ဒေသတွင်းနိုင်ငံများ၌ မျောက်ကျောက်ရောဂါဖြစ်ပွားသူတွေ့ရှိသဖြင့် သတိပြုရန် ပညာရှင်များသတိပေး
ရွှေနွယ်
မဇ္ဈိမ။ ။ဒေသတွင်းနိုင်ငံအချို့တွင် မျောက်ကျောက်ရောဂါဖြစ်ပွားသူတွေ့ရှိခဲ့၍ မြန်မာလူထုအနေဖြင့် ရောဂါလက္ခဏာများကို သတိပြုကြရန်လိုအပ်ကြောင်း ကျန်းမာရေးပညာရှင်များက သတိပေးစကားပြော ဆိုသည်။
စစ်ကောင်စီလက်အောက်ခံ ကျန်းမာရေးဝန်ကြီးဌာနကလည်း နိုင်ငံဝင်ထွက်ပေါက်များဖြစ်သော လေ ဆိပ်နှင့် နယ်စပ်ဂိတ်များ၌ ရောဂါစောင့်ကြပ်ကြည့်ရှုမှုများကို နှီးနွယ်ဝန်ကြီးဌာနများနှင့်ပူးပေါင်းဆောင် ရွက်ရန် ယမန်နေ့က ထုတ်ပြန်ထားသည်။
မျောက်ကျောက်ရောဂါသည် ကျောက်ကြီးရောဂါဖြစ်ပွားစေသည့်ဗိုင်းရပ်စ်နှင့် မျိုးရင်းတူသောဗိုင်းရပ်စ် အမျိုးအစားဖြစ်ကာ ကူးစက်ရောဂါတမျိုးဖြစ်သည်။ မျောက်ကျောက်ရောဂါသည် လူမှလူသို့ ကူးစက် သကဲ့သို့ တိရစ္ဆာန်မှတဆင့် လူသို့လည်း ကူးစက်တတ်သည်။ မျောက်ကျောက်ရောဂါကို ၁၉၇၀ ခုနှစ်တွင် လူသားများထံကူးစက်မှုကို စတင်တွေ့ရှိခဲ့ရခြင်းဖြစ်ကြောင်း Hello ဆရာဝန်၏ မျောက်ကျောက်ရောဂါ အကြောင်း ရေးသားဖော်ပြထားသည့်ဆောင်းပါးက ဆိုသည်။
ယခု ၂၀၂၄ ခုနှစ်အတွင်း ကွန်ဂိုဒီမိုကရက်တစ်နိုင်ငံနှင့် အာဖရိကတိုက်ရှိနိုင်ငံများ၌ မျောက်ကျောက် ရောဂါကူးစက်ဖြစ်ပွားမှု အရှိန်မြင့်လာခဲ့ပြီး ကွန်ဂိုတွင် မျိုးကွဲသစ်တခု လျင်မြန်စွာကူးစက်နေကာ နယ်စပ် ဖြတ်ကျော်ပျံ့ပွားနေခြင်းဖြစ်ကြောင်း စစ်ကောင်စီကျန်းမာရေးဌာနထုတ်ပြန်ချက်၌ ဖော်ပြသည်။ ကမ္ဘာ့ ကျန်းမာရေးအဖွဲ့(WHO)ကလည်း ဩဂုတ်လ ၁၄ ရက်နေ့တွင် မျောက်ကျောက်ရောဂါကို နိုင်ငံတကာ ပြည်သူ့ကျန်းမာရေး အရေးပေါ်အခြေအနေအဖြစ် ကြေညာခဲ့သည်။
ကွန်ဂိုနိုင်ငံတွင်တွေ့ရှိနေရသည့်မျောက်ကျောက်ရောဂါသည် ယခင်မျိုးကွဲများနှင့်ကွဲပြားကာ ကူးစက်နှုန်း ပိုမြင့်မားသည့် ဗိုင်းရပ်စ်မျိုးကွဲ Clade 1b ဖြစ်ပြီး သေဆုံးမှုနှုန်း ၃ ဒသမ ၆ ရာခိုင်နှုန်း ပိုမြင့်ကြောင်း WHO ကထုတ်ပြန်ထားသည်။ ကွန်ဂို၌ ၂၀၂၄ ခုနှစ်အတွင်း မျောက်ကျောက်ရောဂါကူးစက်သူ လူနာ ၁၅,၀၀၀ ကျော်ရှိပြီး ယင်းအနက်မှ လူနာ ၅၀၀ မှာ အသက်သေဆုံးထားသည်။ လက်ရှိတွင် အာဖရိကတိုက်မှ နိုင်ငံ ၁၂ နိုင်ငံ၌ ရောဂါဖြစ်ပွားမှုကို မှတ်တမ်းတင်ထားပြီးဖြစ်သည်။
“မျောက်ကျောက်ရောဂါက Monkeypox ခေါ်တာပေါ့၊ သူ့ကို ရေကျောက်ပေါက်တာနဲ့လည်း မှားတတ်ကြ တယ်။ ရောဂါလက္ခဏာက ကွဲပြားပါတယ်။ ဒါကိုလည်း သိထားကြဖို့လိုတယ် Hello ဆရာဝန်လိုမျိုး Page တွေမှာလည်း ကျယ်ကျယ်ပြန့်ပြန့်ရေးထားပါတယ်။ လက်ရှိက ဒေသတွင်းနိုင်ငံတွေမှာလည်း စတွေ့နေ ပြီဆိုတော့ မြန်မာမှာလည်း ပြည်သူတွေအနေနဲ့ လက္ခဏာတွေ၊ ကူးစက်ပုံတွေကို လေ့လာသိရှိထားသင့် ပြီ။ ကျယ်ကျယ်ပြန့်ပြန့်လည်း ပညာပေးကြဖို့လိုပါပြီ” ဟု CDM ဆရာဝန်တဦးက ပြောသည်။
အမျိုးသားညီညွတ်ရေးအစိုးရ(NUG)၏ ကျန်းမာရေးဝန်ကြီးဌာနကလည်း ၎င်းတို့ဝက်ဘ်ဆိုက်တွင် မျောက် ကျောက်ရောဂါအကြောင်း အသိပညာပေးမှုများ ပြုလုပ်ထားသည်။
မျောက်ကျောက်လက္ခဏာများမှာ အဖျားကြီးခြင်း၊ မျက်နှာ၊ လက်၊ ခြေထောက်၊ ပါးစပ်နှင့် လိင်အင်္ဂါများ တွင် အနီကွက်များနှင့်အတူ အရည်ကြည်ဖုများပေါက်ခြင်း၊ ပြန်ရည်ကျိတ်ရောင်ခြင်း၊ ခေါင်းကိုက်၊ ကြွက်သားနာကျင်ကိုက်ခဲခြင်းနှင့် မောပန်းနွမ်းနယ်ခြင်းတို့ဖြစ်သည်။ ထိုရောဂါသည် လိင်မှတဆင့် ကူး စက်ခြင်း၊ ရောဂါပိုးကပ်တွယ်နေသော အရာဝတ္တုများကိုကိုင်တွယ်ခြင်းနှင့် ရောဂါပိုးကူးစက်ခံထားရ သော တိရိစ္တာန်များနှင့်တိုက်ရိုက်ထိတွေ့ခြင်းတို့မှ ကူးစက်နိုင်သည်။
လက်ရှိတွင် အာရှဒေသတွင်းနိုင်ငံများဖြစ်သည့် ပါကစ္စတန်နိုင်ငံတွင် မျောက်ကျောက်ရောဂါဖြစ်ပွားနေ သူတဦးတွေ့ရှိထားပြီဖြစ်ကြောင်း ပြီးခဲ့သည့်သောကြာနေ့က ထုတ်ပြန်ကြေညာခဲ့ပြီး၊ ဖိလစ်ပိုင်နိုင်ငံ၌ လည်း မျောက်ကျောက်ရောဂါစတင်တွေ့ရှိခဲ့ပြီး ဆေးစစ်ချက်အတည်ပြုမှုကိုစောင့်ဆိုင်းနေကြောင်း CNA သတင်းဌာနကဖော်ပြထားသည်။
ထို့ကြောင့် ရောဂါဖြစ်ပွားတွေ့ရှိရာ နိုင်ငံနှင့်ဒေသများမှ ပြီးခဲ့သည့် ရက် ၂၀ အတွင်း ပြန်လာသူများနှင့်ထိ တွေ့မိခြင်းရှိထားပါက နိုင်ငံတကာနှင့် ပြည်တွင်းခရီးသွားလာခြင်းကို ရှောင်ရှားရန်နှင့် နီးစပ်ရာ ကျန်းမာ ရေးဌာနသို့ အလျင်မြန်ဆုံးသတင်းပို့ ကုသမှုခံယူကြရန် စစ်ကောင်စီကျန်းမာရေးဝန်ကြီးဌာန၏ ထုတ်ပြန် ချက်တွင် ဖော်ပြသည်။ မြန်မာနိုင်ငံ၌ ၂၀၂၂ ခုနှစ်မှစတင်ကာ လက်ရှိအချိန်အထိ သံသယလူနာများ၏ ဓာတ်ခွဲနမူနာ ၁၂၉ ခုကို ဓာတ်ခွဲစစ်ဆေးခဲ့ပြီး မျောက်ကျောက်ရောဂါ အတည်ပြုလူနာ မရှိမတွေ့ရှိရ သေးကြောင်းလည်း စစ်ကောင်စီထုတ်ပြန်ချက်၌ ဆိုထားသည်။
စာတည်း။ ။စောဖေ
#မျောက်ကျောက်ရောဂါ
#monkeypox
#ကျန်းမာရေး
#ကူးစက်ရောဂါ
Website link >> https://bur.mizzima.com/2024/08/20/30598
-----------------------------------------
Mizzima News in Burmese ရဲ့ Official telegram channel ဒီမှာ follow လုပ်ပါ https://t.me/mizzimatv
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U or https://tinyurl.com/donatemzm
