[ရေးသားသူ-အောင်ဓူဝံ]
ဖြစ်ရပ်မှန်ပရဇာတ်လမ်း(၁)

==============

ဧရာဝတီတိုင်း၊မြောင်းမြမြို့ နယ်၌
ဖြစ်ပျက်ခဲ့သည့်အကြောင်းလေးတစ်ခုကို
ကျွန်တော့်ရဲ့စာဖတ်သူများအား
စိတ်အပန်းပြေစေရန် ရည်ရွယ်ပြီး တင်ပြလိုက်ရပါသည်။

ဧရာဝတီတိုင်း၊မြောင်းမြမြို့ နယ်က
ရွာလေးတစ်ရွာ၌ လယ်ကြီးရှင်
ဦးသိုက်ထွန်းနှင့်ဒေါ်ခင်စိုးတို့လင်မယား
ဆိုလျှင်ရွာထဲ၌မသိသူမရှိကြပေ၊
ဦးသိုက်ထွန်းနှင့်ဒေါ်ခင်စိုး(အမည်လွှဲ)
တို့၌ကိုထွန်းခင်ဟုခေါ်သော
တစ်ဦးတည်းသောသားတစ်ယောက်ရှိ
လေသည်။

ကိုထွန်းခင်ကရုပ်ရည်ချောမောသည်
ထို့ကြောင့်ကိုထွန်းခင်မှရွာထဲရှိ
မိန်းမပျိုများအားချည်းကပ်၍ချစ်ခွင့်ပန်လျှင်အားလုံးကခေါင်းညိတ်ကြသည်။
ကိုထွန်းခင်ကမည်သည့်မိန်းကလေးကိုမှ
အတည်လက်ထပ်ယူခြင်းမရှိပဲ
သမီးရည်းစားဘဝ၌ပင်အမျိုးသမီးများအား အပျိုရည်ပျက်စေခဲ့သည်။
အတူနေပြီးသောမိန်းမပျိုများ၌ ကိုယ်ဝန်ရှိသည့်အခါ တောင်းရမ်းမယူပဲ
ကိုထွန်းခင်ကသူ၏မိဘများအားငွေဖြင့်
ဖြေရှင်းစေခဲ့သည်။

လယ်ကြီးရှင် ဦးသိုက်ထွန်းတို့
လင်မယားလည်း သားဖြစ်သူ၏
အရှုပ်ထုပ်များအားနောက်မှလိုက်လံ
ဖြေရှင်းပေးရလေသည်။
ဖခင်ဖြစ်သူဦးသိုက်ထွန်းကတော့
သားဖြစ်သူကိုထွန်းခင်နှင့်
စိတ်ဓာတ်ချင်တခြားစီဖြစ်သည်။
ဦးသိုက်ထွန်းကချမ်းသာသလောက်
အလှူအတန်းပေးကမ်းရက်ရောဖြစ်
သည်။

အရက်သောက်၊ကြက်တိုက်၊မိန်းမကိစ္စရှုပ်သည့် သားဖြစ်သူကြောင့်
မိဘနှစ်ပါးလည်းမျက်နှာပျက်ရပေါင်း
မနည်းတော့ပေ။
ကြံရာမရသည့်အဆုံး သားဖြစ်သူ
ခြေငြိမ်စေရန်အတွက် တခြားရွာမှအမျိုးသမီးတစ်ယောက်နှင့်
သားဖြစ်သူထွန်းခင်အားပေးစားလိုက်ကြသည်။

တစ်ဖက်မှမိန်းကလေးရှင်၏
မိဘများကလည်းကိုထွန်း၏အကြောင်းစုံအားမသိပဲ
ဦးသိုက်စိုးတို့တင်တောင်းသည့်
လယ်ယာမြေများနှင့်ရွှေငွေများအား
မက်မောကာသမီးဖြစ်သူနှင့်သဘောတူလိုက်ကြသည်။

ကိုထွန်းခင်လည်းသူနှင့်လက်ထပ်မည့်
မဝါစင်ဟုဆိုသော
အမျိုးသမီးမှာချောမောလှပသည့်
လူတစ်ယောက်ဖြစ်တာကြောင့်
မိဘများ၏သဘောဆန္ဒကို မလွန်ဆန်ပဲ
ခေါင်းညိတ်ခဲ့လေသည်။

ဤသို့ဖြင့် ကိုထွန်းခင်တစ်ယောက်
မဝါစင်နှင့်အိမ်ထောင်ကျခဲ့လေသည်။
အိမ်ထောင်ကျပြီးတစ်လကျော်သည့်
အထိအရက်မသောက်၊ဖဲမရိုက်
မိန်းမမရှုပ်ပဲခြေငြိမ်ခဲ့သည်။

ခွေးမြှီးကောက်ကျည်တောက်စွပ်
ဆိုသည့်စကားပုံနှင့်အညီကိုထွန်းခင်
တစ်ယောက်အိမ်ထောင်ကျပြီး
နှစ်လခန့်တွင်တော့ အရက်သောက်
ဖဲရိုက်၊မိန်းမကိစ္စပြန်ရှုပ်လာသည်။

သိပ်မကြာခင်မှာပင် မဝါစင်၌
ကိုထွန်းခင်နှင့်ကိုယ်ဝန်ရလာခဲ့သည်။
ထိုအခါမဝင်စင်ကခင်ပွန်းသည်
ကိုထွန်းခင်အားသမီးမိန်းကလေး
မွေးလာပါကဝဋ်လည်မည်ကိုကြောက်၍
မိန်းမမရှုပ်ရန်နားချခဲ့သည်။
ကိုထွန်းခင်လည်းမဝါစင်၏ စကားအား
နားထောင်ခဲ့လေသည်။

မဝါစင်မီးဖွားသည်အထိ
အရက်မသောက်၊ဖဲမရိုက်၊မိန်းမမရှုပ်ပဲ
နေခဲ့လေသည်။

သိပ်မကြာခင်မှာပင်မဝါစင်မီးဖွားခဲ့သည်
ထင်ထားသလိုသမီးမိန်းကလေးမဟုတ်ပဲ
သားယောက်ျားလေးမွေးလာသဖြင့်
ကိုထွန်းခင်လည်းသမီးမဟုတ်တဲ့
အကြောင်းသားယောက်ျားလေးဖြစ်
သည့်အတွက်မည်သည့်ဝဋ်မှလည်မည်
မဟုတ်တဲ့အကြောင်းပြောကာအရင်လို
အရက်သောက်၊ဖဲရိုက်၊မိန်းမပြန်ရှုပ်
ခဲ့လေသည်။

သားလေးမွေးပြီးပါမှ ကိုထွန်းခင်
တစ်ယောက်အရင်ကထက်ပို၍
ဆိုးလာတော့သည်။
မဝါစင်အားကိုယ်ထိလက်ရောက်ပါ
ကျူးလွန်လာခဲ့သည်။
လူရှေ့ သူရှေ့မရှောင်တော့ပဲမဝါစင်အား
ရိုက်နှက်နှိပ်စက်ခဲ့သည်။
ထို့ထက်ပို၍ဆိုးသည်က နောက်မိန်းမအား အိမ်ပေါ်ထိခေါ်တင်လာခြင်းဖြစ်သည်။

ထိုအခါ မဝါစင်နှင့်ကိုထွန်းခင်တို့
စကားများရန်ဖြစ်ကြလေသည်။
မွေးထားသည့်သားလေးပင်အသက်
သုံးနှစ်ကျော်ပြီနောက်မိန်းမအား
အိမ်ပေါ်ခေါ်တင်လာသည့်အတွက်
မဝါစင်လည်းသည်းမခံနိုင်တော့ပဲ
လယ်ထဲဖြန်းမည့်ပိုးသတ်ဆေးများ
သောက်ကာအဆုံးစီရင်သွားတော့သည်။

သားဖြစ်သူနှင့်လိပ်ပြာခွဲသည့်
အခါတွင်လည်းမည်သည့်ကိုမှ
မပေးနိုင်ဟုဆိုလေသည်။
သားဖြစ်သူအသက်လေးနှစ်ကျော်သည့်
အရွယ်သို့ရောက်သည့်အချိန်
ချောင်းနံဘေး၌ဘောလုံးကန်ကာ
ဆော့ကစားရင်းချောင်းထဲသို့
ဘောလုံးကျသွားသဖြင့်လိုက်ကောက်
ရင်းသားဖြစ်သူလည်းရေနစ်သေဆုံးခဲ့
လေသည်။

သားဖြစ်သူသေဆုံးသွားသည့်အခါမှ
ကွယ်လွန်သွားသည့်မဝါစင်လည်း
စတင်ခြောက်လှန့်လေတော့သည်။
ကိုထွန်းခင်နှင့်သူ၏နောက်မယားငယ်အားအိပ်မရအောင် ကုတင်ပေါ်ကဆွဲချခြင်း၊အကောင်အထည်ပြ၍ခြောက်လှန့်ခြင်း
အနံ့ပေး၍ခြောက်လှန့်ခြင်းစသည့်
အမျိုးမျိုးသောခြောက်လှန့်နည်း
မျိုးစုံဖြင့်ခြောက်လှန့်လေသည်။

မည်မျှထိကြောက်အောင်ခြောက်လှန့်
လိုက်သည်မသိပေ။
ကိုထွန်းခင်တစ်ယောက်
သာသနာ့ဘောင်သို့ပင်ဝင်သွားလေသည်
အဘယ့်ကြောင့်ဘုန်းကြီးဝတ်ရသည်ကို
မည်သူ့ကိုမှမပြောခဲ့ပဲဝတ်လာသည်မှာ
အနှစ်၂၀ပင်ကျော်ခဲ့ပြီဖြစ်သည်။

ပိုးသတ်ဆေးသောက်ကာ
အဆုံးစီရင်သွားသည့် မဝါစင်လည်း
ထိုနေ့မှစ၍ခြောက်လှန့်ခြင်းမရှိတော့ပေ
မဝါစင်တစ်ယောက်အစိမ်းသေသရဲဘဝမှကျွတ်လွတ်သွားသလားဆိုသည်
ကိုတော့မည်သူမှမသိကြပေ။

ဖြစ်ရပ်မှန်ဇာတ်လမ်းလေးအား
လာရောက်ပြောပြပါသောညီမအား
ကျေးဇူးအထူးတင်ရှိပါသည်။

#kalyar #ဖြစ်ရပ်မှန် #ပရလောက
Credit...