တရုတ်ပြည်သူ့လွတ်မြောက်ရေးတပ်မတော်တည်ထောင်သည့်(၉၉)နှစ်မြောက်အခမ်းအနားကို ရန်ကုန်မြို့၌ကျင်းပ

တရုတ်ပြည်သူ့လွတ်မြောက်ရေးတပ်မတော်တည်ထောင်သည့်(၉၉)နှစ်မြောက်အခမ်းအနားကို ဇူလိုင် ၂၁ ရက်ညပိုင်းက ရန်ကုန်မြို့ရှိ Novotel Max ဟိုတယ်၌ကျင်းပရာ ဒုတိယတပ်မတော်ကာကွယ်ရေး ဦးစီးချုပ် ဗိုလ်ချုပ်ကြီးကျော်စွာလင်းနှင့်ဇနီး တက်ရောက်ခဲ့ကြောင်း သိရသည်။
အခမ်းအနားကို မြန်မာနိုင်ငံတော်သီချင်း၊ တရုတ်နိုင်ငံတော်သီချင်းတို့ဖြင့်ဖွင့်လှစ်ပြီးနောက် မြန်မာနိုင်ငံဆိုင် ရာ တရုတ်စစ်သံမှူး Senior Colonel Qu Zhe က နှုတ်ခွန်းဆက်စကားပြောကြားခဲ့ကြောင်း သိရသည်။
ထို့နောက် ဒုတိယတပ်မတော်ကာကွယ်ရေးဦးစီးချုပ်နှင့်ဇနီး၊ မြန်မာနိုင်ငံဆိုင်ရာ တရုတ်နိုင်ငံသံအမတ် ကြီး၊ တရုတ်စစ်သံမှူးနှင့်ဇနီးတို့က တရုတ်ပြည်သူ့လွတ် မြောက်ရေးတပ်မတော်တည်ထောင်သည့်(၉၉)နှစ်မြောက်အထိမ်းအမှတ်ကိတ်မုန့်ကိုလှီးဖြတ်ပေးခဲ့ကြကြောင်း သိရသည်။
ထို့ပြင် ဒုတိယတပ်မတော်ကာကွယ်ရေးဦးစီးချုပ်နှင့် ဇနီး၊ တက်ရောက်လာကြသူများအား မြန်မာနိုင်ငံဆိုင်ရာ တရုတ်နိုင်ငံသံအမတ်ကြီးနှင့် တရုတ်စစ်သံမှူးတို့က ဂုဏ်ပြုညစာဖြင့်တည်ခင်းဧည့်ခံခဲ့ကြကြောင်း သိရသည်။

လမ်းခရီးကြန့်ကြာမှုကြောင့် နာနတ်သီးများပုပ်သိုးပြီး ဈေးကောင်းမရ

သယ်ယူပို့ဆောင်ရေးအခက်အခဲများနှင့် လမ်းခရီးကြန့်ကြာမှုများကြောင့် ကချင်ပြည်နယ်၊ ရှမ်းပြည်နယ်နှင့် စစ်ကိုင်းတိုင်းအထက်ပိုင်းဒေသများမှ မန္တလေးဈေးကွက်သို့ တင်ပို့လာသည့် နာနတ်သီးများ ပုပ်သိုးပျက်စီးမှုမြင့်တက်နေပြီး ဈေးကောင်းမရရှိသဖြင့် ကုန်သည်များနှင့် တောင်သူများ အခက်အခဲများ ကြုံတွေ့နေရကြောင်း သစ်သီးပွဲရုံလုပ်ငန်းရှင်များထံမှ သိရသည်။
နယ်မြေအခြေအနေများကြောင့် ကုန်စည်သယ်ယူပို့ဆောင်ရာတွင် လမ်းခရီးကြန့်ကြာမှုများ ဖြစ်ပေါ်နေသဖြင့် ယခင်က ရက်ပိုင်းအတွင်း ရောက်ရှိနိုင်သည့် နာနတ်သီးများမှာ လက်ရှိတွင် ၃ ရက်မှ ၅ ရက်အထိ ကြာမြင့်လေ့ရှိပြီး အချို့ကုန်တင်ယာဉ်များမှာ ၇ ရက်ခန့်အထိ လမ်းခရီးတွင် ကြန့်ကြာနေရကြောင်း သိရသည်။
နာနတ်သီးသည် ပျက်စီးလွယ်သည့် သစ်သီးအမျိုးအစားဖြစ်သည့်အတွက် လမ်းခရီးကြန့်ကြာမှုများသာမက ကုန်စည်စီးဆင်းရာလမ်းတစ်လျှောက် အခြေအနေများကြောင့် ကုန်ပစ္စည်းများကို စုပြုံကျပ်တည်းစွာ ထုပ်ပိုးသယ်ဆောင်ရခြင်းများကလည်း ပျက်စီးဆုံးရှုံးမှုကို ပိုမိုများပြားစေကြောင်း ကုန်သည်များက ဆိုသည်။
ထို့ပြင် ပေါ်ဦးပေါ်ဖျား နာနတ်သီးများမှာ ယခင်နှစ်များအတွင်း ဈေးကောင်းရရှိကာ အမြတ်အစွန်းများခဲ့သော်လည်း ယခုနှစ်တွင် သယ်ယူပို့ဆောင်ရေးအခက်အခဲများကြောင့် အရှုံးမပေါ်ရေးကိုသာ ဦးစားပေးရုန်းကန်နေရကြောင်း မန္တလေးအခြေစိုက် သီးနှံပွဲရုံလုပ်ငန်းရှင်တစ်ဦးက ပြောသည်။
ဈေးနှုန်းအခြေအနေအရ ယခင်နှစ် အလားတူကာလတွင် နာနတ်သီးတစ်လုံးလျှင် ပျမ်းမျှ ကျပ် ၅,၀၀၀ ဝန်းကျင်အထိ ရရှိခဲ့သော်လည်း လက်ရှိတွင် အရည်အသွေးကောင်း နာနတ်သီးများပင် ကျပ် ၁,၅၀၀ မှ ၂,၀၀၀ ဝန်းကျင်သာ ရရှိနေကြောင်း သိရသည်။
ပုပ်သိုးပျက်စီးမှုများသော နာနတ်သီးများမှာမူ တစ်လုံးလျှင် ကျပ် ၃၀၀ မှ ၅၀၀ ဝန်းကျင်ဖြင့်သာ ရောင်းချနေရကြောင်း သိရသည်။

ဂျပန်နိုင်ငံက မြန်မာ့ငရုတ်သီးထုတ်ကုန်များတွင် Aflatoxin(မှိုအဆိပ်) ပါဝင်မှုရှိ၊ မရှိ ဆက်လက်စောင့်ကြည့်စစ်ဆေးမည်

ဂျပန်နိုင်ငံသို့ တင်ပို့နေသည့် မြန်မာနိုင်ငံထုတ် ငရုတ်သီးမှုန့်၊ ငရုတ်ပွနှင့် ငရုတ်သီးခြောက် (အနီရောင်) ပါဝင်သော အစားအသောက်များအပေါ် Aflatoxin (မှိုအဆိပ်) ပါဝင်မှုရှိ၊ မရှိကို ဂျပန်အစိုးရက ဆက်လက်စောင့်ကြည့်စစ်ဆေးသွားမည်ဖြစ်ကြောင်း မြန်မာနိုင်ငံ သစ်သီးဝလံ၊ ပန်းမန်နှင့် ဟင်းသီးဟင်းရွက် စိုက်ပျိုးထုတ်လုပ်တင်ပို့ရောင်းချသူများအသင်း (MFVP) က အသိပေးထုတ်ပြန်ထားသည်။
MFVP ၏ ထုတ်ပြန်ချက်အရ ဂျပန်နိုင်ငံသို့ မြန်မာ့ပဲတီစိမ်းနှင့် ငရုတ်သီးမှုန့်များ တင်ပို့ရာတွင် လိုက်နာရမည့် စစ်ဆေးရေးဆိုင်ရာ သတ်မှတ်ချက်အသစ်များကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနက အကြောင်းကြားလာခြင်းဖြစ်ကြောင်း သိရသည်။
ဂျပန်နိုင်ငံ၏ အစားအသောက်ဘေးကင်းလုံခြုံရေး သတ်မှတ်ချက်များအရ Total Aflatoxin (B1, B2, G1 နှင့် G2) ပါဝင်မှုကို သက်ဆိုင်ရာ စမ်းသပ်နည်းလမ်းများဖြင့် ဆက်လက်စစ်ဆေးသွားမည်ဖြစ်ပြီး စားသုံးသူဘေးကင်းလုံခြုံရေးကို အလေးထားဆောင်ရွက်သွားမည်ဖြစ်ကြောင်းလည်း ဖော်ပြထားသည်။
ထို့ပြင် ဂျပန်နိုင်ငံ၏ သက်ဆိုင်ရာအမိန့်ကြေညာချက်များအရ မြန်မာနိုင်ငံထုတ် ငရုတ်ပွနှင့် ငရုတ်သီးခြောက် (အနီရောင်) ပါဝင်သည့် အစားအသောက်အချို့ကို တင်သွင်းသည့် ကုမ္ပဏီများအပေါ် ကန့်သတ်ချက်များ ချမှတ်ထားကြောင်း သိရသည်။
MFVP ကလည်း ဂျပန်ဈေးကွက်သို့ တင်ပို့နေသော ကုန်သည်များနှင့် ထုတ်လုပ်သူများအနေဖြင့် မိမိတို့၏ ထုတ်ကုန်များကို ဂျပန်နိုင်ငံ၏ အရည်အသွေးနှင့် အစားအသောက်ဘေးကင်းလုံခြုံရေး စံချိန်စံညွှန်းများနှင့် ကိုက်ညီစေရန် အထူးဂရုပြုဆောင်ရွက်ကြရန် တိုက်တွန်းထားသည်။
ဂျပန်က စားသုံးသူဘေးကင်းလုံခြုံရေးအတွက် မြန်မာ့ငရုတ်သီးထုတ်ကုန်များတွင် Aflatoxin ပါဝင်မှု ရှိ၊ မရှိကို ဆက်လက်တင်းကြပ်စစ်ဆေးနေခြင်းဖြစ်သည်။

ရန်ကုန်-မန္တလေးလမ်းဟောင်းတွင် ကားချင်းရှောင်ရာမှ အရှိန်မထိန်းနိုင်ဘဲ ဆီဘောက်ဆာကားလမ်းဘေးထိုးကျ(၁)ဦးဒ_ဏ်ရာရ မီးမလေ_ာင်စေရေးအအေးပေး

ပဲခူးတိုင်း၊ ရေတာရှည်မြို့နယ်ရှိ ရန်ကုန်-မန္တလေးကားလမ်းဟောင်းတွင် ဇူလိုင် ၂၁ ရက်ည ၉ နာရီကျော်ခန့်က ဆီ‌ဘောက်ဆာကားအရှိန်မထိန်းနိုင်ဘဲ လမ်းဘေးထိုးကျခဲ့ကြောင်း သိရသည်။
ရေတာရှည်မြို့နယ်၊ ရန်ကုန်- မန္တလေးလမ်းဟောင်းအတိုင်းမောင်းနှင်လာသော ဆီဘောက်ဆာကားသည် မိုင်တိုင်အမှတ် ၁၈၀/၅ အရောက်လမ်းတဘက်ရှိယာဉ်အားရှောင်တိမ်းစဥ် အရှိန်မထိန်းနိုင်ဘဲလမ်းဘေးသို့ ထိုးကျသွားခဲ့ကြောင်း သိရသည်။
ထို့ကြောင့် မီးလေ_ာင်မှုမဖြစ်ပွားစေရေးအတွက် ရေတာရှည်မြို့နယ်မီးသတ်စခန်းမှတပ်ဖွဲ့ဝင်များမှ အအေးပေးခဲ့ကြပြီး ဖြစ်စဉ်ကြောင့် ထိခို-က်ဒ-ဏ်ရာ(စိုးရိမ်ရ) ရရှိခဲ့သော ကားမောင်းသူကို ဆွာလူမှုကူညီရေးအသင်းက ဆွာဆေးရုံသို့ပို့ဆောင်ပေးခဲ့ကြကြောင်း သိရသည်။

ဗဟိုဘဏ်က စားသုံးဆီတင်သွင်းသူများသို့ အမေရိကန်ဒေါ်လာ ၄ သန်းကျော် ရောင်းချ

မြန်မာနိုင်ငံတော်ဗဟိုဘဏ်သည် CMP ကုမ္ပဏီများထံမှ ဝယ်ယူထားသည့် နိုင်ငံခြားငွေများအနက် အမေရိကန်ဒေါ်လာ ၄ သန်းကျော်ကို စားသုံးဆီတင်သွင်းသည့်ကုမ္ပဏီများသို့ ရောင်းချပေးခဲ့ကြောင်း ဗဟိုဘဏ်ထုတ်ပြန်ချက်အရ သိရသည်။
ထို့ပြင် CMP ကုမ္ပဏီများထံသို့လည်း အမေရိကန်ဒေါ်လာ ၁၃၇,၄၀၄ ကို ရောင်းချပေးခဲ့ကြောင်း သိရသည်။
ဗဟိုဘဏ်၏ FX Trading တွင် နိုင်ငံခြားငွေဝယ်ယူရရှိမှုအခြေအနေအရ စက်သုံးဆီကဏ္ဍက စုစုပေါင်း၏ ၅၁ ရာခိုင်နှုန်းဖြင့် အများဆုံးဖြစ်ခဲ့ပြီး စားသုံးဆီကဏ္ဍက ၂၂ ရာခိုင်နှုန်းဖြင့် ဒုတိယအများဆုံး ဝယ်ယူခဲ့ကြောင်း ထုတ်ပြန်ချက်တွင် ဖော်ပြထားသည်။
ထို့ပြင် ဆေးနှင့် ဆေးဝါးကုန်ကြမ်းပစ္စည်းများက ၄ ရာခိုင်နှုန်း၊ စက်မှုကုန်ကြမ်းက ၂ ရာခိုင်နှုန်း၊ ဂျုံ၊ ကား/ဆိုင်ကယ်အပိုပစ္စည်း၊ ဆောက်လုပ်ရေးလုပ်ငန်းသုံးပစ္စည်း၊ ထုတ်ပိုးမှုပစ္စည်းနှင့် ဓာတ်မြေဩဇာကဏ္ဍများက တစ်ခုလျှင် ၁ ရာခိုင်နှုန်းစီ၊ စားသုံးကုန်စည်က ၂ ရာခိုင်နှုန်းနှင့် အခြားကုန်ပစ္စည်းများနှင့် Non Trade Transaction များက ၁၄ ရာခိုင်နှုန်း အသီးသီး ဝယ်ယူရရှိခဲ့ကြောင်း သိရသည်။
ဗဟိုဘဏ်သည် ပြည်တွင်းလိုအပ်သည့် အရေးကြီးကုန်စည်များ တင်သွင်းရာတွင် လိုအပ်သော နိုင်ငံခြားငွေများကို FX Trading အစီအစဉ်မှတစ်ဆင့် စဉ်ဆက်မပြတ် ရောင်းချပေးလျက်ရှိကြောင်းလည်း ထုတ်ပြန်ထားသည်။

NSPNC နှင့် NCA-S EAOs တို့ ငြိမ်းချမ်းရေးလုပ်ငန်းစဉ် အရှိန်မြှင့်ရေးနှင့် ပြည်တွင်း/ပြည်ပ နည်းပညာအကူအညီရယူရေး ဆွေးနွေး

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများ (NCA-S EAOs) တို့၏ ငြိမ်းချမ်းရေးလုပ်ငန်းစဉ်ဆိုင်ရာ ပြန်လည်သုံးသပ်ခြင်းဆွေးနွေးပွဲ ဒုတိယနေ့ကို ဇူလိုင် ၂၁ ရက်က ကျင်းပခဲ့ပြီး ငြိမ်းချမ်းရေးလုပ်ငန်းစဉ် အရှိန်မြှင့်ဖော်ဆောင်ရေး၊ ပြည်တွင်းနှင့် ပြည်ပနည်းပညာအကူအညီများ ရယူရေးအပါအဝင် အချက်များကို ဆွေးနွေးခဲ့ကြကြောင်း သိရသည်။
နှစ်ရက်တာ ဆွေးနွေးညှိနှိုင်းမှုများအတွင်း NCA ကို အခြေခံသည့် ငြိမ်းချမ်းရေးလုပ်ငန်းစဉ် ဆက်လက်ဖော်ဆောင်ရေး၊ နိုင်ငံရေးပြဿနာများကို နိုင်ငံရေးနည်းလမ်းဖြင့် ဖြေရှင်းရေး၊ သက်ဆိုင်သူအားလုံး ပါဝင်သည့် နိုင်ငံရေးတွေ့ဆုံဆွေးနွေးပွဲများ ဖြစ်မြောက်လာစေရေးနှင့် ဆွေးနွေးညှိနှိုင်းရေး ကိုယ်စားလှယ်အဖွဲ့များ ဆက်လက်တွေ့ဆုံဆွေးနွေးရေးတို့ကို ဆွေးနွေးခဲ့ကြသည်။
ထို့ပြင် EAO များ အခြေပြုရာဒေသများတွင် တည်ငြိမ်အေးချမ်းရေးနှင့် ဖွံ့ဖြိုးရေးလုပ်ငန်းများ အကောင်အထည်ဖော်ရေး၊ လူသားချင်းစာနာထောက်ထားမှု အကူအညီများပေးအပ်၍ ဒေသဖွံ့ဖြိုးရေးနှင့် ငြိမ်းချမ်းရေးလုပ်ငန်းစဉ်ကို ချိတ်ဆက်ဆောင်ရွက်ရေး၊ တိုင်းနှင့် ပြည်နယ်များတွင် ပြည်သူလူထုအခြေပြု ဆွေးနွေးပွဲများနှင့် ဖိုရမ်များကျင်းပရာ၌ သက်ဆိုင်ရာ NCA-S EAOs များ ပူးပေါင်းပါဝင်ရေး၊ အလွတ်သဘောတွေ့ဆုံမှုများနှင့် နှစ်ဖက် (Bilateral) တွေ့ဆုံဆွေးနွေးမှုများ ဆက်လက်ဆောင်ရွက်ရေးတို့အပြင် ငြိမ်းချမ်းရေးလုပ်ငန်းစဉ် အကောင်အထည်ဖော်ရာတွင် လိုအပ်သည့် ပြည်တွင်းနှင့် ပြည်ပနည်းပညာအကူအညီများ ရယူနိုင်ရေးကိုလည်း ဆွေးနွေးခဲ့ကြကြောင်း သိရသည်။
NSPNC အတွင်းရေးမှူး ဒုတိယဗိုလ်ချုပ်ကြီး မင်းနိုင်က နှစ်ရက်တာဆွေးနွေးမှုများမှ ရရှိလာသည့် သဘောထားများကို အခြေခံ၍ NCA ၏ အနှစ်သာရအတိုင်း ငြိမ်းချမ်းရေးလုပ်ငန်းစဉ် ဆက်လက်ဖော်ဆောင်ရေး၊ ယုံကြည်မှုတည်ဆောက်ရေး၊ NCA လက်မှတ်မရေးထိုးရသေးသည့် တိုင်းရင်းသားလက်နက်ကိုင်အဖွဲ့အစည်းများနှင့် အကြောင်းအမျိုးမျိုးကြောင့် NCA လမ်းကြောင်းမှ ကင်းကွာနေသည့် အဖွဲ့အစည်းများ ပြန်လည်ပါဝင်လာနိုင်ရေး၊ စဉ်ဆက်မပြတ် တွေ့ဆုံဆွေးနွေးရေးနှင့် ရှေ့ဆက်အကောင်အထည်ဖော်မည့် ငြိမ်းချမ်းရေးလုပ်ငန်းစဉ်များကို ရှင်းလင်းပြောကြားခဲ့ကြောင်း သိရသည်။
ဆွေးနွေးပွဲအပြီးတွင် နှစ်ရက်တာ ဆွေးနွေးညှိနှိုင်းမှုများမှ ရရှိသည့် သဘောထားစုစည်းချက်များကို မှတ်တမ်းတင် လက်မှတ်ရေးထိုးခဲ့ကြကြောင်း သိရသည်။
အဆိုပါဆွေးနွေးပွဲသို့ NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့်၊ အတွင်းရေးမှူး ဒုတိယဗိုလ်ချုပ်ကြီး မင်းနိုင်နှင့် ကော်မတီဝင်များ၊ NCA-S EAOs ဆွေးနွေးညှိနှိုင်းရေးအဖွဲ့မှ RCSS၊ KNU/KNLA ကောင်စီ၊ NMSP၊ DKBA၊ LDU၊ ALP တို့၏ ကိုယ်စားလှယ်များနှင့် ညှိနှိုင်းရေးမှူးများ တက်ရောက်ခဲ့ကြကြောင်း သိရသည်။

မြန်မာနိုင်ငံတွင် WFP မှ လက်ရှိဆောင်ရွက်နေသော လုပ်ငန်းအစီအစဉ် အကောင်အထည်ဖော်မှုအခြေအနေများ ဆွေးနွေး

အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးအောင်ကျော်ဟိုးသည် ကုလသမဂ္ဂ ကမ္ဘာ့စားနပ်ရိက္ခာအစီအစဉ် (World Food Program) ၏ မြန်မာနိုင်ငံဆိုင်ရာ ဌာနေကိုယ်စားလှယ် Mr. Michael John Dunford ကို ဇူလိုင် ၂၁ ရက်က တွေ့ဆုံခဲ့ကြောင်း သိရသည်။
အမျိုးသားစီမံကိန်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ရုံးအမှတ် (၁) နေပြည်တော်၌ လက်ခံတွေ့ဆုံခဲ့ခြင်းလည်း ဖြစ်သည်။
မြန်မာနိုင်ငံတွင် WFP မှ လက်ရှိဆောင်ရွက်နေသော လုပ်ငန်းအစီအစဉ် အကောင်အထည်ဖော်မှုအခြေအနေနှင့် ရှေ့ဆက်လက်ဆောင်ရွက်ရန်ရှိသည့် လုပ်ငန်းအစီအစဉ်များကို ဆွေးနွေးခဲ့ကြောင်း သိရသည်။

ရန်ကုန်-မန္တလေးအမြန်လမ်းတစ်လျှောက် ဆိုလာစီမံကိန်းများတွင် ရင်းနှီးမြှုပ်နှံရန် လုပ်ငန်းရှင်များ စိတ်ဝင်စား

ရန်ကုန်-မန္တလေးအမြန်လမ်းတစ်လျှောက်တွင် နေရောင်ခြည်စွမ်းအင် (ဆိုလာ) စီမံကိန်းများ အကောင်အထည်ဖော် ရင်းနှီးမြှုပ်နှံရန် ပြည်တွင်းလုပ်ငန်းရှင်များ၏ စိတ်ဝင်စားမှု မြင့်တက်လာနေကြောင်း လျှပ်စစ်နှင့်စွမ်းအင်ဝန်ကြီးဌာနထံမှ သိရသည်။
ပြည်ထောင်စုဝန်ကြီး ဦးကိုကိုလွင်၏ ပြောကြားချက်အရ လုပ်ငန်းရှင်များအနေဖြင့် မိတ္ထီလာ၊ သာစည်၊ နေပြည်တော်နှင့် တပ်ကုန်းအနီးတစ်ဝိုက်တို့တွင် ဆိုလာစီမံကိန်းများ ရင်းနှီးမြှုပ်နှံရန် အဓိကစိတ်ဝင်စားနေကြကြောင်း သိရသည်။
ထို့ပြင် ရန်ကုန်-ပြည်လမ်းတစ်လျှောက်တွင် မဟာဓာတ်အားလိုင်း တည်ရှိနေသော်လည်း ရင်းနှီးမြှုပ်နှံလိုသူ နည်းပါးနေသဖြင့် တောင်တွင်းကြီး၊ အောင်လံ၊ ရွှေတောင်၊ အုတ်ဖို၊ မြန်အောင်၊ မင်းလှနှင့် မြောင်းတကာဒေသများတွင်လည်း ဆိုလာစီမံကိန်းများ တိုးချဲ့အကောင်အထည်ဖော်ရန် ဝန်ကြီးဌာနက တိုက်တွန်းထားကြောင်း သိရသည်။
“အဲ့ဒီနေရာတွေလည်း မျှပြီးလုပ်ပါ။ အဲဒီဒေသက လူတွေက ပိုပြီးတော့တောင် လျှပ်စစ်လိုအပ်နေသေးတယ်” ဟု ပြည်ထောင်စုဝန်ကြီး ဦးကိုကိုလွင်က ပြောကြားသည်။
ထို့အပြင် နိုင်ငံအတွင်း မဟာဓာတ်အားလိုင်း မရောက်ရှိသေးသည့် ဒေသများတွင်လည်း လုပ်ငန်းရှင်များအနေဖြင့် တစ်ပိုင်တစ်နိုင် ဆိုလာစနစ်များ တည်ဆောက်ခြင်း သို့မဟုတ် ဒေသတွင်း ဓာတ်အားလိုင်းများသို့ ချိတ်ဆက်ဖြန့်ဖြူးခြင်းတို့ဖြင့် ရင်းနှီးမြှုပ်နှံနိုင်ကြောင်းလည်း ဝန်ကြီးဌာနက အသိပေးထားသည်။
လက်ရှိတွင် မြန်မာနိုင်ငံ၌ ရေအားလျှပ်စစ်စက်ရုံ ၃၂ ရုံ၊ သဘာဝဓာတ်ငွေ့သုံး စက်ရုံ ၂၄ ရုံ၊ ကျောက်မီးသွေးသုံး စက်ရုံ နှစ်ရုံနှင့် နေရောင်ခြည်စွမ်းအင်သုံး (ဆိုလာ) စက်ရုံ ၁၂ ရုံတို့မှ စုစုပေါင်း လျှပ်စစ်ဓာတ်အား ၃၄၀၀ မဂ္ဂါဝပ်ခန့် ထုတ်လုပ်လျက်ရှိပြီး ဆိုလာစွမ်းအင်မှ ထုတ်လုပ်သည့် ဓာတ်အားပမာဏမှာ စုစုပေါင်း၏ ၄ ရာခိုင်နှုန်းသာ ရှိသေးကြောင်း သိရသည်။

အလုပ်သမားများအတွက် အခွင့်အရေးများရရှိရေး ဥပဒေများနှင့်အညီ ဆောင်ရွက်ပေးနေ

အလုပ်သမားများအတွက် အခွင့်အရေးများရရှိရေး တည်ဆဲဥပဒေများနှင့်အညီ ဆောင်ရွက်ပေးလျက်ရှိကြောင်း အလုပ်သမားဝန်ကြီးဌာန၊ ပြည်ထောင်စုဝန်ကြီး ဦးခင်မောင်စိုးက ပြောကြားသည်။
ဧရာဝတီတိုင်းဒေသကြီးရှိ စက်ရုံအလုပ်ရုံများမှ အလုပ်ရှင်အလုပ်သမားများနှင့် ဇူလိုင် ၂၁ ရက်က ပုသိမ်မြို့တွင် တွေ့ဆုံချိန်၌ ပြည်ထောင်စုဝန်ကြီး ဦးခင်မောင်စိုးက အထက်ပါအတိုင်းပြောကြားခဲ့ခြင်းဖြစ်သည်။
“လူမှုဖူလုံရေးအကျုံးဝင် အာမခံအလုပ်သမားများ၏ ကျန်းမာရေးစောင့်ရှောက်မှုနှင့် ငွေကြေးအကျိုးခံစားခွင့်များ ရရှိနိုင်ရေး ဆောင်ရွက်ပေးလျက်ရှိကြောင်း၊ အလုပ်ရှင်၊ အလုပ်သမားများအနေဖြင့် လုပ်ငန်းခွင်အေးချမ်းသာယာပြီး ကုန်ထုတ်လုပ်မှုတိုးတက်ရေးအတွက် ပူးပေါင်းဆောင်ရွက်သွားရန်”လည်း ပြည်ထောင်စုဝန်ကြီး ဦးခင်မောင်စိုးက ပြောသည်။
ထို့ပြင် အလုပ်သမားဝန်ကြီးဌာနသည် မြန်မာလုပ်သားထု၏ လုပ်ငန်းစွမ်းဆောင်ရည် တိုးတက်မြင့်မားစေရေး၊ ကျွမ်းကျင်မှုဖွံ့ဖြိုးတိုးတက်ရေးနှင့် သင့်လျော်ကောင်းမွန်သော အလုပ်အကိုင်အခွင့်အလမ်းများ ရရှိစေရေးအတွက် အကောင်အထည်ဖော်ဆောင်ရွက်ပေးလျက်ရှိကြောင်း သိရသည်။

စမုံရေငုပ်ပြွန်အောက်ပိုင်းရှိ ဆည်ရေသောက်ဧရိယာ ၄၂၄၃၉ ဧကကို ဆည်ရေပေးဝေလျက်ရှိ

မိတ္ထီလာခရိုင်၊ ဝမ်းတွင်းမြို့နယ်အတွင်း တည်ရှိသည့် ကင်းတားဆည် လက်ဝဲမြောင်းမကြီးမှ ယခုနှစ် မိုးစပါးဧက ၅၂၀၇၀ နှင့် အခြား မိုးသီးနှံ ၃၄၉၄ ဧကကို စိုက်ပျိုးရေ ပေးဝေရန် လျာထားဆောင်ရွက်လျက်ရှိကြောင်း သိရသည်။
လက်ရှိတွင် စမုံရေငုပ်ပြွန်အောက်ပိုင်းရှိ စိုက်ပျိုးဧရိယာ ၄၂၄၃၉ ဧကကို ဇူလိုင်လဒုတိယပတ်မှစတင်၍ ဆည်ရေပေးဝေလျက်ရှိပြီး စမုံရေငုပ်ပြွန်မှ မိတ္ထီလာလွင်ပြင်ဒေသအတွင်း တိုးချဲ့စိုက်ပျိုးရန်လျာထားသည့် စိုက်ပျိုးဧရိယာများအတွက်ပါ စိုက်ပျိုးရေ တိုးချဲ့ပေးဝေသွားမည်ဖြစ်ကြောင်း သိရသည်။
အဆိုပါ စမုံရေငုပ်ပြွန်အသစ် ပြန်လည်တည်ဆောက်ပြီးစီးမှုကို ဇူလိုင် ၂၀ ရက်က စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် မန္တလေးတိုင်းဒေသကြီး ဝန်ကြီးချုပ် ဦးမျိုးအောင်နှင့်အတူ သွားရောက်ကြည့်ရှုစစ်ဆေးခဲ့ကြောင်းလည်း သိရသည်။
ထို့ပြင် ဒေသခံတောင်သူများနှင့် တွေ့ဆုံပြီး ဝင်ငွေရသီးနှံများ ရွေးချယ်စိုက်ပျိုးရေး၊ စိုက်ပျိုးသည့်သီးနှံများ အထွက်ကောင်းရေး၊ ရိတ်သိမ်းသိုလှောင်ခြင်းလုပ်ငန်းများတွင် သီးနှံလေလွင့်မှုမရှိရေး ဂရုပြုဆောင်ရွက်ရန် ပြောကြားခဲ့ကြောင်း သိရသည်။