စာရေးဆရာ ဟမ်စိုင်း (ဆေး မန်း) ရဲ့ "တိမ်ပန်းချီ" ဆိုတဲ့ စာအုပ်ပါ။ ရသမျိုးစုံပါတဲ့ အချစ်ဝတ္ထုစာအုပ်တစ်အုပ်ပါ။ ဖြစ်ရပ်မှန်ကိုရေးသားထားတဲ့အပြင် ရုပ်ရှင်ကလည်း ရုံမတင်ခင်တည်းက အရမ်းပေါက်နေတာကြောင့် စိတ်ဝင်စားလို့ ဖတ်ဖြစ်သွားတာပါ။ ပထမဆုံးပြောချင်တာကတော့ စာအုပ်ထက် ရုပ်ရှင်က ပိုသာသွားတယ်လို့ Karine ကတော့ ခံစားရတယ်။ ရုပ်ရှင်က ပိုပြီး ရုပ်လုံးပေါ်ပြီး ပိုပြီး Entertained ဖြစ်ပါတယ်။ စာအုပ်က ရေးထားတာ အရမ်းသော့တယ်၊ လောလော လောလော နဲ့ ဖတ်ရတာ 2x နဲ့ ရစ်ထားသလိုတောင်ခံစားရတယ်။ ဇာတ်ကောင် ၃ယောက်ကို တစ်ယောက်တည်းဖြစ်အောင်ပေါင်းပြီး ဇာတ်ကို အတိုချုံ့ထားလို့လည်း ဖြစ်မယ်လို့ ထင်ပါတယ်။
ဇာတ်လမ်းက တိမ်ပန်းချီဆိုတဲ့ မိန်းကလေးက သူ့ယောင်္ကျားအမှုကနေ ပြစ်ဒဏ်လျော့လျော့ပေါ့ပေါ့ဖြစ်စေဖို့အတွက် ရှေ့နေနဲ့ လာတွေ့တဲ့အခန်းကနေစထားတာပါ။ အတိတ်ကိုပြန်ပြီး ပြောပြတဲ့အနေနဲ့ ရေးထားတာပါ။
တခါမှ အချစ်ကို မထိတွေ့ဘူးတဲ့ ဆရာဝန်ပေါက်စလေးနဲ့ ကျားတွေကြားထဲမှာ အသက်မွေးဝမ်းကြောင်းပြုနေရတဲ့ စင်တင်မယ်လေးတို့ ည တစ်ညမှာဆုံတွေ့ခဲ့ကြတယ်။ မြင်မြင်ချင်းအချစ်ဆိုတဲ့အတိုင်း ကောင်လေးရဲ့ ရိုးသားတဲ့ အဖြူရောင်မျက်ဝန်းတွေကို မြင်တည်းကချစ်မိခဲ့တယ်။ သူရဲကောင်းဆန်တဲ့ အချစ်စိတ်တွေနဲ့ ကောင်မလေး ဘဝကို ကယ်တင်ချင်စိတ်တွေ တဖွားဖွားဖြစ်လာခဲ့တယ်။
"ကြယ်စင်" ဆိုတဲ့ အမှောင်တွေကြားမှာ ဘဝအတွက်ရှင်သန် ရုန်းကန်ရတဲ့ကောင်မလေးအတွက် "ဝေယံ" ဆိုတဲ့ အလင်းရောင်လေးတစ်ခုကို ရှာတွေ့ခဲ့တယ်။ နှစ်ယောက်အတူတူ မိုးမမြင် လေမမြင် ချစ်ခဲ့ကြတယ်။ သိပ်မကြာဘူး လက်ထပ်ဖို့ စီစဉ်တယ်။ ကြယ်စင်ဘဝရဲ့ အရိပ်မည်းကြီးကို ဝေယံက အပြီးတိုင်း ဖျောက်ဖျက်ပြီး အလင်းရောင်တွေပေးနိုင်မလား။ အတိတ်ဆိုးထဲကနေရော တကယ်ပဲ ဆွဲခေါ်ထုတ်သွားမှာလား။ သူတို့နှစ်ဦးရဲ့ ဘဝထဲကို "မသူဇာ" ဆိုတဲ့ အမျိုးသမီးကရော ဘယ်လိုပုံစံနဲ့ ဝင်ရောက်လာမှာလဲ။ လူတစ်ယောက်ရဲ့ ကိုယ်ကျင့်တရားကို ငွေနဲ့ပေါက်ပြီး ဖျက်စီးလို့ရသလား ... ။ ကိုယ်ကျင့်တရားကို ငွေနဲ့ လဲလှယ်လိုက်တဲ့အခါ ဘာတွေဆက်ဖြစ်မလဲဆိုတတော့ ဖတ်ကြည့်ပါလို့ပဲပြောချင်ပါတယ်။
ယောင်္ကျားဖြစ်စေ မိန်းမဖြစ်စေ လူတိုင်းမှာ အတိတ်ကိုယ်စီရှိကြတာပါပဲ။ တချို့က သိသိကြီးနဲ့ လမ်းမှားကိုရွေးချယ်ခဲ့ကြပေမယ့် တချို့ကတော့ ရွေးချယ်ခွင့်မရှိလို့ ရောက်ခဲ့ကြရတယ်။ နာကျင်စရာ အတိတ်တွေကနေ ကျောခိုင်းပြီးရင် ဘယ်သူမှပြန်မကြားချင်ပါဘူး။ တစ်ယောက်နဲ့ တစ်ယောက် တကယ်ချစ်ခင်မြတ်နိုးလို့ ဘဝတစ်ခု ထူထောင်တော့မယ်လို့ ဆုံးဖြတ်လိုက်ရင် နာကျင်စရာ အတိတ်တွေကို မေ့ပစ်လိုက်ဖို့လိုပါတယ်။ အတိတ်က အမှားတွေကို ပြန်လည်တူးဆွမိတဲ့အခါ နှစ်ယောက်လုံးစိတ်ထိခိုက်နာကျင်ကြရတယ်။ အချစ်ဆိုတာ တကယ်တော့ လက်တွေ့မှာ ချစ်ပြ၊ ကာကွယ်ပြရတာပါ။ လူနှစ်ယောက်ချစ်နေဖို့အတွက် အရေးအကြီးဆုံးက သံသယကင်းနေဖို့ပါပဲ။ သံသယစိတ်ဆိုတာ ကြောက်စရာကောင်းသလို အရမ်းလည်းပူလောင်စေတယ်။ စာအုပ်ထဲမှာရေးသားထားတဲ့အကြောင်းတွေကတော့ အပြင်လောကကြီးမှာ လူ့အဖွဲ့အစည်းမှာ တကယ်ကိုဖြစ်ပျက်နေတဲ့ အရာတွေပါပဲ။ လူတွေရဲ့ အလွယ်လေး ဖောက်ပြန်တတ်တဲ့ အကျင့်စရိုက်၊ ကိုယ်ကျင့်တရားကို ငွေနဲ့ လဲလှယ်တတ်တဲ့သဘောကို မြင်ရမှာပါ။
