Will Smith ရဲ့နာမည်ကျော်ရုပ်ရှင်တွေထဲက တစ်ခုဖြစ်တဲ့ ဘုကလန့်ဂွစာ စူပါဟီးရိုး Hancock ရုပ်ရှင်ဟာ ၁၇ နှစ်ကြာပြီးနောက်မှာတော့ အဆက်ထွက်လာဖို့ပြင်ဆင်နေပြီဖြစ်ကြောင်း Will Smith ကိုယ်တိုင်က အတည်ပြုပေးလိုက်ပါပြီ။
Twitch မှာ ရံဖန်ရံခါ livestream လုပ်လေ့ရှိတဲ့ Will Smith က ပရိသတ်တွေရဲ့ မေးခွန်းတွေကိုဖြေရင်း ဒီသတင်းကို အတည်ပြုပေးခဲ့တာဖြစ်ပါတယ်။ Will Smith ဟာ သူ့ဆီမှာ Hancock 2 အတွက် အိုင်ဒီယာကောင်းတစ်ခုရှိထားပြီး စကားတော့ အတည်တကျမပြောရသေးကြောင်း ပြောဆိုခဲ့တာပါ။ ဒါ့အပြင် နောက်ထပ်သတင်းတစ်ခုကတော့ Will Smith ဟာ သဲလွန်စတစ်ခုအနေနဲ့ ဒီရုပ်ရှင်မှာ ဇာတ်ကောင်တစ်ယောက်နေရာအတွက် လက်ရှိဟောလိဝုဒ်ရဲ့ လူငယ်မျိုးဆက်မှာ နာမည်အကျော်ကြားဆုံးမင်းသမီးတွေထဲက တစ်ယောက်ဖြစ်တဲ့ Zendeya ကို ချဥ်းကပ်ထားကြောင်း ဖွင့်ဟခဲ့ပါတယ်။ Zendeya ဟာ Dune, Spider-Man, Challengers ရုပ်ရှင်တွေနဲ့အတူ အောင်မြင်မှုတွေရရှိထားသလို ပရိသတ်အခိုင်အမာရှိနေပြီး Will Smith က သူ့ကို ဘယ်ဇာတ်ကောင်နေရာမှာ ထည့်သွင်းဖို့ ရည်ရွယ်ထားသလဲဆိုတာတော့ မသိရသေးပါဘူး။
Hancock ရုပ်ရှင်ဟာ ၂၀၀၈ ခုနှစ်က ထွက်ရှိခဲ့တာဖြစ်ပြီး Will Smith နဲ့အတူ Charlize Theron, Jason Bateman တို့ပါဝင်သရုပ်ဆောင်ထားတာဖြစ်ပါတယ်။ Hancock အဆက်ထွက်ရှိလာဖို့အကြောင်းနဲ့ပတ်သက်ပြီး ၂၀၁၂ ခုနှစ်တုန်းက Hancock ဒါရိုက်တာ Peter Berg က အချိန်အခါသင့်ဖို့ကို စောင့်ဆိုင်းနေတာဖြစ်ကြောင်း ပြောဆိုခဲ့ဖူးသလို ၂၀၂၀ ခုနှစ်မှာ မင်းသမီး Charlize Theron ကလည်း Hancock 2 အတွက် စကားပြောဆိုမှုတွေရှိခဲ့ကြောင်း အတည်ပြုခဲ့ဖူးပါတယ်။ ဒီတစ်ကြိမ်မှာတော့ အဓိကဇာတ်ဆောင်မင်းသားဖြစ်တဲ့ Will Smith ကပါ Hancock 2 အကြောင်း ထုတ်ဖော်ပြောဆိုလာပြီဖြစ်တဲ့အတွက် တစ်ချိန်က ပရိသတ်တွေကြိုက်နှစ်သက်ခဲ့တဲ့ ဟီးရိုးတစ်ယောက်ပြန်အလာကို မြင်တွေ့ရဖို့ သိပ်မလိုတော့ပါဘူး။
ကိုးကား - Deadline
