မြောက်ဒဂုံတွင် သံဃာတော်တစ်ပါး ကားတိုက်ခံရ၍ နေရာတွင်ပျံလွန်တော်မူပြီး ကျူးလွန်သူကိုမဖမ်းမိသေး
စက်တင်ဘာ ၁၆
ရန်ကုန်တိုင်းဒေသကြီး၊ ဒဂုံမြို့သစ်မြောက်ပိုင်းမြို့နယ်တွင် သံဃာတော်တစ်ပါး ကားတိုက်ခံရ၍ နေရာတွင်ပျံလွန်တော်မူပြီး ကျူးလွန်သူကိုမဖမ်းမိသေးကြောင်း မြို့လုလင်နာရေးကူညီမူအသင်းထံမှ သိရသည်။
ဖြစ်စဉ်မှာ ယနေ့(စက်တင်ဘာ ၁၆ရက်)၊ နံနက်အစောပိုင်းအချိန်က ဒဂုံမြို့သစ်မြောက်ပိုင်းမြို့နယ်၊ အမှတ်(၂)လမ်းမကြီး၊ သင်တန်း ကျောင်းမှတ်တိုင်အနီးတွင် ဖြစ်ပွားခဲ့ကြောင်း သိရသည်။
“အမှတ် (၂) လမ်းမပေါ်မှာ ဗိုက်မှာဒဏ်ရာနဲ့တစ်ယောက်လဲနေလို့ဆိုပြီး ဖုန်းဆက်လို့သွားလိုက်တာ။ အဲဒီမှာ ဗိုက်မှာလည်းဒဏ်ရာ ရှိတယ်။ ဦးခေါင်းကလည်းပွင့်ထွက်သွားတယ်။ မျက်နှာတစ်ခြမ်းပွင့်သွားတာပေါ့နော်။ ပြောရမယ်ဆိုရင် တိုက်ပြေးပုံစံမျိုးပေါ့။ ကားကတိုက်ပြီး သူ့ကို ကြိတ်သွားတာမျိုးပေါ့”ဟု မြို့လုလင်နာရေးကူညီမူအသင်းမှတာဝန်ရှိသူတစ်ဦးက ပြောသည်။
အဆိုပါ ယာဉ်တိုက်မှုကြောင့် သက်တော် (၅၀)နှစ်ကျော်အရွယ်ခန့်ရှိ သံဃာတော်တစ်ပါးတွင် ဦခေါင်းကြေမွဒဏ်ရာ၊ ဝမ်းဗိုက်ပွင့်ဒဏ်ရာ တို့ဖြင့် အခင်းဖြစ်နေရာတွင်သေဆုံးသွားခဲ့ကြောင်း သိရသည်။
လက်ရှိတွင် ပျံလွန်တော်မူသွားသည့် သံဃာတော်၏ ရုပ်အလောင်းအား မြောက်ဥက္ကာလာဆေးရုံကြီးသို့ ပို့ဆောင်ပေးထားပြီး ယာဉ်တိုက်မှုမှ ကျူးလွန်သူအား ဖော်ထုတ်ဖမ်းဆီးအရေးယူနိုင်ရေးဆက်လက်ဆောင်ရွက်လျက်ရှိကြောင်း သိရသည်။
ယမန်နေ့(စက်တင်ဘာ ၁၅ရက်) နံနက် ၉ နာရီဝန်းကျင်အချိန်ခန့်ကလည်း အင်းစိန်မြို့နယ်၊ ရန်ကုန်-ပြည်လမ်း၊ ထန်းပင်ကုန်း မှတ်တိုင်အနီးတွင် အသက် (၄၅) နှစ်အရွယ်အမျိုးသမီးတစ်ဦး YBS (104) အကြိတ်ခံရကာ နေရာတွင်ပွဲချင်းပြီးသေဆုံးသွားခဲ့သည့် ဖြစ်စဉ်ဖြစ်ပွားခဲ့ကြောင်း သိရသည်။
အလားတူ ယင်းနေ့၊ နံနက် ၆ နာရီအချိန်ခန့်ကလည်း မင်္ဂလာဒုံမြိုနယ်၊ အမှတ်(၃)လမ်းမကြီး၊ စက်သုံးဆီအရောင်းဆိုင်တစ်ဆိုင်ရှေ့တွင် Express ကားပေါ်မှဆင်းကာ လမ်းဖြတ်ကူးလာသည့် အသက် (၅၀)နှစ်အရွယ် အမျိုးသမီးကြီးတစ်ဦး ဖယ်ရီကားအတိုက်ခံရကာ ပွဲချင်းပြီး သေဆုံးသွားခဲ့သေးကြောင်း သိရသည်။
#centralnewsnaypyitaw
+12
