စာဆိုဗိမာန်သုံးထပ် အဆောက်အဦ တည်ဆောက်မှုစတင်
-------------------
အိန္ဒိယ-မြန်မာ ချစ်ကြည်ရေး အထိမ်းအမှတ်အဖြစ် အိန္ဒိယနိုင်ငံရဲ့အကူအညီ အထောက်အပံ့နဲ့ စာဆိုဗိမာန် သုံးထပ် အဆောက်အဦ တည်ဆောက်မှုကို စတင်ဆောင်ရွက်နေပြီ ဖြစ်တယ်လို့ သိရပါတယ်။ အဲဒီ အဆောက် အဦ ရတနာပန္နက်တော်တင် မင်္ဂလာအခမ်းအနားကို အောက်တိုဘာ ၉ ရက်က ရန်ကုန်မြို့၊ မင်္ဂလာတောင်ညွန့် မြို့နယ်၊ ဥယျာဉ်ရပ်ကွက်၊ ဗိုလ်မင်းခေါင်လမ်းရှိ အဲဒီမြေနေရာမှာပြုလုပ်ရာ နစက ဥက္ကဋ္ဌ နိုင်ငံတော် ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ချီးမြှင့်ခဲ့ပါတယ်။
အဆောက်အအုံတွေကို စနစ်တကျတည်ဆောက်သွားဖို့ နဲ့ ရှေးစာဆိုတော်ကြီးတွေရဲ့ ခေတ်အလိုက် ပန်းချီတွေ ဓာတ်ပုံတွေ ရုပ်တုတွေ ကြိုတင်စုဆောင်းထားဖို့ ဂီတ စာဆိုတော်ကြီးတွေရဲ့ မှတ်တမ်းတွေ နဲ့ ပတ်သက်ပြီးလည်း ကြိုတင်စုဆောင်းထားဖို့ စာပေတွေကို ဖတ်ရှုနိုင်ဖို့အတွက် စာဖတ်ခန်းတွေကို အဓိကထည့်သွင်းပြီး စနစ်တကျ ထားရှိသွားဖို့ လိုအပ်တယ်လို့ ဗိုလ်ချုပ်မှူးကြီး မင်းအောင်လှိုင်က လမ်းညွှန်မှာကြားခဲ့ပါတယ်။
စာဆိုဗိမာန်သုံးထပ်အဆောက်အအုံ တည်ဆောက်ပြီးစီးပါက စာပေဖွံ့ဖြိုးမှုဆိုင်ရာ သမိုင်းမှတ်တမ်းဓာတ်ပုံတွေ စာဖတ်ခန်း နဲ့ စာကြည့်တိုက်၊ သမိုင်းဝင် ဂီတအနုပညာ ပြခန်းတွေ ပေပုရပိုက် ပြခန်းတွေ သမိုင်းဝင် ကဗျာပြခန်း တွေ စာပေဆု ရခဲ့ဖူးတဲ့ စာအုပ်စာပေပြခန်းတွေ မြန်မာနိုင်ငံမှာ ထင်ရှားကျော်ကြားခဲ့တဲ့ ခေတ်သုံးခေတ်က စာဆို တော်ကြီးတွေ တစ်သက်တာစာပေဆု ရရှိခဲ့ကြတဲ့ စာပေပညာရှင်တွေ နဲ့ ကဗျာဆရာတွေရဲ့ ရုပ်တုတွေထားရှိတဲ့ ပြခန်းတွေကို ထည့်သွင်းထားရှိသွားမှာ ဖြစ်တယ်လို့ သိရပါတယ်။
