လျှပ်စစ်ဓာတ်အားထုတ်လုပ်ရေး၌ ရင်းနှီးမြှုပ်နှံရန်အသင့်ဟု ရုရှားဆို

ဧရာဝတီ၊ ဖေဖော်ဝါရီ ၂၃

မြန်မာနိုင်ငံတွင်လိုအပ်လျက်ရှိသည့် လျှပ်စစ်ဓာတ်အားထုတ်လုပ်ရေးအတွက် ရုရှားနိုင်ငံမှ ရင်းနှီးမြှုပ်နှံမှုများဆောင်ရွက်ရန်အသင့်ရှိသည်ဟု ရုရှားနိုင်ငံ၊ စီးပွားရေးဖွံ့ဖြိုးတိုးတက်မှုဝန်ကြီး H.E. Maxim RESHETNIKOV က ယမန်နေ့ နေပြည်တော်၌ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံစဉ် ပြောဆိုသည်။

လျှပ်စစ်ဓာတ်အားထုတ်လုပ်ရေးအပြင် ဓာတ်မြေသြဇာထုတ်လုပ်ရေး၊ ရေနံနှင့်ဓာတုထုတ်ကုန်ပစ္စည်းများထုတ်လုပ်ရေးတို့တွင်ပါ ရုရှားနိုင်ငံမှရင်းနှီးမြှုပ်နှံမှုများ ဆောင်ရွက်ရန်အသင့်ရှိနေသည်ဟုလည်း ၎င်းက ဆိုသည်။

ထို့ပြင် မြန်မာနှင့် ရုရှားနိုင်ငံတို့ကြား ကောင်းမွန်သည့်ဆက်ဆံရေးနှင့် ပူးပေါင်းဆောင်ရွက်မှုများရှိပြီး စီးပွားရေးဆိုင်ရာအပြင် နယ်ပယ်ကဏ္ဍပေါင်းစုံ၌ အကျိုးတူ ပူးပေါင်းဆောင်ရွက်မှုများ ပိုမိုတိုးမြှင့်ဆောင်ရွက်သွားရန် ဆွေးနွေးခဲ့ကြကြောင်း ယနေ့ထုတ်သတင်းစာများတွင် ဖော်ပြထားသည်။

ရုရှားနိုင်ငံအနေဖြင့် မြန်မာနိုင်ငံတွင်ကြုံတွေ့ခဲ့ရသည့် သဘာဝဘေးအန္တရာယ်အပါအဝင် အခြားလိုအပ်သည့်အချိန်တိုင်း၌ အကူအညီများပေးအပ်ခဲ့ကြောင်း၊ မြန်မာနိုင်ငံအတွင်း ရင်းနှီးမြှုပ်နှံမှုများ တိုးမြှင့်ဆောင်ရွက်သွားမည်ဖြစ်ပြီး စီမံကိန်းများ ချမှတ်ဆောင်ရွက်ရာတွင် ကျွမ်းကျင်လုပ်သားရရှိရေးတို့ကိုလည်း ဆွေးနွေးခဲ့ကြောင်း ထုတ်ပြန်ထားသည်။

ဓာတ်ပုံ- MOI

#သတင်းဟင်းလေးအိုးကြီး

လွမ်းတယ် *
အများကြီးသတိရတယ်
တစ်ချိန်တုန်းက ကိုယ့်အပိုင်လေးကို
အရမ်းလွမ်းတယ်
တစ်စက်လေးမှ ကိုယ့်ဘက်လှည့်မကြည့်ပေးတဲ့
ဒီလူသားလေးကိုအရမ်းလွမ်းတယ်

#poem(siren)

  ဒီတစ်ခါ စိတ်ဓာတ်ခွန်အားတွေရစေမယ့်
အိန္ဒိယဇာတ်ကားကောင်းတစ်ကားကိုတင်ဆက်ပေးလိုက်ပါတယ်

တရားမျှတမှုကိုရှာဖွေတဲ့အကြောင်းရိုက်ကူးထားတဲ့ဇာတ်ကားဖြစ်ပြီး ဒိုင်ယာလော့ခ်တွေကလည်းအရမ်းကောင်းတဲ့အတွက်ကြည့်သင့်ပါတယ်

ဆူရာပရာကက်ရ်ှဆိုတဲ့ဆော့ဝဲလိအင်ဂျင်နီယာလေးတစ်ယောက်ဟာ သူ မကျူးလွန်ခဲ့တဲ့လူသတ်မှုမှာ
ရဲကသူ့ကို တရားခံဆိုပြီးတော့ အတင်းအဓမ္မချောက်ချတာကိုခံခဲ့ရပါတယ်

အဲ့ဒီရဲအရာရှိက လူယုတ်မာပါဒါကြောင့် တရားရုံးကစီရင်ချက်မချခင် ငါးနှစ်လုံးလုံးအကျဉ်းထောင်ထဲမှာနေခဲ့ရပါတယ်

သူ့ရဲ့မိဘတွေက သူ့သားက ဒီလိုလူသတ်မှုမကျူးလွန်တာကိုသိခဲ့ပါတယ်သူ့သားဘက်ကခံပြင်းစိတ်နဲ့အဆာငတ်ခံဆန္ဒပြကြပါတယ်

နောက်ဆုံးကိုယ့်ကိုကိုယ်ဓာတ်ဆီလောင်းမီးရိူ့ပြီးသတ်သေသွားကြပါတယ်

သူ့ရဲ့ချစ်သူကိုလည်း ထောင်ထဲကနေသူဘယ်အချိန်ပြန်လွတ်လာမလဲမသိတဲ့အတွက်အိမ်ကအခြားလူနဲ့ပေးစားလိုက်ပါတယ်

ဆူရာဟာ ချောက်ချခံရပြီး စီရင်ချက်မချခင်
ထောင်ထဲမှာနေရတာကိုငါးနှစ် မိဘတွေကိုလည်းဆုံးရူံးခဲ့ရ ချစ်သူကိုလည်းဆုံးရူံးခဲ့ရနဲ့ သူ့ဘဝဟာ
တော်တော်လေးပျက်စီးခဲ့ရပါတယ်

တစ်နေ့ ရှေ့နေ့မလေးတစ်ယောက် သူ့ဆီကိုရောက်လာခဲ့ပါတယ်သေချာပေါက်သူ့ဘက်ကနေပြီး တရားမျှတမှုကိုပြန်တိုက်ပေးဖို့ပါ

#storymode

Exterior decoration ဖြစ်တဲ့
အဝတ်အစားအသုံးအဆောင်တွေထက်

Interior decoration ဖြစ်တဲ့
- Belief system
- mental framework
- mindset
တွေကို ပိုအလှဆင်ဖို့ကြိုးစားပါ

အဆင်းရှိပြီး အချင်းမရှိရင်
အောင်မြင်မှုက ခဏပဲခံမယ်မိတ်ဆွေ

#crd
#positive

ဟာလန်းရဲ့ဘဝက ပိုလွယ်ကူတယ်လို့ ဆာလက်ပြော

ဖေဖော်ဝါရီ ၂၃

လီဗာပူးလ်အသင်း တောင်ပံကစားသမား ဆာလက်က မန်စီးတီးနဲ့ လီဗာပူးလ်အသင်းတို့ ယှဉ်ပြိုင်မယ့် ပရီးမီးယားလိဂ် ပွဲစဉ်မတိုင်ခင်မှာ မန်စီးတီးအသင်း တိုက်စစ်မှူး ဟာလန်းရဲ့ဘဝက ပိုလွယ်ကူတယ်လို့ ပြောခဲ့ပါတယ်။

ဆာလက်က “ကျနော်သူ့ကို အလွန်လေးစားပါတယ်။ ဒါပေမယ့် သူဟာ တိုက်စစ်မှူးဖြစ်တဲ့အတွက် သူ့ရဲ့ဘဝက ပိုလွယ်ကူပါတယ်။ ကျနော်ကတော့ သူ့ကိုအကောင်းဆုံးဖြစ်ဖို့ပဲ ဆန္ဒပြုပါတယ်။ တောင်ပံကစားသမားတစ်ဦးရဲ့ အခြေအနေကခက်ခဲပြီး ဘယ်တောင်ပံကစားသမားဆို ဒီလိုပဲပြောမှာပါ။ ဒါက ကျနော်တို့ နှစ်ဦးကြားမှာ ကွာခြားနေတဲ့အရာပါ။ ဘာကြောင့်လဲဆိုရင် သူကတိုက်စစ်မှူးဖြစ်ပြီး ကျနော်ကတောင်ပံကစားသမားဖြစ်လို့ပါ”လို့ ပြောခဲ့တာပါ။

ဆာလက်က ရှေ့တန်းမှာကစားတာနဲ့ တောင်ပံမှာ ကစားခြင်းတို့ရဲ့ ကွာခြားချက်ကို နှိုင်းယှဉ်မှုပြုလုပ်ခဲ့တာ ဖြစ်ပါတယ်။

ဆာလက်နဲ့ ဟာလန်းတို့ဟာ ပြီးခဲ့တဲ့နှစ်တွေ အတွင်းမှာလည်း ပရီးမီးယားလိဂ် ရွှေဖိနပ်ဆုအတွက် အပြိုင်အဆိုင် ဖြစ်ခဲ့ပြီး ဒီရာသီမှာလည်း ဒီဆုအတွက် ယှဉ်ပြိုင်နေရတာပါ။

ဒီရာသီမှာ လီဗာပူးလ်အသင်းအတွက် ခြေစွမ်းပြသနေတဲ့ ဆာလက်ဟာ ပရီးမီးယားလိဂ် ပြိုင်ပွဲမှာ ၂၄ ဂိုးသွင်းယူ ထားပြီး မန်စီးတီးအသင်း တိုက်စစ်မှူး ဟာလန်းက ၁၉ ဂိုး သွင်းယူထားတာကြောင့် နှစ်ဦးကြားမှာ သွင်းဂိုး ၅ ဂိုး ကွာဟနေတာ ဖြစ်ပါတယ်။

ဆာလက်ဟာ မန်စီးတီးအသင်းနဲ့ပွဲမှာ သွင်းဂိုးတွေသွင်းပြီး လီဗာပူးလ်အသင်းကို နိုင်ပွဲရရှိအောင်နဲ့ ဂိုးသွင်း အများဆုံး ထိပ်ဆုံးနေရာမှာ ဆက်ပြီး ရပ်တည်နိုင်အောင် လုပ်ဆောင်နိုင်ဖို့ ရည်မှန်းနေတာပါ။

ဟာလန်းကတော့ လက်ရှိအချိန်မှာ ဒဏ်ရာခံစားနေရပြီး လီဗာပူးလ်အသင်းနဲ့ပွဲစဉ်မှာ ပါဝင်နိုင်ဖို့ မသေချာဘူးလို့ မန်စီးတီးအသင်း နည်းပြဂွာဒီယိုလာက ပြောထားပေမယ့် လူစာရင်းထဲ ပါဝင်လာဖွယ်ရှိတယ်လို့ သိရပါတယ်။

Source: Goal

ပုံ - ဆာလက်ကို တွေ့ရစဉ်

#ဘောလုံးသတင်းစုံ

ဓါးစာခံခြောက်ယောက် လွတ်လာပြီးနောက် ပါလက်စတိုင်း အကျဉ်းသားတွေ ပြန်လွှတ်ပေးရေး အချိန်အကန့်အသတ်မရှိ အစ္စရေးရွှေ့ဆိုင်း

တဲလ်အဗစ်၊ ဖေဖော်ဝါရီ ၂၃

အစ္စရေးနဲ့ ပါလက်စတိုင်းတို့အကြား အပစ်အခတ်ရပ်စဲရေးသဘောတူညီချက်အပေါ် နောက်ထပ်အတားအဆီးအဖြစ် ပါလက်စတိုင်းအကျဉ်းသား ၆၀၀ ကျော်ကို ပြန်လွှတ်ပေးရေး ရက်အကန့်အသတ်မရှိ ရွှေ့ဆိုင်းတယ်လို့ အစ္စရေးက ထုတ်ပြန်လိုက်ပါတယ်။

ဟားမတ်စ်တို့ဟာ အစ္စရေးဓါးစာခံခြောက်ယောက်ကို မနေ့က ပြန်လွှတ်ပေးလိုက်ပြီးနောက်မှာ အစ္စရေးက အခုလို ကြေညာလိုက်တာဖြစ်ပြီး နောက်ထပ်ဓါးစာခံလွှတ်ပေးရေးအတွက် ဟားမတ်စ်တို့ဆီက အာမခံချက်မရမချင်း ဆိုင်းငံ့ထားမယ်လို့ အစ္စရေးဝန်ကြီးချုပ် နေတန်ယာဟုက ပြောပါတယ်။

အပစ်အခတ်ရပ်စဲရေး ပထမအဆင့်အရ ဓါးစာခံတွေ လွှဲပြောင်းပေးရမယ့် အရေအတွက်ဟာ အနည်းငယ်သာကျန်ရှိပါတယ်။ ဖမ်းဆီးထားစဉ်သေဆုံးသွားတဲ့ ဓါးစာခံအလောင်းလေးလောင်းကိုလည်း ဟားမတ်စ်တို့က ပြန်လွှဲပေးခဲ့ပါတယ်။

အပစ်အခတ်ရပ်စဲရေး ဒုတိယအဆင့်မှာ ဓါးစာခံလွတ်မြောက်ရေးနဲ့ အကျဉ်းသားလဲလှယ်မယ့် အစီအစဉ်နဲ့ပတ်သက်ပြီး တိကျတဲ့ သဘောတူညီချက်တွေ မရှိသေးပါဘူး။ လက်ရှိအစ္စရေးရဲ့ ဆိုင်းငံ့မှုက အပစ်အခတ်ရပ်စဲရေး ကျိုးပေါက်မှာကို စိုးရိမ်မူတွေ ရှိနေပါတယ်။

ဟားမတ်စ်တို့ဟာ ဝါ့ဒဖြန့်ချိရေးအတွက် ဓါးစာခံတွေကို ရက်စက်စွာပြုမူခြင်းအပါအဝင် လူ့အခွင့်အရေးချိုးဖောက်မှုတွေရှိတယ်လို့ အစ္စရေးက စွပ်စွဲထားပါတယ်။

၂၀၂၃ ခုနှစ် အောက်တိုဘာ ၇ ရက်မှာ ဟားမတ်စ်တို့က အစ္စရေးကို နယ်စပ်ဖြတ်ကျော်တိုက်ခိုက်မှုအတွင်း လူ ၁၂၀၀ သေဆုံးခဲ့ပြီး ၂၅၁ ယောက်ကို ဓါးစာခံအဖြစ် ဖမ်းဆီးခေါ်ဆောင်သွားခဲ့ပါတယ်။ ဂါဇာမှာတော့ အစ္စရေးရဲ့ လက်တုံ့ပြန်တိုက်ခိုက်မှုကြောင့် လူ လေးသောင်းရှစ်ထောင်ကျော် သေဆုံးခဲ့ကြောင်း ဂါဇာကျန်းမာရေးတာဝန်ရှိသူတွေက ပြောပါတယ်။

Ref:BBC
Photo:Getty Images

#centralnewsnaypyitaw

ပုပ်ရဟန်းမင်းကြီး ဖရန့်စစ်ရဲ့ ကျန်းမာရေးအခြေအနေ စိုးရိမ်ရကြောင်း ဗာတီကန်ထုတ်ပြန်

ဗာတီကန်၊ ဖေဖော်ဝါရီ ၂၃

ပုပ်ရဟန်းမင်းကြီး ဖရန့်စစ်ရဲ့ ကျန်းမာရေးဟာ လွန်ခဲ့တဲ့ ၂၄ နာရီအတွင်း ဆိုးရွားလာကြောင်း ဗာတီကန်က ပထမဆုံးအကြိမ် ထုတ်ပြန်လိုက်ပါတယ်။

အသက် ၈၈ နှစ်အရွယ် ပုပ်ရဟန်းမင်းကြီးသည် ပန်းနာရင်ကြပ်ကဲ့သို့သော အသက်ရှူလမ်းကြောင်းဆိုင်ရာ ဝေဒနာကြောင့် အောက်ဆီဂျင်ပေးထားရတယ်လို့ ဗာတီကန်က ပြောပါတယ်။ အခြေအနေဟာ စိုးရိမ်ရဆဲဖြစ်ပြီး အန္တရာယ်မကင်းဘူးလို့ ဆိုပါတယ်။

ပုပ်ရဟန်းမင်းကြီးဟာ ဖေဖော်ဝါရီ ၁၄ ရက်က ရောမမြို့ရှိ ဆေးရုံမှာတက်ရောက်ခဲ့ပြီး ရက်အတန်ကြာ အသက်ရှူရခက်ခဲလာပြီးနောက်မှာ အဆုတ်ရောင်ရောဂါဖြစ်ပွားခဲ့ကြောင်း စစ်ဆေးတွေ့ရှိခဲ့ပါတယ်။ သွေးအားနည်းရောဂါနဲ့ဆက်စပ်မှုတွေကြောင့် သွေးသွင်းဖို့လည်း လိုတယ်လို့ ဗာတီကန်က ပြောပါတယ်။

ပုပ်ရဟန်းမင်းကြီး ဖရန့်စစ်ဟာ ၂၀၂၃ ခုနှစ် မတ်လအတွင်းကလည်း အသက်ရှူလမ်းကြောင်းဆိုင်ရာ ဝေဒနာကြောင့် ဆေးရုံတက်ခဲ့ရပါသေးတယ်။ အဲဒီနှစ်ဇွန်လအတွင်းမှာတော့ အစာအိမ်အူလမ်းကြောင်း ခွဲစိတ်မှုခံယူခဲ့ရပါတယ်။

ပုပ်ရဟန်းမင်းကြီးဟာ အသက် ၂၁ နှစ်အရွယ်ကတည်းက အဆုတ်တစိတ်တပိုင်းကို ဖယ်ရှားခဲ့ရသူဖြစ်ပါတယ်။ ရိုမန်ကက်သလစ်အကြီးအကဲအဖြစ် တာဝန်ယူစဉ် ၁၂ တာကာလအတွင်း ပုပ်ရဟန်းမင်းကြီးဟာ ဆေးရုံအကြိမ်ကြိမ်တက်ခဲ့ရပြီး ကျန်းမာရေးပြဿနာတွေနဲ့ ရင်ဆိုင်ခဲ့ရပါတယ်။

လက်ရှိမှာတော့ ပုပ်ရဟန်းမင်းကြီးရဲ့ ကျန်းမာရေးနဲ့ ပတ်သက်ပြီး ကမ္ဘာတဝန်းရှိ ကတ်သလစ်ဘာသာဝင်တွေ စိုးရိမ်နေကြပြီး ဆုတောင်းမှုတွေ ပြုလုပ်နေကြကာ ဗာတီကန်ကလည်း ပုပ်ရဟန်းမင်းကြီးရဲ့ ကျန်းမာရေးအခြေအနေကို ထုတ်ပြန်ပေးနေပါတယ်။

Ref:BBC
Photo:Reuters

#သတင်းဟင်းလေးအိုးကြီး

ရီးရယ်လ်နဲ့ တွေ့ဆုံရမယ့်ပွဲအတွက် အဆင်သင့်ပဲလို့ ဆီမြွန်နီပြော

ဖေဖော်ဝါရီ ၂၃

အသလက်တီကိုအသင်းနည်းပြ ဆီမြွန်နီက ချန်ပီယံလိဂ် ၁၆ သင်းအဆင့်မှာ မြို့ခံပြိုင်ဘက် ရီးရယ်လ်အသင်းနဲ့ တွေ့ဆုံရမယ့်ပွဲအတွက် အဆင်သင့်ပဲလို့ ပြောခဲ့ပါတယ်။

ဆီမြွန်နီက “ရီးရယ်လ်အသင်းနဲ့ တွေ့ဆုံရမယ့်ပွဲက ကြီးမားတဲ့ပွဲ ဖြစ်ပါတယ်။ ဒါပေမယ့် ကျနော်တို့ အဆင်သင့် ဖြစ်နေပါပြီ။ ဒါကို ကျနော်သိပါတယ်”လို့ မီဒီယာသမားတွေရဲ့ မေးမြန်းမှုကို ဖြေခဲ့တာပါ။

ရီးရယ်လ်နဲ့ အသလက်တီကိုအသင်းတို့ဟာ ဒီရာသီလာလီဂါပြိုင်ပွဲမှာ ၂ ကြိမ်တွေ့ဆုံခဲ့ပြီး ၂ ကြိမ်စလုံး ၁ ဂိုးစီ သရေရလဒ် ထွက်ပေါ်ခဲ့ပါတယ်။

ချန်ပီယံလိဂ်ပြိုင်ပွဲမှာ တွေ့ဆုံရမယ့် ဒီတွေ့ဆုံမှုကတော့ အနိုင်၊အရှုံး ရလဒ် ရှင်းရှင်းလင်းလင်း သိရမှာဖြစ်ပြီး အရေးနိမ့်တဲ့အသင်းဟာ ပြိုင်ပွဲကနေ စောစီးစွာ ထွက်ခွာရမှာပါ။

ရီးရယ်လ်အသင်း တိုက်စစ်မှူး ဘတ်ပီဟာ ချန်ပီယံလိဂ် ၁၆ သင်း အဆင့်အတွက် မဲခွဲမှုမပြုလုပ်ခင်ကတည်းက ခရီးအဝေးကြီး သွားရမှာကို ရှောင်ချင်တဲ့အတွက် အသလက်တီကိုအသင်းနဲ့ တွေ့ဆုံချင်တယ်လို့ ပြောခဲ့ပါတယ်။

ဒီနှစ်သင်းရဲ့ချန်ပီယံလိဂ် ၁၆ သင်းအဆင့် ပထမအကျော့ ပွဲစဉ်ကို ရီးရယ်လ်အသင်းက အိမ်ကွင်းကျင်းပမှာဖြစ်ပြီး ဒုတိယအကျော့ပွဲစဉ်ကို အသလက်တီကိုအသင်းက အိမ်ရှင်အဖြစ်ကျင်းပရမှာပါ။

ပထမအကျော့ပွဲစဉ်ကို မတ်လ ၅ ရက်နဲ့ ဒုတိယအကျော့ပွဲစဉ်ကို မတ်လ ၁၃ ရက်မှာ ယှဉ်ပြိုင်သွားမှာဖြစ်ပါတယ်။

Source:besoccer

ပုံ - ရီးရယ်လ်အသင်းနဲ့ အသလက်တီကိုအသင်း ယှဉ်ပြိုင်နေစဉ်

#ဘောလုံးသတင်းစုံ

ရေစကြိုနယ် စည်သာကျေးရွာမှာ ဓားပြတိုက် ပြန်ပေးဆွဲခံရ

ဖေဖော်၀ါရီ ၂၃

မကွေးတိုင်း ၊ ပခုက္ကူခရိုင် ၊ ရေစကြိုမြို့နယ် ၊ စည်သာ (ဆားတောင် ) ကျေးရွာမှာ ဒီကနေ့ မနက် ၁၀ နာရီ ၀န်းကျင်ခန့်က ကျေးရွာတွင်းမှာရှိတဲ့ ကုန်စုံဆိုင် တဆိုင်မှာ ဓားပြတိုက် လုယက်ခံပြီး ဆိုင်ပိုင်ရှင် လင်မယားဖြစ်သူကို ဓားပြအဖွဲ့က ပြန်ပေးဆွဲ ဖမ်းဆီး ခေါ်ဆောင်သွားတယ်လို့ ဒေသခံတွေဆီက သိရပါတယ်။

"ဖြစ်တာက ဒီမနက် ၁၀ နာရီ ၀န်းကျင်က ဖြစ်တာ ၊ စည်သာရွာထဲကို ဓားပြတွေ ၀င်လာပြီး ၊ ကုန်စုံဆိုင် ပိုင်ရှင် ကိုနေလင်း နဲ့ မဇာ လင်မယားကို ပြန်ပေးဆွဲ ဖမ်းဆီးခေါ်ဆောင်သွားတယ် ၊ ကိုနေလင်း ဆိုင်ထဲက CCTV စက်ကိုလဲ ဓားပြအဖွဲ့က ရိုက်ခွဲသွားတယ် ၊ အဲ့ဒီအပြင် စျေးဆိုင် ကောင်တာထဲက ပိုက်ဆံတွေကိုလဲ ယူသွားတယ် ၊ ငွေ အမောင့်ဘယ်လောက် ရှိသလဲဆိုတာ မသိရသေးဘူး ၊ ဒါ့အပြင် မြေဖြူ - ဂွေးချို လမ်းမှာလဲ စျေးသည် အမျိုးသမီး သုံးယောက်ကိုလဲ ထပ်မံ ဖမ်းဆီး ခေါ်ဆောင်သွားတယ် လို့ ကြားရတယ် " လို့ စည်သာ ရွာခံ တယောက်က ပြောပါတယ် ။

ရေစကြိုမြိုနယ်မှာ ပြီးခဲ့တဲ့ လေးနှစ်ကျော် ကာလအတွင်း လူပြန်ပေးဆွဲ ဖမ်းဆီးခံရသူ လူပေါင်း သုံးဆယ်ကျော်လောက်ရှိပြီး အဲ့ဒီထဲက လူတချို့လည်း ပြန်လည်ပိုက်ဆံနဲ့ ရွေးယူတာကြောင့် ပြန်လည် လွတ်မြောက်လာတဲ့ သူတွေရှိသလို အများစုက ဆက်သွယ်မရပဲ အခုထိတိုင် ပျောက်ဆုံးနေဆဲ သူတွေလဲရှိတယ်လို့ ရေစကြို မြို့ခံတွေဆီက သိရပါတယ် ။

ပခုက္ကူခရိုင်ထဲက ပေါက် ၊ မြိုင် ၊ ရေစကြို ကမ္မ ၊ ရေပြာ ၊ စတဲ့ မြို့နယ်ဘက်တွေမှာလဲ လုယက်မှု ၊ ဓားပြမှု ၊ ပြန်ပေးဆွဲမှု စတာတွေ ဖြစ်ပွားခဲ့တယ်လို့ သိရပါတယ်။

#centralnewsnaypyitaw

ကျားဖြန့်လုပ်ငန်း နှိမ်နင်းမှု ဖမ်းမိ တရုတ်နိုင်ငံသား ၄ဝဝ ကျော်ကို လွှဲပြောင်းပေးအပ်ခဲ့

ဖေဖော်ဝါရီ ၂၃

မြန်မာ-တရုတ်-ထိုင်း သုံးနိုင်ငံပူးပေါင်းပြီး
မြဝတီနယ်စပ်က ကျားဖြန့်လုပ်ငန်းတွေကို စတင်နှိမ်နင်းနေပြီး ယနေ့အထိ ဖမ်းဆီးရမိ ထားတဲ့ တရုတ်နိုင်ငံသား ၄ဝဝ ကျော်ကို လွှဲပြောင်းပေးအပ်ခဲ့ပြီး ဖြစ်တယ်လို့ သိရပါတယ်။

သက်ဆိုင်ရာဌာနတွေရဲ့ထုတ်ပြန်မှုတွေအရ ဖေဖော်ဝါရီ ၂၁ ရက်နေ့မှာ တရုတ်နိုင်ငံသား ၃ဝဝ ဦးကို ပြန်လည်လွှဲပြောင်းပေးအပ်ခဲ့သလို ဖေဖော်ဝါရီလ ၂၂ ရက်မှာလည်းအွန်လိုင်းလိမ်လည်မှုနဲ့ ဒုစရိုက်မှုလုပ်ငန်းတွေမှာ ဆက်စပ်ပါဝင်ခဲ့ကြတဲ့ တရုတ်နိုင်ငံသား (၁၁၁)ဦး ထပ်မံလွှဲပြောင်းပေးအပ်ခဲ့တာဖြစ်ပါတယ်။

မြန်မာနိုင်ငံဆိုင်ရာ တရုတ်သံရုံးဘက်က
တော့ တရုတ်နိုင်ငံသို့ အွန်လိုင်းလိမ်လည်မှု ကျူးလွန်ခြင်းသံသယရှိသူ တရုတ်နိုင်ငံသား ၈၀၀ ကျော်ကို ရှေ့ဆင့်နောက်ဆင့် တရုတ်နိုင်ငံသို့ ကြီးကြပ်ခေါ်ဆောင်သွားမှာဖြစ်တယ်လို့ သတင်းထုတ်ပြန်ထားပါတယ်။

ယခုမြန်မာ-ထိုင်းအမှတ်(၂) ချစ်ကြည်ရေးတံတားကနေတဆင့် သက်ဆိုင်ရာနိုင်ငံတွေကို လွှဲပြောင်းပေးအပ်ခဲ့သူတွေဟာ မြန်မာ နိုင်ငံအတွင်းသို့ တရားမဝင် ဝင်ရောက်လာသူတွေဖြစ်ပြီး ကရင်ပြည်နယ်၊မြဝတီမြို့ရွှေကုက္ကိုလ်နဲ့ KK Park နယ်မြေတွေမှာ တရားမဝင်အွန်လိုင်းလောင်းကစားမှု၊အွန်လိုင်းလိမ် လည်မှုတွေနဲ့ ဒုစရိုက်မှုတွေကို လုပ်ဆောင်ခဲ့ကြတဲ့ သူတွေဖြစ်တယ်လို့ ဆိုပါတယ်။

ဒီလို အွန်လိုင်းလိမ်လည်မှု(Online Scam)နဲ့ အွန်လိုင်းလောင်းကစားမှု(Online Gambling) လုပ်ဆောင်နေသူတွေ ပါဝင်ပတ်သက်နေသူတွေကို လွှဲပြောင်းပေးအပ်နေသလို နိုင်ငံတကာအဖွဲ့အစည်းတွေနဲ့အတူ မြန်မာ- တရုတ်-ထိုင်း သုံးနိုင်ငံကြား သုံးပွင့်ဆိုင်ပူးပေါင်းဆောင်ရွက်မှုပုံစံ(Trilateral Cooperation)တို့နဲ့ စဉ်ဆက်မပြတ် အွန်လိုင်းကျားဖြန့်လုပ်ငန်းလုပ် ဆောင်သူတွေကို ဖော်ထုတ်အရေးယူသွားမယ်လို့ သိရပါတယ်။

"မြဝတီနယ်စပ်တို့ ရွှေကုက္ကိုလ်တို့ဘက်က အကုန်လုံး ကျားဖြန့်တွေကြီးပဲလေ၊အရင်ကဆို ပွဲစားတွေကနေတဆင့် ဒီဘက်ကိုလာကြတဲ့သူတွေအများကြီးပဲ၊အခုတော့ အခြေ အနေတွေက ဘယ်လိုမှန်းမသိဘူး။ဒီဘက်မှာအလုပ်လာလုပ်တဲ့သူတွေက အကုန်ကျားဖြန့်အတွက် လာအလုပ်လုပ်ကြတဲ့ သူတွေများတယ်"လို့ မြဝတီမြို့ခံ တယောက်က VOM ကို ပြောပါတယ်။

အွန်လိုင်းလိမ်လည်မှု ကျားဖြန့်လုပ်ငန်းတွေမှာ ပါဝင်ခဲ့တဲ့သူတွေကို မြန်မာနိုင်ငံဘက်ကနေ ဥပဒေလုပ် ထုံးလုပ်နည်းနဲ့ အညီစနစ် တကျ ပြည်နှင်လွှဲပြောင်းပေးအပ်နေသလို
မြန်မာနိုင်ငံဆိုင်ရာ တရုတ်သံရုံးဘက်ကလည်း မြဝတီဒေသကနေ ပထမအသုတ်အနေနဲ့ အွန်လိုင်းလိမ်လည်မှုကျူးလွန်ခြင်းသံသယရှိသူ တရုတ်နိုင်ငံသား ၂၀၀ ဦးကို မြန်မာနိုင်ငံကနေ တရုတ်နိုင်ငံထံ လွှဲပြောင်းပေးခဲ့ပြီး အဲဒီသံသယရှိသူတွေကို တရုတ်နိုင်ငံပြည်သူ့လုံခြုံရေးဌာနက ထိုင်းနိုင်ငံမှ
တဆင့် တရုတ်နိုင်ငံသို့ ကြီးကြပ်ခေါ်ဆောင် သွားခဲ့ပြီဖြစ်တယ်လို့ သတင်းထုတ်ပြန်ထားပါတယ်။

ဒါအပြင် လက်ရှိ မြန်မာနိုင်ငံ မြဝတီဒေသမှာရှိနေတဲ့ အွန်လိုင်းလိမ်လည်မှုနဲ့ အွန်လိုင်းလောင်းကစားစတဲ့ ဆိုးဝါးသောပြစ်မှု အခြေအနေတွေကို ဖြေရှင်းဖို့ တရုတ်၊ မြန်မာ၊ ထိုင်း သုံးနိုင်ငံ တရားဥပဒေစိုးမိုးရေးအဖွဲ့တွေကတရားဥပဒေဆိုင်ရာပူးပေါင်း ဆောင်ရွက်မှုတွေကို စဉ်ဆက်မပြတ်မြှင့်တင်နေပြီး ပူးပေါင်းတိုက်ဖျက်ရေး လုပ်ငန်းတွေကိုလည်း အင်တိုက်အားတိုက်ဖော်ဆောင်နေတယ်လို့ ဆိုပါတယ်။

၂၀၂၅ ခုနှစ်၊ ဇန်နဝါရီလ လကုန်ပိုင်းမှာတရုတ်နိုင်ငံ၊ ပြည်သူ့လုံခြုံ ရေးဝန်ကြီးဌာနက တာဝန်ရှိသူတွေ ထိုင်းနဲ့ မြန်မာနိုင်ငံသို့ လာရောက်ခဲ့ပြီးနောက်ပိုင်း မြဝတီနယ်စပ်ကအွန်လိုင်းလိမ်လည်မှု ကျားဖြန့်လုပ်ငန်းတွေကို အခုလို စတင်နှိမ်နင်းခဲ့တာလည်း ဖြစ်ပါတယ်။

ထိုင်းနိုင်ငံအစိုးရဘက်ကလည်း မြဝတီနယ်စပ်ဒေသအတွင်းကို လျှပ်စစ်မီး၊အင်တာနက်နဲ့ စက်သုံးဆီဖြတ်တောက်တာတွေ အပါအဝင် ထိုင်း - မြန်မာနယ်စပ်မှာ ကင်းလှည့်ခြင်းနဲ့ စီမံခန့်ခွဲထိန်းချုပ်မှုတွေကို တိုးမြှင့်လုပ် ဆောင်နေပြီး အွန်လိုင်းလိမ်လည်မှုကျူးလွန်ခြင်းသံသယရှိသူတွေ တရားမဝင်နယ်စပ် ဖြတ်ကျော်မှု၊လမ်းကြောင်းလွှဲ ပြောင်း မှုတွေကို ပြတ်ပြတ်သားသား တားဆီးဖို့ ဆောင်ရွက်နေတာဖြစ်ပါတယ်။

အရှေ့အာရှနဲ့ အရှေ့တောင်အာရှဒေသမှာ ဒီလိုကျားဖြန့်လုပ်ငန်းတွေကြောင့် ဆုံးရှုံးရတဲ့ ငွေကြေးပမာဏက အမေရိကန်ဒေါ်လာ ၁၈ ဘီလီယံကနေ ၃၇ ဘီလီယံလောက်အထိရှိတယ်လို့ ကမ္ဘာ့ကုလသမဂ္ဂ မူးယစ်ဆေးနဲ့ ရာဇဝတ်မှုဆိုင်ရာရုံး(UNODC)ရဲ့ ၂၀၂၄ ခုနှစ် အစီရင်ခံစာက ခန့်မှန်းထားတယ်လို့ သိရပါတယ်။

မြန်မာ့မဟာဗျူဟာနဲ့ မူဝါဒလေ့လာရေးအင်စတီကျူ(ISP-Myanmar)ကတော့ ကျားဖြန့်ဟာ ဒေသတွင်းသာမက ကမ္ဘာတဝန်းကို လှိုက်စားနေတဲ့ မြစ်ပွားနာကြီးဖြစ်သလို
လူထောင်သောင်းချီဟာ ရာဇဝတ်ဂိုဏ်းတွေရဲ့ လူကုန်ကူးခံရပြီး ကမ္ဘောဒီးယား၊ လာအိုနဲ့ မြန်မာ စတဲ့ နယ်စပ်တွေမှာရှိတဲ့ ရာဇဝတ်ဂိုဏ်းတွေရဲ့ ခြံဝင်းကြီးတွေထဲမှာ ပိတ်လှောင်နှိပ်စက်၊ အဓမ္မခိုင်းစေခံနေကြရတယ်လို့ ဆိုထားပါတယ်။

အခုဖြစ်ရပ်တွေဟာ စိုးရိမ်ထိတ်လန့်ဖွယ် အခြေအနေတခုကို ရောက်လာတာကြောင့် နှိမ် နင်းအရေးယူမှုတွေ စတင်လာခဲ့တာဖြစ်ပြီး တရုတ်-မြန်မာနယ်စပ်က တိုင်းရင်းသားလက်နက်ကိုင်အဖွဲ့တွေ စတင်စစ်ဆင်တဲ့ ‘စစ်ဆင်ရေး ၁၀၂၇’ ပေါ်ပေါက်လာသလို အဲဒီစစ်ဆင်ရေးနောက်ပိုင်း ရှမ်းပြည်နယ်မြောက်ပိုင်းမှာရှိတဲ့ တရုတ်နိုင်ငံသား ငါးသောင်းကျော်ကို ဖမ်းဆီးပြီး တရုတ်နိုင်ငံလက်ကို အပ်ခဲ့တယ်လို့လည်း ISP-Myanmar က ရေးသားဖော်ပြထားပါတယ်။

ပုံစာ - ကျားဖြန့်လုပ်ငန်းမှ ဖမ်းဆီးရမိ တရုတ်နိုင်ငံသား ၄ဝဝ ကျော်ကို ထိုင်းနိုင်ငံဘက်သို့
လွှဲပြောင်းပေးအပ်နေစဉ်။

#သတင်းဟင်းလေးအိုးကြီး