တရုတ်နိုင်ငံခြားရေးဝန်ကြီးက ကမ္ဘောဒီးယား၊ ထိုင်းဝန်ကြီးများနှင့်တွေ့မည်

တရုတ်နိုင်ငံခြားရေးဝန်ကြီး ဝမ်ယိသည် ယူနန်တွင် ကမ္ဘောဒီးယားနှင့် ထိုင်းနိုင်ငံခြားရေးဝန်ကြီးများနှင့် တွေ့ဆုံမည်ဖြစ်ကြောင်း တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက စနေနေ့တွင် သတင်းထုတ်ပြန်ခဲ့သည်။
တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင် ဝမ်၏ ဖိတ်ကြားချက်အရ ကမ္ဘောဒီးယား ဒုတိယဝန်ကြီးချုပ်၊ နိုင်ငံခြားရေးနှင့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီး ပရာ့ခ် ဆိုခွန်နှင့် ထိုင်းနိုင်ငံ နိုင်ငံခြားရေးဝန်ကြီး စီဟာဆက် ဖွာင်ကက်ကီယို ဦးဆောင်သည့် ကိုယ်စားလှယ်အဖွဲ့အား တရုတ်နိုင်ငံ ယူနန်ပြည်နယ်၌ ဒီဇင်ဘာလ ၂၈ ရက် နေ့မှ ၂၉ ရက်နေ့အထိ ဝမ်ယိတွေ့ဆုံမည်ဖြစ်ကြောင်း ပြောရေးဆိုခွင့်ရှိသူက ပြောကြားခဲ့သည်။

တရုတ်ပြည်သူ့လွတ်မြောက်ရေးတပ်မတော်က ထိုင်ဝမ်ပတ်ပတ်လည်တွင် စစ်ရေးလေ့ကျင့်မှုများ စတင်

အမေရိကန်ပြည်‌ထောင်စုက ထိုင်ဝမ်နှင့် သမိုင်းတစ်လျှောက် အကြီးမားဆုံးလက်နက်ရောင်းဝယ်ရေး စာချုပ်ကို အတည်ပြုခဲ့ပြီးနောက် နိုင်ငံတော်စည်းလုံးညီညွတ်ရေးကို ကာကွယ်ရန်အတွက် "တရားဝင်ပြီး လိုအပ်သော" လုပ်ဆောင်ချက်ဟုဆိုကာ တရုတ်ပြည်သူ့လွတ်မြောက်ရေးတပ်မတော် (ပီအယ်လ်အေ) သည် တနင်္လာနေ့တွင် ထိုင်ဝမ်ကျွန်းပတ်ပတ်လည်၌ စစ်ရေးလေ့ကျင့်မှုများကို စတင်ခဲ့ကြောင်း သိရှိရပါသည်။
ပီအယ်လ်အေ၏ အရှေ့ပိုင်းတိုင်းစစ်ဌာနချုပ် ပြောရေးဆိုခွင့်ရှိသူဝါရင့်ဗိုလ်မှူးကြီး ရှီယီက ယခုစစ်ရေးလေ့ကျင့်မှုသည် "ခွဲထွက်ရေးအင်အားစုများ" နှင့် ပြင်ပမှ ဝင်ရောက်စွက်ဖက်မှုများကို သတိပေးခြင်းဖြစ်ကြောင်း ပြောကြားခဲ့ပါသည်။
"၂၀၂၅ တရားမျှတရေးအထူးတာဝန်" ဟု အမည်ပေးထားသည့် အဆိုပါစစ်ရေးလေ့ကျင့်မှုများကို ထိုင်ဝမ်ရေလက်ကြားရှိ ရေပြင်နှင့် ဝေဟင်နယ်မြေများအပြင် ထိုင်ဝမ်ကျွန်းမကြီး၏ မြောက်ဘက်၊ အနောက်တောင်ဘက်၊ အရှေ့တောင်ဘက်နှင့် အရှေ့ဘက်နယ်မြေများတွင် ပြုလုပ်နေခြင်းဖြစ်ကြောင်း၊ စစ်ရေးလေ့ကျင့်မှုတွင် အရှေ့ပိုင်း တိုင်းစစ်ဌာနချုပ်လက်အောက်ရှိ ကြည်းတပ်၊ ရေတပ်၊ လေတပ်နှင့် ဒုံးတပ်ဖွဲ့တို့မှ တပ်ဖွဲ့ဝင်များ ပါဝင်ဆောင်ရွက်နေကြခြင်းဖြစ်ကြောင်း ရှီက ပြောကြားထားပါသည်။
ထို့အပြင် ကျည်စစ်ကျည်မှန်များဖြင့် ပ-စ်ခတ်လေ့ကျင့်မှုကို အင်္ဂါနေ့ နံနက် ၈ နာရီမှ ညနေ ၆ နာရီအတွင်း ပြုလုပ်သွားမည်ဖြစ်ကြောင်း အရှေ့ပိုင်းစစ်ဌာနချုပ်၏ သီးခြားထုတ်ပြန်ချက်တစ်ခုတွင်လည်း ဖော်ပြထားပါသည်။
“ယခုလုပ်ဆောင်ချက်သည် ‘ထိုင်ဝမ်လွတ်လပ်ရေး’ ခွဲထွက်ရေးအင်အားစုများအတွက် ပြင်းထန်သော သတိပေးချက်တစ်ခုဖြစ်ပြီး တရုတ်နိုင်ငံ၏ အချုပ်အခြာအာဏာနှင့် နိုင်ငံတော်ညီညွတ်ရေးကို ကာကွယ်စောင့်ရှောက်ရန်အတွက် တရားဝင် လိုအပ်သော စစ်ရေးဆောင်ရွက်မှုအား လုပ်ဆောင်ခြင်း ဖြစ်သည်” ဟု ဗိုလ်မှူးကြီး ရှီယီက ဆက်လက်ပြောကြားခဲ့ကြောင်း သိရှိရပါသည်။

အပ-စ်ရပ်စဲရေးသဘောတူညီချက်တည်မြဲ၊စစ်ဘေးရှောင်များနေရပ်ပြန်ပြီ

ထိုင်းနှင့် ကမ္ဘောဒီးယားနိုင်ငံတို့အကြား လက်မှတ်ရေးထိုးထားသော ယာယီအပ-စ်အခတ်ရပ်စဲရေး သဘောတူညီချက်သည် ဆက်လက်တည်မြဲနေသည့်အခြေအနေရှိသောကြောင့် ထိုင်းနိုင်ငံအရှေ့မြောက်ပိုင်းပြည်နယ်နှစ်ခုရှိ ခိုလှုံရေးစခန်းများတွင် နေထိုင်နေသော စစ်ဘေးရှောင်များသည် တနင်္ဂနွေနေ့တွင် ၎င်းတို့နေအိမ်များသို့ စတင်ပြန်လာနေကြပြီဖြစ်သည်။
ဘူရီယမ်နှင့် ဆူရင်ပြည်နယ်များသည် နယ်စပ်တလျှောက်တို-က်ပွဲများကြောင့် ထွက်ပြေးတိမ်းရှောင်ခဲ့ရသူများကို တနင်္ဂနွေနေ့တွင် ၎င်းတို့နေအိမ်များသို့ ပြန်ခွင့်ပြုခဲ့သည်။ ဆူရင်ပြည်နယ်တွင် စစ်ဘေးရှောင်များ နေရပ်ပြန်ရေးကို ပြည်နယ်အုပ်ချုပ်ရေးမှူး Jumreon Wanhpetch က အတည်ပြုချက်ပေးခဲ့သည်။
ဆူရင်ပြည်နယ်တွင် ဖနွမ်ဒုံရက်မှလွဲ၍ နယ်စပ်ခရိုင်အားလုံးတွင် နေရပ်ပြန်မှုစတင်နေကြောင်း သိရသည်။

ထိုင်းရွေးကောက်ပွဲ နိုင်ငံရေးပါတီ ၅၂ ခု ဝင်ရောက်ယှဉ်ပြိုင်မည်

၂၀၂၆ ခုနှစ် ဖေဖော်ဝါရီလ ၈ ရက်နေ့တွင် ကျင်းပမည့် ထိုင်းနိုင်ငံ၏ အထွေထွေရွေးကောက်ပွဲတွင် နိုင်ငံရေးပါတီ ၅၂ ခု ဝင်ရောက်ယှဉ်ပြိုင်မည်ဖြစ်သည်။ ဝန်ကြီးချုပ်ကိုယ်စားလှယ်လောင်းများကို တနင်္ဂနွေနေ့တွင် ဘန်ကောက်မြို့ရှိ အစိုးရအဆောက်အအုံတွင် မှတ်ပုံတင်ခဲ့ကြသည်။
၂၀၂၃ ခုနှစ် အထွေထွေရွေးကောက်ပွဲတွင် ပါတီ ၄၇ ခု ဝင်ရောက်ယှဉ်ပြိုင်ရန် မှတ်ပုံတင်ခဲ့ပြီး ယခုရွေးကောက်ပွဲတွင် ပါတီအရေအတွက် တိုးလာခဲ့ခြင်းဖြစ်သည်။
Bhumjaithai ပါတီကို ဦးဆောင်နေသည့် ဝန်ကြီးချုပ် အနူတင် ချန်ဗီရာကူလ်က သူ့ပါတီတွင် သူနှင့် နိုင်ငံခြားရေးဝန်ကြီး သီဟာဆတ် ဖူအန်ကတ်ကောတို့သည် ပါတီ၏ ဝန်ကြီးချုပ်ကိုယ်စားလှယ်လောင်းများဖြစ်ကြောင်း ပြောဆိုခဲ့သည်။ ပါတီသည် အထွေထွေရွေးကောက်ပွဲအတွက် ဇွန်လကတည်းက အသင့်ဖြစ်နေခဲ့ပြီးဖြစ်ကြောင်း သူက ဆိုသည်။
သူ့ပါတီအနေဖြင့် တော်ဝင်အသရေဖျ-က်မှုဆိုင်ရာဥပဒေဖြစ်သော ရာဇဝတ်မှုဆိုင်ရာ ဥပဒေပုဒ်မ ၁၁၂ ကို ပြင်ဆင်ပြောင်းလဲရန် ကြိုးပမ်းမည်မဟုတ်ကြောင်း အနူတင်က အတည်ပြုခဲ့သည်။
နိုင်ငံရေးပါတီများအနေဖြင့် မဲဆွယ်ပွဲများတွင် တော်ဝင်အသရေဖျ-က်မှုဥပဒေကိစ္စကို ထုတ်ဖော်ပြောဆိုခြင်းမျိုး မပြုသင့်ဟု ပြည်သူ့ပါတီခေါင်းဆောင် Natthaphong Ruengpanyawut က ပြောဆိုခဲ့သည်။ မဲဆွယ်စည်းရုံးမှုများတွင် ပုဒ်မ ၁၁၂ ပြင်ဆင်ရေးကိစ္စကို ထည့်သွင်းပြောဆိုခဲ့သဖြင့် ပါတီဖျ-က်သိမ်းခံခဲ့ရသော Move Forward ပါတီမှ လွှတ်တော်အမတ်များသည် ပြည်သူ့ပါတီသို့ ရောက်ရှိနေခဲ့သည်။
မစ္စတာ Natthaphong သည် ၎င်းပါတီ၏ ဝန်ကြီးချုပ်ကိုယ်စားလှယ်လောင်းသုံးဦးအနက် တစ်ဦးဖြစ်သည်။
မဲဆန္ဒနယ်ဆိုင်ရာ အမတ်လောင်းများမှတ်ပုံတင်ခြင်းကို စနေနေ့တွင်စတင်ခဲ့ပြီး ပါတီ၏ ဝန်ကြီးချုပ် ကိုယ်စားလှယ်လောင်းများ မှတ်ပုံတင်ခြင်းကို တနင်္ဂနွေနေ့တွင် စတင်ခဲ့သည်။ မှတ်ပုံတင်ခြင်းကို ဒီဇင်ဘာ ၃၁ ရက်တွင် ပိတ်သိမ်းမည်ဖြစ်သည်။ စနေနေ့တွင် တစ်နိုင်ငံလုံးရှိ မဲဆန္ဒနယ်များတွင် ရွေးကောက်ပွဲဝင်ရောက်ယှဉ်ပြိုင်ရန် အမတ်လောင်း ၃၀၉၂ ဦး မှတ်ပုံတင်ခဲ့ကြသည်။

ရွေးကောက်ပွဲသည် ဒီမိုကရေစီတန်ဖိုးများကို ပေါ်လွင်ထင်ဟပ်စေဟု UEC ဥက္ကဋ္ဌပြော

ရွေးကောက်ပွဲသည် နိုင်ငံ့ခေါင်းဆောင်များ၊ လွှတ်တော်ကိုယ်စားလှယ်များ ရွေးချယ်ခြင်းတစ်ခုတည်းအတွက် မဟုတ်ဘဲ ပြည်သူအားလုံးပါဝင်ဆောင်ရွက်နိုင်မှု၊ လွတ်လပ်မှုနှင့် တရားမျှတမှု၊ တာဝန်ယူမှု၊ တာဝန်ခံမှုစသည့် ဒီမိုကရေစီ၏တန်ဖိုးများကိုပေါ်လွင်ထင်ဟပ်စေသည်ဟု ပြည်ထောင်စုရွေးကောက်ပွဲကော်မရှင် (UEC) ဥက္ကဋ္ဌဦးသန်းစိုးက ပြောသည်။
UEC ဥက္ကဋ္ဌမှ ကျင်းပပြီးစီးခဲ့သည့် ရွေးကောက်ပွဲအပိုင်း (၁) အား လာရောက်လေ့လာခဲ့သည့် နိုင်ငံတကာရွေး ကောက်ပွဲစောင့်ကြည့်လေ့လာသူများအား ဒီဇင်ဘာ ၂၈ ရက်ညနေပိုင်းက ဂုဏ်ပြုညစာစားပွဲဖြင့် တည်ခင်းဧည့်ခံစဥ် ပြောကြားခဲ့ခြင်းဖြစ်သည်။
ယနေ့ ကျင်းပသည့် ရွေးကောက်ပွဲသည် မြန်မာနိုင်ငံ၏ ပါတီစုံဒီမိုကရေစီအထွေထွေရွေးကောက်ပွဲကြီးအတွက် အရေးကြီးသည့်မှတ်တိုင်တစ်ခုဖြစ်ကာ မဲဆန္ဒရှင်များက မိမိမဲပေးပိုင်ခွင့်ကိုအသုံးပြုပြီး ဆန္ဒထုတ်ဖော်ပြသခဲ့ကြကာ နိုင်ငံတကာလေ့လာစောင့်ကြည့်ရေးအဖွဲ့များမှလည်း ရွေးကောက်ပွဲကျင်းပသည့်လုပ်ငန်းစဉ်တစ်လျှောက် ဘက်မလိုက်ဘဲ စောင့်ကြည့်လေ့လာခဲ့ကြသည်ကို အထူးကျေးဇူးတင်သည်ဟု ပြောသည်။
"အဆွေတော်တို့ရဲ့ စောင့်ကြည့်လေ့လာမှုတွေဟာ လွတ်လပ်မှု၊ တရားမျှတမှုနဲ့ ပွင့်လင်းမြင်သာမှုတွေကိုခိုင်မာစေရုံသာမက ပြည်ထောင်စုရွေးကောက်ပွဲကော်မရှင်၊ နိုင်ငံရေးပါတီတွေ၊ လွှတ်တော်ကိုယ်စားလှယ်လောင်းတွေ၊ မဲဆန္ဒရှင်တွေနဲ့ ရွေးကောက်ပွဲမှာပါဝင်သူအားလုံးအတွက် ယုံကြည်မှုကို ခိုင်မာစွာတည်ဆောက်ပေးနိုင်မယ်လို့ယုံကြည်ပါတယ်" ဟု UEC ဥက္ကဋ္ဌဦးသန်းစိုးက ပြောသည်။
ထို့ကြောင့် မြန်မာနိုင်ငံ၏ စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ်တည်ဆောက်ရာတွင် အထောက် အကူဖြစ်စေမည့် နိုင်ငံတကာလေ့လာစောင့်ကြည့်ရေးအဖွဲ့များ၏ ကောင်းမွန်သည့်လေ့လာတွေ့ရှိချက်များနှင့် အကြံပြုချက်များကိုစောင့်မျှော်နေမည်ဖြစ်ကာ ရွေးကောက်ပွဲအောင်မြင်စွာကျင်းပနိုင်မှုသည် မြန်မာနိုင်ငံအတွက် ကောင်းမွန်သည့်အရွေ့တစ်ခုကို ဖော်ဆောင်နိုင်မည်ကိုယုံကြည်သည်ဟု UEC ဥက္ကဋ္ဌ ဦးသန်းစိုးက ပြောကြားခဲ့သည်။
ထို့နောက် UEC ဥက္ကဋ္ဌနှင့် တက်ရောက်လာကြသူများက ဂုဏ်ပြုညစာသုံးဆောင်ပြီး သာသနာရေးနှင့် ယဉ်ကျေးမှုဝန်ကြီးဌာန အနုပညာဦးစီးဌာန ယဉ်ကျေးမှုအကအဖွဲ့၏ မြန်မာ့ရိုးရာယဉ်ကျေးမှုအဆိုအကများဖြင့် ဖျော်ဖြေတင်ဆက်မှုများကို ကြည့်ရှုအားပေးကာ ဂုဏ်ပြုပန်းခြင်းများနှင့် ဂုဏ်ပြုငွေများချီးမြှင့်ခဲ့ကြသည်။

မြန်မာ-တရုတ် ကျောက်မျက်ကုန်သည်များ မိတ်ဆုံစားပွဲသို့ တရုတ်နိုင်ငံဆိုင်ရာ မြန်မာသံအမတ် တက်ရောက်

မြန်မာနိုင်ငံ၌ ရင်းနှီးမြှုပ်နှံမှုများ တိုးမြှင့်ဖော်ဆောင်သွားကြရန် မြန်မာနိုင်ငံအစိုးရကိုယ်စား ဖိတ်ခေါ်
တရုတ်နိုင်ငံ ယူနန်ပြည်နယ်တွင် ကျင်းပသည့် မြန်မာ-တရုတ် ကျောက်မျက်ကုန်သည်များ၏ (၁၉) ကြိမ်မြောက် ဆွေမျိုးပေါက်ဖော်ချစ်ကြည်ရေး မိတ်ဆုံစားပွဲအခမ်းအနားကို တရုတ်နိုင်ငံဆိုင်ရာ မြန်မာသံအမတ်ကြီး ဦးတင်မောင်ဆွေ တက်ရောက်ခဲ့ကြောင်း သိရသည်။
မြန်မာ-တရုတ် သံတမန် ဆက်ဆံရေးသည် ၇၅ နှစ်ပြည့်ပြီးဖြစ်ကြောင်းနှင့် နှစ်နိုင်ငံဆက်ဆံရေး သမိုင်းကြောင်းတွင် နယ်စပ်ဒေသနေ ပြည်သူအချင်းချင်းဆက်ဆံရေးမှာ နှစ်ပေါင်းရာထောင်ချီပင်ရှိခဲ့ပြီဖြစ်ပါကြောင်း ဦးတင်မောင်ဆွေက ပြောသည်။
နှစ်နိုင်ငံဆက်ဆံရေးခိုင်မာအားကောင်းစေရန် နယ်စပ်ဒေသနေပြည်သူများ၏ အပြန်အလှန်ချစ်ကြည်ရင်းနှီးမှု၊ဆက်ဆံရေးနှင့် ပူးပေါင်းဆောင်ရွက်မှုများမှာ လွန်စွာအရေးကြီးပါကြောင်း၊ နှစ်နိုင်ငံအကြား အေးအတူ ပူအမျှဆက်ဆံရေး တည်ဆောက်ရာတွင် ပြည်သူများအကြား အပြန်အလှန်ကူညီဖေးမရင်း အေးအတူပူအမျှ နေထိုင်သွားကြရန် ဒေသခံပြည်သူများကို တိုက်တွန်းကြောင်းလည်း သံအမတ်ကြီးက ပြောကြားခဲ့သည်။
ထို့ပြင် ယခုအချိန်သည် ရင်းနှီးမြှုပ်နှံမှုပြုလုပ်ရန် အကောင်းဆုံးအချိန်ကာလ ဖြစ်သည့်အတွက် မြန်မာနိုင်ငံ၌ ရင်းနှီးမြှုပ်နှံမှုများ တိုးမြှင့်ဖော်ဆောင်သွားကြရန် မြန်မာနိုင်ငံအစိုးရကိုယ်စား မိမိအနေဖြင့် ဖိတ်ကြားလိုကြောင်းလည်း သံအမတ်ကြီးက ပြောကြားခဲ့ကြောင်း သိရသည်။
အခမ်းအနားသို့ တဲဟုန်ပြည်နယ်နှင့် ရွှေလီမြိုမှ အစိုးရတာဝန်ရှိသူများနှင့် ရွှေလီမြိုရှိ မြန်မာ-တရုတ် ကျောက်မျက်လုပ်ငန်းရှင်များ၊ ဖိတ်ကြားထားသည့် ဧည့်သည်တော်များ စုစုပေါင်း (၂,၅၀၀) ဦးခန့် တက်ရောက်ခဲ့ကြောင်း သိရသည်။

အဆင့်မြင့် ကြိုးမဲ့ရထားတွဲယာဥ်တန်းကိုတရုတ်စမ်းသပ်

တရုတ်နိုင်ငံသည် ကုန်တင်ရထားတွဲအများအပြားကို သံမဏိချိတ်ဆက်မှုများကို အသုံးမပြုဘဲ ကြိုးမဲ့စနစ်ဖြင့် ချိတ်ဆက်မောင်းနှင်နိုင်သည့် ရထားပို့ဆောင်ရေးစနစ်သစ်တစ်ခုကို စမ်းသပ်အောင်မြင်ခဲ့ကြောင်း သိရှိရပါသည်။
တနင်္လာနေ့က အင်နာမွန်ဂိုလီးယားပြည်နယ်ရှိ ဘော်ရှင် ရထားလမ်းပေါ်တွင် ပြုလုပ်ခဲ့သော စမ်းသပ်မှု၌ စုစုပေါင်းကုန်တင်နိုင်စွမ်း တန်ချိန် ၃၅,၀၀၀ (အီဖယ်မျှော်စင်အလေးချိန်၏ ၃ ဆခွဲခန့်) ရှိသည့် ကုန်တင်ရထား ၇ စီးကို ကြိုးမဲ့စနစ်ဖြင့် ချိတ်ဆက်အသုံးပြုခဲ့ပါသည်။ အဆိုပါရထားများကို တစ်စင်းချင်းစီ သီးခြားမောင်းနှင်ပါက ထားရှိရမည့် ဘေးကင်းလုံခြုံရေးအကွာအဝေးထက် ပိုမိုနီးကပ်စွာထားရှိ၍ တစ်ပြိုင်နက်တည်း အတူတကွ မောင်းနှင်နိုင်ခဲ့ပါသည်။ ဤနည်းပညာသည် ရထားလမ်းသစ်များကိုထပ်မံခင်းရန်မလိုဘဲ တရုတ်နိုင်ငံ၏ ရထားကုန်စည်ပို့ဆောင်ရေးစွမ်းဆောင်ရည်ကို ၅၀ ရာခိုင်နှုန်းကျော်အထိ တိုးမြှင့်ပေးနိုင်မည်ဖြစ်ကြောင်း နိုင်ငံပိုင်ရုပ်သံဌာန CCTV က တနင်္လာနေ့တွင် ပြောကြားခဲ့သည်။ အဆိုပါ အုပ်စုလိုက်ထိန်းချုပ်မောင်းနှင်သည့်စနစ်ကို နိုင်ငံပိုင်ကျောက်မီးသွေးတူးဖော်ရေးလုပ်ငန်းဖြစ်သော တရုတ်ရှင်ဟွာစွမ်းအင်ကုမ္ပဏီနှင့် အခြားပြည်တွင်းအဖွဲ့အစည်းများက ပူးပေါင်းထုတ်လုပ်ခဲ့ခြင်းဖြစ်ပါသည်။
တရုတ်နိုင်ငံအနေဖြင့် ဆယ်စုနှစ်များစွာအတွင်း ၎င်း၏ ရထားကုန်စည်ပို့ဆောင်ရေးစွမ်းရည်ကို တိုးမြှင့်လျက်ရှိပြီး ယခုနှစ်၏ ပထမကိုးလပတ်အတွင်းမှာပင် ကုန်စည်တန်ချိန် ၃ ဘီလျံကျော်ကို သယ်ယူပို့ဆောင်ပေးခဲ့ကြောင်း နိုင်ငံပိုင် ချိုင်းနားဒေးလီးသတင်းစာ ဖော်ပြချက်အရ သိရှိရပါသည်။ ထို့အပြင် တရုတ်မီးရထား အမြန်ကုန်ပို့ဆောင်ရေး ကဲ့သို့သော ဝန်ဆောင်မှုများဖြင့် အခြားနိုင်ငံများသို့ ဆက်သွယ်ဆောင်ရွက်လျက်ရှိပြီး ဥရောပနှင့် အာရှရှိ နိုင်ငံပေါင်းများစွာသို့ ရထားလမ်းချိတ်ဆက်မှုများအပြင် ကုန်စည်ပို့ဆောင်မှုကိုလည်း မြှင့်တင်လျက်ရှိသည်။
တိုးပွားလာသည့် ကုန်စည်လိုအပ်ချက်ကို ဖြည့်ဆည်းရန်အတွက် ရထားလမ်းသစ်များ တည်ဆောက်ခြင်းသည် ကုန်ကျစရိတ်ကြီးမားလှသဖြင့် ရထားတွဲများ၏ အရှည်ကိုတိုးမြှင့်ခြင်း သို့မဟုတ် ရထားတစ်စင်းနှင့်တစ်စင်းအကြား မောင်းနှင်သည့် အချိန်ကာလအပိုင်းအခြားများကို လျှော့ချခြင်းကဲ့သို့သော နည်းလမ်းများသည် ကုန်ကျစရိတ်ကို များစွာသက်သာစေနိုင်ကြောင်း ဟူနန်ပြည်နယ်၊ ချန်ရှာမြို့ရှိ တောင်ပိုင်းဗဟိုတက္ကသိုလ်မှ သုတေသီများက လွန်ခဲ့သော နှစ်နှစ်ခန့်က သင်္ချာဂျာနယ်တွင် ဖော်ပြခဲ့သော သုတေသနစာတမ်း၌ ထောက်ပြထားကြောင်း သိရှိရပါသည်။

နီပေါရက်ပ်ပါဟောင်း ရွေးကောက်ပွဲဝင်ပြိုင်မည်

နီပေါနိုင်ငံတွင် မတ်လအတွင်း ကျင်းပပြုလုပ်မည့် လွှတ်တော်ရွေးကောက်ပွဲမတိုင်မီတွင် လူထုခေါင်းဆောင်နှစ်ဦးသည် မဟာမိတ်ဖွဲ့လိုက်ကြကာ နီပေါနိုင်ငံရေးကို ဆယ်စုနှစ်သုံးခုကျော်ကြာ လွှမ်းမိုးထားသော ဝါရင့်နိုင်ငံရေးပါတီများကို စိန်ခေါ်သွားလိမ့်မည်ဟု ပါတီအရာရှိများနှင့် လေ့လာသုံးသပ်သူများက ဒီဇင်ဘာလ ၂၉ ရက်နေ့တွင် ပြောကြားခဲ့သည်။
လူကြိုက်များသော ရွေးကောက်ခံပြည်သူ့ကိုယ်စားလှယ်ဖြစ်ပြီး ဘာလန်ဟု လူသိများသော ရက်ပ်ပါတစ်ဖြစ်လဲ ခတ္တမန္ဒူမြို့တော်ဝန် ဘာလန်ဒရာရှားသည် ရုပ်သံအစီအစဉ်တင်ဆက်သူအဖြစ်မှ နိုင်ငံရေးသမားဖြစ်လာသည့် ရာဘီ လာမီချန်နီဦးဆောင်သော Rastriya Swatantra Party (RSP) သို့မဟုတ် အမျိုးသားလွတ်လပ်ရေးပါတီနှင့် ပူးပေါင်းခဲ့ကြောင်း ပါတီအရာရှိများက ပြောကြားခဲ့သည်။
RSP နှင့် သဘောတူညီချက်အရ မတ်လ ၅ ရက်နေ့ ရွေးကောက်ပွဲတွင် ပါတီအနိုင်ရခဲ့ပါက အသက် ၃၅ နှစ်အရွယ် ဘာလန်သည် ဝန်ကြီးချုပ်ဖြစ်လာမည်ဖြစ်ကာ မစ္စတာ လာမီချန်နီကမူ ပါတီအကြီးအကဲအဖြစ် ဆက်ရှိနေမည်ဖြစ်သည်ဟု ၎င်းအရာရှိများက ပြောကြားခဲ့သည်။
နိုင်ငံတွင်အကြီးအကျယ်အဂတိလိုက်စားမှုများကို ဆန့်ကျင်သည့် Gen Z လူငယ်များဦးဆောင်သော ဆန္ဒပြပွဲများအတွင်း ထုတ်ဖော်ခဲ့သည့် တောင်းဆိုချက်များကို ဖြေရှင်းသွားမည်ဟု ၎င်းတို့နှစ်ဦးစလုံးက ကတိပြုခဲ့သည်။ ထိုဆန္ဒပြပွဲများအတွင်း လူ ၇၇ ဦး ‌ေသဆုံးခဲ့ပြီး ဝန်ကြီးချုပ် ကေပီ ရှာမာအိုလီ သည် နုတ်ထွက်ခဲ့ရသည်။
ဘာလန်နဲ့ သူ့ရဲ့ လူငယ်ထောက်ခံသူတွေကို ပါတီထဲဆွဲခေါ်ခဲ့သော RSP ၏ လုပ်ဆောင်ချက်သည် အလွန်လိမ္မာပါးနပ်ပြီး မဟာဗျူဟာကျ‌ေသာဆောင်ရွက်ချက်ဖြစ်သည်ဟု လေ့လာသူ ဘီပင် အဒီကာရီက ပြောကြားခဲ့သည်။ “အစဉ်အလာနိုင်ငံရေးပါတီတွေဟာ သူတို့ရဲ့ လူငယ်မဲဆန္ဒရှင်တွေ RSP လက်ထဲရောက်သွားမယ့်အရေးကို စိုးရိမ်နေရပါပြီ” ဟု ၎င်းက ပြောကြားခဲ့သည်။
နီပေါနိုင်ငံ၏ လူဦးရေ သန်း ၃၀ အနက် ရွေးကောက်ပွဲတွင် မဲပေးပိုင်ခွင့်ရှိသူ ၁၉ သန်းနီးပါးရှိကြောင်း နီပေါရွေးကောက်ပွဲကော်မရှင်က ပြောကြားခဲ့သည်။ ဆန္ဒပြပွဲများနောက်ပိုင်းတွင် လူငယ်အများစုပါဝင်သော မဲပေးပိုင်ခွင့်ရှိသူ တစ်သန်းနီးပါး ထပ်တိုးလာခဲ့သည်။

ရန်ကုန် - မန္တလေး အမြန်လမ်း မှာ တိုက်ပွဲဖြစ်ပွားခဲ့

ရန်ကုန် - မန္တလေး အမြန်လမ်း ၊ စကားအင်း ရဲစခန်းအပိုင်ထဲက မိုင်တိုင် ၃၃၁ နဲ့ ၃၃၂ အကြားမှာ ဒီကနေ့ ဒီဇင်ဘာ ၂၈ ရက်နေ့ ၁၀ နာရီလောက်က PDF အဖွဲ့နဲ့ လုံခြုံရေး တပ်ဖွဲ့ဝင်တွေအကြား.ထိတွေ့တိုက်ပွဲ ဖြစ်ပွားခဲ့တယ်လို့ သိရပါတယ်။
အဆိုပါ တိုက်ပွဲက ၁၅ မိနစ်လောက် ကြာမြင့်ခဲ့ပြီး တိုက်ပွဲ ဖြစ်ပွားချိန်မှာ အမြန်လမ်းပေါ် ကားတွေ သွလာခွင့် ရပ်တန့်ခဲ့ ရပေမယ့် လက်ရှိမှာတော့ ကားတွေ သွားလာခွင့် ရရှိနေပြီ ဖြစ်တယ်လို့ သိရပါတယ် ။
လုံခြုံရေး တပ်ဖွဲ့နဲ့ နီးစပ်သူ တယောက်က "မနက်က ရဲကင်းကို လာပစ်ပြီး ပြန်ဆုတ်ခွာသွားပါတယ်။လက်ရှိက တိုက်ပွဲ ပြီးသွားပါပြီ။ဘာမှမဖြစ်ပါဘူး ။ပစ်ပြေးသွားတာပါ။ " လို့ ပြောပါတယ်။
PDF အင်အား ၃၀ လောက်က အမြန်လမ်းမပေါ်ကို တက်လာပြီး ပစ်ခတ်ခဲ့တာဖြစ်ကြောင်း ၊ ပစ်ခတ်မှုကြောင့် လုံခြုံရေးတပ်ဖွဲ့ ဘက်က ထိခိုက်မှုတော့ မရှိဘူးလို့ သိရပါတယ်။
အဆိုပါ အမြန်လမ်းပေါ် ပစ်ခတ်မှု အခြေအနေနဲ့ ပတ်သက်ပြီး အမြန်လမ်း စကားအင်း ရဲစခန်းကို ဖုန်းနဲ့ ဆက်သွယ်ခဲ့ ပေမယ့် ဖုန်းလက်ခံ ဖြေကြားခဲ့ခြင်းမရှိပါဘူး ။
ပြီးခဲ့တဲ့ ဇူလိုင်လ ၂၀ ရက်နေ့ မနက် ၉ နာရီကျော်လောက်ကလည်း ရန်ကုန်-မန္တလေး အမြန်လမ်း၊ ပြင်စည်ရဲစခန်းအပိုင် မိုင်တိုင် ၃၁၈ အနီးမှာ လုံခြုံရေးတပ်ဖွဲ့ နဲ့ ဒေသတွင်း လက်နက်ကိုင် တပ်ဖွဲ့တို့ မြေပြင်ပစ်ခတ်ထိတွေ့ တိုက်ပွဲဖြစ်ပွား ခဲ့တယ်လို့ သိရပါတယ်။
မတ်လ ၁၉ ရက်နေ့ကလည်း ပြင်စည်ရဲစခန်းအနီး မိုင်တိုင် ၃၁၉ မှာ နွားထိုးကြီး PDF နဲ့ နစကလုံခြုံရေးတပ်ဖွဲ့ဝင်တွေအကြား မြေပြင်ထိတွေ့ တိုက်ပွဲဖြစ်ပွားပြီး အမြန်လမ်း ပေါ်သွားလာမှု ယာယီရပ်တန့်ခဲ့ပါတယ်။
၂၀၂၄ ခုနှစ် ဒီဇင်ဘာလ တုန်းကလည်း ရန်ကုန် - မန္တလေးအမြန်လမ်း မိုင်တိုင် ၃၁၉ အနီး တိုက်ပွဲ ဖြစ်ပွားခဲ့သလို အမြန်လမ်း သွားလာနေတဲ့ ကားတွေကို မိုင်တိုင် ၃၁၈ မှာတားပြီး စစ်ဆေးမှု တွေပြုလုပ်ခဲ့တာအထိရှိခဲ့ တယ်လို့သိရပါတယ်။

ရွေးကောက်ပွဲ ကျင်းပနေချိန် လွိုင်ကော်နဲ့ သံတောင်ကြီးမြို့ ရှော့တိုက်ဒုံးတွေနဲ့ တိုက်ခိုက်ခံရ

ဒီကနေ့ ဒီဇင်ဘာ ၂၈ ရက်၊ အထွေထွေ ရွေးကောက်ပွဲ ကျင်းပနေချိန်အတွင်း ကယားပြည်နယ် လွိုင်ကော်နဲ့ ကရင်ပြည်နယ် သံတောင်ကြီးမြို့တို့မှာ ရှော့ဒိုက်ဒုံး ကျရောက် ပေါက်ကွဲမှုတွေ ဖြစ်ပွားခဲ့တယ်လို့ ဒေသခံတွေက ပြောပါတယ်။
ကရင်ပြည်နယ်၊ သံတောင်ကြီးမြို့နယ်ရှိ တိုက်ခိုက်ရေး သင်တန်းကျောင်း (ဘုရင့်နောင်) မှာ ဒီကနေ့ နေ့လယ် ၁၂ နာရီ၊ မိနစ် ၄၀ ဝန်းကျင်က ရှော့တိုက်ဒုံး ခြောက်လုံးနဲ့ ပစ်ခတ် တိုက်ခိုက်ခံရမှု ဖြစ်ပွားခဲ့ပြီး အဲဒီ တိုက်ခိုက်မှုကို Brave Warriors for Myanmar (BWM) က ဦးဆောင်ခဲ့တာ ဖြစ်တယ်လို့ သတင်း ထုတ်ပြန်ထားပါတယ်။
ဒါအပြင် ကယားပြည်နယ် လွိုင်ကော်မြို့မှာလည်း ရွေးကောက်ပွဲ ပြုလုပ်နေချိန် ဒီကနေ့ မနက် ၁၀ နာရီဝန်းကျင်က မင်္ဂလာရပ်ကွက်နဲ့ မိုင်းလုံးရပ်ကွက်အတွင်း ရှော့တိုက်ဒုံးတွေ ကျရောက်ခဲ့တယ်လို့ ဒေသခံတွေက ပြောပါတယ်။
“လွိုင်ကော်မြို့ထဲ ရှော့တိုက်ဒုံး ရှစ်လုံးကျတယ်။ လူတယောက်မှ မထိဘူး။ ရွေးကောက်ပွဲလည်း ပျက်မသွားဘူး။ မြို့ထဲကလူတွေလည်း အသွားအလာ မပျက်ဘူး” လို့ ဒေသခံတယောက်က ပြောပါတယ်။
ဒါအပြင် ပဲခူးတိုင်း၊ ရေတာရှည် မြို့နယ်နဲ့ နေပြည်တော် လယ်ဝေးမြို့နယ်မှာလည်း ဒီကနေ့ မနက်အစောပိုင်း ၃ နာရီဝန်းကျင်က ပေါက်ကွဲမှုတွေ ဖြစ်ခဲ့တယ်လို့ သတင်းတွေ ထွက်ပေါ်နေပေမယ့် VOM က ဒီသတင်း အတည်ပြုနိုင်ဖို့ စုံစမ်းနေဆဲဖြစ်ပါတယ်။
ဒါအပြင် ရန်ကုန်မြို့၊ ကမာရွတ်မြို့နယ်၊ အမှတ် ၃ ရပ်ကွက်မှာရှိတဲ့ မြို့နယ်ရွေးကောက်ပွဲ ကော်မရှင်ရုံးကို ဒီကနေ့ မနစ်အစောပိုင်း ၂ နာရီ ၄၅ မိနစ်ဝန်းကျင်က မိုင်းနှစ်လုံး ဖောက်ခွဲ တိုက်ခိုက်ခဲ့တယ်လို့ Yangon Army အဖွဲ့က ထုတ်ပြန်ပါတယ်။
ဒီသတင်းနဲ့ ပတ်သက်လို့ ရန်ကုန် အနောက်ပိုင်းခရိုင် ရွေးကောက်ပွဲကော်မရှင် အဖွဲ့ခွဲရဲ့ ဥက္ကဋ္ဌဖြစ်သူ ဦးတင်မျိုးအောင်က “ဘာမှမဖြစ်ပါဘူး။ ကျွန်တော်ကိုယ်တိုင် အဲဒီရုံးမှာနေတာပါ။ ဘာပေါက်ကွဲမှုမှ မရှိပါဘူး” လို့ ပြောပါတယ်။
ဒါအပြင် မနေ့ ဒီဇင်ဘာ ၂၇ ရက်၊ မနက် ၈ နာရီခွဲ ဝန်းကျင်က နေပြည်တော်၊ လယ်ဝေးမြို့နယ်၊ စံဝါအောင်း ကျေးရွာမှာရှိတဲ့ အထက်တန်းကျောင်းခွဲ မဲရုံအနီးမှာ ဗုံးပေါက်ကွဲမှု ဖြစ်ပွားခဲ့တယ်လို့ ဒေသခံတွေက ပြောပါတယ်။
“ကားပေါ်ကနေ ပစ်ချသွားတာလို့ ‌သိရတယ်။ ပေါက်ကွဲသံကတော့ တော်တော်ပြင်းတယ်။ တော်တော်ဝေးဝေးကကို ကြားကြတယ်ပြောတယ်။ လူထိခိုက်တာတော့ မရှိဘူး” လို့ ဒေသခံတယောက်က ပြောပါတယ်။
နိုင်ငံရေး အပြောင်းအလဲဖြစ်ပြီး ငါးနှစ်နီးပါးအကြာမှာ ပြုလုပ်တဲ့ ရွေးကောက်ပွဲ အပိုင်း (၁) မှာ မြဝတီ၊ ထားဝယ်၊ လွိုင်ကော်၊ မန္တလေး၊ ပြည်၊ လယ်ဝေး၊ မုံရွာမြို့တွေမှာ ပေါက်ကွဲမှုတွေဖြစ်ခဲ့ပြီး မြဝတီဖြစ်စဉ်မှာတော့ လူသေဆုံးတဲ့အထိ ရှိခဲ့ပါတယ်။