အောင်မြင့်မိုရ်လူမှုကူညီရေးအသင်းဥက္ကဋ္ဌ ယာဉ်တိမ်းမှောက်မှုဖြင့်ကွယ်လွန်

အောင်မြင့်မိုရ်လူမှုကူညီရေးအသင်းဥက္ကဋ္ဌဦးစိုးနိုင်သည် ယာဉ်တိမ်မှောက်သည့်ဒဏ်ရာများဖြင့် ယမန်နေ့(ဒီဇင်ဘာ ၂ ရက်) နံနက်ပိုင်းက ရန်ကုန်ပြည်သူ့ဆေးရုံကြီးတွင်ကွယ်လွန်ကြောင်း လူမှုကူညီကယ်ဆယ်ရေးအဖွဲ့(ရန်ကုန်) ထံမှသိရသည်။
ပြီးခဲ့သည့်နိုဝင်ဘာ ၂၉ ရက်က မကွေးမြို့သို့လူနာသွားရောက်ပို့ဆောင်ပြီးအပြန် နတ်မောက်မြို့နယ်၌ လမ်းပြင်နေသည့်နေရာတွင် တစ်ဖက်မှမောင်းနှင်လာသည့်ယာဉ်အားရှောင်တိမ်းရာမှ လမ်းဘေးကျောက်တုံးဖြင့်တိုက်မိပြီး ယာဉ်တိမ်မှောက်ကာ ထိခိုက်ဒဏ်ရာများရရှိခဲ့သည်။ ယင်းနောက် ဦးစိုးနိုင်အား ရန်ကုန်ဆေးရုံကြီးသို့သယ်ဆောင်ကာ ဆေးကုသမှုခံယူနေစဉ်သေဆုံးသွားခြင်းဖြစ်ကြောင်းသိရသည်။
"ပရဟိတအသင်းသားတွေဆိုတာ ကူးစက်ရောဂါဆိုလည်းသယ်ရတာပဲ။ လူနာကဆီးဝမ်းမနိုင်လို့ လုပ်ပေးရတာတွေလည်းရှိတယ်။ ဘယ်လိုပဲဖြစ်ဖြစ် ပရဟိတစိတ်နဲ့လုပ်နေကြတာပါ။ ဒီလိုလုပ်နေရင်း သေဆုံးသွားတဲ့ ပရဟိတသမားတွေအများကြီးရှိပါတယ်။ ဦးစိုးနိုင်အတွက် ကျန်တဲ့ပရဟိတသမားတွေရဲ့ ကိုယ်စား အားလုံးကိုအလေးပြုပါတယ်" ဟု လူမှုကူညီကယ်ဆယ်ရေးအဖွဲ့(ရန်ကုန်)မှ တာဝန်ရှိသူတစ်ဦးကပြောသည်။
အောင်မြင့်မိုရ်လူမှုကူညီရေးအသင်းသည် ရန်ကုန်တိုင်း၊ သန်လျင်မြို့နယ်အချေစိုက်ကူညီနေသော ပရဟိတအသင်းဖြစ်ပြီး လူမှုကူညီကယ်ဆယ်ရေးအဖွဲ့(ရန်ကုန်) ၏အဖွဲ့ဝင်အသင်းဖြစ်ကြောင်းသိရသည်။

အမွေခံမရှိသော ကွယ်လွန်သူများ၏ ပိုင်ဆိုင်မှု ဂျပန်အစိုးရ စံချိန်တင်ရရှိ

ဂျပန်အစိုးရဘဏ္ဍာတိုက်သည် ၂၀၂၄ ခုနှစ်ဘဏ္ဍာရေးနှစ်တွင် အမွေဆက်ခံမည့်သူ မရှိသော နိုင်ငံသားများ၏ ပိုင် ဆိုင်မှုများကို စံချိန်တင် တန်ဖိုး ၁၂၉ ဒသမ ၁ ဘီလီယံယန်း အထိ ရရှိခဲ့ကြောင်း သတင်းအရ ယင်းမှာ အမေရိကန်ဒေါ်လာ ၈၂၈ သန်း နှင့် ညီမျှသည်။
ယင်းပမာဏသည် နှိုင်းယှဉ်နိုင်သော အချက်အလက်များ ပထမဆုံးရရှိနိုင်သည့် ၂၀၁၃ ခုနှစ် ဘဏ္ဍာရေးနှစ် နောက် ပိုင်းအများဆုံး ဖြစ်ကြောင်း တရားရုံးချုပ် သတင်းရင်းမြစ်များထံမှတစ်ဆင့် သိရှိခဲ့ရသည်ဟု ဆိုသည်။
ယင်းပမာဏသည် ၂၀၁၃ ခုနှစ်က ရရှိခဲ့သော ၃၃ ဒသမ ၆ ဘီလီယံယန်းထက် ၃ ဒသမ ၈ ဆ ပိုများလာခဲ့သည်။
မိသားစုတရားရုံးတစ်ရုံးတွင် ခန့်အပ်ထားသော စာရင်းရှင်းဖျက်သိမ်းရေးမှူးက ကျန်နေသောအစိုးရ အခွန်များပေး ဆောင်ခြင်း၊ သင်္ဂြိုဟ်စရိတ်နှင့် အခြားကုန်ကျစရိတ်များကို ရှင်းလင်းပြီးနောက်တွင် အမွေဆက်ခံမည့်သူ မရှိသူများ၏ ပိုင်ဆိုင်မှုအားလုံး အစိုးရဘဏ္ဍာတိုက်သို့ ရောက်ရှိသွားသည်။
ဇနီး (သို့) ခင်ပွန်း၊ သားသမီး၊ မိဘ၊ ဆွေမျိုးများ မရှိခြင်း၊ သို့မဟုတ် သေတမ်းစာကဲ့သို့ စာရွက်စာတမ်းများ မရှိခဲ့ပါက သေဆုံးသူတစ်ဦး၏ ပိုင်ဆိုင်မှုကို မူအားဖြင့် မည်သူကမျှ ဥပဒေနှင့်အညီ ဆက်ခံပိုင်ခွင့်မရှိပေ။
ထိုသို့ အမွေဆက်ခံသူ မရှိသောပိုင်ဆိုင်မှုများ များပြားလာရသည့် အဓိက အကြောင်းရင်းတစ်ခုမှာ တစ်ဦးတည်းနေ ထိုင်သော သက်ကြီးရွယ်အိုများ များပြားလာခြင်းကြောင့် ဖြစ်သည်။
ယင်းမှာလည်း က လေး မွေး ဖွား နှုန်း ကျဆင်းလာခြင်း၊ သက်ကြီးရွယ်အို များလာခြင်းနှင့် တစ်ကိုယ်ရည်နေ ထိုင် သူဦးရေ များပြားလာခြင်းတို့ကြောင့် ဖြစ်သည်။
ကွယ်လွန်သွားသူတွင်အမွေဆက်ခံသူများရှိပါကလည်းအသက်ရနေသောအ မွေဆက်ခံသူများက ယင်းအတွက် အလုပ်ရှုပ်မလိုခြင်းကြောင့် အမွေကို လက် လွတ်ခံလိုက်သည်များလည်းရှိကြောင်း ဂျပန်အမွေဆက်ခံရေးဆိုင် ရာ အစည်းအရုံး ဒုတိယအကြီးအကဲ ရှေ့နေ ယိုရှီဒါရူဟဲက ပြောသည်။
ဆွေမျိုးသားချင်းမရှိသူ သက်ကြီးရွယ်အို ဦးရေမှာ ဆက် လက်မြင့်တက်နေမည်ဟု မျှော်လင့်ရပြီး ရွေးချယ်စရာ တစ်ခုမှာ ၎င်းတို့အား ပြုစုစောင့်ရှောက်သူများ သို့မဟုတ် ပရဟိတအဖွဲ့အစည်းများကို လှူဒါန်းခြင်းဖြစ်ကြောင်း ၎င်းက ပြောသည်။

ထိုင်းနိုင်ငံ ရနောင်းထိန်းသိမ်းရေးစခန်းမှမြန်မာ ၁၀၀ ကျော်ကို ထပ်မံလွှဲပြောင်း

ထိုင်းနိုင်ငံ ရနောင်းထိန်းသိမ်းရေးစခန်းမှ မြန်မာနိုင်ငံသား ၁၀၀ကျော်ကို ဒီဇင်ဘာ ၃ ရက်က ကော့သောင်းဘက်သို့ ထပ်မံလွှဲပြောင်းပေးလိုက်ကြောင်း သိရသည်။
ပြီးခဲ့သော နိုဝင်ဘာက မြန်မာနိုင်ငံသား ၁၃၇ ဦးကို နှစ်ကြိမ်ခွဲပို့ပြီးနောက်ယခု ဒီဇင်ဘာလတွင် ပထမအကြိမ် နေရပ်ပြန်ပို့ခဲ့ခြင်းဖြစ်ကြောင်း သိရသည်။
ထိုင်းနိုင်ငံအတွင်း အကြောင်းအမျိုးမျိုးဖြင့် ပြစ်ဒဏ်ကျခံပြီးနောက်ရနောင်းထိန်းသိမ်းရေးစခန်းတွင် ထိန်းသိမ်းထားသော မြန်မာနိုင်ငံသားအမျိုးသား ၈၁ ဦး၊ အမျိုးသမီး ၂၃ ဦး စုစုပေါင်း ၁၀၄ ဦးကို ဒီဇင်ဘာ ၃ ရက်နံနက် ၁၁ နာရီခွဲတွင် ကော့သောင်းမြို့သို့ ထပ်မံလွှဲပြောင်းပေးခဲ့ခြင်း ဖြစ်ကြောင်းသိရသည်။
ယခုနှစ် ဇန်နဝါရီတွင် ၁၄၉ ဦး၊ ဖေဖော်ဝါရီတွင် ၂၀၀၊ မတ်တွင် ၂၅၀၊ဧပြီတွင် ၂၀၈ ဦး၊ မေတွင် ၈၁ ဦးနှင့် ဇွန်တွင် နှစ်ကြိမ် ၂၂၉ ဦး၊ ဇူလိုင်တွင် ၁၆၂ဦး၊ ဩဂုတ်တွင် ၉၉ ဦး၊ စက်တင်ဘာတွင် နှစ်ကြိမ် ၂၉၂ ဦး၊ အောက်တိုဘာတွင်၉၀ နှင့် နိုဝင်ဘာတွင် နှစ်ကြိမ် ၁၃၇ ဦး လွှဲပြောင်းခဲ့ပြီးဖြစ်ကြောင်း သိရသည်။

ယူကရိန်းစစ်ပွဲ အဆုံးသတ်ရေး ရုရှား-အမေရိကန်ဆွေးနွေးပွဲ သဘောတူညီချက်မရ

ယူကရိန်းစစ်ပွဲ အဆုံးသတ်ရေးအတွက် ရုရှားသမ္မတ ဗလာဒီမာပူတင်နှင့်အမေရိကန်သမ္မတ ဒေါ်နယ်ထရန့်၏ ညှိနှိုင်းရေးမှူးများအကြား ငါးနာရီကြာဆွေးနွေးမှုအတွင်း သဘောတူညီချက် ရရှိခဲ့ခြင်းမရှိကြောင်း တာဝန်ရှိသူများကဒီဇင်ဘာ ၂ ရက်တွင် ပြောသည်။
မော်စကိုအစည်းအဝေးသည် အပြုသဘောဆောင်သော်လည်း ငြိမ်းချမ်းရေးအစီအစဉ်၏ အစိတ်အပိုင်းအချို့ကို ရုရှားက လက်မခံနိုင်ကြောင်း ရုရှားသမ္မတအိမ်တော် ပြောရေးဆိုခွင့်ရှိသူက ပြောသည်။ အဓိကအားဖြင့် နယ်မြေပိုင်ဆိုင်မှုပြဿနာများဟု ဆိုသည်။
ထရန့်၏ အထူးသံတမန် စတိဗ်ဝစ်အော့ဖ်နှင့် သမက် ဂျရက်ကူရှ်နာတို့သည် စစ်ပွဲကိုအဆုံးသတ်ရန် ရည်ရွယ်သည့် သံတမန်ရေးဆွေးနွေးပွဲများအပြီးတွင် သမ္မတပူတင်နှင့် ဆွေးနွေးခဲ့ခြင်းဖြစ်ပြီး လက်ရှိဆွေးနွေးပွဲနှင့်ပတ်သက်၍ အမေရိကန်ဘက်က မှတ်ချက်မပေးသေးပေ။
အမေရိကန် ထောက်ခံသည့် ငြိမ်းချမ်းရေးအစီအစဉ်မူကြမ်းအပေါ်ယူကရိန်းနှင့် ဥရောပမှ အဆိုပြုထားသော ပြောင်းလဲမှုများကို လက်မခံနိုင်ကြောင်းပူတင်က နိုဝင်ဘာ ၂ ရက်အစောပိုင်းတွင် ပြောကြားခဲ့ပြီး ဥရောပကို တိုက်ခိုက်လိုခြင်းမရှိသော်လည်း ဥရောပအနေဖြင့် စစ်ပွဲထဲသို့ ဝင်ရောက်ပြီး စစ်ပွဲတစ်ခုစတင်လိုပါက ရုရှားအနေဖြင့် အသင့်ဖြစ်နေကြောင်း ၎င်းက ထုတ်ဖော်ပြောကြားသည်။
နိုဝင်ဘာလအတွင်း ပေါက်ကြားလာခဲ့သည့် အမေရိကန်အဆိုပြုသောငြိမ်းချမ်းရေးအစီအစဉ်မူကြမ်းတွင် ရုရှားအတွက် အလေးသာသည့် အချက်များကို ကျယ်ကျယ်ပြန့်ပြန့်မြင်တွေ့ခဲ့ရသော်လည်း အဆိုပါ မူကြမ်းသည် မကြာသေးမီရက်သတ္တပတ်များအတွင်း အပြောင်းအလဲများစွာ ရှိခဲ့သည်။

အရှေ့တောင်အာရှ သုံးနိုင်ငံရေဘေး သေဆုံးသူ ၁၃၀၀ကျော်အထိ မြင့်တက်လာ

အင်ဒိုနီးရှား၊ သီရိလင်္ကာနှင့်ထိုင်းနိုင်ငံတို့တွင် မိုးသည်းထန်စွာရွာသွန်းမှု၊ ရေကြီးမှုနှင့် မြေပြိုမှုများကြောင့် သေဆုံးသူဦးရေသည်၁၃၇၉ ဦးအထိ မြင့်တက်လာကြောင်းတာဝန်ရှိသူများက ဒီဇင်ဘာ ၂ ရက်တွင် ပြောသည်။
အင်ဒိုနီးရှားနိုင်ငံ အနောက်ပိုင်းရှိ စူမားတြားကျွန်းတွင် လူ ၇၄၄ ဦးသေဆုံးကြောင်း အတည်ပြုထားပြီး၅၅၁ ဦး ပျောက်ဆုံးနေသည်။ မြောက်စူမားတြားပြည်နယ်တွင် နေအိမ်များရေလွှမ်းမိုးခံရပြီးနောက် လူပေါင်းငါးသိန်းကျော် ဘေးလွတ်ရာသို့ပြောင်းရွှေ့ခဲ့ရသည်ဟု ဆိုသည်။
ခိုလှုံရာနေရာများတွင် နေထိုင်သော၊ ဘေးလွတ်ရာသို့ ပြောင်းရွှေ့နေထိုင်သူများက မကြာမီအချိန်
အတွင်း အိမ်ပြန်နိုင်ဦးမည် မဟုတ်ဘဲ၎င်းတို့ ကလေးများ၏ ကျန်းမာရေးအတွက် စိုးရိမ်နေကြကြောင်းပြောကြားခဲ့သည်။
အင်ဒိုနီးရှား၏ သဘာ၀ဘေးအန္တရာယ်စီမံခန့်ခွဲမှုအေဂျင်စီသည်ကယ်ဆယ်ရေးနှင့် ကယ်ဆယ်ရေး
လုပ်ငန်းများအတွက် စစ်ဘက်နှင့်ပူးပေါင်းဆောင်ရွက်လျက်ရှိသည်။
သို့သော် ၎င်းတို့၏ ကြိုးပမ်းအားထုတ်မှုများသည် ထိခိုက်ခံရသော နေရာများစွာတွင် လမ်းပန်း ဆက်သွယ်ရေးပြတ်တောက်မှုများကြောင့် အခက်အခဲများနှင့် ရင်ဆိုင်နေရသည်။
အခြေခံအဆောက်အအုံများပြန်လည်ထူထောင်ရေးသည် အဓိကစိန်ခေါ်မှုတစ်ခုဖြစ်သည်။ သီရိလင်္ကာတွင် သဘာ၀ဘေးအန္တရာယ်ကြောင့်သေဆုံးသူဦးရေသည် ၄၆၅ ဦးနှင့်ထိုင်းနိုင်ငံတွင် ၁၇၀ အထိ ရောက်ရှိလာခဲ့သည်။
အင်ဒိုနီးရှားနှင့် သီရိလင်္ကာတွင် လူ ၉၀၀ ကျော် ပျောက်ဆုံးနေဆဲဖြစ်သည်။

အငြင်းပွားဖွယ် ကျွန်းအနီးမှာ ဂျပန်နဲ့ တရုတ် ကမ်းခြေစောင့်တပ်တွေ ထိပ်တိုက်တွေ့

အရှေ့တရုတ်ပင်လယ်ရှိ ပထဝီနိုင်ငံရေးအရ အရေးပါတဲ့ ကျွန်းတခုအနီးမှာ ဂျပန်နဲ့ တရုတ်ကမ်းခြေစောင့်တပ်တွေ ထိပ်တိုက်တွေ့မှု ဖြစ်ပွားခဲ့ပြီး နှစ်ဖက်စလုံးကတော့ ရေပိုင်နက်ချိုးဖောက်ကြောင်း အပြန်အလှန် စွပ်စွဲနေကြပါတယ်။
ဂျပန်က ဆန်ကာကူဟု ခေါ်ပြီး တရုတ်ကတော့ ဒိုင်အိုယုကျွန်းလို့ခေါ်တဲ့ ကျွန်းအနီးရေပြင်မှာ ဂျပန်ငါးဖမ်းသင်္ဘောတစင်း တရားမဝင်ဝင်ရောက်ခဲ့ကြောင်း တရုတ်ကမ်းခြေစောင့်တပ်က ပြောပါတယ်။ ဒီကျွန်းကို ဂျပန်က ထိန်းချုပ်ထားပေမယ့် တရုတ်ကတော့ ပိုင်ဆိုင်တယ်လို့အခိုင်အမာ တောင်းဆိုနေပါတယ်။
ဂျပန်ကမ်းရိုးတန်းစောင့်တပ်တော့ ငါးဖမ်းသင်္ဘောအနီး ချဉ်းကပ်လာတဲ့ တရုတ်ကမ်းရိုးတန်းစောင့်တပ်သင်္ဘောနှစ်စင်းကို ကြားဖြတ်ပြီး မောင်းထုတ်ခဲ့တယ်လို့ ဆိုပါတယ်။ ဂျပန်ဝန်ကြီးချုပ်က ထိုင်ဝမ်နဲ့ပတ်သက်ပြီး အငြင်းပွားဖွယ်ရာ မှတ်ချက်တွေပေးခဲ့ပြီးနောက် နှစ်နိုင်ငံအကြား သံတမန်ဆက်ဆံရေး တင်းမာနေချိန်မှာ ယခုလို ထိပ်တိုက်တွေ့ဆုံမှု ဖြစ်ပေါ်လာတာပါ။
ရေပိုင်နက်အတွင်း ဝင်ရောက်လာတဲ့ ဂျပန်သင်္ဘောကို ချဉ်းကပ်သတိပေးခဲ့ပြီး လိုအပ်တဲ့ အစီအမံတွေကို လုပ်ဆောင်ခဲ့ကာ ဂျပန်အနေနဲ့ ရေပိုင်နက် ချိုးဖောက်မှုနဲ့ ရန်လိုမှုအားလုံးကို ချက်ချင်းရပ်တန့်ဖို့ တိုက်တွန်းတယ်လို့ တရုတ်ကမ်းခြေစောင့်တပ် ပြောရေးဆိုခွင့်ရှိသူက ပြောပါတယ်။
ဂျပန်ကမ်းခြေစောင့်တပ်ကတော့ ဒီဇင်ဘာ ၂ ရက်အစောပိုင်းမှာ ရေပိုင်နက်ချိုးဖောက်တဲ့ တရုတ်သင်္ဘောတွေအနီး ချဉ်းကပ်ခဲ့ပြီး ရေပိုင်နက်မှ ထွက်ခွာရန် တောင်းဆိုခဲ့ကာ ရေပိုင်နက်မှ ထွက်ခွာသွားတဲ့ အထိ ငါးဖမ်းသင်္ဘောတွေရဲ့ ဘေးကင်းရေးကို လုပ်ဆောင်ခဲ့တယ်လို့ ပြောပါတယ်။
ဂျပန်ဝန်ကြီးချုပ် တာကာအိချိဟာ နိုဝင်ဘာလအတွင်းက လွှတ်တော်မှာ မေးခွန်းဖြေကြားစဉ် တရုတ်နိုင်ငံက ထိုင်ဝမ်ကိုတိုက်ခိုက်လာပါက ဂျပန်က စစ်ရေးအရ အရေးယူနိုင်တယ်လို့ ပြောကြားခဲ့ပြီးနောက် နှစ်နိုင်ငံအကြား တင်းမာမှုတွေ မြင့်တက်နေပါတယ်။

ကမ္ဘာ့တန်ဖိုးအရှိဆုံး ကစားသမား ၁၀ ဦးစာရင်း ထွက်ပေါ်လာ
======================

ကမ္ဘာ့တန်ဖိုးအရှိဆုံးကစားသမား ၁၀ ဦးစာရင်းထွက်ပေါ်လာခဲ့ပြီ ဘူကာယိုဆာကာမှာလည်း ထိပ်ဆုံး ၁၀ စာရင်းသို့ ထိုးဖောက်ပါဝင်လာနိုင်တာ တွေ့ရပါတယ်။
အာဆင်နယ်စတားဟာ ယခုရာသီတွင် အာဆင်နယ်အတွက် ၄ ဂိုးသွင်းပြီး ၁ ကြိမ် ဖန်တီးကာ ပရီးမီးယားလိဂ်အမှတ်ပေးဇယားထိပ်ဆုံးတွင် ရပ်တည်နိုင်အောင် ကူညီပေးထားသူ ဖြစ်ပါတယ်။
သူဟာ ဂျူ့ဘယ်လင်ဂမ်နှင့်အတူ တန်ဖိုးအရှိဆုံးကစားသမား ၁၀ ဦးစာရင်းတွင် အင်္ဂလန်ကိုယ်စားပြုအဖြစ် ပါဝင်ခဲ့ပါတယ်။
Transfermarkt ရဲ့ဖော်ပြလာမှုအရ ဘာစီလိုနာနှင့် စပိန်စတားလာမိန်းယာမဲလ်က တန်ဖိုး ပေါင် ၁၇၅ သန်းဖြင့် တန်ဖိုးအရှိဆုံးကစားသမားအဖြစ် ရပ်တည်နေတာ တွေ့ရပါတယ်။ သူဟာ ဒဏ်ရာပြဿနာများနှင့် ကြုံနေရပေမယ့်လည်း ယခုရာသီတွင် ၅ ဂိုးသွင်းကာ ၈ ကြိမ်ဖန်တီးပြီး ခြေစွမ်းပြနေဆဲ ဖြစ်ပါတယ်။
သူ့နောက်တွင် ဂျူ့ဘယ်လင်ဂမ်၊ ကိုင်လီယန်ဘက်ပေးနှင့် အာလင်းဟာလန်းတို့က တန်ဖိုး ပေါင် ၁၅၇ သန်းစီဖြင့် ပူးတွဲ ရပ်တည်နေပါတယ်။
နံပါတ် ၅ နေရာတွင် ဗီနီရှပ်စ်ဂျူနီယာက ပေါင် ၃၁ သန်းဖြင့် ရပ်တည်နေပါတယ်။
ကမ္ဘာ့တန်ဖိုးအရှိဆုံး ၁၀ ဦးစာရင်းတွင် ပီဒရီ(ပေါင် ၁၂၂ သန်း)၊ ဂျာမယ်မူစီယာလာ(ပေါင် ၁၂၂ သန်း)၊ ဘူကာယိုဆာကာ (ပေါင် ၁၂၂ သန်း)၊ အလက်ဇန္ဒားအီဆက်ခ် (ပေါင် ၁၂၂ သန်း)နှင့် ဖလိုရီယန်ဝါ့ဇ် (ပေါင် ၁၁၄ သန်း)တို့လည်း ရပ်တည်နိုင်ခဲ့ပါတယ်။

မန်းတောင်ခြေ စန္ဒာမုနိဘုရားအတွင်း ဖရုံသီးပုံသဏ္ဍာန် အရိုးအိုးတွေ့ရှိ

မန္တလေးတောင်ခြေ၊ နန်းမြေဘုံသာ စန္ဒာမုနိဘုရားပရိဝုဏ်အတွင်း လိုင်းကျင်းတူးရာမှ ငွေဖြင့်ပြုလုပ်ထားသည့် ဖရုံသီးပုံသဏ္ဍာန် အရိုးအိုးတွေ့ရှိခဲ့ကြောင်း ဂေါကပအဖွဲ့ထံမှ သိရသည်။
အဆိုပါ အရိုးအိုးအား နိုဝင်ဘာလ (၃၀) ရက် ညနေပိုင်းတွင် ဘုရားဂေါပကအဖွဲ့မှ ပြုပြင်ထိန်းသိမ်းရေးလုပ်ငန်းများဆောင်ရွက်နေစဥ် တူးဖော်တွေ့ရှိခဲ့ခြင်းဖြစ်ပြီး အရိုးအိုးတွင် မြန်မာသက္ကရာဇ် ၁၂၇၅ ခုနှစ် ကဆုန်လဆန်း (၂) ရက်ဟု ကမ္ဗည်းထိုးထားသည်။
“ရှေးဟောင်းပညာရှင်တွေလည်း လာကြည့်ကြပါတယ်။ ၁၁၂ နှစ် သက်တမ်းရှိပါတယ်” ဟု ဖြစ်စဉ်ကို သိသူတစ်ဦးကလည်း ပြောသည်။
ယင်းသို့ တွေ့ရှိမှုနှင့် ပတ်သက်၍ ရှေးဟောင်း အကြံပေးပညာရှင် ဦးပေါက်ပေါက်၊ ဒုညွှန်ကြားရေးမှူး ဦးနေနိုင်ထွန်းနှင့် ဦးအေးလွင်၊ ဒေါ်မျိုးမျိုးသောင်းနှင့် ရှေးဟောင်တာဝန်ရှိသူများ၊ ခရိုင်ကြီးကြပ်ရေးအဖွဲ့ခေါင်းဆောင် ဦးမောင်မောင်အေး၊ ဂေါပကအတွင်းရေးမှူး/တွဲဘက်အတွင်းရေးမှုးနှင့် ဆောက်လုပ်ရေးတာဝန်ခံများ၊ ဆွေတော်မျိုးတော်များ လာရောက်ကြည့်ရှုဆွေးနွေးခဲ့ကြကြောင်းလည်း ဂေါပကအဖွဲ့မှ မှတ်တမ်းထုတ်ပြန်ထားသည်။

တောင်သမန်အင်းသို့ ဆောင်းခိုငှက်ဝင်ရောက်မှု ယခင်နှစ်ထက် လျော့ကျ

ယခုနှစ်ဆောင်းရာသီတွင် တောင်သမန်အင်းသို့ ဆောင်းခိုငှက်ဝင်ရောက်မှု ယခင်နှစ်များထက်ပင် လျော့ကျသွားကြောင်း သဘာ၀ပတ်၀န်းကျင်ထိန်းသိမ်းရေးဆောင်ရွက်နေကြသူများထံမှ သိရသည်။
ဆောင်းခိုငှက်များဝင်ရောက်မှုသည် တစ်နှစ်ထက်တစ်နှစ်လျော့ကျနေကြောင်း၊ တောင်သမန်အင်းတွင် နှစ်စဉ် ဆောင်းခိုငှက်မျိုးစိတ်ပေါင်း တစ်ရာကျော်ဝင်လေ့ရှိပြီး ရှားပါးမျိုးစိတ်ဝင်ရောက်မှုမရှိသေးကြောင်း သိရသည်။
တောင်သမန်အင်းသို့ ၂၀၀၈ ခုနှစ်က ဆောင်းခိုငှက်အများအပြားဝင်ရောက်ခဲ့ဖူးပြီး ထိုနောက်ပိုင်း ရေသွင်းရေ ထုတ်စနစ်ပုံစံမမှန်ခြင်း၊ ရေအရည်အသွေးပြောင်းလဲလာခြင်းတို့ကြောင့် ပုံမှန်ထက် တစ်နှစ်ထက်တစ်နှစ် လျော့ကျသွားခဲ့ခြင်းဖြစ်ကြောင်း သိရသည်။
မြန်မာနိုင်ငံသို့ တရုတ်၊ မွန်ဂိုလီယား၊ ရုရှားနိုင်ငံတို့မှ ရေငှက် (Water Bird) ၊ ရေဘဲနှင့်ဘဲငန်း၊ ကမ်းခြေနေငှက် (Shore Bird) ၊ ကမ်းစပ်နေခြေတံရှည်ငှက် (Wader) ၊ ပင်လယ်ငှက် (Sea Bird) အစရှိသည့် ရာသီအလိုက် ပြောင်းရွှေ့ကျက်စားတတ်သည့်ငှက်မျိုးစိတ်တို့မှ နှစ်စဉ် အကောင်ရေသိန်းချီဝင်ရောက်တတ်ပြီး၊ မန္တလေးမြို့ အနီး၀န်းကျင်ရှိ တောင်သမန်အင်း၊ ပလိပ်အင်း၊ ဗနောအင်းနှင့် ပြူကန်တို့တွင် ဒီဇင်ဘာလမှ မတ်လအထိကျက်စားလေ့ရှိကြောင်း သိရသည်။

စစ်တက္ကသိုလ်ဗိုလ်လောင်းသင်တန်း အမှတ်စဥ် (၆၇) ၏ သင်တန်းဆင်းစစ်ရေးပြအခမ်းအနားကို တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်တက်ရောက်

မန္တလေးတိုင်း၊ ပြင်ဦးလွင်မြို့ရှိ စစ်တက္ကသိုလ်တွင် ယနေ့ ဒီဇင်ဘာ ၃ ရက်နံနက်ပိုင်းက စစ်တက္ကသိုလ်ဗိုလ်လောင်းသင်တန်းအမှတ်စဥ် (၆၇) ၏ သင်တန်းဆင်းစစ်ရေးပြအခမ်းအနားကျင်းပရာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တက်ရောက်ခဲ့ကြောင်း သိရသည်။
ဗိုလ်ချုပ်မှူးကြီးမင်းအောင်လှိုင်မှ ကျောင်းဆင်းဗိုလ်လောင်းတပ်ခွဲကိုစစ်ဆေးပြီးနောက် အလံတော်အဖွဲ့၊ ကျောင်းဆင်းတပ်ခွဲနှင့် ကျောင်းအရန်တပ်ခွဲများက ဗိုလ်ချုပ်မှူးကြီးမင်းအောင်လှိုင်အား အနှေးလျှောက်၊ အမြန်လျှောက်တို့ဖြင့် ချီတက်အလေးပြုခဲ့ကြကြောင်း သိရသည်။
ထို့နောက် ဗိုလ်ချုပ်မှူးကြီးမင်းအောင်လှိုင်မှ ကျောင်းဆင်းတပ်ဖွဲ့ဖြစ်သော စစ်တက္ကသိုလ်ဗိုလ်လောင်းသင်တန်းအမှတ်စဉ် (၆၇) မှ အောင်စစ်သည်ဆုရ ဗိုလ်လောင်းမြတ်သီဟ၊ လေ့ကျင့်ရေးထူးချွန်ဆုရ ဗိုလ်လောင်းဟိန်းဝေလင်း၊ စာပေထူးချွန်ဆု (ဝိဇ္ဇာ) ဆုရ ဗိုလ်လောင်းတင့်အောင်ထူး၊ စာပေထူးချွန်ဆု (သိပ္ပံ) ဆုရ ဗိုလ်လောင်းဟိန်းထက်နိုင်နှင့် စာပေထူးချွန်ဆု (ကွန်ပျူတာ) ဆုရ ဗိုလ်လောင်းထက်ဝေယံအောင်တို့အား ဆုများပေးအပ်ချီးမြှင့်ခဲ့ကြောင်း သိရသည်။
ထူးချွန်ဆုများပေးအပ်ချီးမြှင့်ပြီးနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်မှ ဂုဏ်ပြုမိန့်ခွန်းပြောကြားခဲ့ကြောင်း သိရသည်။