်း ဖြစ်ပါတယ်။

ABC ရဲ့ ဖော်ပြလာမှုအရ ဟန်ဆီဖလစ်ဟာ ရာသီအကုန်တွင် ထွက်ခွာလာတော့မှာ ဖြစ်ကြောင်း သူ့ နည်းပြအဖွဲ့ဝင်ကို သီးသန့်အသိပေးထားကြောင်း သိရပါတယ်။ ဂျာမန်လူမျိုးနည်းပြဟာ အသင်းတွင် ကစဉ့်ကလျား ဖြစ်နေမှုများအပေါ်တွင် အကြီးအကျယ်စိတ်ပျက်နေတာလည်း ဖြစ်ပါတယ်။

ဟန်ဆီဖလစ်ဟာ ဘာစီလိနာသို့ သုံးနှစ်စီမံကိန်းဖြင့် ရောက်လာခဲ့တာ ဖြစ်ပြီး ကစားသမားများမှာ ပရော်ဖက်ရှင်နယ်မပီသခြင်း၊ စည်းလုံးခြင်း မရှိမှုတို့အပေါ်တွင် စိတ်ပျက်နေပါတယ်။

ဟန်ဆီဖလစ်ဟာ ဘာစီလိုနာတို့ ရလဒ်ကောင်း ရယူနေနိုင်သော်လည်း ကစားသမားများရဲ့ အာရုံစိုက်မှု အားနည်းမှု၊ တကိုယ်ကောင်းဆန်မှုများအပေါ်တွင် စိတ်ပျက်နေပါတယ်။

စည်းကမ်းကြီးတယ်လို့ နာမည်ကြီးတဲ့ ဂျာမနီနှင့် ဘိုင်ယန်မြူးနစ်နည်းပြဟောင်းဟာ ကစားသမားများမှာ အသင်းရဲ့ ရည်မှန်းချက်ထက် တကိုယ်တော် အောင်မြင်ရေးအပေါ်တွင်သာ အာရုံစိုက်မှုအပေါ် စိတ်ပျက်နေတာပါ။
သူဟာ ပြီးခဲ့တဲ့လများအတွင်းတွင် အသင်းကို ပြောင်းလဲရေးအတွက် ကြိုးပမ်းခဲ့ပေမယ့်လည်း မအောင်မြင်လာမှုနှင့် အတူ စိတ်ပျက်နေခဲ့တာပါ။

ဟန်ဆီဖလစ် စိတ်ပျက်ရတဲ့အကြောင်းရင်းများထဲတွင် အသက် ၁၈ နှစ်ရှိ လာမိန်းယာမဲလ်ရဲ့ အပြုအမူအနေအထိုင်လည်း ပါဝင်နေပါတယ်။ ကလပ်ဘက်က လာမိန်းယာမဲလ်အား ပြန်လည်အားပြည့်လာရေး လုပ်ငန်းစဉ်များကို မလုပ်စေဘဲ ခရီးထွက်ခွင့်ပေးနေမှုများအပေါ်တွင် ဖလစ် စိတ်ပျက်နေတာပါ။

လာမိန်းယာမဲလ်ဟာ ရီးရဲလ်မက်ဒရစ်အား ရှုံးနိမ့်ပြီးနောက် ကစားဖော်များနင့်အတူ ပြန်လာခြင်း မပြုဘဲ မီလန်သို့ ကြော်ငြာရိုက်ကူးရန် ခရီးထွက်ခဲ့ပါတယ်။

ဖလစ်ဟာ သူ့ စိတ်ပျက်နေတဲ့ အဖြစ်အပျက်များအား ကလပ်ဥက္ကဌလာပေါ်တာရဲ့ လူရင်းများဖြစ်ကြတဲ့ အလီဂျန်ဒရိုအီချီဗာရီရာနှင့် ဂါဘရီရယ်မာတီနက်ဇ်တို့အား အသိပေးခဲ့ပေမယ့် ၎င်းတို့က ပြဿနာများကို ဖြေရှင်းမယ့်အစား ၎င်းကိုသာ ဖြောင်းဖျနေမှုများအပေါ်တွင်လည်း စိတ်ပျက်နေပါတယ်။

ဖလစ်ဟာ အသင်းအတွက် ဖြစ်ပျက်နေတဲ့ အဖြစ်အပျက်များအပေါ်တွင် စိတ်ပျက်ပေမယ့်လည်း ဥက္ကဌလာပေါ်တာ၊ အားကစားဒါရိုက်တာဒေကိုတို့နှင့်မူ ကောင်းမွန်တဲ့ ဆက်ဆံရေး ရှိနေတုန်း ဖြစ်ပါတယ်။

အင်္ဂလန်ကို အနိုင်ယူကာ ပေါ်တူဂီယူ-၁၆ နှင့်အတူ Federation Cup ဖလားဆွတ်ခူးလာတဲ့ ခရစ္စတီယာနိုဂျူနီယာ
=======================

ခရစ္စတီယာနိုဂျူနီယာဟာ တူရကီတွင် ကစားတဲ့ ဗိုလ်လုပွဲတွင် အင်္ဂလန်ကို အနိုင်ယူရရှိအောင် ကူညီကာ ပေါ်တူဂီယူ-၁၆ အသင်းနှင့်အတူ Federation Cup ဖလားဆွတ်ခူးလာပါတယ်။

တူရကီတွင် ကစားတဲ့ ယင်းဗိုလ်လုပွဲကို ခရစ္စတီယာနိုရော်နယ်ဒိုရဲ့ ချစ်သူဂျော်ဂျီနာရိုဒရီဂွက်ဇ်လည်း တက်ရောက်အားပေးခဲ့ပါတယ်။ ပွဲအပြီးတွင် ခရစ္စတီယာနိုဂျူနီယာဟာ ဂျော်ဂျီနာနှင့်အတူ Federation Cup ကိုင်ကာ ဂုဏ်ယူစွာ ဓာတ်ပုံရိုက်ကူးခဲ့ပါတယ်။

ခရစ္စတီယာနိုဂျူနီယာဟာ ပြီးခဲ့တဲ့အပတ်မှ စတင်ကာ တူရကီတွင် ကျင်းပလာတဲ့ Federation Cup ဖလားမှာ ပေါ်တူဂီယူ-၁၆ အတွက် ပထမဆုံးကစားခဲ့တာ ဖြစ်ပြီး ဝေးလ်ကို ၃-၀ ဖြင့် အနိုင်ရတဲ့ပွဲတွင် ပထမဆုံးနိုင်ငံတကာဂိုးသွင်းယူခဲ့ပါတယ်။

သူဟာ အင်္ဂလန်ကို ၂-၁ ဖြင့် အနိုင်ရတဲ့ ဗိုလ်လုပွဲတွင် ဒုတိယပိုင်းမှာ လူစားဝင်ရောက်ကာ မိနစ်အနည်းငယ် ကစားခဲ့ပါတယ်။
အင်္ဂလန်အား အနိုင်ရတဲ့ ဗိုလ်လုပွဲတွင် ပေါ်တူဂီယူ-၁၆ အတွက် နှစ်ဂိုးလုံးကို ဘရာဂါအကယ်ဒမီကစားသမားရာဖေးလ်ကာဘရယ်က သွင်းယူခဲ့ပါတယ်။

ပွဲကို ကိုယ်တိုင်ကိုယ်ကျလာရောက် အားပေးကြည့်ရှုခဲ့တဲ့ ဂျော်ဂျီနာဟာ ပွဲအပြီးတွင် သားဖြစ်သူနှင့် ရိုက်ကူးထားတဲ့ ဓာတ်ပုံကို အင်စတာဂရမ်တွင် "I love being a mom. I am very proud of my big boy." လို့ ရေးသားကာ ပို့စ်တင်သွားပါတယ်။

ခရစ္စတီယာနိုဂျူနီယာဟာ ဖခင်ဖြစ်သူ ကစားခဲ့တဲ့ ကလပ်များဖြစ်ကြတဲ့ ရီးရဲလ်မက်ဒရစ်၊ ဂျူဗင်တပ်၊ ယူနိုက်တက်နှင့် လက်ရှိ Al Nassr အကယ်ဒမီတို့တွင် ကစားခဲ့ပါတယ်။

သူဟာ ယခုနှစ် အစောပိုင်းတုန်းကလည်း ပေါ်တူဂီယူ-၁၅ နှင့်အတူ ခရိုအေးရှားတွင် ကျင်းပတဲ့ Vlatko Markovic Tournament ဖလား ဆွတ်ခူးခဲ့ပါတယ်။ သူဟာ ဗိုလ်လုပွဲတွင် ခရိုအေးရှားအား ၃-၂ ဖြင့် အနိုင်ရတဲ့ပွဲတွင် ၂ ဂိုးသွင်းနိုင်ခဲ့ပါတယ်။

လုပ်ခ ကြွေးကျန် ယူရို ၅၅ သန်းရရှိရေး ပီအက်စ်ဂျီကို တရားစွဲဆိုထားမှု ရုံးတက် ရင်ဆိုင်လာမယ့် ကိုင်လီယန်ဘက်ပေး
=======================

ကိုင်လီယန်ဘက်ပေးရဲ့ အသင်းဟောင်း ပီအက်စ်ဂျီကို တရားစွဲဆိုထားမှု မပြီးပြတ်သေးပါဘူး။ ရီးရဲလ်မက်ဒရစ်စူပါစတားဟာ လုပ်ခနှင့် အပိုဆုကြွေးကျန် ယူရို ၅၅ သန်း ရရှိရေးအတွက် နိုဝင်ဘာလ ၁၇ ရက်နေ့တွင် ပဲရစ်အလုပ်သမားတရားရုံးတွင် ထွက်ဆိုရပါမယ်။

ဘက်ပေးဟာ အစောပိုင်းတုန်းက အသင်းဟောင်းပီအက်စ်ဂျီကို စိတ်ပိုင်းဆိုင်ရာနာကျင်အောင် ပြုလုပ်မှုအတွက် တရားစွဲဆိုခဲ့ပေမယ့် ယင်းအမှုကို ပြန်လည်ရုတ်သိမ်းလိုက်ပြီး ဖြစ်ပါတယ်။ ဒါပေမယ့် ပြင်သစ်အသင်းခေါင်းဆောင်ဟာ လုပ်ခနှင့် အပိုဆုကြေးငွေ ကြွေးကျန်များ ရရှိရေးအတွက် ဆက်လက် တိုက်ပွဲဝင်နေတုန်း ဖြစ်ပါတယ်။

ယနေ့တွင် RMC Sport ရဲ့ ဖော်ပြလာမှုအရ ဘက်ပေးနှင့် ပီအက်စ်ဂျီတို့ဟာ ယခုလ နိုဝင်ဘာလ ၁၇ ရက်နေ့တွင် ပဲရစ်အလုပ်သမားတရားရုံးတွင် အမှုရင်ဆိုင်လာရမှာ ဖြစ်ကြောင်း သိရပါတယ်။

ဘက်ပေးက ၂၀၂၄ ခုနှစ်တွင် ကုန်ဆုံးခဲ့တဲ့ စာချုပ်ဟောင်းအတွက် လုပ်ခကြွေးကျန်၊ လက်မှတ်ထိုးကြေးနှင့် ကျင့်ဝတ်လိုက်နာမှုအတွက် ငွေကြေး စုစုပေါင်း ယူရို ၅၅ သန်း ကျန်နေသေးကြောင်း စွပ်စွဲထားပါတယ်။

တဖက်တွင် ပီအက်စ်ဂျီဘက်ကလည်း ၂၀၂၄ ခုနှစ်တွင် အသင်းမှ ထွက်ခွာသွားတဲ့ ဘက်ပေးအတွက် တစုံတရာ ပေးရန် မရှိတော့ကြောင်း ယုံကြည်နေပါတယ်။

လက်ရှိအနေအထားအရ ပီအက်စ်ဂျီနှင် ကစားသမားဟောင်းကိုင်လီယန်ဘက်ပေးတို့အကြား ဆက်ဆံရေးမှာ ပိုမို ဆိုးရွားလာမယ့် အခြေအနေမှာ ရှိနေပြီလည်း ဖြစ်ပါတယ်။

ဘောလုံးသမိုင်းတွင် အကောင်းဆုံးခေါင်းတိုက်ဂိုးအဖြစ် ချီးကျူးခံနေရတဲ့ နယူးကာဆယ်နောက်ခံလူဒန်ဘန်းရဲ့ ခေါင်းတိုက်ဂိုး
========================

ဒန်ဘန်းရဲ့ မနေ့ညတုန်းက ဘီလ်ဘာအိုအား အနိုင်ရတဲ့ ချန်ပီယံလိဂ်ပွဲစဉ်မှ ခေါင်းတိုက်ဂိုးမှာ သမိုင်းတွင် အကောင်းဆုံးခေါင်းတိုက်ဂိုးအဖြစ် တင်စာချီးကျူးခြင်းခံနေရပါတယ်။

နယူးကာဆယ်ဗဟိုနောက်ခံလူဟာ မတ်လတုန်းက သောမတ်စ်တူချယ်လက်အောက်တွင် ပထမဆုံးအင်္ဂလန်ပွဲ ကစားခွင့် ရပြီးနောက် ပရော်ဖက်ရှင်နယ်ကစားသမားဘဝ အကောင်းဆုံးကာလကို ဖြတ်သန်းနေရသူလည်း ဖြစ်ပါတယ်။

အသက် ၃၃ နှစ်ရှိ အရပ်အမောင်းမြင့်မားတဲ့ ဒန်ဘန်းဟာ မနေ့ညတုန်းက ဘီလ်ဘာအိုနှင့်ပွဲတွင် အဝေးထောင့်သို့ စူပါခေါင်းတိုက်ဂိုးသွင်းကာ နယူးကာဆယ်အတွက် ဦးဆောင်ဂိုးသွင်းခဲ့တာလည်း ဖြစ်ပါတယ်။

ပရိသတ်များဟာ ဖရီးကစ်ကနေ ဒန်ဘန်းရဲ့ အဝေးမှ ခေါင်းတိုက်ချက် ဝေ့ဝိုက်ကာ အဝေးထောင့်သို့ ဝင်သွားမှုကြောင့် မင်သက်ခဲ့ရပါတယ်။

ဒန်ဘန်းရဲ့ ဂိုးဟာ ဘောလုံးသမိုင်းတွင် အကောင်းဆုံးခေါင်းတိုက်ဂိုးအဖြစ် အွန်လိုင်းတွင် ချီးကျူးခြင်းခံနေရပါတယ်။
ပရိသတ်တစ်ဦးက "အမိုက်ဆုံးခေါင်းတိုက်ဂိုးကို ဒန်ဘန်း ဘယ်လောက်တောင် သွင်းလိုက်တာလဲ"လို့ ပြောကြားသွားပါတယ်။
တဖက်တွင် ပရိသတ်များဟာ ဒန်ဘန်းရဲ့ ခေါင်းတိုက်ဂိုးအား ရော်ဘင်ဗန်ပါစီရဲ့ ကမ္ဘာ့ဖလားခေါင်းတိုက်ဂိုးနဲ့ နှိုင်းယှဉ်ပြောကြားနေကြပါတယ်။

ပရိသတ်တစ်ဦးက "ဒန်ဘန်းရဲ့ ခေါင်းတိုက်ဂိုးက ဗန်ပါစီရဲ့ ခုန်ပျံခေါင်းတိုက်ဂိုးနဲ့ တစ်တန်းတည်းပဲ။ ဘယ်လောက်တောင် ကောင်းလိုက်သလဲ။ ဝေ့ဝိုက်တိုက်သွားတာ ဘယ်လောက်တောင် အံ့ဩစရာကောင်းလိုက်သလဲ"လို့ ဆိုသွားပါတယ်။

မနေ့ညကပွဲတွင် နယူးကာဆယ်ဟာ မနေ့ညကပွဲတွင် ဂျိုးလင်တန် ဂိုးထပ်မံ သွင်းယူလိုက်မှုကြောင့် ၂-၀ ဖြင့် အနိုင်ရခဲ့ပါတယ်။
ဒန်ဘန်းဟာ ယခုရာသီ ပထမဆုံးဂိုး သွင်းယူခဲ့တာ ဖြစ်ပြီး ၂၀၂၁ ခုနှစ်တွင် ဘရိုက်တန်မှ ပြောင်းလာပြီးနောက် နယူးကာဆယ်အတွက် ၈ ဂိုးမြောက်ဂိုး သွင်းယူခဲ့တာလည်း ဖြစ်ပါတယ်။

ဒန်ဘန်းဟာ လာမယ့်နွေမှာ ၃၄ နှစ်ပြည့်မှာ ဖြစ်ပေမယ့် ကြံ့ခိုင်မှုပိုင်း အကောင်းဆုံး ဖြစ်နေဆဲ ဖြစ်ပြီး ပြီးခဲ့တဲ့ရာသီတုန်းက ပြိုင်ပွဲအရပ်ရပ် ၄၆ ပွဲကစားခဲ့ပါတယ်။

သူဟာ ယခုရာသီ နယူးကာဆယ်ရဲ့ ပီရးမီးယားလိဂ်ပွဲအားလုံး ပွဲထွက်ကစားပြီး ပြိုင်ပွဲအရပ်ရပ် ၁၃ ပွဲကစားထားပြီး ဖြစ်ပါတယ်။

နယူးကာဆယ်ဟာ ဘီလ်ဘာအိုနိုင်ပွဲကြောင့် ချန်ပီယံလိဂ်အမှတ်ပေးဇယားအဆင့် ၆ နေရာသို့ တက်လှမ်းလာပါတယ်။ ဒါပေမယ့် ၎င်းတို့ဟာ ပရီးမီးယားလိဂ်မှာတော့ အဆင့် ၁၃ နေရာမှာ ရပ်တည်နေပါတယ်။

အတ္တလန္တာနိုင်ပွဲတွင် လူစားလဲခံရပြီးနောက် နည်းပြနှင့် ပြဿနာတက်ခဲ့တဲ့ အဒီမိုလာလုပ်ခ်မန်း
===================

အဒီမိုလာလုပ်ခ်မန်းဟာ ဗုဒ္ဓဟူးနေ့ညတုန်းက ချန်ပီယံလိဂ်ပွဲစဉ်တွင် လူစားလဲလှယ်ခြင်းခံရပြီးနောက် အတ္တလန္တာနည်းပြအိုင်ဗန်ဂျူရစ်နှင့် ပြဿနာတက်ခဲ့ပါတယ်။

အဲဗာတန်တိုက်စစ်မှူးဟောင်းဟာ မာဆေးကို ၁-၀ ဂိုးဖြင့် အနိုင်ရတဲ့ ယင်းပွဲစဉ်အတွက် ပွဲနှောင်းပိုင်းမှာ လူစားလဲလှယ်ခြင်းခံခဲ့ရပါတယ်။

တောင်ပံကစားသမားဟာ ပွဲချိန် ၇၅ မိနစ်တွင် လူစားလဲလှယ်ခြင်းခံရပြီးနောက် ကွင်းဘေးစည်းတွင် လမ်းလျှောက်နေစဉ် ဆောက်သမ်တန်နည်းပြဟောင်းအား တစုံတခု ပြောကြားခဲ့ပါတယ်။

ချက်ချင်းဆိုသလိုဘဲ အိုင်ဗန်ဂျူရစ်ဟာ အကြီးအကျယ်ဒေါသထွက်ကာ လုပ်ခ်မန်းရဲ့ လက်မောင်းအား ဖမ်းဆုပ်ခဲ့ပါတယ်။
လုပ်ခ်မန်းဟာ ဂျူရစ်ရဲ့ တုံ့ပြန်မှုကြောင့် အကြီးအကျယ်တုန်လှုပ်နေတာ တွေ့ရပြီး အခြားနည်းပြအဖွဲ့ဝင်များ လာရောက် ဖြေဖြန်ခဲ့ရပါတယ်။

နည်းပြအဖွဲ့ဝင်တစ်ဦးက ဂျူရစ်အား ဆွဲထားချိန်တွင် အခြားနည်းပြတစ်ဦးကလည်း နည်းပြကို ပြန်လည်တုံ့ပြန်ရန် ကြိုးစားတဲ့ လုပ်ခ်မန်းအား တားဆီးခဲ့တာ တွေ့ရပါတယ်။

ယင်းအဖြစ်အပျက် ဖြစ်ချိန်တွင် ပွဲမှာ ဂိုးမရှိသရေကျနေပြီး လုပ်ခ်မန်းကို ယူနပ်စ်မူဆာနှင့် လူစားလဲခဲ့တာပါ။

ယင်းနောက် ၈၉ မိနစ်မှာတော့ ဆာမာဇစ်က ပြင်သစ်မြေတွင် အတ္တလန္တာအတွက် တစ်လုံးတည်းသော အနိုင်ဂိုးကို သွင်းယူခဲ့ပါတယ်။

လုပ်ခ်မန်းဟာ ယခုနှစ်အတွင်းတွင် အတ္တလန္တာတွင် ပြဿနာများစွာ ဖြစ်ပျက်ထားသူ ဖြစ်ပါတယ်။

သူဟာ ဖေဖော်ဝါရီလတုန်းက ကလပ်ဘရုဂျက်အား ရှုံးနိမ့်တဲ့ ချန်ပီယံလိဂ်ပွဲတွင် ပင်နယ်တီလွဲပြီးနောက် သူ့ကို အဆိုးရွားဆုံးပင်နယ်တီကန်သူအဖြစ် သမုတ်ခဲ့တဲ့ နည်းပြဂီယန်ပီရိုဂက်စ်ပါရီနီအား မလေးမစားပြောဆိုသူအဖြစ် တုံ့ပြန်ခဲ့ပါတယ်။

ယင်းနောက် သူဟာ နွေရာသီတုန်းကလည်း အင်တာမီလန်မှ ပေါင် ၃၂ သန်းဖြင့် ကမ်းလှမ်းမှုအား ကလပ်ဘက်က ပယ်ချလာပြီးနောက် ကလပ်ကို ကတိချိုးဖောက်တယ်ဆိုပြီး လူသိရှင်ကြား ဝေဖန်ခဲ့ပါတယ်။