Nintendo Switch 2 ဂိမ်းစက် ၃၀၀၀ နီးပါး ကားထဲကနေ အခိုးခံရ
အရောင်းသွက်ဆုံး Nintendo ဂိမ်းစက်တွေ ကော်လိုရာဒိုသွား လမ်းပိုင်းတစ်နေရာမှာ အခိုးခံလိုက်ရပါတယ်။
Nintendo အမေရိကန်ရုံးချုပ်ကနေ တက္ကဆက် GameStop စတိုးဆီ ပစ္စည်းပို့ရင်း Love's Truck Stop ဆိုတဲ့ ယာဉ်နားစခန်းတစ်နေရာမှာ ခဏရပ်နားတုန်း အခိုးခံလိုက်ရတာပါ။ ထရပ်ကားပေါ်မှာ ပါတဲ့ ဂိမ်းစက်တွေက Nintendo ရဲ့ နောက်ဆုံးပေါ် Switch 2 console တွေ ဖြစ်ပြီး ဂိမ်းစက်ပေါင်း ၂၈၁၀ ပါသွားခဲ့တာပါ။
Switch 2 တစ်လုံးကို ၄၉၉ ဒေါ်လာတန်ပါတယ်။ ဒေါ်လာ ၁.၄ သန်းဖိုး အခိုးခံလိုက်ရတာလို့ ဆိုနိုင်ပါတယ်။ ကားပြန်ထွက်ဖို့ လုပ်မှ သူ့ကားနောက်ခန်း ဖောက်ထားတာ မြင်ခဲ့တာပါ။
ကားဆရာကတော့ သူ့ကားပေါ် တင်လာတာ Nintendo Switch 2 တွေလို့ မသိဘဲ ကစားစရာအရုပ်တွေလို့ ထင်ခဲ့တာလို့ ဆိုပါတယ်။ အမှုက ဇွန်လ ၈ ရက်နေ့က ဖြစ်ပွားခဲ့ပြီး ဒီလောက်များတဲ့ ဂိမ်းစက်တွေကို စောရတွေက ထရပ်ကားထဲကနေ ဘယ်လို ခိုးထုတ်သွားလဲဆိုတာ မပေါ်ပေါက်သေးဘူးလို့လည်း ဆိုပါတယ်။
အခု ဂိမ်းစက်တစ်ခုချင်းစီမှာ serial နံပါတ်တွေ ပါပါတယ်။ ပျောက်သွားတဲ့ ဂိမ်းစက်တွေ သုံးမရအောင်လည်း Nintendo က အဝေးကနေ ပိတ်ချလို့ရပါတယ်။ စောရအဖွဲ့တွေက အခုလို တန်ဖိုးကြီးဂိမ်းစက်တွေ ခိုးတဲ့ဖြစ်ရပ်က အရင်ကလည်း ရှိဖူးပါတယ်။
၂၀၂၀ တုန်းက ယူကေမှာ Sony ရဲ့ နာမည်ကျော် PlayStation 5 တွေ တင်လာတဲ့ ကုန်ကားကို Fast & Furious ရုပ်ရှင်ဆန်ဆန် ကားနဲ့ လိုက်လုခဲ့တဲ့သတင်းတွေ တက်ခဲ့ပါတယ်။
အခု Switch 2 တွေကလည်း Nintendo ရဲ့သမိုင်းမှာ အရောင်းသွက်ဆုံး ဂိမ်းစက်တွေလို့ ဆိုရမှာပါ။ Global ဝင်ပြီး ၄ ရက်အတွင်းမှာတင် Switch 2 အလုံးရေ ၃.၅ သန်းကျော် ရောင်းချခဲ့ပါတယ်။
ဂိမ်းစက်သစ် ဖြန့်ချိပြီးနောက် ဂျပန်ဂိမ်းကုမ္ပဏီ Nintendo ရဲ့ ရှယ်ယာတန်ဖိုးလည်း ၄၆% ခုန်တက်ထားပါတယ်။