#နိုင်ငံတကာသတင်း
◾️ဓားစာခံအားလုံး စနေနေ့လယ်ပြန်လွှတ်မလား၊ ငရဲပြန်အဖြစ်ခံမလားဟု ဟားမားစ်အား ထရန့် ရာဇသံပေး
ဂါဇာဒေသ၌ ဟားမားစ်တို့ ထိန်းသိမ်းထားသော ဓားစာခံများအားလုံးကို စ နေနေ့နေလယ်တွင် လွှတ်ပေးသင့်ကြောင်း သို့မဟုတ်ပါက အစ္စရေး-ဟားမားစ် အပစ်အခတ်ရပ်စဲမှုကို ဖျက်သိမ်းပြီး ငရဲပြည်ဖြစ်အောင်လုပ်ဆောင်ရေးအတွက် ၎င်းအနေနှင့် အကြံပြုသွားနိုင်ကြောင်း အမေရိ ကန် သမ္မတဒေါ်နယ်ထရန့်က ယမန်နေ့တွင် သတိပေးပြောကြားသည်။
ယင်းကိစ္စတွင် အစ္စရေးက ၎င်းထက်ပိုလွန်လွန်ကျုးကျုးလုပ်ဆောင်ဖွယ်ရှိကြောင်း ထရန့်က သတိပေးကာ ၎င်းအနေဖြင့် အစ္စရေးဝန်ကြီးချုပ် ဘင်ဂျမင်နေတန်ယာဟု နှင့် ပြောဆိုသွားမည်ဟုလည်း ဆိုသည်။
အိမ်ဖြူတော် ဘဲဥပုံရုံးခန်းအတွင်း သတင်းထောက်များနှင့် တွေ့ဆုံရာတွင် ဟားမားစ်အဖွဲ့ က နောက်ဆုံးလွှတ်ပေးလိုက်သော ဓားစာခံများ၏ကျန်းမာရေး အခြေအနေ နှင့် ဓားစာခံများ ထပ်မံလွှတ်ပေးခြင်းကို ဆိုင်းငံ့ထားမည်ဟု ဟားမားတို့၏ ကြေညာချက်အပေါ် စိတ်ပျက်မိကြောင်း ထရန့် က ပြောကြားသည်။
“ ကျွန်တော့်အတွက်တော့ ဓားစာခံတွေအားလုံးကို စနေနေ့ နေ့လယ် ၁၂ နာရီမှာ ပြန်လွှတ်မပေးဘူးဆိုရင် ၊ ကဲ အားလုံး ဖျက်သိမ်းလိုက်တော့ ၊ အပေးအယူအားလုံးပြီးသွားပြီ ငရဲခန်းဖြစ်ပါစေတော့ လို့ ပြောသွားနိုင်ပါတယ်။ သူတို့အားလုံး စနေနေ့ နေ့လယ် ၁၂ နာရီ မှာ ပြန်လွတ်သင့်ပါတယ်။ သင့်တော်တဲ့ အချိန်လို့လည်း ထင်ပါတယ်။” ဟု ထရန့်က ပြောကြားသည်။
ဓားစာခံများအား တစ်ကြိမ်လျှင် နည်းနည်းချင်းလွှတ်ပေးနေခြင်းထက် အဖွဲ့လိုက်လွှတ်ပေးခြင်းမျိုးကို မြင်တွေ့လိုကြောင်း လည်း ထရန့် က ပြောကြားသည်။
ထို့ပြင် ဂါဇာဒေသမှ ပြောင်းရွှေ့နေရာချထားမည့် ပါလက်စတိုင်း ဒုက္ခသည်များအား အီဂျစ် နှင့် ဂျော်ဒန်တို့က လက်သင့်မခံခဲ့ပါက ၎င်းအနေဖြင့် ထိုနိုင်ငံများသို့ ပေးအပ်နေသော အမေရိကန်ဒေါ်လာ ဘီလီယံနှင့်ချီသော အကူအညီများကို ဆိုင်းငံ့သွားမည်ဟု ယနေ့တွင် ဂျော်ဒန်ဘုရင် နှင့် တွေ့ဆုံမည့် ဒေါ်နယ်ထရန့်က ပြောသည်။
ဂါဇာ၌ တိုက်ခိုက်မှုများရပ်တန့်သွားချိန်တွင် ယင်းဒေသအား အမေရိကန်က လွှဲ ပြောင်းရယူသွားမည်ဖြစ်ကြောင်း ဒေါ်နယ်ထရန့်၏ အဆိုပြုချက်နှင့်ပတ် သက် ၍ ရှုပ်ထွေးမှုများ ဖြစ်ပေါ်နေစဉ် ထရန့်၏ မှတ်ချက်များ ထွက်ပေါ်လာခြင်းဖြစ်သည်။
ဂါဇာဒေသခံများအား ယာယီရွှေ့ပြောင်းမည့်သဘောမျိုး ၎င်း၏ အရာရှိများက ပြောကြားနေသော်လည်း ပါလက်စတိုင်းတို့အား အပြီးအပိုင် ရွှေ့ပြောင်းခိုင်းမည့်သဘောမျိုး ဒေါ်နယ်ထရန့်ကပြောသည်။
ဖေဖော်ဝါရီ ၄ ရက်တွင်ဝါရှင်တန်မြို့၌ အစ္စရေးဝန်ကြီးချုပ်နှင့်တွေ့ဆုံပြီးနောက် ဂါဇာမှ လူပေါင်း ၂ ဒသမ ၂ သန်းအား ပြန်လည်နေရာချထားပြီး ယင်းပင်လယ်ကမ်းဘေး ဒေသကို အမေရိကန်က လွှဲပြောင်းရယူကာ အရှေ့အလယ်ပိုင်း၏ အကောင်းဆုံးအပန်းဖြေနေရာ ဖြစ်အောင်လုပ်ဆောင်သွားမည်ဟု အိမ်၊ ခြံ၊ မြေ လုပ်ငန်းရှင်ဟောင်း ထရန့်က အံအားသင့်ဖွယ်ကြေညာခဲ့သည်။
ပါလက်စတိုင်းများအား ရွှေ့ပြောင်းခိုင်းမည့် ထရန့်၏ အဆိုပြုချက်ကို ပါလက် စတိုင်းလူမျိုးများနှင့် အာရပ် နိုင်ငံများက အကြိမ်ကြိမ်ပယ်ချကြပြီး ယင်းမှာ လူမျိုးရေးရှင်းလင်းခြင်း အဆိုပြုချက် ဖြစ်ကြောင်း လူ့အခွင့်အရေးအဖွဲ့များနှင့် ကုလသမဂ္ဂက ကင်ပွန်းတပ်ထားသည်။
