#ယနေ့ထုတ်သတင်းစာ_နိုင်ငံတကာသတင်း
◼ ရုရှားသို့ မြောက်ကိုရီးယားတပ်ဖွဲ့ဝင်သုံးသောင်းထိ ထပ်မံစေလွှတ်နိုင်
ရုရှားက ယူကရိန်းကိုတိုက်ခိုက်မှုများ ပြုလုပ်နေချိန်တွင် ရုရှားအတွက် တိုက်ပွဲဝင်ရန် မြောက်ကိုရီးယားသည် တပ်ဖွဲ့ဝင် နှစ်သောင်းငါးထောင်မှ သုံးသောင်းအထိ ထပ်မံစေလွှတ်မည်ဖြစ်ကြောင်း ယူကရိန်းတာဝန်ရှိသူများက ဇူလိုင် ၂ ရက်တွင် ပြောသည်။
ဇွန် ၄ ရက်တွင်ရိုက်ကူးထားသော မြောက်ကိုရီးယားလေဆိပ်တစ်ခု၏ ဂြိုဟ်တုဓာတ်ပုံများအရ မြောက်ကိုရီးယားတပ်ဖွဲ့ဝင်များကိုရုရှားသို့ယမန်နှစ်က စေလွှတ်ရာတွင်အသုံးပြုခဲ့သည့် သယ်ယူ ပို့ဆောင်ရေးလေယာဉ်များ၏ လှုပ်ရှားမှုများကိုတွေ့ရကြောင်း စီအင်န်အင်န်သတင်းဌာနက ဖော်ပြထားသည်။
ယူကရိန်းတပ်များသည် ရုရှားနိုင်ငံ ခါ့ချ်ဒေသကို ဝင်ရောက်တိုက်ခိုက်ပြီးနောက်ပိုင်း မြောက်ကိုရီးယားတပ်ဖွဲ့များသည် ရုရှားနှင့်အတူ ယူကရိန်းတပ်များကိုတိုက်ခိုက်ရာတွင် ပူးပေါင်းပါဝင်ခဲ့သည်။
နှစ်နိုင်ငံအကြား စစ်ရေးပူးပေါင်းဆောင်ရွက်မှုသည် ယခင်ကထက်ပိုမိုနက်ရှိုင်းလာခဲ့ပြီး လက်နက်ခဲယမ်းများကိုလည်း မြောက်ကိုရီးယားက ရုရှားသို့ပေးပို့ခဲ့သည်။
မြောက်ကိုရီးယားသည် ရုရှားတွင်တပ်ဖွဲ့ဝင် ၁၅၀၀၀ ချထားခဲ့ကြောင်း တောင်ကိုရီးယားထောက်လှမ်းရေးက ဧပြီလတွင် ပြောသည်။
မြောက်ကိုရီးယား၏ နောက်ထပ် တပ်ဖြန့်မှုနှင့်ပတ်သက်၍ ယူကရိန်းက စိုးရိမ်ဖွယ်ရှိပြီး ရုရှားသိမ်းပိုက်ထားသော ယူကရိန်းနယ်မြေတိုက်ပွဲများတွင် ပါဝင်ရန်အလားအလာများရှိနေကြောင်း စောင့်ကြည့်လေ့လာသူများက သုံးသပ်ပြောဆိုသည်။
အင်န်အိတ်ချ်ကေ
