ဓါတ်ပုံအတုများကို ပြန်ပြင်နိုင်ရန် ဉာဏ်ရည်တု ကိရိယာကို တီထွင်

သြစတြေးလျနိုင်ငံ မိုနာ့ရှ် တက္ကသိုလ်မှ သုတေသီများသည် ဩစတြေးလျ ရဲတပ်ဖွဲ့နှင့် ပူးပေါင်း၍ ဓါတ်ပုံအတုများကို ပြန်ပြင်နိုင်ရန် ဉာဏ်ရည်တု ကိရိယာအသစ်ကို တီထွင်လျက်ရှိသည်။
၎င်းသု‌တေသီများ၏ အက်ပလီကေးရှင်းအသစ်သည် ဉာဏ်ရည်တုဖြင့် ထုတ်လုပ်ထားသော ကလေးငယ်များကို အလွဲသုံးစားပြုသည့် ဓါတ်ပုံအတုများနှင့် ဗီဒီယိုအတုများကို ထုတ်လုပ်သည့် ရာဇဝတ်ကောင်များကို လျော့ကျစေပြီး အဆုံး၌ ရပ်တန့်ပစ်နိုင်မည်ဟု မိုနာ့ရှ် တက္ကသိုလ်၏ တနင်္လာနေ့တွင်ထုတ်ပြန်သော ကြေငြာချက်တစ်ခုအရ သိရသည်။
"ဒေတာအဆိပ်ခပ်ခြင်း" ဟု ခေါ်သော ၎င်းတို့ တီထွင်လိုက်‌သော အက်ပလီကေးရှင်းကြောင့် ဉာဏ်ရည်တု ပရိုဂရမ်များကို အသုံးပြု၍ ရုပ်ပုံများ သို့မဟုတ် ဗီဒီယိုများကို ထုတ်လုပ်ရန်၊ လိုသလို ပြုပြင်ရန်နှင့် အလွဲသုံးစားလုပ်ရန် ကြိုးပမ်းမှုများကို ခက်ခဲစေမည်ဟု ရဲတပ်ဖွဲ့ နှင့် မိုနာ့ရှ်တက္ကသိုလ်တို့က ပူးပေါင်းဆောင်ရွက်သော တရားဥပဒေစိုးမိုးရေးနှင့် ရပ်ရွာလုံခြုံရေးအတွက် ဉာဏ်ရည်တုဌာန၏ ပြောကြားချက်အရ သိရသည်။
ဉာဏ်ရည်တုနှင့် စက်၏သင်ယူမှုကိရိယာများသည် ကြီးမားသောအွန်လိုင်းဒေတာအတွဲများကို အားကိုးအားထား ပြုရသည်ဖြစ်ရာ ဤဒေတာများကို အဆိပ်ခတ်ခြင်းသည် ၎င်းတို့အား မှားယွင်းသောရလဒ်များကို ထုတ်ပေးစေသည်သာမက ရာဇဝတ်သားများက ဖန်တီးထားသော ဓာတ်ပုံများ သို့မဟုတ် ဗီဒီယိုများကိုဖော်ထုတ်ရန် ပိုမိုလွယ်ကူစေကာ အတုအယောင်ပြုလုပ်မှု ပမာဏကိုလည်းလျှော့ချနိုင်ကြောင်း သုတေသီများက ပြောကြားခဲ့သည်။
ဘဲလ် ဝီဆန်၏အဆိုအရ ရာဇဝတ်ကောင်များသည် open-source နည်းပညာကို အသုံးပြု၍ အတုများကို အလွယ်တကူဖန်တီးဖြန့်ဝေနိုင်ကြောင်း အေအက်ဖ်ပီက ဖော်ပြခဲ့သည်။

ရုရှားစစ်ရေယာဥ်(၃)စင်း ရန်ကုန်မြို့သို့ရောက်ရှိလာ

ရုရှားနိုင်ငံ၊ ရုရှားရေတပ် Pacific Fleet မှစစ်ရေယာဉ် (၃) စင်း တတိယအကြိမ် မြန်မာ-ရုရှားနှစ်နိုင်ငံ ရေကြောင်းလုံခြုံရေးဆိုင်ရာလေ့ကျင့်ခန်းဆောင်ရွက်ရန်နှင့် ချစ်ကြည်ရေးခရီးလည်ပတ်ရန်အတွက် ရန်ကုန်မြို့ရှိ သီလဝါဆိပ်ကမ်းသို့ ယနေ့ နိုဝင်ဘာ ၁၀ ရက်ညနေပိုင်းက ဆိုက်ရောက်လာခဲ့ကြောင်း သိရသည်။
ဖရီဂိတ်စစ်ရေယာဉ် Marshal Shaposhnikov ၊ ကော်ဗက်စစ် ရေယာဉ် Gremyashchiy နှင့်ထောက်ပံ့ရေးရေယာဉ် Boris Butoma တို့ဆိုက်ရောက်ခဲ့ခြင်းဖြစ်ကြောင်း သိရသည်။
အဆိုပါ စစ်ရေယာဥ်များအား တပ်မတော် (ရေ) မှ အရာ ရှိကြီးများ၊ အရာရှိ၊ စစ်သည်များ၊ မြန်မာနိုင်ငံသို့ ချစ်ကြည်ရေးခရီးရောက်ရှိနေသည့် ရုရှားရေတပ်မှ ဒု-ရေ တပ်ဦးစီးချုပ် ဒု-ဗိုလ်ချုပ်ကြီး Aleksei Anatolievich kilashko ၊ မြန်မာနိုင်ငံဆိုင်ရာ ရုရှားစစ်သံမှူးနှင့် တာဝန်ရှိသူများကကြိုဆိုခဲ့ကြကြောင်း သိရသည်။
ယင်း စစ်ရေယာဉ်များတွင် အဖွဲ့ခေါင်းဆောင်အဖြစ် ရုရှားရေတပ် Pacific Fleet မှ Captain 1st Rank Ulyanenko Aleksey ဦးစီး၍ အရာရှိ၊စစ်သည်များလိုက်ပါလာပြီး ၎င်းတို့သည် ခရီးစဉ်အတွင်း၌ ရန်ကုန်မြို့ရှိ အထင်ကရနေရာများကိုသွားရောက်လေ့လာလည်ပတ်ခြင်း၊ နှစ်နိုင်ငံချစ်ကြည်ရေး အားကစားပြိုင်ပွဲများပြုလုပ်ခြင်းနှင့် ဆိပ်ကမ်းအခြေပြုလေ့ကျင့်ခန်း (Harbour Phase) များကိုပြုလုပ်သွားမည်ဖြစ်ကြောင်း သိရသည်။

ငမိုးရိပ်ရေလှောင်တမံ၏ သတ်မှတ်ရေပြည့်မှတ်ထက် (၁) ပေ မြင့်တက်လာ

ငမိုးရိပ်ရေလှောင်တမံမှာ သတ်မှတ်ရေပြည့်မှတ်ထက် (၁) ပေ မြင့်တက်လာကြောင်း အသိပေးထားသည်။
ငမိုးရိပ်ရေလှောင်တမံ၏ ရေပြည့်မှတ်မှာ (၁၀၇.၀၀) ပေ သတ်မှတ်ထားရာ
ယနေ့ နံနက်ပိုင်းတွင် ရေမှတ် ၁၀၈.၀၀ ပေသို့ရောက်ရှိနေကြောင်း သိရသည်။
အလားတူ မဟူရာတမံရေပြည့်မှတ်မှာ (၂၁၆.၀၀) ပေ သတ်မှတ်ထားရာ ယနေ့တွင် ရေမှတ် (၂၁၇.၆၀ ) ပေသို့ မြင့်တက်သကဲ့သို့ ပေါင်းလင်းတမံမှာလည်း ရေပြည့်မှတ်ရောက်ရန်(၇.၈၀) ပေသာ လိုတော့ကြောင်း အသိပေးထားသည်။
ငမိုးရိပ်ရေပိုလွှဲ၌ Shutter များ ထောင်ထားခြင်းကြောင့် ရေမကျော်နိုင်ကြောင်းနှင့် မဟူရာတမံရေပိုလွှဲမှာလည်း သဲအိတ်များပိတ်ပြီး ရေသိုလှောင်ခြင်းကြောင့် ရေမကျော်နိုင်ကြောင်း အသိပေးထားသည်။
ရန်ကုန်တိုင်းအပါအဝင် နေပြည်တော်၊ ရန်ကုန်တိုင်း၊ ပဲခူးတိုင်း၊ ဧရာဝတီတိုင်း၊ တနင်္သာရီတိုင်း၊ ကယားပြည်နယ်၊ ကရင် ပြည်နယ်၊ မွန်ပြည်နယ်နှင့် ရှမ်းပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာမည်ဟု မိုး/ဇလ က အသိ‌ပေးထားသည်။

ကမ္ဘောဒီးယားနှင့် သဘောတူညီချက်များအားလုံးကို ဆိုင်းငံ့လိုက်ကြောင်း ထိုင်း‌တော်ဝင်တပ်မတော်ကြေညာ

"ကမ္ဘောဒီးယားအနေဖြင့် (ထိုင်းနိုင်ငံ၏)'ရန်သူ' မဟုတ်ကြောင်း ရိုးသားစွာ ထင်ရှားပြသသည်အထိ၊ ထိုင်းတော်ဝင်တပ်မတော်သည် သဘောတူညီချက်များအားလုံးကို ဆိုင်းငံ့လိုက်မည်ဖြစ်ပြီး၊ ထိုင်းတော်ဝင်တပ်မတော်သည် နိုင်ငံတော်၏ ဂုဏ်သိက္ခာနှင့် အချုပ်အခြာအာဏာကိုလည်းကောင်း၊ ထိုင်းလူမျိုးအားလုံး၏ ကောင်းကျိုးချမ်းသာကိုလည်းကောင်း ထိန်းသိမ်းရန် အသင့်ရှိပါသည်"
ဗိုလ်ချုပ်ကြီး အုခ်ခရစ် ဘွန်တနွန်ထာ ကာကွယ်ရေးဦးစီးချုပ်

Computer အသုံးပြုနေရင်း ရုတ်တရက် ပိတ်သွားရခြင်း အကြောင်းများ။ 🙂‍↔️
၁။ အပူလွန်ကဲခြင်း (Overheating)
ဒါက အဖြစ်အများဆုံး အကြောင်းရင်းတစ်ခုပါ။
📌အဓိကအကြောင်းရင်း:
CPU သို့မဟုတ် Graphics Card ကဲ့သို့သော အစိတ်အပိုင်းများကို အားစိုက်အသုံးပြုရတဲ့ Program တွေ (ဂိမ်းဆော့တာ၊ ဗီဒီယိုတည်းဖြတ်တာ၊ ဆော့ဖ်ဝဲအသစ်တင်တာ) ကြောင့် အပူချိန်မြင့်တက်သွားတတ်ပါတယ်။
ဘာကြောင့်ပိတ်သလဲ:🤔
Computer က သူ့အစိတ်အပိုင်းတွေ ပျက်စီးမှာကို ကာကွယ်ဖို့ ကိုယ်တိုင်အလိုအလျောက် ပိတ်ချလိုက်ပါတယ်။
လက္ခဏာများ: ✋
Computer က လုပ်ငန်းစဉ်အကြီးစားလုပ်နေချိန်မှာသာ ပိတ်တတ်ခြင်း။
Case ထဲက Fan အသံကျယ်လောင်စွာ လည်နေခြင်း။
Case ကိုထိကြည့်လျှင် အရမ်းပူနေခြင်း။
၂။ ဓာတ်အားဆိုင်ရာ ပြဿနာများ (Power Supply Issues)
📌အဓိကအကြောင်းရင်း:
Power Supply Unit (PSU) အားနည်းနေခြင်း၊ ပျက်စီးနေခြင်း သို့မဟုတ် မတည်ငြိမ်တဲ့ လျှပ်စစ်ဓာတ်အားကြောင့်ဖြစ်တတ်ပါတယ်။
ဘာကြောင့်ပိတ်သလဲ: 🤔
Computer လည်ပတ်ဖို့ လိုအပ်တဲ့ ဓာတ်အားပမာဏကို PSU က မပေးနိုင်တော့တဲ့အခါ ရုတ်တရက် ပိတ်သွားတတ်ပါတယ်။
လက္ခဏာများ: ✋
ဘာလုပ်လုပ် ပိတ်သွားခြင်း (အပူချိန်နဲ့ မဆိုင်ဘဲ)။
Computer ကို ပြန်ဖွင့်ဖို့ ကြိုးစားရင် ဖွင့်မရဘဲ ပြန်ပိတ်သွားခြင်း။
UPS သို့မဟုတ် Stabilizer မရှိဘဲ လျှပ်စစ်မီးအားမမှန်တဲ့ နေရာမှာ သုံးစွဲနေခြင်း။
၃။ ဆော့ဖ်ဝဲ ပဋိပက္ခများ (Software Conflicts)
📌အဓိကအကြောင်းရင်း:
Driver အသစ်တင်မိခြင်း၊ Operating System (Windows) Update မှားယွင်းခြင်း၊ ဗိုင်းရပ်စ်ရှိခြင်း၊ သို့မဟုတ် Program နှစ်ခု တစ်ပြိုင်နက် အလုပ်လုပ်ရာက ပဋိပက္ခဖြစ်ခြင်း။
ဘာကြောင့်ပိတ်သလဲ:🤔 System File တစ်ခုခု ပျက်စီးသွားတဲ့အခါ၊ သို့မဟုတ် မတည်ငြိမ်တဲ့ Command ပေးမိတဲ့အခါ Blue Screen of Death (BSOD) မြင်ရပြီး Computer က ပြန်လည် Restart ချလိုက်တတ်ပါတယ်။
လက္ခဏာများ:✋
ဆော့ဖ်ဝဲအသစ်တစ်ခုခု တင်ပြီးချိန်မှ စဖြစ်ခြင်း။
Blue Screen မြင်ရခြင်း (Error Code ပါလေ့ရှိပါတယ်)။
Computer က ပုံမှန်အလုပ်လုပ်နေရာက ရုတ်တရက် Restart ချသွားခြင်း။
၄။ ဟာ့ဒ်ဝဲ ပျက်စီးခြင်း (Hardware Failure)
📌အဓိကအကြောင်းရင်း:
RAM ပျက်စီးခြင်း၊ Motherboard ပြဿနာရှိခြင်း၊ Hard Disk ပျက်စီးခြင်း တို့ကြောင့်လည်း ဖြစ်တတ်ပါတယ်။
ဘာကြောင့်ပိတ်သလဲ:🤔
Motherboard ပေါ်က Capacitor ( Capacitor ခေါ် လျှပ်စုပစ္စည်း) တွေ ဖောင်းကားလာတာ၊ RAM ချောင်းတွေ ကောင်းကောင်းမတပ်မိတာ စတာတွေကြောင့် System က ရုတ်တရက် ရပ်ဆိုင်းသွားတတ်ပါတယ်။
လက္ခဏာများ:✋
Computer ဖွင့်လိုက်ရင် မီးပြီး Fan လည်ပေမယ့် Screen အမှောင်ကျနေခြင်း (No Post)။
ပိတ်သွားတိုင်း Beep အသံမြည်ခြင်း (အကြိမ်ရေအလိုက် အဓိပ္ပာယ်ရှိပါတယ်)။
Hard Disk ကနေ တဂျစ်ဂျစ် အသံထွက်နေခြင်း။
ပထမဆုံး စစ်ဆေးသင့်သည်များ (Initial Troubleshooting Steps)
၁. အပူချိန်စစ်ဆေးပါ: 🌡️
HWMonitor ကဲ့သို့သော အခမဲ့ Software များဖြင့် CPU နှင့် GPU အပူချိန်ကို စစ်ဆေးနိုင်ပါတယ်။
၂. Computer အတွင်းပိုင်း သန့်ရှင်းရေးလုပ်ပါ: 🧹
ဖုန်မှုန့်များကို လေမှုတ်စက်ဖြင့် သေချာသန့်စင်ပေးပါ။ Fan များ လည်နေခြင်း ရှိ/မရှိ စစ်ဆေးပါ။
၃. ပလပ်များ ပြန်တပ်ပါ:🔌
Power Cable၊ RAM၊ Graphics Card စသည်တို့ကို ပြန်လည်ချွတ်တပ်ဆင်ပေးပါ။ ကောင်းစွာ တပ်မိရဲ့လားဆိုတာ သေချာစေပါတယ်။
၄. Safe Mode ဝင်ကြည့်ပါ: 👁️
Computer ကို Safe Mode ဖြင့် ဖွင့်ကြည့်ပါ။ Safe Mode မှာ ပိတ်ခြင်းမရှိဘူးဆိုရင် ဆော့ဖ်ဝဲ ပြဿနာဖြစ်နိုင်ခြေများပါတယ်။ Driver အသစ်တင်ထားလားဆိုတာ စဉ်းစားပါ။
၅. System File Checker ကို အသုံးပြုပါ: 🔍
Command Prompt ကို Administrator အနေနဲ့ ဖွင့်ပါ။
`sfc /scannow` လို့ရိုက်ထည့်ပြီး Enter နှိပ်ပါ။ ဒီCommand က System File တွေ ပျက်စီးနေလားဆိုတာ စစ်ဆေးပြုပြင်ပေးပါလိမ့်မယ်။
၆. Windows Event Viewer ကြည့်ပါ:
Windows Key + R ကိုနှိပ်ပြီး `eventvwr.msc` လို့ရိုက်ထည့်ပါ။
Windows Logs > System ထဲမှာ "Critical" Level နဲ့ Error ဖြစ်ခဲ့တဲ့ အချိန်တွေကို ရှာဖွေကြည့်ရှုနိုင်ပါတယ်။ Error Code ပါရင် Google မှာ ရှာကြည့်ပါက အဖြေရှာရလွယ်ကူပါလိမ့်မယ်။
𝑪𝒐𝒎𝒑𝒖𝒕𝒆𝒓 𝑶𝒏𝒍𝒊𝒏𝒆 𝑻𝒓𝒂𝒊𝒏𝒊𝒏𝒈

ရွေးကောက်ပွဲသည် ပြည်သူ့ကောင်းကျိုးဆန္ဒကိုဖြည့်ဆည်းပေးနိုင်သော အမြန်ဆုံးယန္တရားတစ်ခုဖြစ်

ရွေးကောက်ပွဲသည် ပြည်သူ့ကောင်းကျိုးဆန္ဒကိုဖြည့်ဆည်းပေးနိုင်သော အမြန်ဆုံးယန္တရားတစ်ခုဖြစ်သည်ဟု ယနေ့ နိုဝင်ဘာ ၁၀ ရက်တွင် အမျိုးသားကာကွယ်ရေးနှင့် လုံခြုံရေးကောင်စီသတင်းထုတ်ပြန်ရေးအဖွဲ့ခေါင်းဆောင်ဗိုလ်ချုပ်ဇော်မင်းထွန်းက ပြောကြားခဲ့ကြောင်း သိရသည်။
ပါတီစုံဒီမိုကရေစီအထွေထွေရွေးကောက်ပွဲနှင့်ပတ်သက်၍ပြောကြားရာ၌ ထည့်သွင်းပြောကြားခဲ့ခြင်းဖြစ် ကြောင်း သိရသည်။
"ရွေးကောက်ပွဲဆိုတာ ပြည်သူ့အသံကိုနားထောင်ပြီး ပြည်သူ့ကောင်းကျိုးဆန္ဒကိုဖြည့်ဆည်းပေးနိုင်တဲ့ အမြန်ဆုံးသော ယန္တရားတစ်ခုဖြစ်ပါတယ်။ ရွေးကောက်ပွဲမှာ မဲပေးသူများလေလေ ရွေးကောက်ခံကိုယ်စားလှယ်တစ်ယောက်ဟာ တာဝန်ရှိလေလေဖြစ်ပါတယ်" ဟု ဗိုလ်ချုပ်ဇော်မင်းထွန်းက ပြောသည်။
မိမိဖြစ်ချင်သည်များ၊ မိမိအတွက်လိုအပ်သည်များမှအစပြု၍ မိမိပတ်ဝန်းကျင်၊ မိမိမြို့၊ မိမိရွာ၊ မိမိဒေသတိုးတက်ဖွံ့ဖြိုးရေး၊ ကောင်းကျိုးလိုရာဆန္ဒများ၊ ဖြစ်သင့်ဖြစ်ထိုက်သော ဆန္ဒများကို မိမိရွေးချယ်သည့် ကိုယ်လှယ်မှတစ်ဆင့် အစိုးရထံတောင်းဆိုခွင့်ရရှိမည်ဖြစ်ရာ ယင်း အခွင့်အရေးကိုအားလုံးမှလက်လွှတ်မခံကြရန် တိုက်တွန်းပြောကြားခဲ့ကြောင်း သိရသည်။
"ဖျက်ဆီးခံထားရတဲ့ ပါတီစုံဒီမိုကရေစီစနစ်ကို ကျွန်တော်တို့က နည်းစနစ်တကျပြန်လည်တည်ဆောက်ပေးနေတာပါ။ ကျွန်တော်တို့ကျင့်သုံးတဲ့ ဒီမိုကရေစီစနစ်အရ မိမိကိုယ်စားဆောင်ရွက်ပေးမယ့် လွှတ်တော်ကိုယ်စားလှယ်တွေကို ပြည်သူလူထုက ရွေးကောက်တင် မြှောက်ပေးရတာဖြစ်ပါတယ်"ဟု ဗိုလ်ချုပ်ဇော်မင်းထွန်းကပြောသည်။
ထို့ကြောင့် မြန်မာနိုင်ငံတွင် ပြည်သူများလိုလားတောင့်တသည့် ပါတီစုံဒီမိုကရေစီစနစ်အား ဖွဲ့စည်းပုံအခြေခံဥပဒေ ၂၀၀၈ နှင့်အညီ အကောင်အထည်ဖော်ဆောင် ရွက်နေခြင်းဖြစ်သည်ဟု ဗိုလ်ချုပ်ဇော်မင်းထွန်းက ပြောကြားခဲ့ကြောင်း သိရသည်။

မြန်မာနိုင်ငံသားများ၏အနာဂတ်ကို မြန်မာနိုင်ငံသားများကသာ ဖန်တီးပိုင်ခွင့်ရှိ

မြန်မာနိုင်ငံသားများ၏အနာဂတ်ကို မြန်မာနိုင်ငံသားများကသာ ဖန်တီးပိုင်ခွင့်ရှိသည်ဟု အမျိုးသားကာကွယ်ရေးနှင့် လုံခြုံရေးကောင်စီ သတင်းထုတ်ပြန်ရေးအဖွဲ့ခေါင်းဆောင်ဗိုလ်ချုပ်ဇော်မင်းထွန်းမှ ယနေ့ နိုဝင်ဘာ ၁၀ ရက်က ပါတီစုံဒီမိုကရေစီအထွေထွေရွေး ကောက်ပွဲနှင့် ပတ်သက်၍ပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
မြန်မာနိုင်ငံသည် သမိုင်းကြောင်းအရဖြစ်စေ၊ နိုင်ငံရေးမူအရဖြစ်စေ အချုပ်အခြာအာဏာပိုင်ပြီး လွတ်လပ်သည့်နိုင်ငံတစ်နိုင်ငံဖြစ်ကာ ယင်း အချုပ်အခြာအာဏာသည် မြန်မာနိုင်ငံသားများထံမှဆင်းသက်လာခြင်းဖြစ်ပြီး မြန်မာနိုင်ငံတစ်ဝှမ်းလုံးတွင်တည်သည်ဟု ပြော သည်။
မြန်မာနိုင်ငံ၏ပြည်တွင်းရေး၊ မိမိနိုင်ငံ မိမိသမိုင်းကြောင်းနှင့်အညီ ဆောင်ရွက်ရသည့် ရွေးကောက်ပွဲလုပ်ငန်းစဥ်များမှာ မြန်မာနိုင်ငံ၏ ပြည်တွင်းရေးသက်သက်၊ မြန်မာနိုင်ငံသားများအရေးသက်သက်သာဖြစ်၍ တိုင်းတစ်ပါးနိုင်ငံများ ၏ သြဇာအာဏာနှင့် မည်သည့်ဝင်ရောက်စွက်ဖက်မှုမှ ရွေးကောက်ပွဲအောင်မြင်အောင်ကျင်းပရေးခရီးလမ်းကို ပျက်ပြားစေရန်၊ ပြောင်းလဲစေရန်ပြုလုပ်၍မရဟု ပြောသည်။
" မြန်မာနိုင်ငံသားတွေရဲ့အနာဂတ်ကို မြန်မာနိုင်ငံသားတွေကသာ ဖန်တီးပိုင်ခွင့်ရှိပါတယ်။ မြန်မာ့အရေးကို ရွေးကောက်ပွဲမဲပေးတဲ့ နိုင်ငံသားတွေကပဲ အသိအမှတ်ပြုဆုံးဖြတ်ရပါမယ်။ မြန်မာနိုင်ငံမှာ တရားမျှတတဲ့ အ ထွေထွေရွေးကောက်ပွဲကို ဖွဲ့စည်းပုံအခြေခံဥပဒေနဲ့အ ညီ ပြည်ထောင်စုရွေးကောက်ပွဲကော်မရှင်ကဦးဆောင်ပြီးကျင်းပပေးသွားပါမယ်"ဟု ဗိုလ်ချုပ်ဇော်မင်းထွန်းက ပြောသည်။
ထို့ပြင် ရွေးကောက်ပွဲနှင့်ပတ်သက်၍ မလိုလားသူများမှ ပြည်သူများအား ထင်ယောင်ထင်မှားဖြစ်စေရန် အမျိုးမျိုးပြောဆိုနေခြင်းများ၊ သွေးထိုးလှုံ့ဆော်နေမှုများကိုတွေ့နေရသော်လည်း ယခု ကျင်းပမည့်ရွေးကောက်ပွဲ၌ မဲပေးပိုင်ခွင့်ရှိသည့်နိုင်ငံသားတိုင်း မဲပေးကြရန်လည်း ဗိုလ်ချုပ်ဇော်မင်းထွန်းက အလေးအနက်ထားတိုက်တွန်းပြောကြားခဲ့သည်။

မြန်မာ့အထည်အလိပ်နှင့် စက်ယန္တရား ကုန်စည်ပြပွဲ-၂၀၂၃နှင့် ၂၀၂၄ တို့ ကျင်းပပြီးနောက် တရုတ်နိုင်ငံမှ Brand ၅ ခုလာရောက်ရင်းနှီးမြှုပ်နှံ

မြန်မာ့အထည်အလိပ်နှင့် စက်ယန္တရား ကုန်စည်ပြပွဲ ၂ဝ၂၃ နှင့် ၂၀၂၄ တို့ ကျင်းပပြီးနောက် အကျိုးရလဒ်အနေဖြင့် တရုတ်နိုင်ငံမှ Brand ၅ ခု လာရောက်ရင်းနှီးမြှုပ်နှံမှုပြုလုပ်ခဲ့ကြောင်း Chinese Textile & Garment Association In Myanmar (CTGA) မှ CEO Mr.San Khun က Popular News သို့ပြောသည်။
ပြီးခဲ့သည့်နှစ်များတွင် ကျင်းပပြီးစီးခဲ့သည့် မြန်မာ့အထည်အလိပ်နှင့် စက်ယန္တရား ကုန်စည်ပြပွဲအပြီး မည်သည့်အကျိုးရလဒ်များရခဲ့သလဲဟု မေးမြန်းမှုအပေါ် ၎င်းက အထက်ပါအတိုင်း ပြန်လည်ဖြေကြားခဲ့ခြင်းဖြစ်သည်။
အသစ်ဝင်ရောက်လာသည့် Brand ၅ ခုမှာ SEMIR, BALABALA,Jeans West,BOSIDENG,Baleno တို့ဖြစ်ကြောင်း သိရသည်။
လက်ရှိတွင် အထည်ချုပ်ကဏ္ဍ၌ စက်ရုံအသစ်များ ယခင်ထက်ပိုတိုးလာကြောင်းလည်း မြန်မာနိုင်ငံအထည်ချုပ်လုပ်ငန်းရှင်များအသင်းမှ အထွေထွေအတွင်းရေးမှူး ဒေါ်ခိုင်ခိုင်နွယ်က ပြောသည်။
ထို့ပြင် လာမည့် ဒီဇင်ဘာလ၌ သုံးကြိမ်မြောက် မြန်မာ့အထည်အလိပ်နှင့် စက်ယန္တရား ကုန်စည်ပြပွဲ ၂ဝ၂၅ ပြပွဲကို Inya Lake Hotel, Yangon Convention Center (YCC) ၌ သုံးရက်ကြာ ပြုလုပ်သွားမည်ဖြစ်ကြောင်းလည်း သိရသည်။

မူဆယ်မြို့၌ ဖမ်းဆီးရမိထားသည့် မူးယစ်ဆေးဝါးများကိုဖျ-က်ဆီး

ရှမ်းပြည်နယ် (မြောက်ပိုင်း)၊ မူဆယ်မြို့နယ်အတွင်းမှဖမ်းဆီးရမိထားသည့် မူးယစ်ဆေးဝါးများ၊ ထိန်းချုပ်ဓာတုပစ္စည်းများနှင့် ဓာတုဆက်စပ်ပစ္စည်းများအား နိုဝင်ဘာ ၈ ရက်နံနက်ပိုင်းက မူဆယ်မြို့၊ စွမ်စော်ရပ်ကွက်၌ မီးရှို့ဖျ-က်ဆီးခြင်းနှင့် မြေမြှုပ်ဖျ-က်ဆီးခြင်းများပြုလုပ်ခဲ့ကြောင်း သိရသည်။
မူဆယ်မြို့မရဲစခန်း၌ အမှုဖွင့်လှစ်ထားသည့် မူးယစ်ဆေးဝါးမှု (၁၉) မှု၊ ဓာတုဆက်စပ်ပစ္စည်းအမှု (၁၀) မှုတို့မှ ငွေကျပ် (၁၃၂,၁၃၂,၂၇၄ ဒသမ ၄) တန်ဖိုးရှိ စိတ်ကြွဆေးပြားများ၊ ကတ်တမင်းများ၊ HAPPY WATER များ၊ ဘိန်းဖြူများ၊ ခတ်ခူးများ၊ ဘိန်းဆီခဲများ၊ ဆေးခြောက်များ၊ METHYLAMINE များ၊ THIONYL CHLORIDE များ၊ BENZENE များ၊ အရိုးမီးသွေးများ၊ SODIUM ETHOXIDE များ၊ CAUSTIC SODA များ၊ SODIUM BISULFITE များ၊ POTASSIUM CHLORIDE များ၊ SODIUM CHLORIDE များကိုမီးရှို့ဖျ-က်ဆီးခြင်းနှင့် မြေမြှုပ်ဖျ-က်ဆီးခြင်းများပြုလုပ်ခဲ့ကြကြောင်း သိရသည်။
မူးယစ်ဆေးဝါးတားဆီးနှိမ်နင်းရေးလုပ်ငန်းများကို တပ်မတော်၊ ရဲတပ်ဖွဲ့၊ အကောက်ခွန်ဦးစီးဌာနနှင့် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့တို့က အရှိန်အဟုန်မြှင့်တင်ကြိုးပမ်းဆောင်ရွက်မှုကြောင့် မူးယစ်ဆေးဝါးနှင့် ဓာတုပစ္စည်းအများအပြားကို ဖော်ထုတ်ဖမ်းဆီးနိုင်ခဲ့ပြီး မီးရှို့ဖျ-က်ဆီးခြင်းများကိုလည်းဆောင်ရွက်နိုင်ခဲ့ခြင်းဖြစ်ကြောင်း သိရသည်။
ထို့ကြောင့် မူးယစ်ဆေးဝါးနှင့် စိတ်ကိုပြောင်းလဲစေတတ်သည့် ဓာတုဆေးဝါးတို-က်ဖျ-က်ရေးလုပ်ငန်းစဥ်များကိုလည်း အလေးထားဆောင်ရွက်လျက်ရှိကြောင်း သိရသည်။

မြန်မာနိုင်ငံ၏ ရွေးကောက်ပွဲလုပ်ငန်းစဉ်များကို အားလုံးကအသိအမှတ်ပြုပြီးဖြစ်

မြန်မာနိုင်ငံ၏ရွေးကောက်ပွဲလုပ်ငန်းစဉ်များကို အားလုံးကအသိအမှတ်ပြုပြီးဖြစ်သည်ဟု အမျိုးသားကာကွယ်ရေးနှင့် လုံခြုံရေးကောင်စီသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းမှ နိုဝင်ဘာ ၁၀ ရက်က ပါတီစုံဒီမိုကရေစီအထွေထွေရွေးကောက်ပွဲနှင့် ပတ်သက်၍ပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
မြန်မာနိုင်ငံရွေးကောက်ပွဲအပေါ် ကွဲပြားခြားနားသည့် နိုင်ငံတကာတုံ့ပြန်မှုများရှိသော်လည်း မိတ်ဖက်နိုင်ငံများ၏ထောက်ခံမှုများကို အခိုင်အမာရရှိထားပြီးဖြစ်ကာ ရွေးကောက်ပွဲလုပ်ငန်းစဉ်များကိုလည်း အားလုံးက အသိအမှတ်ပြုပြီးဖြစ်၍ ရွေးကောက်ပွဲလုပ်ငန်းစဉ်များကို လိပ်ပြာလုံစွာဆောင်ရွက်ထားသဖြင့် မိတ်ဖက်နိုင်ငံများ၊ နိုင်ငံတကာအဖွဲ့အစည်းများ၊ အခြားနိုင်ငံများ၊ ပြည်တွင်း/ပြည်ပ နိုင်ငံတကာမီဒီယာများအား ပွင့်လင်းမြင်သာသည့် ရွေးကောက်ပွဲလုပ်ငန်းစဉ်များကို လာရောက်ကြည့်ရှုလေ့လာရန် ဖိတ်ခေါ်ထားပြီးဖြစ်သည်ဟု ပြောသည်။
" မဲမသမာမှုတွေမရှိစေဖို့ ခေတ်မီနည်းပညာသုံး MEVM စက်တွေကို အသုံးပြုထားတာကြောင့် ရွေးကောက်ပွဲက ထွက်ပေါ်လာတဲ့ လွှတ်တော်ဟာ ဂုဏ်သိက္ခာရှိတဲ့ လွှတ် တော်တစ်ရပ်ဖြစ်ကြောင်း ကမ္ဘာကိုချပြနိုင်မှာဖြစ်ပါတယ်"ဟု ဗိုလ်ချုပ်ဇော်မင်းထွန်းက ပြောသည်။
ထို့ပြင် ကျင်းပမည့် ရွေးကောက်ပွဲ၌ နိုင်ငံရေးပါတီ (၅၇)ပါတီနှင့် တစ်သီးပုဂ္ဂလကိုယ်စားလှယ်လောင်း (၉၅)ဦး(စုစုပေါင်းကိုယ်စားလှယ်လောင်း ၅,၀၀၀) ကျော်ဝင်ရောက်ယှဉ်ပြိုင်မည်ဖြစ်၍ ရွေးကောက်ပွဲတွင် တိုင်းရင်းသားများနှင့် လူထုလူတန်းစားအလွှာများကို ကိုယ်စားပြုသူများ လွှတ်တော်တွင် ကျယ်ကျယ်ပြန့်ပြန့်ပါဝင်လာစေရန် ပြည်သူ့လွှတ်တော်အား FPTP၊ အမျိုးသားလွှတ်တော်နှင့် တိုင်း/ပြည်နယ်လွှတ်တော်ကို ရောနှောထားသည့် ကိုယ်စားလှယ်အချိုးကျစနစ်(MMP)တို့ဖြင့် အသုံးပြုသွားမည်ဟု ပြောသည်။
စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ်ခိုင်မာပြီး ဒီမိုကရေစီနဲ့ဖက်ဒရယ်စနစ်ကိုအခြေခံသော ပြည်ထောင်စုကြီးတည်ဆောက်နိုင်ရန် ဒီဇင်ဘာလနှင့် ဇန်နဝါရီလအတွင်းကျင်းပမည့် ပါတီစုံဒီမိုကရေစီ အထွေထွေရွေးကောက်ပွဲကို ပြည်သူတစ်ရပ်လုံးမှ ပူးပေါင်းပါဝင်၍ဆန္ဒမဲပေးကြရန်လည်း ဗိုလ်ချုပ်ဇော်မင်းထွန်းက တိုက်တွန်းပြောကြားခဲ့သည်။