ကျွန်းဝယ်ပြီး နည်းပညာနိုင်ငံထောင်မယ့် အိန္ဒိယ-အမေရိကန်သူဌေး

Coinbase ရဲ့ ပထမဆုံး CTO ဖြစ်ခဲ့တဲ့ အိန္ဒိယဖွား investor တစ်ယောက်တော့ စင်ကာပူနားမှာ ကျွန်းဝယ်ပြီး နိုင်ငံထောင်ဖို့ လုပ်နေပါတယ်။

စတန်းဖို့ဒ်ကျောင်းဆင်း ဘယ်လာဂျီ သျှရီနီဗန်ဆန်က ကိုယ်တိုင်နည်းပညာကုမ္ပဏီတွေ Bitcoin mining လုပ်ငန်းတွေ တည်ထောင်ခဲ့သလို နည်းပညာ startup တွေမှာလည်း ရင်းနှီးမြှုပ်နှံနေတဲ့သူပါ။ သူ့အိုင်ဒီယာတစ်ခုက နည်းပညာလုပ်ငန်းရှင်တွေ ၊ စွန့်ဦးတီထွင်သူတွေနဲ့ ပညာရှင်တွေအတွက် နိုင်ငံတစ်ခု ထောင်ဖို့ပါ။

အသက် ၄၅ နှစ်အရွယ် ဘယ်လာဂျီက ဒီအိုင်ဒီယာကို သူရေးတဲ့ The Network State ဆိုတဲ့ စာအုပ်မှာ ပြောဖူးပါတယ်။ The Network State ဆိုတာ ဗဟိုထိန်းချုပ်မှုမရှိတဲ့ ဒီဂျစ်တယ်ဦးစားပေးနိုင်ငံပါ။ အွန်လိုင်း အသိုင်းအဝိုင်းတစ်ခု အဖြစ်ကနေ ကိုယ်ပိုင်မြေဝယ်ပြီး နိုင်ငံထူထောင်ဖို့ဆိုတဲ့ အယူအဆ ဖြစ်ပါတယ်။

ဘယ်လာဂျီက သူ့အယူအဆကို လူတွေလက်ခံအောင် ဟောပြောဖြန့်ဝေဖို့ စင်ကာပူနားက ပုဂ္ဂလိကကျွန်းတစ်ကျွန်းပေါ်မှာ ကျောင်းတစ်ကျောင်းထောင်ထားပါတယ်။ ဒီကျောင်းက Network School လို့ ခေါ်ပြီး ဘယ်လာဂျီရဲ့ ဒီဂျစ်တယ်နိုင်ငံသစ်အယူအဆတွေကို သုံးလသင်ရိုးနဲ့ သင်ပါတယ်။ Network School ရဲ့ လက်ကိုင်ဆောင်ပုဒ်က "လေ့လာပါ။ ခန္ဓာကိုယ်အတွက် လေ့ကျင့်ပါ။ ပိုက်ဆံရှာပါ။ ပျော်ပျော်နေပါ" ဆိုတာပါ။

အဓိကက AI , Crypto နဲ့ Social Media နည်းပညာတွေ ၊ ရုပ်ပိုင်းဆိုင်ရာကြံ့ခိုင်ဖို့ Gym ကစားရတာတွေ ၊ Startup ထောင်နည်းနဲ့ လက်တွေ့အတွေ့အကြုံယူတဲ့ လုပ်ငန်းခွင်တွေ ပါပါတယ်။ ဘယ်လာဂျီရဲ့ အိုင်ဒီယာက အစဉ်အလာပညာရေးမကြိုက်သူတွေအတွက် ပညာရေးပုံစံသစ် ဖန်တီးဖို့ နဲ့ ရွက်ပုန်းသီးလူတော်တွေ ဖော်ထုတ်ဖို့ ဆိုတာမျိုးတွေ ပါပါတယ်။