#ယနေ့ထုတ်သတင်းစာ_နိုင်ငံတကာသတင်း
⬛အက်ဖ်-၃၅ တိုက်လေယာဉ် ၁၅ စင်း ဂျာမနီ ထပ်မံဝယ်ယူမည်
မေရိကန် ပြည်ထောင်စုအခြေစိုက် လော့ဟိခ်မာတင်လေယာဉ် ထုတ်လုပ်ရေးကုမ္ပဏီမှအက်ဖ်-၃၅ အမျိုးအစား တိုက်လေယာဉ် ၁၅ စင်း ထပ်မံဝယ်ယူရန်ဂျာမနီကာကွယ်ရေးဝန်ကြီး ဘောရစ်ပစ္စတိုရီးယပ်စ်က ရည်ရွယ်ထားကြောင်း အောက်တိုဘာ၂၀ ရက်သတင်းများတွင် ရေးသားတင်ပြထားသည်။
အက်ဖ်-၃၅ တိုက်လေယာဉ်၁၅ စင်း ထပ်မံဝယ်ယူရန် ဂျာမနီကာကွယ်ရေးဝန်ကြီးဌာနက ရည်ရွယ်ထားမှု ကို ဂျာမနီလွှတ်တော် သတင်းအရင်းအမြစ်များက မီဒီယာများသို့အတည်ပြုပြောကြားထားသည်။
လွှတ်တော် ဘတ်ဂျက်ကော်မတီ၏ မှတ်တမ်းမှတ်ရာများအရအထက်ပါ အက်ဖ်-၃၅ တိုက်လေယာဉ် ၁၅စင်း၏ စုစုပေါင်းတန်ဖိုးမှာအမေရိကန်ဒေါ်လာ ၂ ဒသမ ၉ ဘီလီယံအထိရှိနိုင်ကြောင်း လွှတ်တော် သတင်းအရင်းအမြစ်များက ထုတ်ဖော်ပြောကြားထားသည်။
ဂျာမနီနိုင်ငံသည် သက်တမ်းအိုမင်းနေပြီဖြစ်သော တော်နာဒိုးအမျိုးအစား တိုက်လေယာဉ် ၈၅ စင်းနေရာတွင် အစားထိုး အသုံးပြုရေးအတွက် အက်ဖ်-၃၅ တိုက်လေယာဉ်၃၅ စင်း မှာယူထားပြီး ဖြစ်သည်။
အထက်ပါ မှာယူပြီး လေယာဉ်များအပြင် ၁၅စင်းထပ်မံမှာယူသည့်အစီအစဉ်ရှိသည်ဆိုသော သတင်းများကို ဂျာမနီအစိုးရက ယခင်ကငြင်းပယ်ထားသည်။
အက်ဖ်-၃၅တိုက်လေယာဉ်၁၅ စင်း ထပ်မံဝယ်ယူမည့် ဂျာမနီအစိုးရ၏ အစီအစဉ်ကြောင့် ဂျာမနီနှင့် ပြင်သစ်တို့အကြား တင်းမာမှုများထပ်မံ ပေါ်ပေါက်လာနိုင်သည်။
ပြင်သစ်နှင့် ဂျာမနီတို့သည်ပြင်သစ်၌ တိုက်လေယာဉ်ပုံစံသစ်တစ်မျိုး နှစ်နိုင်ငံ ပူးတွဲထုတ်လုပ်ရေး အတွက် ကြိုးပမ်းရာတွင် သဘောထားအမြင် ကွဲပြားမှုများနှင့် ရင်ဆိုင်နေရသည်။
ကိုးကား- ရိုက်တာ

◾️ရွှေပြည်သာရှိခေါက်ဆွဲစက်ရုံမီးလောင်၊ အမျိုးသားတစ်ဦးသေဆုံး
ရန်ကုန်တိုင်း၊ ရွှေပြည်သာမြို့နယ်၊ စက်မှုဇုန် (၁)၊ ကနောင်မင်းသားကြီး(၂) လမ်းရှိခေါက်ဆွဲစက်ရုံ၌ ယမန်နေ့(အောက်တိုဘာ ၂၀ ရက်) ညသန်းခေါင် ၁၂ နာရီခန့်ကမီးလောင်မှုဖြစ်ပွားခဲ့ပြီး အမျိုးသားတစ်ဦးသေဆုံးကြောင်း ရွှေပြည်သာမြို့နယ်လူမှုကူညီရေးအသင်းထံမှသိရသည်။
သေဆုံသူမှာ အသက်(၇၈) နှစ်အရွယ်ရှိ ဦးမောင်မောင်ဆိုသူဖြစ်ကြောင်း အဆိုပါအသင်းမှတာဝန်ရှိသူတစ်ဦးကပြောသည်။
“ဒယ်နီအိုးထဲဟင်းထည့်နွှေးနေရင်းအိပ်ပျော်သွားတာ။ အိုးအပူလွန်ကဲပြီး မီးလောင်တာပါ။ သေဆုံးသူကမီးလောင်တာမသိဘဲ အိပ်ပျော်နေလို့မီးလောင်သေဆုံးတာပါ” ဟု ၎င်းကပြောသည်။
ယင်းမီးလောင်မှုမှာ ၁၀ မိနစ်ခန့်လောင်ကျွမ်းခဲ့ပြီး ရွှေပြည်သာမြို့နယ်မီးသတ်စခန်းမှ Level 1 အဆင့် ထွက်ခွာငြှိမ်းသတ်ခဲ့ကြောင်းသိရသည်။
ထို့ပြင် လှိုင်သာယာမြို့နယ်၊ ရွှေလင်ဗန်းစက်မှုဇုန်၊ ပိတောက်လမ်းရှိဖွဲစက်ရုံတွင်လည်း ယနေ့ (အောက်တိုဘာ ၂၁ ရက်) နံနက် ၂ နာရီ ၅၀ မိနစ်ခန့်က Level 1 အဆင့်မီးလောင်မှုဖြစ်ပွားခဲ့ပြီး လူထိခိုက်မှုမရှိကြောင်းသိရသည်။
သတင်း - ပိုင်လေး
ဓာတ်ပုံ - MFSD
#ပြည်တွင်းသတင်း

#ယနေ့ထုတ်သတင်းစာ_ပြည်တွင်းသတင်း
⬛ဧရာ၀တီတိုင်းတွင် ကြိုးကြာခေါင်းနီငှက်သိုက် ၆၀ ကျော် တွေ့ရ
ဧရာ၀တီတိုင်း ဒေသကြီး အတွင်းရှိ မြို့နယ်ခြောက်ခုတွင် ကြိုးကြာခေါင်းနီငှက်သိုက် ၆၀ ကျော် တွေ့ရှိမှတ်တမ်းတင်နိုင်ခဲ့ကြောင်း သိရသည်။
၂၀၁၅ ခုနှစ်မှစတင်၍ ကြိုး ကြာခေါင်းနီငှက်များ၏ ကောင်ရေ သားပေါက်မှု အခြေအနေ နေထိုင် ကျက်စားရာနေရာများကို ဒေသခံ ပြည်သူလူထုနှင့် သက်ဆိုင်ရာ အဖွဲ့ အစည်းများက ကွင်းဆင်း လေ့လာရေးလုပ်ငန်းနှငထိန်းသိမ်းရေးလုပ်ငန်းများကို နှစ်စဉ်လုပ်ဆောင်နေခြင်းဖြစ်ရာ ကြိုးကြာခေါင်းနီ ငှက်သားပေါက်ရာသီဖြစ်သည့် ဇူလိုင်လအတွင်းက လက်ရှိ အောက်တိုဘာလ ဆန်းပိုင်းအထိ ကြိုးကြာ ခေါင်းနီငှက်သိုက် ၆၀ ကျော်ကို တွေ့ရှိမှတ်တမ်းတင်နိုင် ခဲ့ခြင်းဖြစ်ကြောင်း သိရသည်။
အဆိုပါ ကြိုးကြာခေါင်းနီ ငှက်သိုက် ၆၀ ကျော်ကို မအူပင်၊ ပန်းတ နော်၊ အိမ်မဲ၊ ကျိုက်လတ်၊ မော်လမြိုင် ကျွန်းနှင့် ဝါးခယ်မမြို့နယ်တို့ ၌ တွေ့ရှိမှတ်တမ်း တင်နိုင်ခဲ့ခြင်းဖြစ်ကြောင်း သိရသည်။
ကြိုးကြာခေါင်းနီ ငှက်များသည် ဌာနေငှက်မျိုးစိတ်ဖြစ်ပြီး ဧရာ၀တီ၊ စစ်ကိုင်း၊ ပဲခူးတိုင်းဒေသကြီး၊ ကချင်၊ ရှမ်းနှင့် ရခိုင်ပြည်နယ်တို့တွင် တွေ့ရှိရပြီး အထူးသဖြင့် ဧရာ၀တီတိုင်းဒေသကြီးအတွင်းရှိ သဘာ၀ ရေဝပ်ဧရိယာများနှင့် ရေနက်ကွင်းစပါးစိုက်ခင်းများတွင် အများဆုံးတွေ့ရှိရကြောင်း သိရသည်။
ကြိုးကြာခေါင်းနီငှက်သည် ကမ္ဘာ့ပတ်ဝန်းကျင်ထိန်းသိမ်းရေး အဖွဲ့၏ Red List အရ မျိုးသုဉ်းရန် အန္တရာယ်ကျရောက်နိုင်သည့် မျိုးစိတ်ဖြစ်ကြောင်း သိရသည်။
ဓာတ်ပုံ- Myanmar Crane Conservation Group

#ယနေ့ထုတ်သတင်းစာ_နိုင်ငံတကာသတင်း
⬛အမေရိကန်နှင့် ဩစတြေးလျတို့ မြေရှားသတ္တုဆိုင်ရာ သဘောတူညီချက်လက်မှတ်ထိုး
မြေရှားသတ္တုနှင့် အရေးပါ သော တွင်းထွက်များ ထုတ်လုပ် ထောက်ပံ့ရေးအတွက် သဘောတူညီချက် တစ်ရပ်ကို အမေရိကန်နှင့် ဩစတြေးလျတို့က အောက်တိုဘာ ၂၀ ရက်တွင် လက်မှတ်ရေးထိုးလိုက်သည်။
ယင်းမှ မြေရှားသတ္တုတင်ပို့မှုကို ကန့်သတ်မှုများ ချမှတ်ထားသည့် တရုတ်နိုင်ငံ၏ ဈေးကွက်လွှမ်းမိုးမှုကို တန်ပြန်ရန် ကြိုးပမ်းမှုအဖြစ် ရှုမြင်ရပြီး ဒေါ်နယ်ထရန့်နှင့် ဩစတြေးလျ ဝန်ကြီးချုပ် အယ်ဘာနီစီတို့က အိမ်ဖြူ တော်တွင် လက်မှတ်ရေးထိုးခဲ့ကြ သည်။
သဘောတူညီချက်အရ အမေ ရိကန်နှင့် ဩစတြေးလျတို့သည် ခြောက်လအတွင်း စီမံကိန်းအတွက် ဒေါ်လာ တစ်ဘီလီယံ စတင်အသုံးပြု သွားမည်ဖြစ်ပြီး မြေရှားသတ္တုနှင့် အခြား အရေးပါသော ဓာတ်သတ္တု များ တူးဖော်ခြင်း၊ ပြုပြင်ခြင်းများ အတွက် အမေရိကန်က ဒေါ်လာ ၈ ဒသမ ၅ ဘီလီယံ အထိ ရင်းနှီးမြှုပ်နှံမည်ဖြစ်သည်။
သဘော တူညီချက်တွင် ဩစတြေးလျ၊ အမေရိကန်နှင့် ဂျပန်တို့ ပူးပေါင်းပြီး တစ်ပိုင်းလျှပ်ကူးပစ္စည်း ထုတ်လုပ်ရာတွင်အသုံးပြုသည့် ဂယ်လီယမ်ကို ပူးတွဲထုတ်လုပ်မည့် စီမံကိန်းတစ်ခုလည်း ပါဝင်ကြောင်း ဩစတြေးလျဝန်ကြီးချုပ်က ပြောသည်။
ဩစတြေးလျသည် မြေရှား သတ္တုထုတ်လုပ်သည့် အဓိကနိုင်ငံ တစ်နိုင်ငံဖြစ်ပြီး လက်ရှိသဘောတူညီ ချက်အရ တည်ငြိမ်သည့် ထောက်ပံ့ ရေးကွင်းဆက်ကို ထူထောင်ရန်နှင့် တရုတ်နိုင်ငံအပေါ် မှီခိုအားထား မှုမှ ရုန်းထွက်ရန် အမေရိကန်က ကြိုးပမ်း နေပုံရသည်။
ကိုးကား-အင်န်အိတ်ခ်ျကေ

ယနေ့ ရန်ကုန်အခြေစိုက် စက်သုံး‌ဆီဈေး။
October 22,2025

#နိုင်ငံခြားငွေလဲလှယ်နှုန်း
-မြန်မာနိုင်ငံတော်ဗဟိုဘဏ် ရည်ညွှန်းငွေလဲနှုန်း
အမေရိကန် တဒေါ်လာ - ၃၅၉၉ ကျပ်
ပြင်ပပေါက်စျေး
-အမေရိကန်ဒေါ်လာ‌
ရောင်းဈေး - ၄၀၇၀ ကျပ်
ဝယ်ဈေး - ၃၉၇၀ ကျပ်
-စင်္ကာပူဒေါ်လာ
ရောင်းဈေး - ၃၁၃၅ ကျပ်
ဝယ်ဈေး - ၃၀၆၀ ကျပ်
-ယူရို
ရောင်းဈေး - ၄၇၂၀ ကျပ်
ဝယ်ဈေး - ၄၆၀၅ ကျပ်
-ထိုင်းဘတ်
ရောင်းဈေး - ၁၂၄.၂၂ ကျပ်
ဝယ်ဈေး - ၁၂၁.၂၁ ကျပ်
-မလေးရှားရင်းဂစ်
ရောင်းဈေး - ၉၆၂ ကျပ်
ဝယ်ဈေး - ၉၃၈ ကျပ်
-တရုတ်ယွမ်
ရောင်းဈေး - ၅၇၁ ကျပ်
ဝယ်ဈေး - ၅၅၇ ကျပ်
-ဂျပန်ယန်း
ရောင်းဈေး - ၂၆.၈၃ ကျပ်
ဝယ်ဈေး - ၂၆.၁၈ ကျပ်
-အိန္ဒိယရူပီး
ရောင်းဈေး - ၄၆.၂၅ ကျပ်
ဝယ်ဈေး - ၄၅.၁၃ ကျပ်
-ကိုရီးယားဝမ်
ရောင်းဈေး - ၂.၈၄ ကျပ်
ဝယ်ဈေး - ၂.၇၇ ကျပ်
-စတာလင်ပေါင်
ရောင်းဈေး - ၅၄၄၀ ကျပ်
ဝယ်ဈေး - ၅၃၀၅ ကျပ်
-ဩစတြေးလျဒေါ်လာ
ရောင်းဈေး - ၂၆၄၁ ကျပ်
ဝယ်ဈေး - ၂၅၇၇ ကျပ်
-ကနေဒါဒေါ်လာ
ရောင်းဈေး - ၂၉၀၀ ကျပ်
ဝယ်ဈေး - ၂၈၃၀ ကျပ်
-ဟောင်ကောင်ဒေါ်လာ
ရောင်းဈေး - ၅၂၄ ကျပ်
ဝယ်ဈေး - ၅၁၁ ကျပ်
-ယူအေအီး
ရောင်းဈေး - ၁၁၀၈ ကျပ်
ဝယ်ဈေး - ၁၀၈၀ ကျပ်
ငွေလဲနှုန်းများ အချိန်နှင့်အမျှ ပြောင်းလဲနိုင်သည်။
***သတ်မှတ်ဈေးအတိုင်း အရောင်းအဝယ်မလုပ်ပါက အရေးယူခံရနိုင်သည်။

#ရွှေဈေး
-ကမ္ဘာ့ရွှေဈေး
တအောင်စ ၄၁၀၈ ဒေါ်လာ
ရန်ကုန်တိုင်းရွှေလုပ်ငန်းရှင်များအသင်း (YGEA) ရဲ့ရွှေစျေးကွက် အဖွင့်ဈေးနှုန်း
- အကယ်ဒမီ မီးလင်းရွှေ တကျပ်သား
၅၉၉၀၀၀၀ ကျပ်
ပြင်ပ အရောင်းအဝယ်ဖြစ်တဲ့ ရွှေဈေးနှုန်း
* စနစ်ဟောင်း
(၁ိ - ၁၆.၆၀၆ ဂရမ် = ၁၂၈ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၅၄၀၀၀၀ ကျပ်
ဝယ်ဈေး ၈၅၀၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၁၄၀၀၀၀ ကျပ်
ဝယ်ဈေး ၈၁၀၀၀၀၀ ကျပ်
* စနစ်သစ်
(၁ိ - ၁၆.၃၂၉၃၂၅ ဂရမ် = ၁၂၀ ရွေး)
-အခေါက်ရွှေ တကျပ်သား (ပြင်ပဈေးကွက်)
ရောင်းဈေး ၈၄၂၀၀၀၀ ကျပ်
ဝယ်ဈေး ၈၃၈၀၀၀၀ ကျပ်
-၁၅ ပဲရည် တကျပ်သား
ရောင်းဈေး ၈၀၂၀၀၀၀ ကျပ်
ဝယ်ဈေး ၇၉၈၀၀၀၀ ကျပ်
“လက်ရှိ ရွှေဈေးကွက်အတွင်း ဈေးနှုန်းအတက်အကျ မငြိမ်သေးတဲ့အတွက် ရောင်းမှား၊ ဝယ်မှား မဖြစ်ဖို့ သတိပြုစေလိုပါတယ်။”
(ရွှေဈေးနှုန်းများ အချိန်နှင့်အမျှ ပြောင်းလဲနိုင်သည်။)

ငှက်ပျောစိုက်ပျိုးနည်း 🍌🍌
🔰 ရေမြေရာသီဥတု
- မြေဆီဩဇာ၊ အာဟာရပြည့်စုံသောနုန်းမြေသည် အကောင်းဆုံး ဖြစ်သည်။ ရွံ့စေးမြေ၊ သဲမြေ၊ ထုံးပေါက်မြေ၊ ဆားပေါက်မြေများတွင် ငှက်ပျောပင် ကောင်းမွန်စွာမဖြစ်ထွန်းနိုင်ပါ။ မြေချဉ်ငံဓါတ် ၆-၇.၅ အတွင်းရှိအောင် ပြုပြင်စိုက်ပျိုး၍ နွားချေး၊ ကြက်ချေး၊ သစ်ရွက်ဆွေးများကို အသုံးပြုခြင်းဖြင့် မြေဆီလွှာအာဟာရဓါတ်ကို မြှင့်တင်နိုင်သည်။
- အပင်သက်တမ်းပထမသုံးလေးလသည် ထွက်ရှိလာမည့် ငှက်ပျောခိုင်၏အလေးချိန်၊ တစ်ခိုင်တွင်ပါရှိမည့် ငှက်ပျောဖီးအရေအတွက်၊ တစ်ဖီးတွင် ပါရှိမည့် ငှက်ပျောသီးအရေအတွက်ကို ဆုံးဖြတ်ပေးသော ကာလဖြစ်သဖြင့် အဓိက အာဟာရဓာတ်များ၊ အစိုဓာတ်များကောင်းစွာရရှိရန် အရေးကြီးသည်။
- ငှက်ပျောပင်သည် ရေကြိုက်သော်လည်း ရေဝပ်ခြင်းသည်အပင်အတွက်မကောင်းသောကြောင့် အပင်ခြေရင်းတွင် ရေမဝပ်စေရန် ရေနုတ်မြောင်းများ စနစ်တကျ ပြုလုပ်ပေးရမည်။
🔰 စိုက်ပျိုးခြင်း
ထယ်နက်နက်ထိုးပြီးထွန်မွှေကာမြေညှိပါ။ သားတက်ဖြင့် သို့မဟုတ် အပင်တစ်သျှူးမျိုးပွားနည်းဖြင့် မျိုးပွား၍စိုက်ပျိုးကြသည်။ သားတက်တွင်လှံစို့သားတက်နှင့်ရေစို့သားတက်ဟူ၍ရှိပြီး လှံစို့သားတက်သည် ပင်ခြေပိုင်းတွင်ကောင်းစွာကြီးထွားဖွံ့ဖြိုး၍ အစောပိုင်းကာလတွင် အရွက်မှာ လှံသွားပုံသေးရှည်သော ရွက်ပြားပါရှိသည်။ ရေစို့သားတက်မှာရွက်ပြားကြီးသည်။ လှံစို့သားတက်သည်(၁၁)လနှင့်အခိုင်ကျပြီး ရေစို့သားတက်မှာ (၁၅)လကြာမှသာအခိုင်ကျသည်။ ရွေးချယ်ထားသောသားတက်၏အမြစ်များနှင့် အသားပိုများအားပြောင်စင်အောင်ဖယ်ရှားပါ။ ကျင်းအနက်၊ အကျယ် ၂ ပေ ပတ်လည်ရှိသော ကျင်းများတူး၍ နွားချေး၊ သဘာဝမြေဩဇာနှင့် ရေသင့်တင့်အောင်ထည့်၍ သမအောင်မွှေပြီး တစ်ပတ်ခန့်မြေနှပ်ထားပါ။ အပင်ပုမျိုးစိုက်မည်ဆိုပါက တစ်ကျင်းနှင့် တစ်ကျင်းအကွာအဝေး ၅-၆ ပေခြား၊ အပင်ကြီးမျိုးအတွက် ၇-၁၀ ပေခြားစိုက်ပါ။
🔰 ကြီးထွားမှုအဆင့်အလိုက် မြေဩဇာကျွေးနည်း
- စိုက်ပျိုးပြီး ၁-၂ လအတွင်း (စတင်ကြီးထွားချိန်)တွင် စိမ်းစိုဩဂဲနစ်မြေသြဇာအနေဖြင့် အမြစ်နှင့် အရွက်များထွက်ရှိရန်နှင့် ဖွံ့ဖြိုးသန်စွမ်းရန် နိုက်ထရိုဂျင်ကို ပိုမိုကျွေးပါ။ 15:15:15+7S Blended ၅၀ ဂရမ်ခန့် ကို ပင်ခြေတစ်ပင်လျှင် ၁-၂ လတစ်ကြိမ် ကျွေးပါ။
- စိုက်ပျိုးပြီး ၃-၆ လအတွင်း (ပန်းပွင့်ချိန်မတိုင်ခင်) ထိ ပန်းအုံ၊ သီးတောင့်နှင့် သီးခိုင်အရွယ်အစား ကောင်းမွန်စေရန်အတွက် ပိုတက်စီယမ်(K)ပါဝင်မှု မြင့်မားသော 17:5:20 မြေသြဇာကို ပင်ခြေတစ်ပင်လျှင် ၅၀-၇၅ ဂရမ် ကို ၁-၂ လတစ်ကြိမ် ကျွေးပါ။
- ပန်းပွင့်ပြီး အသီးသီးချိန်နှင့်အသီးရင့်မှည့်ချိန်တွင် ချိုမြိန်ပြည့်ဖြိုးစေရန် ပိုတက်စီယမ် (K) ကို ၅၀ ဂရမ် ခန့်ဆက်လက်ကျွေးပါ။
- မြေသြဇာကို ပင်စည်မှ အနည်းဆုံး ၆ လက်မ ခန့် ခွာ၍ ရေပေးသွင်းမည့် မြောင်းကလေးတစ်ဝိုက်တွင် ဖြူးချပေးပါ။ မြေသြဇာကျွေးပြီးတိုင်း ရေကို လောင်းပေးရပါမည်။ သို့မှသာ မြေဆီလွှာထဲသို့ အာဟာရများ စုပ်ယူနိုင်မည် ဖြစ်ပြီး မြေဩဇာလောင်ခြင်း (root burn) ကို ကာကွယ်နိုင်မည်။ မြေဆွ၍ မြေသြဇာနှင့် မြေကြီးရောမွှေပေးခြင်းက ပိုမိုကောင်းမွန်ပါသည်။
🔰 အထွက်နှုန်းကောင်းစေရန် သတိပြုရမည့်အချက်များ
- မိုးရာသီတွင် ရေစိမ့်ဆင်းမှုကောင်းရန်နှင့် အပင်ခြေရေမဝပ်စေရန် အပင်ခြေကိုမြေဖို့ပေးပါ။
- ငှက်ပျောပင်သည် ရေအလွန်ကြိုက်သောကြောင့် အစိုဓါတ်အမြဲရနေစေရန် ရေပေးသွင်းခြင်းကို စီစဉ်ဆောင်ရွက်ထားပါ။
- အသီးကြီးထွားရန် ငှက်ပျောဖူး(အဖိုဖူး)အားဖြတ်ပေးပါ။ အသီးအရောင်လှပစေရန် သီးခိုင်ကို အပြာရောင်ပလပ်စတစ်အိတ်ဖြင့် စွပ်ပေးပါ။
- ငှက်ပျောအတွက် အများဆုံးလိုအပ်သောအာဟာရဓာတ်မှာ ပိုတက်ဆီယမ်(K)ဖြစ်ပါသည်။ အစောပိုင်းကာလများတွင် K အနည်းငယ်သာ လိုအပ်ပြီး ငှက်ပျောဖူးမထွက်မှီနှင့် ထွက်ပြီးအချိန်များတွင် အများဆုံးလိုအပ်ပါသည်။
- ငှက်ပျောခင်းအား(၃)နှစ်အထိသာထားပြီး အသစ်ပြန်စိုက်ပါ။
- ပေါင်းမြက်များရှင်းလင်းရာတွင် အမြစ်များထိခိုက်မှုမရှိစေရန် အထူးဂရုပြုဆောင်ရွက်ပါ။
- ငှက်ပျောပင်သည် ရောဂါဒဏ်ကိုခံနိုင်ရည်မရှိသည့်အတွက် တွေ့ရအများဆုံးရောဂါများဖြစ်သော ပနားမားပင်ညှိုးသေရောဂါ၊ ရွက်ပျောက်ရောဂါ၊ ငှက်ပျောထိပ်စုရောဂါများ ကျရောက်ခြင်းရှိ၊ မရှိ အစဉ်အမြဲစောင့်ကြည့်ဂရုစိုက်ပေးပါ။
- အဖူးထွက်ပြီး(၆)လခန့်အကြာ ငှက်ပျောသီးဇောင်းပျောက်ပြီးလုံးဝန်းသောအချိန်တွင်ခုတ်ပါ။ သားတက်သန်မာစေရန်ငှက်ပျောခိုင်ခုတ်ပြီးသောအပင်ကိုအောက်ခြေမှ(၅)ပေချန်ပြီးဖြတ်ပါ။

ရည်းစားနဲ့စကားများပြီး ရွှေဂုံတိုင်တံတားအဆင်း ကားလမ်းမပေါ် လှဲအိပ်ခဲ့တဲ့ ကောင်မလေး ကားကြိတ်ခံရပြီးသေဆုံး
အောက်တိုဘာ ၂၂၊ ၂၀၂၅

ရန်ကုန်တိုင်း ၊ ဗဟန်းမြို့နယ်၊ ကမ္ဘာအေးဘုရားလမ်း၊ ရွှေဂုံတိုင်ဂုံးတံတားအဆင်းမှာ ကားလမ်းမပေါ် လှဲချပြီး ကိုယ့်ကိုယ်ကို သေကြောင်းကြံတဲ့ အမျိုးသမီးတယောက် ကားတက်ကြိတ်ခံရပြီး သေဆုံးမှု အောက်တိုဘာ ၂၁ ရက်နေ့ ညပိုင်းက ဖြစ်ပွားခဲ့တယ်လို့ သိရပါတယ်။
ဖြစ်စဥ်ကို မျက်မြင်ကြုံတွေ့ခဲ့ရသူက
"ကိုယ့်ရှေ့တင်ဖြစ်သွားတာပါ။ နှစ်ယောက်သား ခရီးကပြန်လာပုံ ရတယ်။ ကားရပ်ပြီး ရန်တွေဖြစ် နေကြတာ။ နောက်ဆုံး ကောင်လေးက ကောင်မလေးကို သူ့အိတ်တွေနဲ့ထားခဲ့ပြီး ကား မောင်းထွက်သွားတော့ ကောင်မလေးက စိတ်ထိခိုက်သွားပုံရတယ်။ တံတားအဆင်း လမ်းမအလယ်မှာ လှဲချလိုက်တာမှာ တံတားပေါ်ကအရှိန်နဲ့ဆင်းလာတဲ့ကားက တက်ကြိတ်သွား တာ။ ဘေးကလူတွေအော်ဟစ်ပြီး သွားဆွဲဖို့လုပ်ကြပါသေးတယ်၊ ရုံးဆင်းချိန် ကားတွေအရမ်းဖြတ်နေတာရော ခဏလေးအတွင်းဖြစ်သွားတာ ကြောင့်ရော မမှီလိုက်ဘူး။" လို့ ပြောပါတယ် ။
ကားတက်ကြိတ်ခံရပြီး သေဆုံးသွားတဲ့ ကောင်မလေးက အသက် ၂၃ နှစ်အရွယ် မ---ဆိုသူဖြစ်ပြီး မင်္ဂလာဒုံမြို့နယ် ၊ စွယ်တော်အိမ်ရာမှာနေထိုင်သူဖြစ်ကြောင်း၊ မိသားစုနဲ့အဆက်အသွယ်ရရှိခဲ့တယ်လို့လည်းသိရပါတယ်။
" ကားကြိတ်ခံရတဲ့အနားမှာ သူရဲ့ ခရီးဆောင်အိတ်တွေလည်းတွေ့တယ်။ ကောင်မလေးက ကလောကနေ ပြန်ရောက်လာလာချင်းအိမ်တောင်မရောက်လောက်သေးဘူးထင်တယ်။ ကလောကပြန်လာတဲ့အဝတ်အစားနဲ့ပဲဆိုတော့လေ။သူ့အကောင့်မှာလည်းတင်ထားတယ်။ ရည်းစားအတွက်နဲ့များ ကိုယ့်အသက်ကို စတေးရတယ်လို့ အတွေးတွေမှားသွားတာပေါ့။ခုမှအသက်ငယ်ငယ်လေးကို မိဘတွေရင်ကျိုးပြီလေ။ကလေးမလေးက ဖြူဖြူချောချောလေး။ကားကတက်ကြိတ်တာပေါင်ရိုးဖြတ်ကျိုးတယ်သိရတယ်။" လို့ ဖြစ်စဥ်သိရှိသူ တယောက်ကပြောပါတယ်။
မလင်းပြည့်အိမ်ရဲ့ ရုပ်အလောင်းကိုတော့ ရန်ကုန်ဆေးရုံကြီးကို ပို့ဆောင်ထားကြောင်း ၊ ကားကတော့ လူကို ဝင်တိုက်ပြီး မောင်းပြေးသွားတာကြောင့် ဖမ်းဆီးရမိခြင်းမရှိသေးဘူးလို့သိရပါတယ်။
အောက်တိုဘာ ၂၁ ရက်နေ့ မနက်အစောပိုင်းကလည်း ဆိုင်သိမ်းပြန်လာတဲ့ကားက တောင်ဥက္ကလာမြို့နယ်၊ ဝေဇယန္တာလမ်းမပေါ် နဲ့ ၉ ရပ်ကွက် ၊ ကျော်သူ ၂၅ လမ်းထိပ်အရောက်မှာ ဓာတ်တိုက်ဝင်တိုက်မိပြီး ကားပေါ်ပါသူ ၁၅ ယောက်ထိခိုက်ဒဏ်ရာရရှိခဲ့ တယ်လို့သိရပါတယ်။
အလားတူ အဲဒီနေ့ မနက်ပိုင်းကပဲ အင်းစိန်မြို့နယ်၊ ရွှေပြည်သာစက်မှုဇုန်(၃)၊ ဦးရွှေဘင်လမ်းနှင့် ဦးရွှေအိုးလမ်းထောင့်မှာလည်း ယာဉ်တိုက်မှုဖြစ်ပြီးအမျိုးသားတ​ယောက် ထိခိုက်ဒဏ်ရာရရှိခဲ့တယ်လို့သိရပါတယ်။
အောက်တိုဘာ ၁၈ ရက်နေ့မနက်ပိုင်းကလည်း
ကျောက်တံတားမြို့နယ်၊ အနော်ရထာလမ်းမမှာ ယာဥ်သုံးစီးဆင့်တိုက် မှုဖြစ်ပွားခဲ့တယ်လို့သိရပါတယ်။
အောက်တိုဘာ ၁၆ ရက်ကလည်း ရန်ကုန်၊ ပြည်လမ်းမပေါ်မှာ ယာဉ် ၅ စီး ဆင့်တိုက်မှုဖြစ်ပွါးခဲ့တယ်လို့သိရပါတယ်။
ဓာတ်ပုံ - မေတ္တာအလင်း
credit

🌻 မခွဲချင်လည်း ခွဲကြရမယ် 🌻
လောကမှာ ဘယ်သူမှ ကိုယ်ချစ်ရတဲ့သူတွေကိုယ်ပိုင်ဆိုင်ထားတဲ့အရာတွေနဲ့ မခွဲချင်ကြဘူး ။ မခွဲခွါချင်ပါဘူးလို့ ငိုယိုပြီး ဆုတောင်းနေလည်း ဆုတောင်းပြည့်မှာ မဟုတ်ဘူး။
ဘာကြောင့်လဲဆိုရင် မွေးဖွားပြီးရင် သေဆုံးရတယ် ။ ဖြစ်ပြီးရင် ပျက်ရတာ ထုံးစံဖြစ်နေတော့ လောကနိယာမတရားကို ဘယ်သူမှ လွန်ဆန်လို့ မရနိုင်လို့ပါ ။
လွန်ဆန်လို့မရတဲ့ လောကကြီးမှာ နေရတာဖြစ်တဲ့အတွက်ကြောင့် အချိန်ကျလာရင် ကိုယ်ချစ်ရတဲ့သူတွေကို မခွဲချင်လည်း ခွဲကြရမယ်။ ကိုယ့်ပိုင်ဆိုင်မှုတွေကိုလည်း မထားချင်လည်း ထားခဲ့ကြရမယ်။ ဘယ်သူမှ ခေါ်ဆောင် ဘယ်အရာကိုမှယူဆောင်သွားလို့မရနိုင်ပါဘူး ။
ဒါကြောင့် ကိုယ်ချစ်ရတဲ့သူတွေနဲ့ ကိုယ်ပိုင်ဆိုင်မှုတွေနဲ့ မခွဲခွါချင်လည်း ခွဲကြရမှာသိနေပြီးဖြစ်တဲ့အတွက်အကြောင့် ဆုံဆည်းခွင့်ရတုန်း ကိုယ်ချစ်ရတဲ့သူတွေနဲ့ မခွဲခွါခင်လေးမှာ အေးအေးချမ်းချမ်း ပျော်ပျော်ရွှင်ရွှင် မေတ္တာတရားတွေနဲ့ နေထိုင်ပြီးတော့ ကိုယ်ပိုင်ဆိုင်မှုတွေကို အများအတွက်အကျိုးရှိရှိ အသုံးပြုပြီးသေရင်ကိုယ့်နောက်ပါမယ့် ကုသိုလ်လေးတွေကို များများပြုနိုင်ကြပါစေ .....။ 🌻