#ယနေ့ထုတ်သတင်းစာ_သတင်း
◼ ဗီဇာကြိုတင်ဘိုကင်ယူလိုသူများအား အီးမေးလ်မှ တစ်ဆင့် ယာယီ ပြောင်းလဲဆောင်ရွက်ပေးမည်
ဗီဇာလျှောက်ထားရန်အတွက် ကြိုတင်ဘိုကင်ယူလိုသူများအား အီးမေးလ်မှတစ်ဆင့် ယာယီလက်ခံဆောင်ရွက်ပေးသွားမည်ဖြစ်ကြောင်း ဖေဖော်ဝါရီ ၂၂ ရက်တွင် မြန်မာနိုင်ငံဆိုင်ရာ ဂျပန်သံရုံးက အသိပေးကြေညာထားသည်။
ဗီဇာလျှောက်ထားရန်အတွက် ကြိုတင်ဘိုကင်ယူရန် အွန်လိုင်း ဘိုကင်စနစ်အား ဝင်ရောက်မရသည့် အခြေအနေဖြစ်ပေါ်နေသောကြောင့် အီးမေးလ်မှတစ်ဆင့် ယာယီလက်ခံဆောင်ရွက်ပေး သွားမည်ဖြစ်ကြောင်း ထုတ်ပြန်ချက်တွင် ထည့်သွင်းဖော်ပြထားသည်။
ဗီဇာလျှောက်ထားလိုသူများအနေဖြင့် အမည်၊ ဖုန်းနံပါတ်၊ မြန်မာ နိုင်ငံမှ ထွက်ခွာမည့်ရက်စွဲ၊ ကာလရှည်နေထိုင်ခွင့်လက်မှတ်၊ Certifi-cate of Eligibility ရှိ၊ မရှိစသည့် အချက်အလက်တို့ကို အီးမေးလ်မှတစ်ဆင့် ထည့်သွင်းဖော်ပြလျှောက်ထားရမည်ဖြစ်ကြောင်း သိရသည်။
ကြိုတင်ဘိုကင်အနေဖြင့် တစ်ဦးလျှင် အီးမေးလ်တစ်ကြိမ်သာ ပေးပို့လျှောက်ထားနိုင်ပြီး အီးမေးလ်ပေးပို့သည့်ရက်မှ စတင်ကာ အချိန်တစ်ပတ်အတွင်း သံရုံးမှ အကြောင်းကြားမည်ဖြစ်ကြောင်း သိရသည်။
