ရေနံမြေနဲ့ ထိုးကြေး
ဆော်ဒီအာရေဗျနိုင်ငံက အားကစားပွဲတွေ ရှယ်လုပ်ချင်တာပါ။ အားကစားပုံရိပ်ကို သုံးလိုက်ပြီး သူတို့နိုင်ငံရဲ့ ခရီးသွားလာရေးစနစ်ကို မြှင့်တင်ချင်တာပါ။ ကစားသမားတွေက တခြားနိုင်ငံထက် ဆော်ဒီအာရေဗျနိုင်ငံမှာ ကစားရင် ပိုက်ဆံပိုရပါတယ်။ မြင်လွယ်အောင်ပြောရရင် ဩစတြေးလျနိုင်ငံသား Jai Opetaia က IBF Cruiserweight Champion ဖြစ်ပါတယ်။ IBF အဖွဲ့အစည်းက Jai Opetaia နဲ့ Mairis Briedis တို့ကို ကစားရမယ်လို့ သတ်မှတ်ပေးထားတယ်။ ကစားရင် ကစား၊ မကစားရင် ချန်ပီယံဘွဲ့ကို ရုတ်သိမ်းလိုက်မှာပါ။
ဆော်ဒီအာရေဗျနိုင်ငံမှာ ကျင်းပခဲ့တဲ့ Day of Reckoning ပြိုင်ပွဲကြီးမှာ Jai Opetaia နဲ့ Ellis Zorro တို့ကို တည်ပေးတယ်။ အဲဒါက ပွဲစီစဉ်သူတည်ပေးတာပါ။ IBF အဖွဲ့အစည်းက မဟုတ်ပါဘူး။ Jai Opetaia ဘက်က ဘာကိုရွေးမလဲ။ ပွဲစီစဉ်သူပေးတဲ့ ထိုးကြေးလား၊ IBF အဖွဲ့အစည်းရဲ့ ချန်ပီယံဘွဲ့လား။ ပထမအချက်ကိုပဲ ရွေးတာပါ။ IBF အဖွဲ့အစည်းက တည်ပေးထားတဲ့ Mairis Briedis ကို မထိုးပါဘူး။ ခါးပတ်အပြုတ်ခံပြီး Ellis Zorro ကိုပဲ ကစားလိုက်တယ်။
အားလုံးသိတဲ့အတိုင်း ကစားသမားတွေက အခြေခံထိုးကြေးရတယ်။ PPV အကျိုးအမြတ်ကို ခံစားခွင့်ရှိတယ်။ အဓိကက ဒါပါပဲ။ ဒါပေမယ့် ရေနံနိုင်ငံတွေမှာ ကစားရင် အဲဒီအချက်တွေအပြင် သူတို့နိုင်ငံကပေးတဲ့ စပွန်ဆာကြေးထပ်ရပါတယ်။ အခုလည်း ဆော်ဒီအာရေဗျနိုင်ငံက ပွဲစီစဉ်သူကို ပိုက်ဆံပေးထားပြီး ပွဲကျင်းပခိုင်းတာပါ။ Anthony Joshua ဆိုရင် ထိုးကြေးမြင့်ပြီးသားပါ။ နောက်ဆုံး (၅) ပွဲမှာ (၃) ကို ဆော်ဒီအာရေဗျနိုင်ငံမှာ ကစားလိုက်လို့ ပိုက်ဆံအများကြီးပိုရတယ်။
အခုဆိုရင် UFC အဖွဲ့အစည်းနဲ့ ဆော်ဒီအာရေဗျနိုင်ငံတို့က စာချုပ်လိုက်တယ်။ အဓိကက ပွဲကျင်းပဖို့ပါပဲ။ ဆော်ဒီအာရေဗျနိုင်ငံကလည်း အခြေခံဥပဒေတွေ ပြင်ပေးလိုက်တယ်။ နိုင်ငံအတွင်းမှာ အရက်ရောင်းချခွင့်ရတယ်တဲ့။ (၇၂) နှစ််အတွင်းမှာ ပထမဆုံးပြောင်းလဲလိုက်တာပါ။ ပွဲကျင်းပရင် ရုံထဲမှာ ဘီယာသောက်ကြတာမလား။ ဥပဒေပြင်ရတာ တခြားအကြောင်းအချက်တွေ ရှိနေသေးပေမယ့် အားကစားပြိုင်ပွဲကလည်း အကြောင်းရင်းတစ်ချက်ပါပဲ။
UFC အဖွဲ့အစည်းက ကမ္ဘာကျော်ဆိုပေမယ့် ဆော်ဒီအာရေဗျနိုင်ငံမှာ အခုချိန်ထိ ပွဲမလုပ်ဖူးဘူး။ စာချုပ်ကြောင့်သာ ဇွန်လ (၂၂) ရက်မှာ Robert Whittaker နဲ့ Khamzat Chimaev တို့ကို ခေါင်ပွဲထားပြီး ပွဲလုပ်ပါမယ်။ ပွဲကျင်းပတဲ့ နေရာကလည်း ဟိုတစ်ခါက Anthony Joshua နဲ့ Francis Ngannou တို့ကို ထိုးခိုင်းတဲ့ Kingdom Arena ပါပဲ။ ဘောလုံးကွင်းထဲမှာ သံဇကာဆောက်ပြီး ကစားရမှာပါ။ ပရိသတ်အကြိုက်ဖြစ်ပါစေလို့ ဆုတောင်းလိုက်ပါတယ်။ စာဖတ်သူတွေ ဘေးကင်းပါစေ။
+-x÷+-x÷+-x÷+-x÷+-x÷+-x÷+-x÷+-x÷+-x÷+-x÷
CMKN Gas Stoves ဆိုတာက စားသောက်ဆိုင်၊ ဟိုတယ်နဲ့ မီးဖိုချောင်သုံးပစ္စည်းတွေကို မြန်မာတစ်နိုင်ငံလုံးမှာ တစ်ဦးတည်းမူပိုင် ဖြန့်ဖြူးရောင်းချပေးနေတဲ့ ကုမ္ပဏီဖြစ်ပြီး မြို့ကြီးတွေမှာလည်း ဆိုင်ခွဲတွေအများကြီး ဖွင့်လှစ်ထားပါတယ်။ အိမ်ရှင်မတွေရဲ့အကြိုက် နံပါတ် (၁) ထုတ်ကုန်ဖြစ်လို့ ယုံကြည်စိတ်ချစွာ ဝယ်ယူအားပေးနိုင်ပါတယ်။
Reference Source - ESPN
Photo Credit - La Sueur
ကျော်စိုးအောင် (Myanmar Fight Edition)
