#ပြည်တွင်းသတင်း
◼တောင်ငူ၌ရေမြောင်းပိတ်ဆို့ခြင်းကြောင့် ရေကြီးရေလျှံမှုဖြစ်၊ ပရဟိတအသင်းများက ရေမြောင်းပိတ်ဆို့မှုများရှင်းလင်း
ပဲခူးတိုင်း၊ တောင်ငူမြို့၌ ရေမြောင်းပိတ်ဆို့ခြင်းများကြောင့် ရေကြီးရေလျှံဖြစ်ပွားခြင်းများဖြင့်ကြုံတွေ့ခဲ့ရကြောင်း တောင်ငူမြို့ရှိရွှေမင်းဝံအရေးပေါ်ကယ်ဆယ်ရေးနှင့် လူမှုကူညီရေးပရဟိတအသင်းထံမှ သိရသည်။
ယမန်နေ့(ဇွန် ၂၂ ရက်)နံနက်ပိုင်းတွင် တောင်ငူမြို့၌ မိုးသည်ထန်းစွာရွာသွန်းခြင်းကြောင့် ၂၂ ရပ်ကွက်၊ မင်းကြီးညိုရပ်ကွက်၊ မင်းကြီးညို-ပေါက်လှကြီးလမ်းမများတွင် ရေကြီးရေလျှံခြင်းများဖြစ်ပွားခဲ့ပြီး ဒေသခံတချို့ဘေးလွတ်ရာသို့ ယာယီပြောင်းရွှေခဲ့ကြရကြောင်းသိရသည်။
"အခုရေကြီးတာ မြစ်ရေတိုးလို့မဟုတ်ဘူး။ မိုးများပြီးရေထွက်ပေါက်မရှိလို့ဖြစ်တာ။ မိုးရေကမထွက်ဘဲ ပိတ်ပြီးရေတင်သွားတာ။ ပိတ်နေတဲ့ရေထွက်ပေါက်တွေကို လိုက်လံရှင်းလင်းနေပါတယ်။ အခုတော့ ရေလဲကျသွားပါပြီ။ ကျန်နေတဲ့ရေထွက်ပေါက်တွေကိုလည်းလိုက်ပြီး ရှင်းလင်းပေးနေပါတယ်" ဟု ရွှေမင်းဝံအရေးပေါ်ကယ်ဆယ်ရေးနှင့်လူမှုကူညီရေးပရဟိတအသင်းမှ တာဝန်ရှိသူတစ်ဦးက ပြောသည်။
အဆိုပါရေမြောင်းပိတ်ဆို့မှုများကို ရေစီးရေလာကောင်းမွန်စေရန် တောင်ငူမြို့ရှိ ရွှေမင်းဝံအရေးပေါ် ကယ်ဆယ်ရေးနှင့်လူမှုကူညီရေးပရဟိတအသင်းများက ရှင်းလင်းဆောင်ရွက်နေကြရကြောင်း ၎င်းတို့ထံမှသိရသည်။
သတင်း - ပိုင်လေး
ဓာတ်ပုံ - ရွှေမင်းဝံ
