အက်သလက်တီကိုအသင်းကို အနိုင်ယူခဲ့တဲ့ပုံစံက ချန်ပီယံပြေးလမ်းအတွက် အဆုံးအဖြတ်ဖြစ်နိုင်တယ်လို့ ရာဖင်ညာ ပြောကြား

ဘာစီလိုနာအသင်းရဲ့ တိုက်စစ်ကစားသမား ရာဖင်ညာက အက်သလက်တီကိုအသင်းကို အနိုင်ယူခဲ့တဲ့ပုံစံက ချန်ပီယံပြေးလမ်းအတွက် အဆုံးအဖြတ်ဖြစ်နိုင်တယ်လို့ ပြောကြားခဲ့ပါတယ်။
မနေ့က ယှဉ်ပြိုင်ကစားခဲ့တဲ့ လာလီဂါကြိုကန်ပွဲမှာ ဘာစီလိုနာအသင်းက အက်သလက်တီကိုအသင်းကို (၃-၁)ဂိုးနဲ့ အနိုင်ယူပြီး လာလီဂါမှာ (၅)ပွဲဆက်အနိုင်ရရှိအောင် စွမ်းဆောင်နိုင်ခဲ့ပါတယ်။
အက်သလက်တီကိုနဲ့ပွဲမှာ ပြိုင်ဘက်အသင်းက ပွဲအစ(၁၉)မိနစ်ကတည်းက ဦးဆောင်ဂိုးသွင်းခဲ့ပေမဲ့ ဘာစီလိုနာအသင်းက (၃)ဂိုးပြန်သွင်းကာ ဂိုးပြတ်နိုင်ပွဲ ရယူခဲ့တာဖြစ်ပြီး ချေပဂိုးကို ရာဖင်ညာက (၂၆)မိနစ်မှာ သွင်းယူခဲ့တာပါ။
ရာဖင်ညာဟာ ပေါင်ခြံဒဏ်ရာကြောင့် ဘာစီလိုနာအသင်းရဲ့ ပွဲစဉ်(၉)ပွဲကို လွဲချော်ခဲ့ရပြီး ဘီလ်ဘာအိုနဲ့ပွဲမှာမှ ပြန်ကစားနိုင်တာဖြစ်သလို၊ ဒီပွဲမှာ ဂိုးသွင်းနိုင်တာက စက်တင်ဘာလနောက်ပိုင်း ပထမဆုံးဂိုးလည်း ဖြစ်ခဲ့ပါတယ်။
''ကျွန်တော်တို့ တစ်ပွဲထက်တစ်ပွဲ ယုံကြည်မှုမြင့်တက်လာတယ်လို့ ထင်ပါတယ်။ ဒီပွဲက လာလီဂါရဲ့ ပွဲကြီးပွဲကောင်းတစ်ပွဲဖြစ်ပြီး ဒီလိုမျိုး အနိုင်ယူခဲ့တဲ့ပုံစံက ချန်ပီယံပြေးလမ်းအတွက် အဆုံးအဖြတ်ဖြစ်နိုင်ပါတယ်။ ကျွန်တော်တို့ တစ်ပွဲပြီးတစ်ပွဲ အမှတ်ပြည့်ယူနိုင်ခဲ့ရင် အရာအားလုံးက ပိုကောင်းလာမှာပါ'' လို့ ရာဖင်ညာက ပြောကြားခဲ့ပါတယ်။
အက်သလက်တီကိုနည်းပြ ဆီမြွန်နီကတော့ ရာဖင်ညာရဲ့ခြေစွမ်းကို ချီးကျူးခဲ့ပြီး Ballon d'or ဆု မရသေးတဲ့အတွက် မယုံနိုင်အောင်ဖြစ်မိတယ်လို့ ပြောကြားခဲ့ပါတယ်။

မန်စီးတီးသို့ ရောက်လာပြီး သုံးလအကြာမှာဘဲ ဘယ်သူမှ မလိုချင်တဲ့ ပရီးမီးယားလိဂ်မှတ်တမ်းဆိုး ပိုင်ဆိုင်ဖို့ နီးစပ်နေတဲ့ ဒွန်နာရမ်မာ
=================

ဂီယန်လူဂီဒွန်နာရမ်မာဟာ မန်စီးတီးသို့ ရောက်လာပြီး သုံးလအကြာမှာဘဲ ပရီးမီးယားလိဂ်သမိုင်းမှတ်တမ်းဆိုးပိုင်ဆိုင်ဖို့ နီးစပ်နေပြီ ဖြစ်ပါတယ်။
အီတလီနံပါတ်တစ်ဂိုးသမားဟာ အဝါကတ်ပြသခြင်းခံရကာ ပွဲပယ်ခံရတဲ့ ပထမဆုံးပရီးမီးယားလိဂ်ဂိုးသမားအဖြစ် သမိုင်းမှတ်တမ်းတင်နိုင်ဖို့ လက်တစ်ကမ်းအလိုသို့ ရောက်နေတာလည်း ဖြစ်ပါတယ်။
သူဟာ အပြောင်းအရွှေ့ဈေးကွက်နောက်ဆုံးနေ့တွင် ပီအက်စ်ဂျီမှ ပြောင်းလာပြီးနောက် မန်စီးတီးအတွက် ၁၀ ပွဲကစားတည်းသာ ကစားထားရပါသေးတယ်။
သူဟာ စနေနေ့တုန်းက လိဒ်ကို ၃-၂ ဖြင့် အနိုင်ရတဲ့ပွဲစဉ်ရဲ့ ဒုတိယပိုင်းတွင် အဝါကတ်ပြသခြင်းခံရပြီးနောက် စတုတ္ထမြောက် အဝါကတ်ပြသခြင်းခံခဲ့ရပါတယ်။
သူဟာ မန်စီးတီးတွင် ကစားစဉ်အတွင်း ပြစ်ဒဏ်ကျူးလွန်မှုအတွက် အဝါကတ် ၃ ကြိမ်၊ အချိန်ဆွဲမှုကြောင့် အဝါကတ် ၁ ကြိမ် ပြသခြင်းခံထားရပါတယ်။
အသက် ၂၆ နှစ်ရှိ အီတလီလက်ရွေးစင်ဂိုးသမားဟာ ယနေ့ည ဖူလ်ဟမ်နှင့်ပွဲအပြင် နောက်ထပ် လာမယ့် လိဂ်ပွဲ ၅ ပွဲတွင် အဝါကတ်ပြသခြင်းခံလာရပါက ၁ ပွဲပယ်ခံလာရပါမယ်။
သူဟာ ယခုရာသီ ၁၉ ပွဲမြောက်ပွဲအဖြစ် နှစ်သစ်ကူးနေ့ ဆန်းဒါးလန်းပွဲအထိ အဝါကတ်နောက်ထပ် ပြသခြင်းမခံရပါက အဝါကတ် ၁၀ ကတ်ပြည့်မှသာ ပွဲပယ်ခံရပါမယ်။
တဖက်တွင် မန်စီးတီးနည်းပြပက်ဂွါဒီယိုလာအနေဖြင့် ဒွန်နာရမ်မာ ပွဲပယ်ခံရပါကလည်း အသုံးပြုရန် အင်္ဂလန်ဂိုးသမားဂျိမ်းစ်ထရက်ဖို့ဒ် ရှိနေပါတယ်။
ဂျိမ်းစ်ထရက်ဖို့ဒ်ဟာ နွေရာသီတွင် ဘန်လေမှ ပေါင် ၃၁ သန်းဖြင့် မန်စီးတီးသို့ ပြန်လည် ပြောင်းလာပြီးနောက် နံပါတ် ၁ ဂိုးသမားအဖြစ် ၆ ပွဲကစားခွင့်ရခဲ့ပေမယ့်လည်း ဒွန်နာရမ်မာ ရောက်လာပြီးနောက် အရန်ဂိုးသမားအဖြစ် ကစားနေရပါတယ်။

ပွဲစတင်ခါနီးအချိန်တွင်မှ နည်းဗျူဟာပိုင်း အပြောင်းအလဲ ပြုလုပ်တတ်တဲ့ သောမတ်စ်ဖရန့်အပေါ်တွင် စပါးစ်စတားများ အကြီးအကျယ် စိတ်ပျက်လျက်ရှိ
===================

စပါးစ်ကစားသမားများဟာ ပွဲကစားရန် အချိန်ကပ်နေချိန်တွင်မှ ဗျူဟာပိုင်း အပြောင်းအလဲ ပြုလုပ်တတ်တဲ့ သောမတ်စ်ဖရန့်ရဲ့ လုပ်ဆောင်မှုများအပေါ်တွင် စိတ်ပျက်လျက်ရှိကြောင်း သိရပါတယ်။
စပါးစ်အဝတ်အစားလဲခန်းနှင့် နီးစပ်တဲ့ သတင်းအရင်းအမြစ်က ကစားသမားများမှာ ပွဲကစားရန် နီးကပ်နေတဲ့အချိန် (သို့မဟုတ်) ပွဲအစောပိုင်းတို့တွင်ပင် ယခင် စီစဉ်ထားတဲ့ ဗျူဟာကို အပြောင်းအလဲ ပြုလုပ်ခြင်း၊ လုံးဝ ပြောင်းလဲခြင်းတို့ ပြုလုပ်ကာ ကစားသမားများရဲ့ တာဝန်အား အပြောင်းအလဲ လုပ်မှုအပေါ် စိတ်ပျက်နေကြောင်း ဆိုသွားပါတယ်။
သောမတ်စ်ဖရန့်ဟာ ယခုရာသီ ပရီးမီးယားလိဂ်တွင် အိမ်ကွင်း ၁ ပွဲတည်းသာ အနိုင်ရရှိထားမှုနှင့်အတူ ဖိအားများအောက်သို့ ကျရောက်နေသူ ဖြစ်ပါတယ်။
ဒါပေမယ့် ယနေ့ည နယူးကာဆယ်နှင့်ပွဲမတိုင်မီ သတင်းစာရှင်းလင်းပွဲမှာတော့ ဒိန်းမတ်လူမျိုးနည်းပြက စပါးစ်ပိုင်ရှင်များရဲ့ ထောက်ခံအားပေးမှု အပြည့်အဝ ရရှိထားတယ်လို့ ယုံကြည်ကြောင်း ဆိုထားပါတယ်။
စပါးစ်စတားအချို့တို့ဟာ ပြီးခဲ့တဲ့အပတ်တုန်းက ပီအက်စ်ဂျီကို ရှုံးနိမ့်တဲ့ ပွဲစဉ်အတွင်းတွင် ဖရန့်ရဲ့ ဗျူဟာအပြောင်းအလဲကြောင့် ပွဲအတွင်း မည်သည့်တာဝန်ယူရမည်ကိုပင် ရေရေရာရာ မသိတော့တဲ့ အခြေအနေမျိုးသို့ ရောက်သွားခဲ့ပါတယ်။
ယင်းပွဲတွင် စပါးစ်ဟာ ချန်ပီယံလိဂ်ချန်ပီယံကို နှစ်ကြိမ်တိုင်တိုင် ဦးဆောင်ကစားနိုင်ခဲ့ပြီးမှ ၅ ဂိုးအထိ ပေးရကာ အမှတ်ဗလာဖြင့် ပါရီမှ ပြန်ခဲ့ရတာပါ။
တဖက်တွင် စပါးစ်ကစားသမားအချို့တို့ဟာ ဖရန့်လက်အောက်တွင် ကစားရတာ ပျော်ရွှင်နေပေမယ့် ယခုကဲ့သို့ ကစားသမားအချို့ စိတ်ပျက်နေမှုနှင့်အတူ ရလဒ်ပိုင်း ဆိုးရွားနေပါက အသင်းအတွင်း စည်းလုံးမှု ပျက်ပြယ်လာမှာကို စိုးရိမ်နေကြရပါတယ်။
ဖရန့်ရဲ့ စပါးစ်ဟာ ပြိုင်ပွဲအရပ်ရပ် နောက်ဆုံး ၇ ပွဲတွင် ၁ ပွဲတည်းသာ အနိုင်ရထားပြီး နောက်ဆုံး ၃ ပွဲတွင် ၁၁ ဂိုးအထိ ပေးထားရပါတယ်။

ကိုယ်ရေးကိုယ်တာပြဿနာကြုံနေတဲ့ အရူဂျိုအား ဘာစီလိုနာ ခွင့်ပေးလာ
====================

ဘာစီလိုနာစတားရိုနယ်အရူဂျိုဟာ ကိုယ်ရေးကိုယ်တာ ပြဿနာများကြောင့် ကလပ်ရဲ့ ခွင့်ပေးခြင်းခံလာရပါတယ်။
ဗဟိုနောက်ခံလူဟာ ပြီးခဲ့တဲ့အပတ် အလာဗက်စ်အား ၃-၁ ဖြင့် အနိုင်ရတဲ့ပွဲစဉ်တွင် ဘာစီလိုနာလူစာရင်းတွင် ပါဝင်ခဲ့ခြင်း မရှိပါဘူး။
သူဟာ ယင်းပွဲမတိုင်မီ ချဲလ်ဆီးကို ရှုံးနိမ့်တဲ့ ချန်ပီယံလိဂ်ပွဲစဉ်တုန်းက အနီကတ်ပြထုတ်ပယ်ခြင်းခံခဲ့ရသူလည်း ဖြစ်ပါတယ်။
ယခုအခါ အသက် ၂၆ နှစ်ရှိနောက်ခံလူဟာ အေးဂျင့်နှင့် အားကစားဒါရိုက်တာဒေကိုတို့အကြား တွေ့ဆုံဆွေးနွေးမှု ပြုလုပ်ပြီးချိန်မှာတော့ ခွင့်ပေးခြင်းခံလာရကြောင်း The Athletic ရဲ့ ဖော်ပြမှုအရ သိရပါတယ်။
အရူဂျိုဘက်က ကိုယ်ရေးကိုယ်တာပြဿနာကို ဖြေရှင်းရန် ခွင့်ပေးရန် တောင်းဆိုခဲ့တယ်လို့ ယူဆရပါတယ်။
ဘာစီလိုနာဥက္ကဌလာပေါ်တာက ခက်ခဲတဲ့ကာလကြုံနေရတဲ့ အရူဂျိုအား လူသိရှင်ကြား ထောက်ခံအားပေးစကား ပြောဆိုထားပါတယ်။
ဘာစီလိုနာနည်းပြဟန်ဆီဖလစ်ကလည်း "ဒါက ကိုယ်ရေးကိုယ်တာကိစ္စပါ။ အများကြီး မပြောလိုပါဘူး။ လေးစားတယ်ဆိုရင် ထပ်မမေးပါနဲ့။ ဒီအတွက် ကျေးဇူးတင်ပါတယ်"လို ဆိုသွားပါတယ်။

၂၀၂၆ ကမ္ဘာ့ဖလားတွင် ယူနိုက်တက်ရဲ့ ကြီးကျယ်ခမ်းနားတဲ့ စံချိန် ကျိုးပျက်လာဖို့ ရှိနေ
======================

ကမ္ဘာ့ဖလား ၁၄ ကြိမ် ဆက်တိုက် အင်္ဂလန်အသင်းလူစာရင်းမှာ ယူနိုက်တက်ကစားသမား အနည်းဆုံး ၁ ဦး ပါဝင်လာခဲ့ပါတယ်။
၁၉၅၈ ဘရာဇီးကမ္ဘာ့ဖလားပြိုင်ပွဲတုန်းက ဘော်လ်ဘီချာလ်တန်မှ စတင်ပြီး ၂၀၂၂ ကာတာကမ္ဘာ့ဖလားမှာ လုပ်ခ်ရှော၊ ဟယ်ရီမက်ဂွိုင်းယား၊ မားကပ်စ်ရက်ဖို့ဒ်တို့အထိ ၆၄ နှစ်ဆက်တိုက် ယူနိုက်တက်မှ ကစားသမားတွေ အင်္ဂလန်ရဲ့ ကမ္ဘာ့ဖလားလူစာရင်းမှာ ပါဝင်တဲ့ တစ်သင်းတည်းသော အသင်းအဖြစ် ရပ်တည်လာခဲ့တာပါ။
ဒါပေမယ့် ယူနိုက်တက်ရဲ့ ကြီးကျယ်ခမ်းနားလှတဲ့ မှတ်တမ်းဟာ လာမယ့်နှစ် မြောက်အမေရိကမှာ ကျင်းပမယ့် ကမ္ဘာ့ဖလားမှာတော့ ကျိုးပျက်လာဖို့ ရှိနေပါတယ်။
ယခုနှစ်အတွင်းမှာ သောမတ်စ်တူချယ်ဟာ တစ်ဦးတည်းသော ယူနိုက်တက်ကစားသမားအဖြစ် ဗီလာနှင့် ဘာစီလိုနာမှာ အငှားဖြင့် သွားကစားနေတဲ့ မားကပ်စ်ရက်ဖို့ဒ်ကိုပဲ ရွေးချယ်လာပါတယ်။
ရက်ဖို့ဒ်က အခြားအသင်းမှာ အငှားဖြင့် ကစားနေတယ်ဆိုပေမယ့်လည်း ယူနိုက်တက်ကစားသမားအဖြစ် ရှိနေတုန်း ဖြစ်ပါတယ်။
ဒါပေမယ့် ယခုရာသီအကုန်တွင် ရက်ဖို့ဒ်ဟာ ဘာစီလိုနာသို့ ပေါင်သန်း ၃၀ ဖြင့် အပြီးသတ်ပြောင်းရွှေ့လာဖို့ ရှိနေတာကြောင့် ယူနိုက်တက်ကိုယ်စားပြု ကစားလာဖို့ မရှိပါဘူး။
လုခ်ရှော၊ ဟယ်ရီမက်ဂွိုင်းယား၊ ကိုဘီမိုင်နူးနှင့် မေဆင်မောင့်တို့မှာလည်း တူချယ်ရဲ့ ကမ္ဘာ့ဖလားလူစာရင်းမှာ ရွေးချယ်ခံရဖို့ မရေမရာ ဖြစ်နေပါတယ်။
လုခ်ရှောမှာ ၂၀၂၄ ခုနှစ် ဇူလိုင်လတုန်းက စပိန်နှင့် ယူရို ၂၀၂၄ ဗိုလ်လုပွဲကတည်းက အင်္ဂလန်အသင်းမှာ ကစားခွင့်မရလာခဲ့ပါဘူး။ မက်ဂွိုင်းယားနှင့် လုခ်ရှောတို့ကလည်း ပြီးခဲ့တဲ့နှစ်စက်တင်ဘာလကတည်းက ရွေးချယ်ခံရခြင်း မရှိပါဘူး။
မေဆင်မောင့်ကတော့ ၂၀၂၂ ဒီဇင်ဘာလတုန်းက ပြင်သစ်နှင့် ကမ္ဘာ့ဖလားကွာတားဖိုင်နယ်ပွဲကတည်းက ရွေးချယ်ခြင်းမခံလာရပါဘူး။
လုခ်ရှောဟာ ယူနိုက်တက်ရဲ့ ယခုရာသီ ပရီးမီးယားလိဂ်ပွဲတိုင်း ပွဲထွက်ကစားခွင့်ရနေပေမယ့်လည်း အင်္ဂလန်အသင်းမှာ ရွေးချယ်ခံလာရခြင်း မရှိပါဘူး။
တူချယ်ဟာ ဗဟိုနောက်ခံလူနေရာအတွက် ဂျွန်စတုန်း၊ မာ့ခ်ဂူဟီ၊ အက်ဇ်ရီကွန်ဆာတို့ ရှိနေတဲ့အပြင် ဒန်ဘန်းနှင့် ဂျာရဲလ်ကွန်ရှာတို့သာ အားပြုနေပါတယ်။
ဒါပေမယ့် တူချယ်အနေဖြင့် လုခ်ရှောကို ရွေးချယ်လာမည်ဆိုပါက ဗဟိုခံစစ်အတွက်သာမက ဘယ်နောက်ခံလူနေရာအတွက်လည်း အားကိုးလာရပါမယ်။
ဟယ်ရီမက်ဂွိုင်းယားမှာ ဆောက်ဂိတ်လက်ထက်တုန်းက အဓိက ကစားသမားအဖြစ် ပုံမှန်ကစားခွင့်ရလာပေမယ့်လည်း ယာယီနည်းပြလီးကာစလေလက်ထက်မှ စတင်ကာ ချန်လှပ်ခံလာရပါတယ်။
မိုင်နူးမှာ ယူရို ၂၀၂၄ ပြိုင်ပွဲတုန်းက အင်္ဂလန်အတွက် အရေးပါတဲ့ အခန်းကဏ္ဍမှ ကစားခဲ့ပေမယ့်လည်း ယူနိုက်တက်တွင် ပုံမှန်ကစားခွင့်ပျောက်နေမှုနှင့်အတူ ရွေးချယ်ခံလာရဖို့ မရှိပါဘူး။
တကယ်လို့များ မိုင်နူးအနေဖြင့် ဇန်နဝါရီတွင် ပုံမှန်ကစားခွင့်ရမယ့် အသင်းတစ်သင်းသိ့ ပြောင်းရွှေ့ကစားပြီး ခြေစွမ်းပြလာနိုင်ပါက အင်္ဂလန်အသင်းတွင် နေရာရလာနိုင်ပေမယ့် အရန်အဖြစ်သာ ကစားခွင့်ရလာဖို့ ရှိပါတယ်။
မေဆင်မောင့်မှာ ယခုရာသီတွင် ဒဏ်ရာပြဿနာမှ လွတ်မြောက်လာပြီးနောက် အရေးပါတဲ့ ကစားသမားအဖြစ် ကစားနေသူ ဖြစ်ပြီး ပဲလေ့စ်နှင့်ပွဲတွင် အဖိုးတန်အနိုင်ဂိုးသွင်းခဲ့ပါတယ်။
သူဟာ ချဲလ်ဆီးတွင် တူချယ်လက်အောက်မှာ ကစားခဲ့ဖူးပေမယ့် ရက်ဖို့ဒ်၊ အီးဇီး၊ အန်တိုနီဂေါ်ဒွန်၊ ဘူကာယိုဆာကာ၊ ဖီးလ်ဖိုဒန်၊ ကိးလ်ပါလ်မာ၊ မော်ဂန်ရိုဂျာ၊ ဂျူ့ဘယ်လင်ဂမ်တို့ ရှိနေမှုနှင့်အတူ ရွေးချယ်ခံရရန် ခက်ခဲနေပါတယ်၊
ဒါပေမယ့် ၄-၂-၃-၁ ကစားကွက်ကို အသုံးပြုနေတဲ့ တူချယ်ဟာ ဘယ်လင်ဂမ် (သို့မဟုတ်) ရိုဂျာတို့ ဒဏ်ရာရရှိလာပါက မေဆင်မောင့်ကို ရွေးချယ်ရေး အလေးအနက်ထား စဉ်းစားလာနိုင်ပါတယ်။

ဖခင်ရဲ့ ခြေရာနင်းကာ ချဲလ်ဆီးနှင့် ပရော်ဖက်ရှင်နယ်စာချုပ်ချုပ်ဆိုလာတဲ့ တီယာဂိုဆေးလ်ဗားရဲ့သား
=====================

တီယာဂိုဆေးလ်ဗားရဲ့သားအိုင်ဆာဂိုဟာ ချဲလ်ဆီးနှင့် ပထမဆုံး ပရော်ဖက်ရှင်နယ်စာချုပ်ချုပ်ဆိုကာ ဖခင်ဖြစ်သူရဲ့ခြေရာကို နင်းလာပါတယ်။
အသက် ၁၇ နှစ်ရှိ အိုင်ဆာဂိုဟာလည်း ဖခင်ဖြစ်သူကဲ့သို့ပင် နောက်ခံလူတစ်ဦးဖြစ်ပြီး တစ်နေ့တွင် ချဲလ်ဆီးပထမအသင်းအတွက် အားကိုးရတဲ့သူတစ်ဦးဖြစ်လာမယ်လို့ မျှော်လင့်ခြင်းခံထားရသူလည်း ဖြစ်ပါတယ်။
တီယာဂိုဆေးလ်ဗားဟာ ၂၀၂၀ ခုနှစ်တွင် ပီအက်စ်ဂျီမှ ထွက်ခွာလာပြီးနောက် ချဲလ်ဆီးအတွက် ၄ နှစ်ကစားစဉ်အတွင်း ၁၅၅ ပွဲကစားခဲ့ကာ ၂၀၂၁ ခုနှစ် ချန်ပီယံလိဂ်ဖလား ဆွတ်ခူးနိုင်ခဲ့ပါတယ်။
ဆေးလ်ဗားဟာ ဘရာဇီးအသင်းအတွက် ၁၁၃ ပွဲကစားခဲ့ကာ ၂၀၂၂ ခုနှစ်တုန်းက လက်ရွေးစင်ကစားသမားဘဝမှ အနားယူခဲ့သူ ဖြစ်ပါတယ်။
အသက် ၄၁ နှစ်ရှိ ဆေးလ်ဗားဟာ ဖလာမင်ဂိုတွင် ကစားနေဆဲ ဖြစ်ပြီး ကစားသမားဘဝမှ အနားယူရန် အစီအစဉ် မရှိသေးသလို ဥရောပသို့ ပြန်လည်ခြေချလာမယ်လို့လည်း သတင်းထွက်နေပါတယ်။
သူဟာ ဘရာဇီးတွင် ဘောလုံးဆက်ကစားနေပေမယ့်လည်း သားသမီးများနှင့် ဇနီးသည်ကတော့ လန်ဒန်မှာ နေထိုင်နေတုန်း ဖြစ်ပါတယ်။ အိုင်ဆာဂိုရဲ့ ညီအီယာဂိုမှာလည်း ချဲလ်ဆီးအကယ်ဒမီတွင်ပင် ကစားနေပါတယ်။
အိုင်ဆာဂိုဆေးလ်ဗားဟာ ချဲလ်ဆီးအကယ်ဒမီသို့ ရောက်လာပြီးနောက် ယူ-၁၃ တွင် စတင်ကစားခဲ့သူ ဖြစ်ပြီး ပြီးခဲ့တဲ့ရာသီမှ စတင်ကာ ချဲလ်ဆီးယူ-၁၈ မှာ စတင်ကစားခွင့်ရလာခဲ့ပါတယ်။
သူဟာ ယခုရာသီတွင် ချဲလ်ဆီးယူ-၁၇ နှင့် ယူ-၁၈ တို့တွင် ပုံမှန်ကစားခွင့်ရနေသူ ဖြစ်ပြီး ချဲလ်ဆီးရဲ့ ချန်ပီယံလိဂ်အတွက် အကယ်ဒမီ ကစားသမား ၃၃ ဦးစာရင်းမှာ ထည့်သွင်းခြင်းခံထားရပါတယ်။

ရေငုံပြီး ထွေးထုတ်တတ်တဲ့ ခရစ္စတီယာနိုရော်နယ်ဒိုရဲ့ အမူအကျင့် နောက်ကွယ်မှ သိပ္ပံအကြောင်းရင်း
=====================

ခရစ္စတီယာနိုရော်နယ်ဒိုဟာ ဘောလုံးပွဲတွေမှာ ရေငုံပြီး ထွေးထုတ်ပစ်လေ့ ရှိပါတယ်။ ခရစ္စတီယာနိုရော်နယ်ဒိုဟာ ရေကို မသောက်ဘဲ ထွေးထုတ်ပစ်လာတာပါ။
ဒီလို လုပ်ဆောင်မှုရဲ့‌နောက်ကွယ်မှာ သိပ္ပံဆိုင်ရာ အကြောင်းပြချက်ရှိနေပါတယ်။
အသက် ၄၀ နှစ်ရှိ Al Nassr နှင့် ပေါ်တူဂီစူပါစတားဟာ စပို့တင်းလစ္စဘွန်း၊ ယူနိုက်တက်၊ ရီးရဲလ်မက်ဒရစ်၊ ဂျူဗင်တပ်တို့မှာ အောင်မြင်မှုတွေ များစွာ ရရှိခဲ့သလို လက်ရှိ ကလပ် Al Nassr မှာလည်း ထိပ်တန်းအဆင့်မှာ ကစားနိုင်တုန်း ဖြစ်ကြောင်း ပြသနေဆဲ ဖြစ်ပါတယ်။
သူဟာ ၂၀၀၉ ခုနှစ်တုန်းက ရီးရဲလ်မက်ဒရစ်သို့ ထိုစဉ်တုန်းက ကမ္ဘာ့စံချိန်တင်ပြောင်းရွှေ့ကြေး ပေါင်သန်း ၈၀ ဖြင့် ပြောင်းပြီးနောက် ချန်ပီယံလိဂ်ဖလား ၄ ကြိမ်၊ လာလီဂါဖလား ၂ ကြိမ် ရခဲ့သလို ရီးရဲလ်မက်ဒရစ်သမိုင်းတွင် ဂိုးအများဆုံးသွင်းယူသူဖြစ်လာခဲ့ပါတယ်။
ယင်းနောက် သူဟာ ၂၀၁၈ ခုနှစ်တွင် ဂျူဗင်တပ်သို့ ယူရိုသန်း ၁၀၀ ဖြင့် ပြောင်းခဲ့ပြီး စီးရီးအေဖလား ၂ လုံး ရရှိပြီးနောက် ၂၀၂၁ ခုနှစ်တွင် အသင်းဟောင်း ယူနိုက်တက်သို့ ပြန်ခဲ့ပါတယ်။
သူ့ရဲ့ ယူနိုက်တက်ဒုတိယမြောက်ကစားသမားဘဝက လှပခဲ့ခြင်း မရှိဘဲ ကလပ်ကို လူသိရှင်ကြားဝေဖန်မှုကြောင့် ၂၀၂၂ ခုနှစ် နိုဝင်ဘာလမှာ စာချုပ်ဖျက်သိမ်းခြင်းခံခဲ့ရပါတယ်။
သူဟာ လက်ရှိအချိန်မှာ Al Nassr မှာ ကစားနေပြီး ယင်းမှာဘဲ ကစားသမားဘဝမှ အနားယူလာဖို့ ရှိနေပါတယ်။
ပေါ်တူဂီအသင်းတွင်လည်း သူဟာ ပွဲ ၂၆၀ ကစားပြီး ၁၆၁ ဂိုးသွင်းထားကာ နိုင်ငံရဲ့ ပွဲအများဆုံးကစားထားသူ၊ ဂိုးအများဆုံးသွင်းယူထားသူအဖြစ် မှတ်တမ်းရေးထိုးထားသလို ယူရို ၂၀၁၆ ဖလားရထားပါတယ်။ ဒါ့အပြင် သူဟာ နေးရှင်းလိဂ်ဖလား ၂ ကြိမ်လည်း ရရှိထားပါသေးတယ်။
ရော်နယ်ဒိုဟာ ပရော်ဖက်ရှင်နယ်အလွန်အမင်းပီသမှုနှင့်အတူ ကွင်းတွင်း ကွင်းပြင် စနစ်တကျနေထိုင်စားသောက်တာကြောင့် အသက် ၄၀ နှစ်အရွယ်သို့ ရောက်တဲ့တိုင် ထိပ်တန်းအဆင့်မှာ ကစားနိုင်သေးတာလည်း ဖြစ်ပါတယ်။
ယခု ခရစ္စတီယာနိုရော်နယ်ဒိရဲ့ ဘောလုံးပွဲတွေမှာ ရေမသောက်ဘဲ ငုံကာ ထွေးထုတ်တတ်တဲ့ စနစ်ရဲ့ နောက်ကွယ်မှ သိပ္ပံအကြောင်းရင်းကို ဖွင့်ချလာပါတယ်။ တကယ်တော့ ဒီစနစ်ကို ခရစ္စတီယာနိုရော်နယ်ဒိုအပြင် အခြားကစားသမားတွေလည်း လုပ်တတ်ပါတယ်။
ရေမသောက်ဘဲ ငုံပြီး ထွေးထုတ်တဲ့အလွန်ကောင်းတဲ့ အပြုအမူတစ်ခုလို့ သိပ္ပံပညာက ဆိုထားပါတယ်။
ရေငုံမှုကြောင့် ပါးစပ်အာရုံခံကိရိယာများကို အသက်ဝင်လာစေခြင်း၊ မောပန်းနွမ်းနယ်မှုကို လျှော့ချခြင်း၊ ရေမမြိုချဘဲ စွမ်းအင်ခံစားရစေခြင်းတို့ ဖြစ်ပေါ်စေကြောင်း သိပ္ပံပညာက ရှင်းလင်းထားပါတယ်။
ဒါ့အပြင် အားကစားသမားတို့အနေဖြင့် ရေသောက်မှုကြောင့် ပြင်းထန်သော အားကစားလုပ်နေချိန်တွင် အစာအိမ်ကို နာကျင်မှု ဖြစ်စေနိုင်ပါတယ်။ အများအားဖြင့် ကစားသမားတွေက ရေများများသောက်ပြီး ရေဓာတ်မခန်းအောင် ရေများများသောက်ခြင်းအား ပွဲအတွင်း ပြုလုပ်လေ့မရှိဘဲ ပွဲမတိုင်မီနှင့် ပထမပိုင်းပြီးချိန်တို့မှာဘဲ ပြုလုပ်လေ့ရှိပါတယ်။

ပရီးမီးယားလိဂ်ရာပြည့်ဂိုးစံချိန်သစ်အား အာလင်းဟာလန်း ရေးထိုးလာ
====================

အာလင်းဟာလန်းဟာ ပရီးမီးယားလိဂ်ဂိုးရာပြည့်ခဲ့ပြီဖြစ်ပြီး အလန်ရှီးယားရဲ့ အမြန်ဆုံးပရီးမီးယားလိဂ်ဂိုးရာပြည့်တဲ့စံချိန်အား ရိုက်ချိုးလာကာ ပရီးမီးယားလိဂ်သမိုင်းတွင် အမြန်ဆုံးဂိုးရာပြည့်သွင်းနိုင်သူအဖြစ် သမိုင်းမှတ်တိုင်သစ်စိုက်ထူလာပါတယ်။
အသက် ၂၅ နှစ်ရှိ နော်ဝေတိုက်စစ်မှူးဟာ အင်္ဂါနေ့ညတုန်းက ဖူလ်ဟမ်ကို ၄-၅ ဂိုးဖြင့် အနိုင်ရတဲ့ပွဲမှာ ပရီးမီးယားလိဂ်ရာပြည့်ဂိုးအား သွင်းလာခဲ့တာလည်း ဖြစ်ပါတယ်။
မန်စီးတီးတိုက်စစ်မှူးဟာ ယခုရာသီတွင်လည်း အကောင်းဆုံးပုံစံ ဆက်လက်ပြသနေပြီး ပြိုင်ပွဲအရပ်ရပ် ၁၉ ပွဲတွင် ဂိုး ၂၀ အထိ သွင်းထားပါတယ်။
သူဟာ ဖူလ်ဟမ်နှင့်ပွဲမတိုင်မီ သုံးပွဲဆက် ဂိုးပေါက်ပျောက်နေခဲ့တာလည်း ဖြစ်ပါတယ်။ သူဟာ နယူးကာဆယ်နှင့် လေဗာကူဆင်ရှုံးပွဲနဲ့ ပြီးခဲ့တဲ့အပတ်က လိဒ်အား အနိုင်ရတဲ့ပွဲတို့မှာ ဂိုးပေါက်ပျောက်ခဲ့တာပါ။
သူဟာ မနေ့ညက ပွဲမှာတော့ ဒိုကူရဲ့ဖြတ်တင်ဘောကနေ လှပတဲ့ အဆုံးသတ်ဖြင့် မန်စီးတီးအတွက် ဦးဆောင်ဂိုးသွင်းကာ ပရီးမီးယားလိဂ်ဂိုးရာပြည့်ခဲ့ပါတယ်။
အာလင်းဟာလန်းက "ဂုဏ်ယူရတဲ့ အခိုက်အတန့်ပါ။ ကလပ်ဂိုးရာပြည့်တာ ကြီးကျယ်တဲ့အရာတစ်ခုပါ။ အမြန်ဆုံးသွင်းနိုင်တယ်ဆိုတော့ ပိုပြီးတော့ အံ့ဩစရာကောင်းတာပေါ့။ ဂုဏ်ယူတယ်၊ ပျော်လည်း ပျော်တယ်။ မန်စီးတီးအတွက် တိုက်စစ်မှူးတစ်ဦးဆိုတာ ဂိုးအများကြီးသွင်းဖို့လိုတယ်လို့ အကြိမ်များစွာပြောခဲ့ဖူးပါတယ်။ ဒါက ကျွန်တော့်အလုပ်ပါ။ ဒီအတွက်ပဲ ကြိုးစားနေတာပါ။ ပြီးတော့ ဒီနေရာမှာ ကျွန်တော်မဆိုးပါဘူး"လို့ ပြောကြားသွားပါတယ်။
အင်္ဂါနေ့မှာ ဂိုးရာပြည့်ခဲ့တဲ့ အာလင်းဟာလန်းအတွက် ၁၀၁ ဂိုးမြောက်ဂိုး၊ ၁၀၂ ဂိုးမြောက်ဂိုးတို့ဆိုတာ အလွယ်တကူ ရောက်လာဦးမှာပါ။
ဖူလ်ဟမ်နှင့်ပွဲမှာ သူဟာ ၂ ကြိမ်တိုင်တိုင် တိုင်ထိခဲ့ပါသေးတယ်။ ဒါ့အပြင် သူဟာ ဖန်တီးမှု ၂ ကြိမ်လည်း လုပ်ပြနိုင်ခဲ့ပါတယ်။
ယခုအခါ သူဟာ ပရီးမီးယားလိဂ်သွင်းဂိုး ၁၅ ဂိးဖြင့် ဂိုးသွင်းဘုရင်စာရင်းကို ထိပ်ဆုံးမှ ဦးဆောင်နေပါတယ်။ တဖက်မှာ ဘရန့်ဖို့ဒ်တိုက်စစ်မှူးတီယာဂိုကလည်း ၁၁ ဂိုးနဲ့ နောက်ကနေ ကပ်လိုက်နေပါတယ်။
သူဟာ ၂၀၂၂ ခုနှစ် နွေရာသီမှာ ဒေါ့မွန်ကနေ ပြောင်းလာပြီးတဲ့နောက် ၁၁၁ ပွဲဖြင့် ဂိုး ၁၀၀ ပြည့်သွင်းခဲ့ကာ အလန်ရှီးယားရဲ့ ၁၂၄ ပွဲဖြင့် ရာပြည့်စံချိန်အား ရိုက်ချိုးနိုင်ခဲ့တာလည်း ဖြစ်ပါတယ်။
ဒါပေမယ့် အာလင်းဟာလန်းအနေဖြင့် ပရီးမီးယားလိဂ်သမိုင်းတွင် ဂိုးအများဆုံးသွင်းယူထားသူအဖြစ် ဂိုး ၂၆၀ ဖြင့် ရပ်တည်နေတဲ့ အလန်ရှီးယားရဲ့ စံချိန်ကို ရိုက်ချိုးနိုင်ဖို့တော့ အချိန်များစွာပေးရဦးမှာ ဖြစ်ပါတယ်။

စပါးစ်နှင့်ပွဲစဉ်မှ နယူးကာဆယ်ရရှိခဲ့တဲ့ ပင်နယ်တီအပေါ် အာဆင်နယ်ပရိသတ်များပါ ဒေါသထွက်နေကြ
=====================

ပရိသတ်များဟာ စပါးစ်နှင့်ပွဲစဉ်မှ နယူးကာဆယ်အသင်းရရှိခဲ့တဲ့ အငြင်းပွားဖွယ်ပင်နယ်တီနှင့်ပတ်သက်ပြီး ဒေါသထွက်လျက်ရှိကြပါတယ်။
ရိုဒရီဂိုဘန်တန်ကော်က ဒန်ဘန်းကို ပင်နယ်တီဧရိယာအတွင်းတွင် အပြန်အလှန်လုံးထွေးလို့ဆိုပြီး VAR က ပင်နယ်တီပေးခဲ့တာလည်း ဖြစ်ပါတယ်။
ဘန်တန်ကော်က ဘရူနိုဂူမာရေးစ်က ထောင့်ကန်ဘောကန်လိုက်ချိန်တွင် ဒန်ဘန်းကို လက်ဖြင့် ဖက်ထားခဲ့တာပါ။ တဖက်တွင် အရပ် ၆ ပေ၊ ၇ လက်မရှိ ဒန်ဘန်းကလည်း သူ့ထက် များစွာသေးတဲ့ ဘန်တန်ကော်အား အားသုံးကာ အတင်းပြေးခဲ့ပြီး လုံးထွေး လဲကျသွားခဲ့ပါတယ်။
ဒိုင်လူကြီးတွမ်ဘရာမေးလ်က ယင်းကို ပြစ်ဒဏ်ဘောမပေးဘဲ ပွဲကို ဆက်ကစားစေခဲ့ပါတယ်။
ဒါပေမယ့် VAR ဒိုင်ပေါလ်တီယာနေးက ကြားဝင်လာပြီး ဘရာမေးလ်ကို ကွင်းဘေးမော်နီတာတွင် ကြည့်ရှုစစ်ဆေးစေခဲ့ပါတယ်။ ဘရာမေးလ်ဟာ ကွင်းဘေးမော်နီတာတွင် ကြည့်ရှုစစ်ဆေးလာချိန်မှာတော့ စိတ်ပြောင်းလဲသွားခဲ့ပါတယ်။
ယင်းပင်နယ်တီကနေ အန်တိုနီဂေါ်ဒွန်က နယူးကာဆယ်အတွက် ဦးဆောင်ဂိုးသွင်းခဲ့ပါတယ်။ မနေ့ညကပွဲတွင် နယူးကာဆယ်ဟာ ဂူမာရေးစ်၊ ဂေါ်ဒွန်တို့ရဲ့ ဂိုးတွေဖြင့် နှစ်ကြိမ်တိုင်တိုင် ဦးဆောင်ခဲ့ပေမယ့်လည်း စပါးစ်ကလည်း ရိုမီယိုရဲ့ သွင်းဂိုး ၂ ဂိုးဖြင့် ၂ ဂိုးစီသရေကစားနိုင်ခဲ့ပါတယ်။
ပွဲအပြီးတွင် ပရိသတ်တစ်ဦးက "စိန့်ဂျိမ်းစ်ပါ့ခ်မှာ နေ့ခင်းကြောင်တောင် ဓားပြတိုက်ခံရတယ်။ ဘယ်လိုများ ပင်နယ်တီလို့ ဆုံးဖြတ်လိုက်တာလဲ။ ကျုပ် စပါးစ်ကို မုန်းတယ်။ ဒါပေမယ့် ဘယ်လောက်တောင် ဆိုးဝါးလိုက်တဲ့ VAR လဲ။ ငလိမ်တွေ"လို့ ဆိုသွားပါတယ်။
အခြားတစ်ဦးကလည်း "ဒါက ပင်နယ်တီလုံးဝ မဟုတ်ဘူး။ စပါးစ်တို့ လုယက်ခံလိုက်ရတာ"လို့ ဆိုသွားပါတယ်။
အခြားတစ်ဦးကလည်း "ကြည်ဖူးသမျှ ဘောလုံးပွဲတွေထဲမှာ အဆိုးရွားဆုံး ဆုံးဖြတ်ချက်ပဲ။ စပါးစ်တို့ ဆိုးဆိုးရွားရွား လုယက်ခံလိုက်ရတာပဲ"လို့ ဆိုသွားပါတယ်။
စပါးစ်နည်းပြသောမတ်စ်ဖရန့်ကလည်း ယင်းပင်နယ်တီဖြစ်စဉ်တွင် VAR ကြားဝင်လာမှုမှာ လုံးဝအမှားတစ်ခု ဖြစ်ကြောင်း ဝေဖန်သွားပါတယ်။
သောမတ်စ်ဖရန့်က "VAR ရဲ့အမှားပါ။ ဒိုင်လူကြီးက လုပ်သင့်တာ လုပ်ပြီးသွားပြီလေ။ သူတို့က ဒိုင်လူကြီးကို စိတ်ပြောင်းလာလာအောင် လုပ်ခဲ့တာ။ ကျွန်တော့်အတွက်တော့ ဒါက ပင်နယ်တီ မဟတ်ပါဘူး"လို့ ဆိုသွားပါတယ်။
ပရီးမီးယားလိဂ်ကတော့ ဘန်တန်ကော်မှာ ဘောလုံးကို မကြည့်ဘဲ ဒန်ဘန်းကိုသာ လုံးထွေးထိန်းချုပ်ရန် ကြိုးပမ်းနေခြင်းကြောင့် ပင်နယ်တီပေးရခြင်းလို့ ဆိုထားပါတယ်။

ဖီဖာက အာဖရိကဖလားပြိုင်ပွဲအတွက် ကစားသမား စေလွှတ်ရမယ့် ရက်စွဲသစ် ကြေညာလာမှုကြောင့် ယူနိုက်တက် အကျိုးအမြတ်ရှိလာ
===================

ယူနိုက်တက်အပါအဝင် ကလပ်များဟာ ဖီဖာဘက်က အာဖရိကဖလားပြိုင်ပွဲအတွက် ကစားသမားများကို စေလွှတ်ရမယ့် ရက်စွဲသစ်ကြေညာလာမှုကြောင့် အကျိုးအမြတ် ရရှိလာပါတယ်။
ယူနိုက်တက်ဟာ အာဖရိကဖလားပြိုင်ပွဲအတွက် ကစားသမားများ စေလွှတ်ရမယ့် ကလပ်တွေထဲက တစ်ခု ဖြစ်ပါတယ်။
အစောပိုင်းတုန်းက ကလပ်များဟာ ကစားသမားများကို အာဖရိကဖလားပြိုင်ပွဲဝင်အသင်းများသို့ ဒီဇင်ဘာလ ၈ ရက်နေ့တွင် စေလွှတ်ရပါမယ်။
ဒါပေမယ့် ယနေ့တွင် Daily Mail ရဲ့ ဖော်ပြလာမှုအရ ကလပ်များအနေဖြင့် အာဖရိကစတားများကို နောက်ထပ် တစ်ပတ် ထိန်းထား အသုံးပြုနိုင်ပါဦးမယ်။
ဖီဖာက ဒီဇင်ဘာလ ၁၅ ရက်နေ့တွင်မှ နောက်ဆုံးထားကာ ကစားသမားများကို စေလွှတ်ရန် ဆုံးဖြတ်လာတာပါ။
ဒါကြောင့်လည်း ယူနိုက်တက်ဟာ အာမက်ဒီရယ်လို၊ ဘရိုင်ယန်အမ်ဘူမိုနှင့် နူဆာမာ့ဇ်ရာဝီတို့အား ယင်းနေ့ ဘုန်းမောက်ပွဲအထိ ထိန်းထားနိုင်ပါမယ်။
ယူနိုက်တက်ဟာ ယနေ့ အိုးထရက်ဖို့ဒ်ပွဲအပြီးတွင် ကစားသမားများကို စေလွှတ်လာဖို့ ရှိပါတယ်။
လက်ရှိအချိန်မှာ ယူနိုက်တက်ဘက်က ယင်းပွဲတွင် ယင်းကစားသမား ၃ ဦးကို အသုံးပြုပြီးမှ စေလွှတ်လာမလားဆိုတာ အတည်မပြုသေးပါဘူး။
ဒါပေမယ့် အစောပိုင်းတုန်းက ယူနိုက်တက်မန်နေဂျာအမိုရမ်က ကစားသမားများ ထွက်ခွာရေးကို အတတ်နိုင်ဆုံး နောက်ဆုတ်ထားနိုင်ဖို့ ကြိုးစားမယ်လို့ ဆိုထားပါတယ်။
ယူနိုက်တက်ကဲ့သို့ပင် ဆန်းဒါးလန်းမှာလည်း နယူးကာဆယ်နှင့် တိုင်နီဝယ်ယာဒါဘီပွဲတွင် အတောင့်တင်းဆုံးအသင်းဖြင့် ပွဲထွက်လာနိုင်ပါတော့မယ်။
ယင်းတိုင်နီဝယ်ယာဒါဘီမှာ ၂၀၁၇ ခုနှစ်တွင် ဆန်းဒါးလန်းတို့ တန်းဆင်းသွားရပြီးနောက် ပထမဆုံးပရီးမီးယားလိဂ်တွင် ထိပ်တိုက်တွေ့မယ့် ဒါဘီပွဲလည်း ဖြစ်ပါတယ်။
ယင်းပွဲကို ဒီဇင်ဘာလ ၁၄ ရက်နေ့မှာ ကစားလာမှာ ဖြစ်ပြီး ဆန်းဒါးလန်းအနေဖြင့် ဆိုင်မွန်အေဒင်ဂရာနှင့် ချမ်ဒိုင်းတယ်ဘီတို့အား အသုံးပြုလာနိုင်ပါမယ်။
ယင်းပွဲအပြီးတွင် ဆန်းဒါးလန်းဟာ ယင်းကစားသမား ၂ ဦးအပြင် ဘာထရမ်းထရာအိုရီ၊ အာသာမာဆွာကာ၊ ရိုင်နယ်ဒို၊ နိုအာဆာဒီကီ၊ ဟာဘစ်ဒီယာရာတို့ကိုလည်း ဆုံးရှုံးလာပါမယ်။
ယခုကဲ့သို့ ကစားသမား စေလွတ်ရမယ့်နေ့ နောက်ဆုတ်လာမှုနှင့်အတူ မန်စီးတီးမှာ ပဲလေ့စ်နှင့်ပွဲအထိ အိုမာမာမွတ်ရှ်အား သုံးလာနိုင်မှာ ဖြစ်သလို လီဗာပူးမှာလည်း ဘရိုက်တန်နှင့်ပွဲအထိ မိုဟာမက်ဆာလက်အား သုံးလာနိုင်ပါမယ်။
ပရီးမီးယားလိဂ်ကလပ်များဟာ ဒီဇင်ဘာလ ၂၁ ရက်နေ့တွင် စတင်မယ့် အာဖရိကဖလားပြိုင်ပွဲအတွက် ကစားသမား ၄၅ ဦးအထိ ဆုံးရှုံးလာပါမယ်။
ပရီးမီးယားလိဂ်ကလပ်များဖြစ်ကြတဲ့ အာဆင်နယ်၊ ချဲလ်ဆီး၊ လိဒ်၊ နယူးကာဆယ်တို့ကတော့ အာဖရိကဖလားပြိုင်ပွဲအတွက် ကစားသမားတစ်ဦးမျှ စေလွှတ်လာရမှာ မဟုတ်ပါဘူး။
နယူးကာဆယ်ရဲ့ ပေါင် ၅၅ သန်းတန်တိုက်စစ်မှူးယိုအာနီဝစ်ဆာမှာ ဒဏ်ရာကြောင့် အနားယူနေရမှုနဲ့အတူ ဒီမိုကရက်တစ်ကွန်ဂိုရဲ့ ရွေးချယ်ခံလာရခြင်း မရှိပါဘူး။
အာဖရိကဖလားပြိုင်ပွဲ သွားကစားရမယ့် ကစားသမားများဟာ ပွဲ ၈ ပွဲအပြင် ဇန်နဝါရီလ ၁၈ ရက်နေ့ အက်ဖ်အေဖလားတတိယအဆင့်ပွဲစဉ်ကိုလည်း လွဲချော်လာနိုင်ပါတယ်။