MySPACE

44 w - Translate

ငါးအထီးမရှိဘဲ ကန်ထဲမှာ တစ်ကောင်တည်းနေရင်း သန္ဓေရသွားတဲ့ ငါးလိပ်ကျောက်အမ

ငါးအထီးမရှိဘဲ ကန်ထဲမှာ တစ်ကောင်တည်းနေရင်း သန္ဓေရသွားတဲ့ ငါးလိပ်ကျောက်အမ ချားလော့ရဲ့ဖြစ်ရပ်က အံ့အားသင့်စရာ ဖြစ်စေခဲ့ပါတယ်။ ဒီဖြစ်ရပ်ကြောင့် လိင်မဲ့မျိုးပွားခြင်းဆိုတဲ့ သိပ္ပံဝေါဟာရ (parthenogenesis)ကိုလည်း စိတ်ဝင်စားမှု မြင့်တက်လာခဲ့ပါတယ်။

မြောက်ပိုင်းကာရိုးလိုင်းနားပြည်နယ် ဟန်ဒါဆန်ဗီးလ်မြို့ Aquarium & Shark Lab by Team ECCO မှာရှိတဲ့ ငါးလိပ်ကျောက်အမ ချားလော့ရဲ့ ဗီဒီယိုဟာ TikTok မှာ ကြည့်ရှုမှုအကြိမ်ရေ ၁၂ သန်းကျော် ရှိနေပါတယ်။ ချားလော့ရဲ့ဖြစ်ရပ်ဟာ လူအများ နားလည်နိုင်စွမ်းကို ကျော်လွန်တဲ့ဖြစ်ရပ်လို့ လိင်မဲ့မျိုးပွားမှုဆိုင်ရာ ကျွမ်းကျင်ပညာရှင်တွေက ဆိုပါတယ်။ မြင်းကျားငါးမန်း၊ ကယ်လီဖိုးနီးယားသိမ်းငှက်၊ ကိုမိုဒိုနဂါး (ဖွတ်ကြီး)တွေ အပါအဝင် သက်ရှိမျိုးစိတ် ဒါဇင်ပေါင်းများစွာဟာ လိင်မဲ့မျိုးပွားနိုင်စွမ်းရှိပါတယ်။

'' လိင်မဲ့မျိုးပွားခြင်းက သဘာဝကိုလွန်ဆန်မှုမျိုး မဟုတ်ပါဘူး။ ကျောရိုးမဲ့သတ္တဝါ သို့မဟုတ် ငါးတွေဟာ သူတို့ရဲ့သက်တမ်းတစ်လျှောက်မှာ အောင်မြင်စွာ မျိုးပွားနိုင်စေဖို့အတွက် အံ့အားသင့်စရာတွေ လုပ်ခဲ့ကြတာပါ'' လို့ မေရီလန်းတက္ကသိုလ်မှ ဇီဝဗေဒပညာရှင် မာစီးဒီးစ်ဘန်းက ပြောပါတယ်။

ငါးလိပ်ကျောက်အမ သားပေါက်ပြီးရင် သားပေါက်တွေကို မျိုးဗီဇ စစ်ဆေးမှုပြုလုပ်ပြီး လိင်မဲ့မျိုးပွားမှု ဟုတ်၊ မဟုတ် အတည်ပြုသွားမယ်လို့ သုတေသီတွေက ဆိုပါတယ်။ ငါးလိပ်ကျောက်၊ ငါးမန်းနဲ့ ဘဲလိပ်ငါးတွေဟာ မျိုးအောင်နိုင်တဲ့ သုက်ကောင်တွေကို သူတို့ရဲ့ အထူးဂလန်းတွေထဲမှာ နှစ်ပေါင်းများစွာကြာ သိမ်းဆည်းထားနိုင်စွမ်း ရှိတာကြောင့် အတည်ပြု စစ်ဆေးပြီးမှသာ လိင်မဲ့မျိုးပွားမှု ဟုတ်၊ မဟုတ် ဆိုနိုင်မှာပါ။