ရုရှား-ယူကရိန်း နောက်ထပ်ဆွေးနွေးပွဲ ဂျီနီဗာမှာ ကျင်းပနိုင်
ဝါရှင်တန်၊
ယူကရိန်းစစ်ပွဲ အပစ်အခတ်ရပ်စဲရေးအတွက် ရုရှားနဲ့ ယူကရိန်းတို့ရဲ့ နောက်ထပ်ဆွေးနွေးပွဲကို ဂျီနီဗာမှာ ကျင်းပနိုင်ကြောင်း ယူကရိန်းဆိုင်ရာ အမေရိကန်အထူးကိုယ်စားလှယ် ကိသ်ကီလော့က ပြောပါတယ်။
အပစ်အခတ်ရပ်စဲရေးအတွက် ယူကရိန်းရဲ့ လိုလားချက်တွေကို အမေရိကန်က ရရှိထားပြီး ရုရှားဘက်ကလည်း အလားတူ ပြုလုပ်ဖို့ လိုအပ်ပြီး ဒါကိုရရှိတာနဲ့ ရုရှားနဲ့ ယူကရိန်းအကြား လူချင်းတွေ့ဆုံဆွေးနွေးမှုတွေကို ထပ်မံကျင်းပနိုင်မယ်လို့ ဆိုပါတယ်။
အမေရိကန်အနေနဲ့ နှစ်ဖက်ဆွေးနွေးပွဲတွေကို ဗာတီကန်မှာ ကျင်းပဖို့ ဆန္ဒရှိပေမယ့် ရုရှားဘက်က မလိုလားဘူးလို့ ပြောပါတယ်။ ဒီအတောအတွင်း ရုရှားနိုင်ငံခြားရေးဝန်ကြီး ဆာဂေးလပ်ရော့ဗ်ဟာ တူရကီနိုင်ငံခြားရေးဝန်ကြီးနဲ့ မော်စကိုမှာ တွေဆုံဆွေးနွေးခဲ့ပါတယ်။
ရုရှားနဲ့ ယူကရိန်းတို့အကြား နောက်ထပ်ဆွေးနွေးပွဲကို လက်ခံကျင်းပဖို့ တူရကီကို တောင်းဆိုမယ်လို့ ရုရှားနိုင်ငံခြားရေးဝန်ကြီးက ပြောပါတယ်။ တူရကီကတော့ နှစ်ဖက်ဆွေးနွေးပွဲတွေကို လက်ခံကျင်းပဖို့ အသင့်ရှိတယ်လို့ ထုတ်ဖော်ပြောဆိုခဲ့ဖူးပါတယ်။
ပြီးခဲ့တဲ့ မေ ၁၆ ရက်ကလည်း ရုရှားနဲ့ ယူကရိန်းကိုယ်စားလှယ်အဖွဲ့တို့အကြား ပထမဆုံး မျက်နှာချင်းဆိုင် ဆွေးနွေးပွဲကို လက်ခံကျင်းပခဲ့ပါတယ်။ ဒါပေမယ့်လည်း နှစ်နိုင်ငံအကြား စစ်သုံ့ပန်းတွေ အပြန်အလှန် လဲလှယ်ဖို့ကလွဲပြီး အပစ်ရပ်ရေး သဘောတူညီချက် တစုံတရာ မရရှိခဲ့ပါဘူး။
ဒီအတောအတွင်း ရုရှားဟာ နယ်စပ်တလျှောက်မှာ ကြားခံဇုန်တွေဖန်တီးဖို့ တစိတ်တပိုင်းအဖြစ် ယူကရိန်းအရှေ့မြောက်ပိုင်း ဆူမီဒေသမှာ ထိုးစစ်ဆင်မှုတွေ အပြင်းအထန်လု်ပဆောင်နေတယ်လို့ ယူကရိန်းတာဝန်ရှိသူတွေက ပြောပါတယ်။
Ref:NHK
Photo:Getty Images
