ပွဲပြီးသွားတော့မှ “ငါဘာလေးလုပ်လိုက်ရင်၊ ဘယ်လိုပိုကြိုးစားလိုက်ရင် သိပ်ကောင်းမှာပဲ”ဆိုပြီး အားမလိုအားမရနဲ့ နောင်တရနေရတာမျိုး မဖြစ်စေနဲ့ပေါ့ကွာ…
မင်းတို့တွေကို ငါ့ကိုယ်တွေ့အဖြစ်အပျက်လေးတစ်ခု ပြန်ပြောပြဦးမယ်။ 2014 ဘရာဇီးလ်ကမ္ဘာ့ဖလားတုန်းက အားလပ်ရက်တစ်ရက်မှာ မွေးရပ်မြေကို ငါပြန်ခဲ့တယ်။ အိမ်ရောက်တော့ အဖေဟာ နေမကောင်းဖြစ်နေတာကို ငါတွေ့လိုက်ရတာပဲ…
အမှန်အတိုင်းပြောရရင်တော့ အမေ့အမျိုးသားပေါ့ကွာ။ ငါ့အဖေအရင်းတော့မဟုတ်ပါဘူး။ ဒါပေမယ့် သူဟာ အဖေရင်းနဲ့မခြား ငါ့ကိုဂရုစိုက်စောင့်ရှောက်ခဲ့၊ ကျေးဇူးရှိခဲ့တာပါ။ ဒီနေ့ဒီအချိန်မှာ သီယာဂိုဆေးလ်ဗားရယ်လို့ ငါဖြစ်လာခဲ့တာလည်း သူ့ကျေးဇူးတွေကြောင့်ပါပဲ။ အဲ့ဒီတော့ ငါ့အတွက်အဖေပဲပေါ့ကွာ။ အခု သူနေမကောင်းဖြစ်နေတယ်။ အဲ့ဒါကိုမြင်ရတော့ ငါလည်း စိတ်မကောင်းဖြစ်ရတယ်…
ဒါပေမယ့် ငါနည်းနည်းပေါ့ဆသွားခဲ့တယ်။ “ဪ… ဒါ ရိုးရိုးနေမကောင်းဖြစ်တာပဲ။ ပြန်ကောင်းသွားမှာပဲ”လို့ပဲ ငါထင်ခဲ့တယ်။ ကမ္ဘာ့ဖလားလည်းပြီး၊ ခွင့်ရက်လည်းစေ့သွားတော့ ပဲရစ်ကို ငါပြန်ခဲ့တယ်။ PSGနဲ့ ရာသီကြိုထရိန်နင်တွေလုပ်တယ်။ နောက်တော့ ဘောလုံးရာသီသစ်စတင်လာတယ်။ ရာသီအစောပိုင်းပွဲစဉ်တစ်ပွဲအပြီးမှာပဲ ငါ့မိန်းမ ငါ့ဆီဖုန်းဆက်လာခဲ့တာက “အဖေဆုံးပြီ” တဲ့…
အဖေနေမကောင်းတာ၊ ဆေးရုံဆေးခန်းရောက်နေတာ ငါသိတယ်ကွာ။ ဒါပေမယ့် ငါသီးသန့်အချိန်မပေးဖြစ်ခဲ့ဘူး။ သွားမကြည့်ဖြစ်ခဲ့ဘူး။ ဘာဖြစ်လို့လဲဆိုတော့ သူပြန်ကောင်းလာမယ်လို့ပဲ ငါထင်ခဲ့တာကိုး…
ပြောချင်တာကကွာ။ အခုလုပ်လို့ရနေတဲ့ကိစ္စကို ဘယ်တော့မှ နေ့ရွှေ့ညရွှေ့မလုပ်ပါနဲ့။ ကိုယ့်ရဲ့ကြိုးစားအားထုတ်မှုကို ဘယ်သောအခါမှ မလျှော့ချလိုက်ပါနဲ့။ ငါတို့ဟာ အချိန်တွေ၊ အခွင့်အရေးတွေ အများကြီးရှိသေးတယ်လို့ ကိုယ့်ကိုယ်ကိုအမြဲထင်ကြတယ်။ ဒါပေမယ့် တချို့အခွင့်အရေးတွေဟာ နောက်တစ်ကြိမ်ဘယ်တော့မှ ပြန်မရတတ်တာမျိုးလည်း ဘဝမှာရှိတတ်တယ်ကွ။ အဲ့ဒါကို သိလိုက်ရတဲ့အချိန်မှာ အရာရာဟာ နောက်ကျသွားတတ်တယ်။ အဲ့ဒီလိုမဖြစ်စေနဲ့ပေါ့ကွာ…
အဲ့ဒီတော့ အားလုံးပဲ လက်ရှိကစားနေရတဲ့ပွဲ၊ လက်ရှိရနေတဲ့ အခွင့်အရေးတွေကို တန်ဖိုးထားကြပါ။ ပျော်ပျော်ရွှင်ရွှင်၊ လွတ်လွတ်လပ်လပ် ကစားကြပါ။ ဒါပေမယ့် ကိုယ့်တာဝန်တော့ကိုယ် အပြည့်အဝယူရလိမ့်မယ်။ အားလုံးပဲ အစွမ်းကုန်ကြိုးစားကြမယ်ဆိုတာ ငါယုံကြည်ပြီးသားပါ။ ဒါပေမယ့် ပွဲသိမ်းခရာမှုတ်ချိန်မှာ ငါတို့ကစားသမား၁၁ယောက်စလုံး ကွင်းထဲမှာရှိနေဖို့လည်း အရေးကြီးတာပဲ။ ကိုယ်တဒင်္ဂစိတ်လွတ်သွားခဲ့လို့ အသင်းဖော်တွေ ၁၀ယောက်ထဲနဲ့ ရုန်းကန်ရတာမျိုးလည်း မဖြစ်စေနဲ့ပေါ့ကွာ။ ငါပြောချင်တာကတော့ အဲ့ဒါပါပဲ…
ငါတို့ကို ဘုရားသခင် စောင့်ရှောက်မှာပါ။ ကဲ… ကွင်းထဲဝင်ကြစို့…
(အင်တာမီလန်နဲ့ပွဲ၊ ကွင်းထဲမဝင်ခင် အသင်းဖော်တွေကို သီယာဂိုဆေးလ်ဗားပြောခဲ့တဲ့စကား) 💙💙